Dung dibege Pambarbar na Sumurung na nidok ni lali i, didangguri ma tu ginjang, huhut ma didok: "Haru tangke do . hubahen, ale lali, so dihilala, ba lam sambilu bulung tobu ma?!" ninna.
ᯑᯮᯰ ᯑᯪᯅᯩᯎᯩ ᯇᯔ᯲ᯅᯒ᯲ᯅᯒ᯲ ᯉ ᯘᯮᯔᯮᯒᯮᯰ ᯉ ᯉᯪᯑᯄ᯦ᯬ᯲ ᯉᯪ ᯞᯞᯪ ᯤ, ᯑᯪᯑᯰᯎᯒᯮ᯲ ᯔ ᯖᯮ ᯎᯉᯪ᯲ᯐᯰ, ᯂᯮᯂᯖᯮ᯲ ᯔ ᯑᯪᯑᯄ᯦ᯬ᯲:" ᯂᯒᯮ ᯖᯰᯂᯩ ᯑᯬ ᯂᯮᯅᯂᯉᯩ᯲, ᯀᯞᯩ ᯞᯞᯪ, ᯘᯬ ᯑᯪᯂᯪᯞᯞ, ᯅ ᯞᯔ᯲ ᯘᯔ᯲ᯅᯪᯞᯮ ᯅᯮᯞᯮᯰ ᯖᯬᯅᯮ ᯔ?!" ᯉᯉᯪ᯲ᯉ.
Alai didok lali i ma mangalusi, "Ba molo so oloanmu na hudok i, roham do; ai adong do ruma ijuk, panoloti do soada; adong' do sipaingot, pangoloim do na soada; hudok hatangki, hape sogo roham, ba idaonmu do muse pandapotanna."
ᯀᯞᯤ ᯑᯪᯑᯄ᯦ᯬ᯲ ᯞᯞᯪ ᯤ ᯔ ᯔᯝᯞᯮᯘᯪ, "ᯅ ᯔᯬᯞᯬ ᯘᯬ ᯀᯬᯞᯬᯀᯉ᯲ᯔᯮ ᯉ ᯂᯮᯑᯄ᯦ᯬ᯲ ᯤ, ᯒᯬᯂᯔ᯲ ᯑᯬ; ᯀᯤ ᯀᯑᯬᯰ ᯑᯬ ᯒᯮᯔ ᯤᯐᯄ᯦ᯮ᯲, ᯇᯉᯬᯞᯬᯖᯪ ᯑᯬ ᯘᯬᯀᯑ; ᯀᯑᯬᯰ ᯑᯬ ᯘᯪᯇᯤᯝᯖᯬ᯲, ᯇᯝᯬᯞᯬᯀᯔᯪ᯲ ᯑᯬ ᯉ ᯘᯬᯀᯑ; ᯂᯮᯑᯂᯬ᯲ ᯂᯖᯰᯄ᯦ᯪ, ᯂᯇᯩ ᯘᯬᯎᯬ ᯒᯬᯂᯔ᯲, ᯅ ᯤᯑᯀᯉᯬ᯲ᯔᯮ ᯑᯬ ᯔᯮᯘᯩ ᯇᯉ᯲ᯑᯇᯬᯖᯉ᯲ᯉ."
Ia dung laho lali i, morpingkir ma Pambarbar na Sumurung, didok ma di bagasan rohana, "Nioloan ma jolo hatana i, anggiat tutu na nidokna."
ᯤᯀ ᯑᯮᯰ ᯞᯂᯬ ᯞᯞᯪ ᯤ, ᯔᯒᯬ᯲ᯇᯪᯰᯄ᯦ᯒᯪ᯲ ᯔ ᯇᯔ᯲ᯅᯒ᯲ᯅᯒ᯲ ᯉ ᯘᯮᯔᯮᯒᯮᯰ, ᯑᯪᯑᯄ᯦ᯬ᯲ ᯔ ᯑᯪ ᯅᯎᯘᯉ᯲ ᯒᯬᯂᯉ, "ᯉᯪᯀᯬᯞᯬᯀᯉ᯲ ᯔ ᯐᯬᯞᯬ ᯂᯖᯉ ᯤ, ᯀᯰᯎᯪᯀᯖ᯲ ᯖᯮᯖᯮ ᯉ ᯉᯪᯑᯂᯬ᯲ᯉ."
Dung i laho ma ibana mambuat bulung tobu, diirishon ma i tu hau jongjong anian, pintor puas ma gotana songon mudar ni jolma, dung i morumpak ma hau i, dumugur ma bulungna, lumapat ma dangkana, humuntal ma langgunggung, mangkuling ma sidomdom.
ᯑᯮᯰ ᯤ ᯞᯂᯬ ᯔ ᯤᯅᯉ ᯔᯔ᯲ᯅᯮᯀᯖ᯲ ᯅᯮᯞᯮᯰ ᯖᯬᯅᯮ, ᯑᯪᯤᯒᯘᯪ᯲ᯂᯉᯬ᯲ ᯔ ᯤ ᯖᯮ ᯂᯥ ᯐᯬᯰᯐᯬᯰ ᯀᯉᯪᯀᯉ᯲, ᯇᯉᯪ᯲ᯖᯒᯬ᯲ ᯇᯮᯀᯘ᯲ ᯔ ᯎᯬᯖᯉ ᯘᯬᯝᯉᯬ᯲ ᯔᯮᯑᯒ᯲ ᯉᯪ ᯐᯞᯬ᯲ᯔ, ᯑᯮᯰ ᯤ ᯔᯬᯒᯔᯮ᯲ᯇᯄ᯦᯲ ᯔ ᯂᯥ ᯤ, ᯑᯮᯔᯮᯎᯒᯮ᯲ ᯔ ᯅᯮᯞᯮᯰᯉ, ᯞᯮᯔᯇᯖ᯲ ᯔ ᯑᯰᯄ᯦ᯉ, ᯂᯮᯔᯉᯮ᯲ᯖᯞ᯲ ᯔ ᯞᯰᯎᯮᯰᯎᯮᯰ, ᯔᯰᯄ᯦ᯮᯞᯪᯰ ᯔ ᯘᯪᯑᯔᯬ᯲ᯑᯔᯬ᯲.
Ia dung marumpak hau i, dibarbar ma muse, dung i digana. Ditailihon ma antong, na so adong do anina, na so ada tudosanna. Hau na ginjang i ma tu hau na bolon on; bulung ni sungkit i ma na hupopohon on; tung na so tuk do malo ni rohangki patorangkon pande ni Pambarbar na Sumurung, panggana pande gorga on.
ᯤᯀ ᯑᯮᯰ ᯔᯒᯔᯮ᯲ᯇᯄ᯦᯲ ᯂᯥ ᯤ, ᯑᯪᯅᯒ᯲ᯅᯒ᯲ ᯔ ᯔᯮᯘᯩ, ᯑᯮᯰ ᯤ ᯑᯪᯎᯉ. ᯑᯪᯖᯤᯞᯪᯂᯉᯬ᯲ ᯔ ᯀᯉ᯲ᯖᯬᯰ, ᯉ ᯘᯬ ᯀᯑᯬᯰ ᯑᯬ ᯀᯉᯪᯉ, ᯉ ᯘᯬᯀᯑ ᯖᯮᯑᯬᯘᯉ᯲ᯉ. ᯂᯥ ᯉ ᯎᯉᯪ᯲ᯐᯰ ᯤ ᯔ ᯖᯮ ᯂᯥ ᯉ ᯅᯬᯞᯉᯬ᯲ ᯀᯉᯬ᯲; ᯅᯮᯞᯮᯰ ᯉᯪ ᯘᯮᯰᯄ᯦ᯖᯪ᯲ ᯤ ᯔ ᯉᯂᯮᯇᯬᯇᯬᯂᯉᯬ᯲ ᯀᯉᯬ᯲; ᯖᯮᯰ ᯉ ᯘᯬ ᯖᯄ᯦ᯮ᯲ ᯑᯬ ᯔᯞᯬ ᯉᯪ ᯒᯬᯂᯰᯄ᯦ᯪ ᯇᯖᯬᯒᯰᯄᯱᯉᯬ᯲ ᯇᯉ᯲ᯑᯩ ᯉᯪ ᯇᯔ᯲ᯅᯒ᯲ᯅᯒ᯲ ᯉ ᯘᯮᯔᯮᯒᯮᯰ, ᯇᯰᯎᯉ ᯇᯉ᯲ᯑᯩ ᯎᯒᯬ᯲ᯎ ᯀᯉᯬ᯲.
Ia dung ma sidung digana, didokkon ma hatobanna i mangusung, alai ndang boi hindatonna; ro pe Pambarbar na Sumurung mangurupi, nanggo tung humosing na ginana i, soada. Ia dung songon inon loja nasida, laos so boi hau i paeretonna, tangis ma Pambarbar na Sumurung, digalmit ma hurumna, digotil lambiakna, angka dekdek ma iluna, ditangkupi hambirangna.
ᯤᯀ ᯑᯮᯰ ᯔ ᯘᯪᯑᯮᯰ ᯑᯪᯎᯉ, ᯑᯪᯑᯄ᯦ᯬ᯲ᯄ᯦ᯉᯬ᯲ ᯔ ᯂᯖᯬᯅᯉ᯲ᯉ ᯤ ᯔᯝᯮᯘᯮᯰ ᯀᯞᯤ ᯉ᯲ᯑᯰ ᯅᯬᯤ ᯂᯉᯪ᯲ᯑᯖᯉᯬ᯲ᯉ; ᯒᯬ ᯇᯩ ᯇᯔ᯲ᯅᯒ᯲ᯅᯒ᯲ ᯉ ᯘᯮᯔᯮᯒᯮᯰ ᯔᯝᯮᯒᯮᯇᯪ, ᯉᯰᯎᯬ ᯖᯮᯰ ᯂᯮᯔᯬᯘᯪᯰ ᯉ ᯎᯪᯉᯉ ᯤ, ᯘᯬᯀᯑ ᯤᯀ ᯑᯮᯰ ᯘᯬᯝᯉᯬ᯲ ᯤᯉᯉᯬ᯲ ᯞᯬᯐ ᯉᯘᯪᯑ, ᯞᯀᯘᯬ᯲ ᯘᯬ ᯅᯬᯤ ᯂᯥ ᯤ ᯇᯀᯩᯒᯩᯖᯉᯬ᯲ᯉ, ᯖᯝᯘᯪ᯲ ᯔ ᯇᯔ᯲ᯅᯒ᯲ᯅᯒ᯲ ᯉ ᯘᯮᯔᯮᯒᯮᯰ, ᯑᯪᯎᯞ᯲ᯔᯖᯪ᯲ ᯔ ᯂᯮᯒᯔᯮ᯲ᯉ, ᯑᯪᯎᯬᯖᯞᯪ᯲ ᯞᯔ᯲ᯅᯪᯀᯄ᯦᯲ᯉ, ᯀᯰᯄ᯦ ᯑᯄᯩ᯲ᯑᯄᯩ᯲ ᯔ ᯤᯞᯮᯉ, ᯑᯪᯖᯰᯄ᯦ᯮᯇᯪ ᯂᯔ᯲ᯅᯪᯒᯰᯉ
Bulung ni gaol pinariga-riga,
Ia andorang so saut digana,
Sai naeng na hurang gira,
Ia dung saut digana,
Nunga sumolsol bagina.
ᯅᯮᯞᯮᯰ ᯉᯪ ᯎᯀᯞᯬ᯲ ᯇᯪᯉᯒᯪᯎᯒᯪᯎ,
ᯤᯀ ᯀᯉ᯲ᯑᯬᯒᯰ ᯘᯬ ᯘᯀᯖᯮ᯲ ᯑᯪᯎᯉ,
ᯘᯤ ᯉᯀᯰᯩ ᯉᯂᯮᯒᯰ ᯎᯪᯒ,
ᯤᯀ ᯑᯮᯰ ᯘᯀᯖᯮ᯲ ᯑᯪᯎᯉ,
ᯉᯮᯝ ᯘᯮᯔᯞᯬ᯲ᯘᯞᯬ᯲ ᯅᯎᯪᯉ.
Ia dung sai tangis Pambarbar na Sumurung, panggana na lumobi, hulis-hulis ma muse lali di ginjang, didok ma: "Unang ho sai tangis, ale Pambarbar na Sumurung, ai sai na morbarita do ho di pagian ni ari", ninna.
ᯤᯀ ᯑᯮᯰ ᯘᯤ ᯖᯝᯘᯪ᯲ ᯇᯔ᯲ᯅᯒ᯲ᯅᯒ᯲ ᯉ ᯘᯮᯔᯮᯒᯮᯰ, ᯇᯰᯎᯉ ᯉ ᯞᯮᯔᯬᯅᯪ, ᯂᯮᯞᯘᯪ᯲ᯂᯮᯞᯘᯪ᯲ ᯔ ᯔᯮᯘᯩ ᯞᯞᯪ ᯑᯪ ᯎᯉᯪ᯲ᯐᯰ, ᯑᯪᯑᯄ᯦ᯬ᯲ ᯔ:" ᯥᯉᯰ ᯂᯬ ᯘᯤ ᯖᯝᯘᯪ᯲, ᯀᯞᯩ ᯇᯔ᯲ᯅᯒ᯲ᯅᯒ᯲ ᯉ ᯘᯮᯔᯮᯒᯮᯰ, ᯀᯤ ᯘᯤ ᯉ ᯔᯒᯬ᯲ᯅᯒᯪᯖ ᯑᯬ ᯂᯬ ᯑᯪ ᯇᯎᯪᯀᯉ᯲ ᯉᯪ ᯀᯒᯪ", ᯉᯉᯪ᯲ᯉ.
Dung i mulak ma nasida tu tonga ni jabuna, ditinggangkon Pambarbar na Sumurung ma ibana, so haru tu talaga, so haru tu halangulu, sian dele ni rohana.
ᯑᯮᯰ ᯤ ᯔᯮᯞᯄ᯦᯲ ᯔ ᯉᯘᯪᯑ ᯖᯮ ᯖᯬᯝ ᯉᯪ ᯐᯅᯮᯉ, ᯑᯪ ᯖᯪᯰᯎᯰᯄ᯦ᯉᯬ᯲ ᯇᯔ᯲ᯅᯒ᯲ᯅᯒ᯲ ᯉ ᯘᯮᯔᯮᯒᯮᯰ ᯔ ᯤᯅᯉ, ᯘᯬ ᯂᯒᯮ ᯖᯮ ᯖᯞᯎ, ᯘᯬ ᯂᯒᯮ ᯖᯮ ᯂᯞᯝᯮᯞᯮ, ᯘᯪᯀᯉ᯲ ᯑᯩᯞᯩ ᯉᯪ ᯒᯬᯂᯉ.
Dung i didok jolmana i ma: " Boasa tangis ho, anak ni namboru, anak ni raja bolon?" Alai didok ma mangalusi: "Ba aha ma so tangis ahu, ale boru ni datulang, ai nunga songon jarojak na taruntul ahu, songon ansuan na tarbatu, songon gala-gala mormutik, na soratari di bonana, ia hugana hau jongjong anian, na soada tudosanna; hape ia naeng usungonnami, so boi paereton , nda na ripe di ngalutna ma iba, so dohot nampunasa?!"
ᯑᯮᯰ ᯤ ᯑᯪᯑᯂᯬ᯲ ᯐᯞᯬ᯲ᯔᯉ ᯤ ᯔ: "ᯅᯬᯀᯘ ᯖᯝᯘᯪ᯲ ᯂᯬ, ᯀᯉᯄ᯦᯲ ᯉᯪ ᯉᯔ᯲ᯅᯬᯒᯮ, ᯀᯉᯄ᯦᯲ ᯉᯪ ᯒᯐ ᯅᯬᯞᯉᯬ᯲?" ᯀᯞᯤ ᯑᯪᯑᯄ᯦ᯬ᯲ ᯔ ᯔᯝᯞᯮᯘᯪ: "ᯅ ᯀᯂ ᯔ ᯘᯬ ᯖᯝᯘᯪ᯲ ᯀᯂᯮ, ᯀᯞᯩ ᯅᯬᯒᯮ ᯉᯪ ᯑᯖᯮᯞᯰ ᯀᯤ ᯉᯮᯝ ᯘᯬᯝᯉᯬ᯲ ᯐᯒᯬᯐᯄ᯦᯲ ᯉ ᯖᯒᯉᯮ᯲ᯖᯞᯮ᯲ ᯀᯂᯮ ᯘᯬᯝᯉᯬ᯲ ᯀᯉ᯲ᯘᯮᯀᯉ᯲ ᯉ ᯖᯒ᯲ᯅᯖᯮ ᯘᯬᯝᯉᯬ᯲ ᯎᯞᯎᯞ ᯔᯒᯬ᯲ᯔᯮᯖᯄ᯦ᯪ᯲, ᯉ ᯘᯬᯒᯖᯒᯪ ᯑᯪᯅᯬᯉᯉ, ᯤᯀ ᯂᯮᯎᯉ ᯂᯥ ᯐᯬᯰᯐᯬᯰ ᯀᯉᯪᯀᯉ᯲, ᯉ ᯘᯬ ᯀᯑ ᯖᯮᯑᯬᯘᯉ᯲ᯉ; ᯂᯇᯩ ᯤᯀ ᯉᯀᯰᯩ ᯥᯘᯮᯝᯉᯬ᯲ᯉᯔᯪ, ᯘᯬ ᯅᯬᯤ ᯇᯀᯩᯒᯩᯖᯉᯬ᯲, ᯉ᯲ᯑ ᯉ ᯒᯪᯇᯩ ᯑᯪᯝᯞᯮᯖ᯲ᯉ ᯔ ᯤᯅ, ᯘᯬ ᯑᯬᯂᯖᯬ᯲ ᯉᯔ᯲ᯇᯮᯉᯘ?!"
Dung i didok jolmana i ma : "Anggo i do hape , unang pola marsak ho, hahuaon ; ndada sai sude gogo na pinanganhon; unang pola sai marsak ho!" ninna. Jadi sonang ma rohana umbege hata ni jolmana i.
ᯑᯮᯰ ᯤ ᯑᯪᯑᯂᯬ᯲ ᯐᯞᯬ᯲ᯔᯉ ᯤ ᯔ: "ᯀᯰᯎᯬ ᯤ ᯑᯬ ᯂᯇᯩ, ᯥᯉᯰ ᯇᯬᯞ ᯔᯒ᯲ᯘᯄ᯦᯲ ᯂᯬ, ᯂᯂᯮᯀᯀᯉᯬ᯲; ᯉ᯲ᯑᯑ ᯘᯤ ᯘᯮᯑᯩ ᯎᯬᯎᯬ ᯉ ᯇᯪᯉᯝᯉ᯲ᯂᯉᯬ᯲; ᯥᯉᯰ ᯇᯬᯞ ᯘᯤ ᯔᯒ᯲ᯘᯄ᯦᯲ ᯂᯬ! "ᯉᯉᯪ᯲ᯉ. ᯐᯑᯪ ᯘᯬᯉᯰ ᯔ ᯒᯬᯂᯉ ᯀᯔᯮ᯲ᯅᯩᯎᯩ ᯂᯖ ᯉᯪ ᯐᯞᯬ᯲ᯔᯉ ᯤ.
Ia dung ma inon, leleng ma di porlelengan, lalap ma di porlalapan, laho ma halak Portiga-tiga Torus, borhat ma portiga-tiga ulos, mamolus ma nasida di tombak na limuton, di harangan longo-longo, sahat ma nasida tu lambung ni hau jongjong anian hau ' · tibal tudosan, naung ginana ni pambarbar na sumurung, panggana na utusan, gabe longang ma nasida mornida dengganna, ai tung na so adong do anina, soada tudosanna; dung i laos maradian ma nasida pabereng-berengkon, di dolok nanggaraja, portungkoan ni na hundul, paradianan ni na loja, manotnotihon ganaganaan, na so moranian, na so mortudosan i.
ᯤᯀ ᯑᯮᯰ ᯔ ᯤᯉᯉᯬ᯲, ᯞᯩᯞᯰᯩ ᯔ ᯑᯪ ᯇᯒᯬ᯲ᯞᯩᯞᯩᯝᯉ᯲, ᯞᯞᯇ᯲ ᯔ ᯑᯪ ᯇᯒᯬ᯲ᯞᯞᯇᯉ᯲, ᯞᯂᯬ ᯔ ᯂᯞᯄ᯦᯲ ᯇᯒᯬ᯲ᯖᯪᯎᯖᯪᯎ ᯖᯬᯒᯘᯮ᯲, ᯅᯒᯬ᯲ᯂᯖ᯲ ᯔ ᯇᯒᯬ᯲ᯖᯪᯎᯖᯪᯎ ᯥᯞᯘᯬ᯲, ᯔᯔᯬᯞᯘᯮ᯲ ᯔ ᯉᯘᯪᯑ ᯑᯪ ᯖᯔᯬ᯲ᯅᯄ᯦᯲ ᯉ ᯞᯪᯔᯮᯖᯉᯬ᯲, ᯑᯪ ᯂᯒᯝᯉ᯲ ᯞᯬᯝᯬᯞᯬᯝᯬ, ᯘᯂᯖ᯲ ᯔ ᯉᯘᯪᯑ ᯖᯮ ᯞᯔ᯲ᯅᯮᯰ ᯉᯪ ᯂᯥ ᯐᯬᯰᯐᯬᯰ ᯀᯉᯪᯀᯉ᯲ ᯂᯥ ᯖᯪᯅᯞ᯲ ᯖᯮᯑᯬᯘᯉ᯲, ᯉᯀᯮᯰ ᯎᯪᯉᯉ ᯉᯪ ᯇᯔ᯲ᯅᯒ᯲ᯅᯒ᯲ ᯉ ᯘᯮᯔᯮᯒᯮᯰ, ᯇᯰᯎᯉ ᯉ ᯥᯖᯮᯘᯉ᯲, ᯎᯅᯩ ᯞᯬᯝᯰ ᯔ ᯉᯘᯪᯑ ᯔᯒᯬ᯲ᯉᯪᯑ ᯑᯰᯩᯎᯉ᯲ᯉ, ᯀᯤ ᯖᯮᯰ ᯉ ᯘᯬᯀᯑᯬᯰ ᯑᯬ ᯀᯉᯪᯉ, ᯘᯬᯀᯑ ᯖᯮᯑᯬᯘᯉ᯲ᯉ; ᯑᯮᯰ ᯤ ᯞᯀᯘᯬ᯲ ᯔᯒᯑᯪᯀᯉ᯲ ᯔ ᯉᯘᯪᯑ ᯇᯅᯩᯒᯰᯩᯅᯩᯒᯰᯩᯄᯱᯉᯬ᯲, ᯑᯪ ᯑᯬᯞᯂᯬ᯲ ᯉᯰᯎᯒᯐ, ᯇᯒᯬ᯲ᯖᯮᯰᯄ᯦ᯬᯀᯉ᯲ ᯉᯪ ᯉᯂᯉᯮ᯲ᯑᯞᯮ᯲, ᯇᯒᯑᯪᯀᯉᯉ᯲ ᯉᯪ ᯉ ᯞᯬᯐ, ᯔᯉᯖᯬ᯲ᯉᯬᯖᯪᯂᯉᯬ᯲ ᯎᯉᯎᯉᯀᯉ᯲, ᯉ ᯘᯬ ᯔᯬᯒᯉᯪᯀᯉ᯲, ᯉ ᯘᯬ ᯔᯒᯬ᯲ᯖᯮᯑᯬᯘᯉ᯲ ᯤ.
Dung i didok nasida be ma: "Inang da ba, inang, ise ma ulaning manggana on! Beha muse ulaning ulina, aut binahen paheanna. Ua tabahen ma, ale dongan, ulosta on paheonna, asa taida jolo dengganna!" ninna deba halak sian partiga-tiga ulos i. Alai ro ma deba mandok : "Aha ma na pinaaha-aha disi, rohana ma disi, ua atik manang aha i, so pinaboto-boto i. Beta ma hita, ai nunga tingkos ari, naeng hita tu onan", ninna.
ᯑᯮᯰ ᯤ ᯑᯪᯑᯄ᯦ᯬ᯲ ᯉᯘᯪᯑ ᯅᯩ ᯔ: "ᯤᯉᯰ ᯑ ᯅ, ᯤᯉᯰ, ᯤᯘᯩ ᯔ ᯥᯞᯉᯪᯰ ᯔᯰᯎᯉ ᯀᯉᯬ᯲ ᯅᯩᯂ ᯔᯮᯘᯩ ᯥᯞᯉᯪᯰ ᯥᯞᯪᯉ, ᯀᯀᯖᯮ᯲ ᯅᯪᯉᯂᯉᯩ᯲ ᯇᯂᯩᯀᯉ᯲ᯉ. ᯥᯀ ᯖᯅᯂᯉᯩ᯲ ᯔ, ᯀᯞᯩ ᯑᯬᯝᯉ᯲, ᯥᯞᯘᯬ᯲ᯖ ᯀᯉᯬ᯲ ᯇᯂᯩᯀᯉᯬ᯲ᯉ, ᯀᯘ ᯖᯤᯑ ᯐᯬᯞᯬ ᯑᯰᯩᯎᯉ᯲ᯉ! "ᯉᯉᯪ᯲ᯉ ᯑᯩᯅ ᯂᯞᯄ᯦᯲ ᯘᯪᯀᯉ᯲ ᯇᯒ᯲ᯖᯪᯎᯖᯪᯎ ᯥᯞᯘᯬ᯲ ᯤ. ᯀᯞᯤ ᯒᯬ ᯔ ᯑᯩᯅ ᯔᯉ᯲ᯑᯄ᯦ᯬ᯲: "ᯀᯂ ᯔ ᯉ ᯇᯪᯉᯀᯂᯀᯂ ᯑᯪᯘᯪ, ᯒᯬᯂᯉ ᯔ ᯑᯪᯘᯪ, ᯥᯀ ᯀᯖᯄ᯦ᯪ᯲ ᯔᯉᯰ ᯀᯂ ᯤ, ᯘᯬ ᯇᯪᯉᯅᯬᯖᯬᯅᯬᯖᯬ ᯤ. ᯅᯩᯖ ᯔ ᯂᯪᯖ, ᯀᯤ ᯉᯮᯝ ᯖᯪᯰᯄᯱᯘᯬ᯲ ᯀᯒᯪ, ᯉᯀᯰᯩ ᯂᯪᯖ ᯖᯮ ᯀᯬᯉᯉ᯲", ᯉᯉᯪ᯲ᯉ.
Alai ro ma na sada mangalusi, i ma na morgoar Si Gabagobu, didok ma: "Aha ianggo ho! Sai luhut do huroha ari na pinanggulahon di roham", ninna.
ᯀᯞᯤ ᯒᯬ ᯔ ᯉᯘᯑ ᯔᯝᯞᯮᯘᯪ, ᯤ ᯔ ᯉ ᯔᯒᯬ᯲ᯎᯬᯀᯒ᯲ ᯘᯪ ᯎᯅᯎᯬᯅᯮ ᯑᯪᯑᯄ᯦ᯬ᯲ ᯔ: "ᯀᯂ ᯤᯀᯰᯎᯬ ᯂᯬ! ᯘᯤ ᯞᯮᯂᯖᯮ᯲ ᯑᯬ ᯂᯮᯒᯬᯂ ᯀᯒᯪ ᯉ ᯇᯪᯉᯰᯎᯮᯞᯂᯉᯬ᯲ ᯑᯪ ᯒᯬᯂᯔ᯲", ᯉᯉᯪ᯲ᯉ.
Dung i dibuat ma ulos tiga-tigana i, dialithon ma i tu gana-ganaan i, ai nunga jongjong hian i didapot nasida. Ia dung dialithon abitna i, pintor sabur ma antong rupana, ndada adong be situlukna, tung na soada do tudosanna, lobi do sadampang boni sinondang ni bohina.
ᯑᯮᯰ ᯤ ᯑᯪᯅᯮᯀᯖ᯲ ᯔ ᯥᯞᯘᯬ᯲ ᯖᯪᯎᯖᯪᯎᯉ ᯤ, ᯑᯪᯀᯞᯖᯪ᯲ᯂᯉᯬ᯲ ᯔ ᯤ ᯖᯮ ᯎᯉᯎᯉᯀᯉ᯲ ᯤ, ᯀᯤ ᯉᯮᯝ ᯐᯬᯰᯐᯬᯰ ᯂᯪᯀᯉ᯲ ᯤ ᯑᯪᯑᯇᯖᯬ᯲ ᯉᯘᯪᯑ. ᯤᯀ ᯑᯮᯰ ᯑᯪᯀᯞᯪᯖ᯲ᯂᯉᯬ᯲ ᯀᯅᯖᯪ᯲ᯉ ᯤ, ᯇᯉᯪ᯲ᯖᯒᯬ᯲ ᯘᯅᯒᯮ᯲ ᯔ ᯀᯉ᯲ᯖᯬᯰ ᯒᯮᯇᯉ, ᯉ᯲ᯑᯑ ᯀᯑᯬᯰ ᯅᯩ ᯘᯪᯖᯮᯞᯮᯄ᯦ᯮ᯲ᯉ, ᯖᯮᯰ ᯉ ᯘᯬᯀᯑ ᯑᯬ ᯖᯮᯑᯬᯘᯉ᯲ᯉ, ᯞᯬᯅᯪ ᯑᯬ ᯘᯑᯔ᯲ᯇᯰ ᯅᯬᯉᯪ ᯘᯪᯉᯉᯬ᯲ᯑᯰ ᯉᯪ ᯅᯬᯂᯪᯉ.
Dung i didok Si Gabagobu ma muse: "Dagoi amang, dengganna i!" Dibahen muse ma mas tu pinggolna, disangkothon muse dohot ulang-aling tiga-tigana hian. Dipahusor gana-ganaan i, humusor ma antong; ia tu si diaithon, tu si do mangoloi; hape ia na manggana i uju i paerethon, humurtik pe soada.
ᯑᯮᯰ ᯤ ᯑᯪᯑᯄ᯦ᯬ᯲ ᯘᯪ ᯎᯅᯎᯬᯅᯮ ᯔ ᯔᯮᯘᯩ: "ᯑᯎᯬ ᯤ ᯀᯔᯰ, ᯑᯰᯩᯎᯉ᯲ᯉ ᯤ! "ᯑᯪᯅᯂᯉᯩ᯲ ᯔᯮᯘᯩ ᯔ ᯔᯘ᯲ ᯖᯮ ᯇᯪᯰᯎᯞᯬ᯲ᯉ, ᯑᯪᯘᯰᯄ᯦ᯖᯬ᯲ᯂᯉᯬ᯲ ᯔᯮᯘᯩ ᯑᯬᯂᯖᯬ᯲ ᯥᯞᯰᯀᯞᯪᯰ ᯖᯪᯎᯖᯪᯎᯉ ᯂᯪᯀᯉ᯲. ᯑᯪᯇᯂᯮᯘᯒᯬ᯲ ᯎᯉᯎᯉᯀᯉ᯲ ᯤ, ᯂᯮᯔᯮᯘᯒᯬ᯲ ᯔ ᯀᯉ᯲ᯖᯬᯰ; ᯤᯀ ᯖᯮ ᯘᯪ ᯑᯪᯀᯀᯖᯪ᯲ᯂᯉᯬ᯲, ᯖᯮ ᯘᯪ ᯑᯬ ᯔᯝᯬᯞᯬᯤ; ᯂᯇᯩ ᯤᯀ ᯉ ᯔᯰᯎᯉ ᯤ ᯥᯐᯮ ᯤ ᯇᯀᯩᯒᯖᯩ᯲ᯂᯉᯬ᯲, ᯂᯮᯔᯒᯮ᯲ᯖᯄ᯦ᯪ᯲ ᯇᯩ ᯘᯬᯀᯑ.
Ia dung ma songon i, dibahen muse ma haen sabesabena, morgondang baba ma nasida, dipangurdot-urdothon ma ganaganaan, tu siamun diaithon, tu si do mangoloi, tu hambirang dieolhon, tu si do so manjua, tung mangolo-oloi do songon na mangolu, tung mansai las do rohanasida paida-idahonsa.
ᯤᯀ ᯑᯮᯰ ᯔ ᯘᯬᯝᯉᯬ᯲ ᯤ, ᯑᯪᯅᯂᯉᯩ᯲ ᯔᯮᯘᯩ ᯔ ᯂᯀᯉᯩ᯲ ᯘᯅᯩᯘᯅᯩᯉ, ᯔᯒᯬ᯲ᯎᯉᯬ᯲ᯑᯰ ᯅᯅ ᯔ ᯉᯘᯪᯑ, ᯑᯪ ᯇᯝᯒᯮ᯲ᯑᯖᯬ᯲ᯀᯒᯮ᯲ᯑᯖᯬ᯲ᯂᯉᯬ᯲ ᯔ ᯎᯉᯎᯉᯀᯉ᯲, ᯖᯮ ᯘᯪᯀᯔᯉᯮ᯲ ᯑᯪᯀᯀᯖᯪ᯲ᯂᯉᯬ᯲, ᯖᯮ ᯘᯪ ᯑᯬ ᯔᯝᯬᯞᯬᯤ, ᯖᯮ ᯂᯔ᯲ᯅᯪᯒᯰ ᯑᯪᯀᯩᯀᯞᯬ᯲ᯂᯉᯬ᯲, ᯖᯮ ᯘᯪ ᯑᯬ ᯘᯬ ᯔᯉ᯲ᯐᯮᯀ, ᯖᯮᯰ ᯔᯝᯬᯞᯬᯀᯬᯞᯬᯤ ᯑᯬ ᯘᯬᯝᯉᯬ᯲ ᯉ ᯔᯝᯬᯞᯮ, ᯖᯮᯰ ᯔᯉ᯲ᯘᯤ ᯞᯘ᯲ ᯑᯬ ᯒᯬᯂᯉᯘᯪᯑ ᯇᯤᯑᯤᯑᯂᯉᯬ᯲ᯘ.
Alai dung bot ari, didok nasida ma:
"Beha, ale dongan sanga dope hita laho tu onan?" Alai di dok na deba i ma mangalusi:"Indang sanga be hita laho tu onan, ai nunga bot ari, hutanta na sai dao. Mulak ma hita tu huta!" ninna.
ᯀᯞᯤ ᯑᯮᯰ ᯅᯖᯬ᯲ ᯀᯒᯪ, ᯑᯪᯑᯂᯬ᯲ ᯉᯘᯪᯑ ᯔ:
"ᯅᯩᯂ, ᯀᯞᯩ ᯑᯬᯝᯉ᯲ ᯘᯝ ᯑᯬᯇᯩ ᯂᯪᯖ ᯞᯂᯬ ᯖᯮ ᯀᯬᯉᯉ᯲? "ᯀᯞᯤ ᯑᯪᯑᯄ᯦ᯬ᯲ ᯉ ᯑᯩᯅ ᯤ ᯔ ᯔᯝᯞᯮᯘᯪ: "ᯀᯉᯪ᯲ᯑᯰ ᯘᯝ ᯅᯩ ᯂᯪᯖ ᯞᯂᯬ ᯖᯮ ᯀᯬᯉᯉ᯲, ᯀᯤ ᯉᯮᯝ ᯅᯖᯬ᯲ ᯀᯒᯪ, ᯂᯮᯖᯉ᯲ᯖ ᯉ ᯘᯤ ᯑᯀᯬ. ᯔᯮᯞᯄ᯦᯲ ᯔ ᯂᯪᯖ ᯖᯮ ᯂᯮᯖ! "ᯉᯉᯪ᯲ᯉ.
Alai di na laho mulak i nasida, disandehon nasida ma gana ganaan i, naeng ma tanggalan nasida sude pahean na binahen nasida i, hape nunga lohot, indang boi be buaton; raut pe dibahen so boi; gogo pe ditoltol laos so boi.
ᯀᯞᯤ ᯑᯪ ᯉ ᯞᯂᯬ ᯔᯮᯞᯄ᯦᯲ ᯤ ᯉᯘᯪᯑ, ᯑᯪᯘᯉ᯲ᯑᯩᯂᯉᯬ᯲ ᯉᯘᯪᯑ ᯔ ᯎᯉᯎᯉᯀᯉ᯲ ᯤ, ᯉᯀᯰᯩ ᯔ ᯖᯰᯎᯞᯉ᯲ᯉᯘᯪᯑ ᯘᯮᯑᯩ ᯇᯂᯩᯀᯉ᯲ᯉ ᯅᯪᯉᯂᯉᯩ᯲ᯉᯘᯪᯑ ᯤ, ᯂᯇᯩ ᯉᯮᯝ ᯞᯬᯂᯖᯬ᯲, ᯀᯉᯪ᯲ᯑᯰ ᯅᯬᯤ ᯅᯩ ᯅᯮᯀᯖᯉᯬ᯲ ; ᯒᯀᯖᯮ᯲ ᯇᯩ ᯑᯪᯅᯂᯉᯩ᯲ ᯘᯬ ᯅᯬᯤ; ᯎᯬᯎᯬ ᯇᯩ ᯑᯪᯖᯞᯬ᯲ᯖᯞᯬ᯲ ᯞᯀᯘᯬ᯲ ᯘᯬ ᯅᯬᯤ.
Dung i didok nasida be ma: "Nunga piukon songon tali, nunga putor on songon langkitang; nunga dipupusi na so marroha hita, dipaoto-oto na so mangolu.
ᯑᯮᯰ ᯤ ᯑᯪᯑᯂᯬ᯲ ᯉᯘᯪᯑ ᯅᯩ ᯔ: "ᯉᯮᯝ ᯇᯪᯥᯄ᯦ᯉᯬ᯲ ᯘᯬᯝᯉᯬ᯲ ᯖᯞᯪ, ᯉᯮᯝ ᯇᯮᯖᯒᯬ᯲ ᯀᯉᯬ᯲ ᯘᯬᯝᯉᯬ᯲ ᯞᯰᯂᯪᯖᯰ; ᯉᯮᯝ ᯑᯪᯇᯮᯇᯮᯘᯪ ᯉ ᯘᯬ ᯔᯒ᯲ᯒᯬᯂ ᯂᯪᯖ, ᯑᯪᯇᯀᯬᯖᯬᯀᯬᯖᯬ ᯉ ᯘᯬ ᯔᯝᯬᯞᯮ
Tinunjang panggaruan, angka bola panggonggonan, nunga gabe anian hita on jala gabe tudosan; rupa dohot ma angka anakkonta gabe tu paradopan, ai nunga suda pangkalta dipogo gana-ganaan on", ninna nasida be.
ᯖᯪᯉᯉᯮ᯲ᯐᯰ ᯇᯰᯎᯒᯮᯀᯉ᯲, ᯀᯰᯄ᯦ ᯅᯬᯞ ᯇᯰᯎᯬᯰᯎᯬᯉᯉ᯲, ᯉᯮᯝ ᯎᯅᯩ ᯀᯉᯪᯀᯉ᯲ ᯂᯪᯖ ᯀᯉᯬ᯲ ᯐᯞ ᯎᯅᯩ ᯖᯮᯑᯬᯘᯉ᯲; ᯒᯮᯇ ᯑᯬᯂᯖᯬ᯲ ᯔ ᯀᯰᯄ᯦ ᯀᯉᯄ᯦᯲ᯂᯉᯬ᯲ᯖ ᯎᯅᯩ ᯖᯮ ᯇᯒᯑᯬᯇᯉ᯲, ᯀᯤ ᯉᯮᯝ ᯘᯮᯑ ᯇᯰᯄ᯦ᯞ᯲ᯖ ᯑᯪᯇᯬᯎᯬ ᯎᯉᯎᯉᯀᯉ᯲ ᯀᯉᯬ᯲", ᯉᯉᯪ᯲ᯉ ᯉᯘᯪᯑ ᯅᯩ
Dung i sai masisolsolan ma nasida mandok,: "Ia so nioloan hata ni dongan, naeng oloan; ba ia nioloan, hape hamagoan." Ia dung so boi be buatonnasida tiga-tiganasida i sian gana-ganaan i, ditadingkon ma songon i,,' laho ma nasida muli, tangis be ma nasida morsuap-suap iluna.
ᯑᯮᯰ ᯤ ᯘᯤ ᯔᯘᯪᯘᯞᯬ᯲ᯘᯬᯞᯉ᯲ ᯔ ᯉᯘᯪᯑ ᯔᯉ᯲ᯑᯄ᯦ᯬ᯲,: "ᯤᯀ ᯘᯬ ᯉᯪᯀᯬᯞᯬᯀᯉ᯲ ᯂᯖ ᯉᯪ ᯑᯬᯝᯉ᯲, ᯉᯀᯰᯩ ᯀᯬᯞᯬᯀᯉ᯲; ᯅ ᯤᯀ ᯉᯪᯀᯬᯞᯬᯀᯉ᯲, ᯂᯇᯩ ᯂᯔᯎᯬᯀᯉ᯲. "ᯤᯀ ᯑᯮᯰ ᯘᯬ ᯅᯬᯤ ᯅᯩ ᯅᯮᯀᯖᯉᯬ᯲ ᯉᯘᯪᯑ ᯖᯪᯎᯖᯪᯎᯉᯘᯪᯑ ᯤ ᯘᯪᯀᯉ᯲ ᯎᯉᯎᯉᯀᯉ᯲ ᯤ, ᯑᯪᯖᯑᯪᯰᯄᯱᯉᯬ᯲ ᯔ ᯘᯬᯝᯉᯬ᯲ ᯤ,, 'ᯞᯂᯬ ᯔ ᯉᯘᯪᯑ ᯔᯮᯞᯪ, ᯖᯝᯘᯪ᯲ ᯅᯩ ᯔ ᯉᯘᯪᯑ ᯔᯒᯬ᯲ᯘᯮᯀᯇ᯲ᯘᯮᯀᯇ᯲ ᯤᯞᯮᯉ.
Ia dung sahat Si Gabagobu tu jabuna, ditinggangkon ma · ibana, so haru tu talaga, so haru tu halangulu, dibahen dele ni rohana. Dung i manungkun ma jolmana, didok ma : "Aha huroha na masa, dia na muba, umbahen na songon i ho, ale anak ni rajanami?" ninna.
ᯤᯀ ᯑᯮᯰ ᯘᯂᯖ᯲ ᯘᯪ ᯎᯅᯎᯬᯅᯮ ᯖᯮ ᯐᯅᯮᯉ, ᯑᯪ ᯖᯪᯰᯎᯰᯄᯱᯉᯬ᯲ ᯔ· ᯤᯅᯉ, ᯘᯬ ᯂᯒᯮ ᯖᯮ ᯖᯞᯎ, ᯘᯬ ᯂᯒᯮ ᯖᯮ ᯂᯞᯝᯮᯞᯮ, ᯑᯪᯅᯂᯉᯩ᯲ ᯑᯩᯞᯩ ᯉᯪ ᯒᯬᯂᯉ. ᯑᯮᯰ ᯤ ᯔᯉᯮᯰᯄ᯦ᯉᯮ᯲ ᯔ ᯐᯞᯬ᯲ᯔᯉ, ᯑᯪᯑᯄ᯦ᯬ᯲ ᯔ: "ᯀᯂ ᯂᯮᯒᯬᯂ ᯉ ᯔᯘ, ᯑᯪᯀ ᯉ ᯔᯮᯅ, ᯀᯔᯮ᯲ᯅᯂᯉᯩ᯲ ᯉ ᯘᯬᯝᯉᯬ᯲ ᯤ ᯂᯬ, ᯀᯞᯩ ᯀᯉᯄ᯦᯲ ᯉᯪ ᯒᯐᯉᯔᯪ?" ᯉᯉᯪ᯲ᯉ.
Adong huboto be, ale inang ; rupa mangadop na ma hita dohot angka anakkonta i", ninna ibana mangalusi.
ᯀᯑᯬᯰ ᯂᯮᯅᯬᯖᯬ ᯅᯩ, ᯀᯞᯩ ᯤᯉᯰ; ᯒᯮᯇ ᯔᯝᯑᯇᯬ᯲ ᯉ ᯔ ᯂᯪᯖ ᯑᯬᯂᯖᯬ᯲ ᯀᯰᯄ᯦ ᯀᯉᯄ᯦᯲ᯄ᯦ᯉᯬ᯲ᯖ ᯤ", ᯉᯉᯪ᯲ᯉ ᯤᯅᯉ ᯔᯝᯞᯮᯘᯪ.
Dung i didok jolmana i ma muse: "Ba, tung paboa damang jolo alana, manang dia alana umbahen na didok ho songon i!" ninna.
ᯑᯮᯰ ᯤ ᯑᯪᯑᯂᯬ᯲ ᯐᯞᯬ᯲ᯔᯉ ᯤ ᯔ ᯔᯮᯘᯩ: "ᯅ ᯖᯮᯰ ᯇᯅᯬᯀ ᯑᯔᯰ ᯐᯬᯞᯬ ᯀᯞᯉ, ᯔᯉᯰ ᯑᯪᯀ ᯀᯞᯉ ᯀᯔᯮ᯲ᯅᯂᯉᯩ᯲ ᯉ ᯑᯪᯑᯄ᯦ᯬ᯲ ᯂᯬ ᯘᯬᯝᯉᯬ᯲ ᯤ! "ᯉᯉᯪ᯲ᯉ
Dung i dipaboa Si Gabagobu ma pangalahona, na binahen na i, ulos tiga-tigana dohot mas dohot ulang-aling i tu gana-ganaan. na niida i, hape so boi be muse buatonna.
ᯑᯮᯰ ᯤ ᯑᯪᯇᯅᯬᯀ ᯘᯪ ᯎᯅᯎᯬᯅᯮ ᯔ ᯇᯝᯞᯂᯬᯉ, ᯉ ᯅᯪᯉᯂᯉᯩ᯲ᯉ ᯤ, ᯥᯞᯘᯬ᯲ ᯖᯪᯎᯖᯪᯎᯉ ᯑᯬᯂᯖᯬ᯲ ᯔᯘ᯲ ᯑᯬᯂᯖᯬ᯲ ᯥᯞᯰᯀᯞᯪᯰ ᯤ ᯖᯮ ᯎᯉᯎᯉᯀᯉ᯲. ᯉ ᯉᯪ ᯤᯑ ᯤ, ᯂᯇᯩ ᯘᯬ ᯅᯬᯤ ᯅᯩ ᯔᯮᯘᯩ ᯅᯮᯀᯖᯉᯬ᯲ᯉ.
Dung i ninna jolmana i ma: "Inang da ba, inang, tung pupusan ni na mate ma hape na mangolu! Alai hahuaon ; unang pola mamarsakku ho, sai tubu ma singkat ni i di hita, ditumpak ompunta Debata."
ᯑᯮᯰ ᯤ ᯉᯉᯪ᯲ᯉ ᯐᯞᯬ᯲ᯔᯉ ᯤ ᯔ: "ᯤᯉᯰ ᯑ ᯅ, ᯤᯉᯰ, ᯖᯮᯰ ᯇᯮᯇᯮᯘᯉ᯲ ᯉᯪ ᯉ ᯔᯖᯩ ᯔ ᯂᯇᯩ ᯉ ᯔᯝᯬᯞᯮ! ᯀᯞᯤ ᯂᯂᯮᯀᯀᯉᯬ᯲; ᯥᯉᯰ ᯇᯬᯞ ᯔᯔᯒ᯲ᯘᯄ᯦᯲ᯂ᯦ᯮ ᯂᯬ, ᯘᯤ ᯖᯮᯅᯮ ᯔ ᯘᯪᯰᯄ᯦ᯖ᯲ ᯉᯪ ᯤ ᯑᯪ ᯂᯪᯖ, ᯑᯪᯖᯮᯔ᯲ᯇᯄ᯦᯲ ᯀᯔᯬ᯲ᯇᯉᯮ᯲ᯖ ᯑᯩᯅᯖ."
Jadi sumonang ma roha ni Si Gabagobu umbege pangapuli ni na niolina i. Ia dung sidung nasida na mangkatai i, mortatahuak ma manuk manjojoti paboa torang ni ari.
ᯐᯑᯪ ᯘᯮᯔᯬᯉᯰ ᯔ ᯒᯬᯂ ᯉᯪ ᯘᯪ ᯎᯅᯎᯬᯅᯮ ᯀᯔᯮ᯲ᯅᯩᯎᯩ ᯇᯝᯇᯮᯘᯪ ᯉᯪ ᯉ ᯉᯪᯀᯬᯞᯪᯉ ᯤ. ᯤᯀ ᯑᯮᯰ ᯘᯪᯑᯮᯰ ᯉᯘᯪᯑ ᯉ ᯔᯰᯂᯖᯤ ᯤ, ᯔᯒᯬ᯲ᯖᯖᯂᯮᯀᯄ᯦᯲ ᯔ ᯔᯉᯄ᯦ᯮ᯲ ᯔᯉ᯲ᯐᯬᯐᯬᯖᯪ ᯇᯅᯬᯀ ᯖᯬᯒᯰ ᯉᯪ ᯀᯒᯪ.
Ia jus ma ninna hole , sar ma ninna tahu-tahu pur ma ninna barita, sar ma alu-alu tu Datu na Sumurung, portaoar na lumobi, datu pangubung, siubung hosa loja, sipangolu naung mate.
ᯤᯀ ᯐᯘᯮ᯲ ᯔ ᯉᯉᯪ᯲ᯉ ᯂᯬᯞᯩ, ᯘᯒ᯲ ᯔ ᯉᯉᯬ᯲ᯉ ᯖᯂᯮᯖᯂᯮ ᯇᯒᯮ᯲ ᯔ ᯉᯉᯪ᯲ᯉ ᯅᯒᯪᯖ, ᯘᯒ᯲ ᯔ ᯀᯞᯮᯀᯞᯮ ᯖᯮ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ, ᯑᯖᯮ ᯇᯝᯮᯅᯮᯰ ᯘᯪᯥᯅᯮᯰ ᯂᯬᯘ ᯞᯬᯐ, ᯘᯪᯇᯝᯬᯞᯮ ᯉᯀᯮᯰ ᯔᯖᯩ.
Ia dung sahat tu ibana barita, taringot tu gana-ganaan, hau jongjong anian, hau tibal tudosan, disuru ma hatobanna mamboan ula
ulana, diusung ma antong taoar pangabang-abang, taoar pangubung-ubung, sipangolu naung mate, siparata naung busuk.
ᯤᯀ ᯑᯮᯰ ᯘᯂᯖ᯲ ᯖᯮ ᯤᯅᯉ ᯅᯒᯪᯖ, ᯖᯒᯪᯝᯖᯬ᯲ ᯖᯮ ᯎᯉᯎᯉᯀᯉ᯲, ᯂᯥ ᯐᯬᯰᯐᯬᯰ ᯀᯉᯪᯀᯉ᯲, ᯂᯥ ᯖᯪᯅᯞ᯲ ᯖᯮᯑᯬᯘᯉ᯲, ᯑᯪᯘᯮᯒᯮ ᯔ ᯂᯖᯬᯅᯉ᯲ᯉ ᯔᯔ᯲ᯅᯬᯀᯉ᯲ ᯥᯞᯥᯞᯉ, ᯑᯪᯥᯘᯮᯰ ᯔ ᯀᯉ᯲ᯖᯬᯰ ᯖᯀᯬᯀᯒ᯲ ᯇᯝᯅᯰᯀᯅᯰ, ᯖᯀᯬᯀᯒ᯲ ᯇᯝᯮᯅᯮᯰᯥᯅᯮᯰ ᯘᯪᯇᯝᯬᯞᯮ ᯉᯀᯮᯰ ᯔᯖᯩ, ᯘᯪᯇᯒᯖ ᯉᯀᯮᯰ ᯅᯮᯘᯄ᯦ᯮ᯲.
Mordalan ma nasida mangadangi gana-ganaan, hau jongjong anian, hau tibal tudosan, jumpang nasida ma antong di tombak na ngolngolan, di harangan na limuton, hatubuan ni pongki na ngirngiran.
ᯔᯬᯒ᯲ᯑᯞᯉ᯲ ᯔ ᯉᯘᯪᯑ ᯔᯝᯑᯝᯪ ᯎᯉᯎᯉᯀᯉ᯲, ᯂᯥ ᯐᯬᯰᯐᯬᯰ ᯀᯉᯪᯀᯉ᯲, ᯂᯥ ᯖᯪᯅᯞ᯲ ᯖᯮᯑᯬᯘᯉ᯲, ᯐᯔᯮ᯲ᯇᯰ ᯉᯘᯪᯑ ᯔ ᯀᯉ᯲ᯖᯬᯰ ᯑᯪ ᯖᯔᯬ᯲ᯅᯄ᯦᯲ ᯉ ᯝᯞᯬ᯲ᯝᯬᯞᯉ᯲, ᯑᯪ ᯂᯒᯝᯉ᯲ ᯉ ᯞᯪᯔᯮᯖᯉᯬ᯲, ᯂᯖᯮᯅᯮᯀᯉ᯲ ᯉᯪ ᯇᯬᯰᯄ᯦ᯪ ᯉ ᯝᯒᯪ᯲ᯝᯪᯒᯉ᯲.
Didaishon ma taoarna i tu pamangan ni gana-ganaan i, gabe boi ma mangkuling, alai indang boi dope mornida. Didaishon ma taoar i muse tu matana, gabe mornida ma huhut, alai indang boi dope morbinege. Didaishon muse ma taoar i tu pinggolna, gabe morbinege ma antong, alai indang dope morpornianggoan.
ᯑᯪᯑᯀᯘᯪ᯲ᯂᯉᯬ᯲ ᯔ ᯖᯀᯬᯀᯒ᯲ᯉ ᯤ ᯖᯮ ᯇᯔᯝᯉ᯲ ᯉᯪ ᯎᯉᯎᯉᯀᯉ᯲ ᯤ, ᯎᯅᯩ ᯅᯬᯤ ᯔ ᯔᯰᯄ᯦ᯮᯞᯪᯰ, ᯀᯞᯤ ᯀᯉᯪ᯲ᯑᯰ ᯅᯬᯤ ᯑᯬᯇᯩ ᯔᯒᯬ᯲ᯉᯪᯑ. ᯑᯪᯑᯀᯘᯪ᯲ᯂᯉᯬ᯲ ᯔ ᯖᯀᯬᯀᯒ᯲ ᯤ ᯔᯮᯘᯩ ᯖᯮ ᯔᯖᯉ, ᯎᯅᯩ ᯔᯒᯬ᯲ᯉᯪᯑ ᯔ ᯂᯮᯂᯖᯮ᯲, ᯀᯞᯤ ᯀᯉᯪ᯲ᯑᯰ ᯅᯬᯤ ᯑᯬ ᯇᯩ ᯔᯒᯬ᯲ᯅᯪᯉᯩᯎᯩ. ᯑᯪᯑᯀᯘᯪ᯲ᯂᯉᯬ᯲ ᯔᯮᯘᯩ ᯔ ᯖᯀᯬᯀᯒ᯲ ᯤ ᯖᯮ ᯇᯪᯰᯎᯞᯬ᯲ᯉ, ᯎᯅᯩ ᯔᯒᯬ᯲ᯅᯪᯉᯩᯎᯩ ᯔ ᯀᯉ᯲ᯖᯬᯰ, ᯀᯞᯤ ᯀᯉᯪ᯲ᯑᯰ ᯑᯬ ᯇᯩ ᯔᯒᯬ᯲ᯇᯒᯬ᯲ᯉᯪᯀᯰᯎᯬᯀᯉ᯲
Songon i ma sai dipandaishon taorna i, gabe mangolu ma songon jolma hian. Tung na so moranian do, tung soada mortuduson; mansai longang ma Portaoar na Sumurung, mida hinadengganna, nunga naeng i di rohana bahenonna siadopanna.
ᯘᯬᯝᯉᯬ᯲ ᯤ ᯔ ᯘᯤ ᯑᯪᯇᯉ᯲ᯑᯀᯘᯪ᯲ᯂᯉᯬ᯲ ᯖᯀᯬᯀᯒ᯲ᯉ ᯤ, ᯎᯅᯩ ᯔᯝᯬᯞᯮ ᯔ ᯘᯬᯝᯉᯬ᯲ ᯐᯞᯬ᯲ᯔ ᯂᯪᯀᯉ᯲. ᯖᯮᯰ ᯉ ᯘᯬ ᯔᯬᯒᯉᯪᯀᯉ᯲ ᯑᯬ, ᯖᯮᯰ ᯘᯬᯀᯑ ᯔᯒᯬ᯲ᯖᯮᯑᯬᯘᯉ᯲; ᯔᯉ᯲ᯘᯤ ᯞᯬᯝᯰ ᯔ ᯇᯒᯬ᯲ᯖᯀᯬᯀᯒ᯲ ᯉ ᯘᯮᯔᯮᯒᯮᯰ, ᯔᯪᯑ ᯂᯪᯉᯑᯰᯩᯎᯉ᯲ᯉ, ᯉᯮᯝ ᯉᯀᯰᯩ ᯤ ᯑᯪ ᯒᯬᯂᯉ ᯅᯂᯩᯉᯉᯬ᯲ᯉ ᯘᯪᯀᯑᯬᯇᯉ᯲ᯉ.
Songon lada ma antong songon singkoru, songon na sada ma idaon, songon na tolu, pangeol ni gontingna songon dengke na mangolu; songon pusuk ni hatunggal, na so halinggoman, songon manuk sabur bintang, songon na sumillam borngin, di sondangna di pudina, dipatiur na di jolona, dibahen hinaulina, dibahen hinadengganna ; naeng ma i gogaan ni Portaoar na Sumurung bahen siadopanna.
ᯘᯬᯝᯉᯬ᯲ ᯞᯑ ᯔ ᯀᯉ᯲ᯖᯬᯰ ᯘᯬᯝᯉᯬ᯲ ᯘᯪᯰᯄ᯦ᯒᯮ, ᯘᯬᯝᯉᯬ᯲ ᯉ ᯘᯑ ᯔ ᯤᯑᯀᯉᯬ᯲, ᯘᯬᯝᯉᯬ᯲ ᯉ ᯖᯬᯞᯮ, ᯇᯝᯩᯀᯞᯬ᯲ ᯉᯪ ᯎᯉᯬ᯲ᯖᯪᯰᯉ ᯘᯬᯝᯉᯬ᯲ ᯑᯰᯩᯄᯰᯩ ᯉ ᯔᯝᯬᯞᯮ; ᯘᯬᯝᯉᯬ᯲ ᯇᯮᯘᯄ᯦ᯮ᯲ ᯉᯪ ᯂᯖᯮᯰᯎᯞ᯲, ᯉ ᯘᯬ ᯂᯞᯪᯰᯎᯬᯔᯉ᯲, ᯘᯬᯝᯉᯬ᯲ ᯔᯉᯄ᯦ᯮ᯲ ᯘᯅᯒᯮ᯲ ᯅᯉᯪ᯲ᯖᯰ, ᯘᯬᯝᯉᯬ᯲ ᯉ ᯘᯮᯔᯞᯪ᯲ᯞᯔ᯲ ᯅᯒᯬ᯲ᯝᯉᯪ᯲, ᯑᯪᯘᯉᯬ᯲ᯑᯰᯉ ᯑᯪ ᯇᯮᯑᯪᯉ, ᯑᯪ ᯇᯖᯪᯀᯒᯮ᯲ ᯉ ᯑᯪ ᯐᯬᯞᯬᯉ, ᯑᯪᯅᯂᯉᯩ᯲ ᯂᯪᯉᯥᯞᯪᯉ, ᯑᯪᯅᯂᯉᯩ᯲ ᯂᯪᯉᯑᯰᯩᯎᯉ᯲ᯉ; ᯉᯀᯰᯩ ᯔ ᯤ ᯎᯬᯎᯀᯉ᯲ ᯉᯪ ᯇᯒᯬ᯲ᯖᯀᯬᯀᯒ᯲ ᯉ ᯘᯮᯔᯮᯒᯮᯰ ᯅᯂᯉᯩ᯲ ᯘᯪᯀᯑᯬᯇᯉ᯲ᯉ.
Pitu panggaruan, ualu panggongonan, ianggo portaoar na sumurung, nunga tung mansai longang.
ᯇᯪᯖᯮ ᯇᯰᯎᯒᯮᯀᯉ᯲, ᯥᯀᯞᯮ ᯇᯰᯎᯬᯝᯬᯉᯉ᯲, ᯤᯀᯰᯎᯬ ᯇᯒᯬ᯲ᯖᯀᯬᯀᯒ᯲ ᯉ ᯘᯮᯔᯮᯒᯮᯰ, ᯉᯮᯝ ᯖᯮᯰ ᯔᯉ᯲ᯘᯤ ᯞᯬᯝᯰ.
Dung i mangkuling ma gana-ganaan i, hau jongjong anian, hau tibal tudosan, naung gabe jolma na mangolu, didok ma: "So tung manuan bulu ho, amang, di dalan-dalan ni babi ; unang ho mangulahon na so uhum, mambahen na so jadi! Tongka songon i bahenonmu tu ahu, ai damang do ho, borum do ahu. Ahu ma Si Boru Jongjong Anian si
Boru Tibal Tudosan Hau Jadi-jadian Hau Jadi Mamora" , ninna.
ᯑᯮᯰ ᯤ ᯔᯰᯄ᯦ᯮᯞᯪᯰ ᯔ ᯎᯉᯎᯉᯀᯉ᯲ ᯤ, ᯂᯥ ᯐᯬᯰᯐᯬᯰ ᯀᯉᯪᯀᯉ᯲, ᯂᯥ ᯖᯪᯅᯞ᯲ ᯖᯮᯑᯬᯘᯉ᯲, ᯉᯀᯮᯰ ᯎᯅᯩ ᯐᯞᯬ᯲ᯔ ᯉ ᯔᯝᯬᯞᯮ, ᯑᯪᯑᯄ᯦ᯬ᯲ ᯔ: "ᯘᯬ ᯖᯮᯰ ᯔᯉᯮᯀᯉ᯲ ᯅᯮᯞᯮ ᯂᯬ ᯀᯔᯰ ᯑᯪ ᯑᯞᯉ᯲ᯑᯞᯉ᯲ ᯉᯪ ᯅᯅᯪ; ᯥᯉᯰ ᯂᯬ ᯔᯝᯮᯞᯂᯉᯬ᯲ ᯉ ᯘᯬ ᯥᯂᯔᯮ᯲, ᯔᯔ᯲ᯅᯂᯉᯩ᯲ ᯉ ᯘᯬ ᯐᯑᯪ! ᯖᯬᯰᯄ᯦ ᯘᯬᯝᯉᯬ᯲ ᯤ ᯅᯂᯩᯉᯉᯬ᯲ᯔᯮ ᯖᯮ ᯀᯂᯮ, ᯀᯤ ᯑᯔᯰ ᯑᯬ ᯂᯬ, ᯅᯬᯒᯔᯮ᯲ ᯑᯬ ᯀᯂᯮ. ᯀᯂᯮ ᯔ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲ ᯂᯥ ᯐᯑᯪᯐᯑᯪᯀᯉ᯲ ᯂᯥ ᯐᯑᯪ ᯔᯔᯬᯒ", ᯉᯉᯪ᯲ᯉ.
Alai didok Portaoar na Sumurung i ma mangalusi : "Manang beha pe didok ho, ingkon saut do ho di ahu" , ninna. " Palias hatam, tongka songon i, ·ai damang do ho, borum do ahu" , ninna Si Boru Jongjong Anian mangalusi.
ᯀᯞᯤ ᯑᯪᯑᯄᯱᯬ᯲ ᯇᯬᯒ᯲ᯖᯀᯬᯀᯒ᯲ ᯉ ᯘᯮᯔᯮᯒᯮᯰ ᯤ ᯔ ᯔᯝᯞᯮᯘᯪ: "ᯔᯉᯰ ᯅᯩᯂ ᯇᯩ ᯑᯪᯑᯄ᯦ᯬ᯲ ᯂᯬ, ᯀᯪᯰᯄ᯦ᯉᯬ᯲ ᯘᯀᯖᯮ᯲ ᯑᯬ ᯂᯬ ᯑᯪ ᯀᯂᯮ", ᯉᯉᯪ᯲ᯉ. "ᯇᯞᯪᯀᯘ᯲ ᯂᯖᯔ᯲, ᯖᯬᯰᯄ᯦ ᯘᯬᯝᯉᯬ᯲ ᯤ, ᯀᯤ ᯑᯔᯰ ᯑᯬ ᯂᯬ, ᯅᯬᯒᯔᯮ᯲ ᯑᯬ ᯀᯂᯮ", ᯉᯉᯪ᯲ᯉ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯔᯝᯞᯮᯘᯪ
Dung i dipangke Datu na Sumurung, portaoar na lumobi ma nasa ula-ulaanna , dipatuat ma dohot dorma sitogu losung tu Si Boru Tibal Tudosan, hape indang belut, ai indada dumatu ibana sian i.
ᯑᯮᯰ ᯤ ᯑᯪᯇᯰᯄᯰᯩ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ ᯔ ᯉᯘ ᯥᯞᯥᯞᯀᯉ᯲ᯉ, ᯑᯪᯇᯖᯮᯀᯖ᯲ ᯔ ᯑᯬᯂᯖᯬ᯲ ᯑᯒᯬ᯲ᯔ ᯘᯪᯖᯬᯎᯮ ᯞᯬᯘᯮᯰ ᯖᯮ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲, ᯂᯇᯩ ᯀᯉᯪ᯲ᯑᯰ ᯅᯩᯞᯖᯮ᯲, ᯀᯤ ᯀᯉᯪ᯲ᯑᯑ ᯑᯮᯔᯖᯮ ᯤᯅᯉ ᯘᯪᯀᯉ᯲ ᯤ.
Dung i didok Si Boru Jongjong Anian muse : "Boti ma i amang ; unang be sai tuntun roham dompak ahu , indang aha laba ni i, ai borum do ahu."
ᯑᯮᯰ ᯤ ᯑᯪᯑᯄ᯦ᯬ᯲ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯔᯮᯘᯩ: "ᯅᯬᯖᯪ ᯔ ᯤ ᯀᯔᯰ; ᯥᯉᯰ ᯅᯩ ᯘᯤ ᯖᯉᯮ᯲ᯖᯉᯮ᯲ ᯒᯬᯂᯔ᯲ ᯑᯔᯬ᯲ᯇᯄ᯦᯲ ᯀᯂᯮ, ᯀᯉᯪ᯲ᯑᯰ ᯀᯂ ᯞᯅ ᯉᯪ ᯤ, ᯀᯤ ᯅᯬᯒᯔᯮ᯲ ᯑᯬ ᯀᯂᯮ."
Dung i didok Portaoar na Sumurung ma mangalusi : "Ba molo songon i ma, nimmu, ale inang, ba na uli! Balintang ma pagabe, tumandakkon sitadoan, arinta ma manggabe , hita masipaolooloan, tumpahon ni ompunta sombaon dohot porsumangotan. Ba molo borungku ma ho, ba amam ma ahu", ninna.
ᯑᯮᯰ ᯤ ᯑᯪᯑᯄ᯦ᯬ᯲ ᯇᯒᯬ᯲ᯖᯀᯬᯀᯒ᯲ ᯉ ᯘᯮᯔᯮᯒᯮᯰ ᯔ ᯔᯝᯞᯮᯘᯪ: "ᯅ ᯔᯬᯞᯬ ᯘᯬᯝᯉᯬ᯲ ᯤ ᯔ, ᯉᯔᯪ᯲ᯔᯮ, ᯀᯞᯩ ᯤᯉᯰ, ᯅ ᯉ ᯥᯞᯪ! ᯅᯞᯉᯪ᯲ᯖᯰ ᯔ ᯇᯎᯅᯩ, ᯖᯮᯔᯉ᯲ᯑᯄ᯦᯲ᯄ᯦ᯉᯬ᯲ ᯘᯪᯖᯑᯬᯀᯉ᯲, ᯀᯒᯉᯪ᯲ᯖ ᯔ ᯔᯰᯎᯅᯩ, ᯂᯪᯖ ᯔᯘᯪᯇᯀᯬᯞᯬᯀᯬᯞᯬᯀᯉ᯲, ᯖᯔᯮ᯲ᯇᯂᯉᯬ᯲ ᯉᯪ ᯀᯔᯬ᯲ᯇᯉᯮ᯲ᯖ ᯘᯔᯬ᯲ᯅᯀᯉᯬ᯲ ᯑᯬᯂᯖᯬ᯲ ᯇᯒᯬ᯲ᯘᯮᯔᯝᯬᯖᯉ᯲. ᯅ ᯔᯬᯞᯬ ᯅᯬᯒᯮᯰᯄ᯦ᯮ ᯔ ᯂᯬ, ᯅ ᯀᯔᯔ᯲ ᯔ ᯀᯂᯮ", ᯉᯉᯪ᯲ᯉ.
Dung i didok Si Boru Tibal Tudosan : "I ma tutu , ale amang, bangun-bangun na bara, tabo paura-uraon, molo nunga nidok hata, tongka pauba-ubaon ; hori ihot ni doton, hata do siingoton!" ninna.
ᯑᯮᯰ ᯤ ᯑᯪᯑᯂᯬ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲: "ᯤ ᯔ ᯖᯮᯖᯮ, ᯀᯞᯩ ᯀᯔᯰ, ᯅᯝᯉᯮ᯲ᯅᯝᯉᯮ᯲ ᯉ ᯅᯒ, ᯖᯅᯬ ᯇᯥᯒᯥᯒᯀᯉᯬ᯲, ᯔᯬᯞᯬ ᯉᯮᯝ ᯉᯪᯑᯄ᯦ᯬ᯲ ᯂᯖ, ᯖᯬᯰᯄ᯦ ᯇᯥᯅᯥᯅᯀᯉᯬ᯲; ᯂᯬᯒᯪ ᯤᯂᯖᯬ᯲ ᯉᯪ ᯑᯬᯖᯉᯬ᯲, ᯂᯖ ᯑᯬ ᯘᯪᯤᯝᯬᯖᯉᯬ᯲! "ᯉᯉᯪ᯲ᯉ.
Dung i didok datu na sumurung i ma, portaoar na lumobi: "Ba molo songon i, beta dainang ma tu huta!" ninna.
ᯑᯮᯰ ᯤ ᯑᯪᯑᯄᯱᯬ᯲ ᯑᯖᯮ ᯉ ᯘᯮᯔᯮᯒᯮᯰ ᯤ ᯔ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ: "ᯅ ᯔᯬᯞᯬ ᯘᯬᯝᯉᯬ᯲ ᯤ, ᯅᯩᯖ ᯑᯤᯉᯰ ᯔ ᯖᯮ ᯂᯮᯖ! "ᯉᯉᯪ᯲ᯉ.
Alai didok Si Boru Tibal .'Tudosan ma mangalusi : "Ia burjum do naeng manogihon ahu tu huta, ingkon jolo paluonmu do gondang sabangunan, ingkon jolo alapanmu do pangulu bolon, porsanggul baringin manomu-nomu ahu ; dung i ingkon dohononmu do ahu borum, na tubu pandatuan", ninna.
ᯀᯞᯤ ᯑᯪᯑᯄ᯦ᯬ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲ ᯔ ᯔᯝᯞᯮᯘᯪ: "ᯤᯀ ᯅᯒᯮ᯲ᯐᯔᯮ᯲ ᯑᯬ ᯉᯀᯰᯩ ᯔᯉᯬᯎᯪᯂᯉᯬ᯲ ᯀᯂᯮ ᯖᯮ ᯂᯮᯖ, ᯀᯪᯰᯄ᯦ᯉᯬ᯲ ᯐᯬᯞᯬ ᯇᯞᯮᯀᯉᯬ᯲ᯔᯮ ᯑᯬ ᯎᯉᯬ᯲ᯑᯰ ᯘᯅᯝᯮᯉᯉ᯲, ᯀᯪᯰᯄ᯦ᯉᯬ᯲ ᯐᯬᯞᯬ ᯀᯞᯇᯉ᯲ᯔᯮ ᯑᯬ ᯇᯝᯮᯞᯮ ᯅᯬᯞᯉᯬ᯲, ᯇᯒᯬ᯲ᯘᯰᯎᯞᯮ᯲ ᯅᯒᯪᯝᯉᯪ᯲ ᯔᯉᯬᯔᯮᯉᯬᯔᯮ ᯀᯂᯮ; ᯑᯮᯰ ᯤ ᯀᯪᯰᯄ᯦ᯉᯬ᯲ ᯑᯬᯂᯬᯉᯉᯬ᯲ᯔᯮ ᯑᯬ ᯀᯂᯮ ᯅᯬᯒᯮᯔ᯲, ᯉ ᯖᯮᯅᯮ ᯇᯉ᯲ᯑᯖᯮᯀᯉ᯲", ᯉᯉᯪ᯲ᯉ.
Dung i dioloi ma sude hata ni boruna i. Dung i mordalan ma nasida, digondangi ma tutu, sahat ma tu huta.
ᯑᯮᯰ ᯤ ᯑᯪᯀᯬᯞᯬᯤ ᯔ ᯘᯮᯑᯩ ᯂᯖ ᯉᯪ ᯅᯬᯒᯮᯉ ᯤ. ᯑᯮᯰ ᯤ ᯔᯒᯬ᯲ᯑᯞᯉ᯲ ᯔ ᯉᯘᯪᯑ, ᯑᯪ ᯎᯉᯬ᯲ᯑᯝᯪ ᯔ ᯖᯮᯖᯮ, ᯘᯂᯖ᯲ ᯔ ᯖᯮ ᯂᯮᯖ.
Jadi didok Si Boru Jongjong Anian Si Boru Tibal Tudosan ma : "Molo manortor ahu, ale amang, ingkon jolo rimbe-rimbean do para-para", ninna.
ᯐᯑᯪ ᯑᯪᯑᯄᯱᯬ᯲ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲ ᯔ: "ᯔᯬᯞᯬ ᯔᯉᯒᯬ᯲ᯖᯒᯬ᯲ ᯀᯂᯮ, ᯀᯞᯩ ᯀᯔᯰ, ᯀᯪᯰᯄ᯦ᯉᯬ᯲ ᯐᯬᯞᯬ ᯒᯔᯪ᯲ᯅᯩᯒᯔᯪ᯲ᯅᯩᯀᯉ᯲ ᯑᯬ ᯇᯒᯇᯒ", ᯉᯉᯪ᯲ᯉ.
Alai didok amana i ma: "indang hea masa songon i, indang dung rimbean para-para, ai naeng do tangkas panortor idaon ni paninondur" , ninna.
ᯀᯞᯤ ᯑᯪᯑᯄ᯦ᯬ᯲ ᯀᯔᯉ ᯤ ᯔ: "ᯀᯉᯪ᯲ᯑᯰ ᯂᯩᯀ ᯔᯘ ᯘᯬᯝᯉᯬ᯲ ᯤ, ᯀᯉᯪ᯲ᯑᯰ ᯑᯮᯰ ᯒᯔᯪ᯲ᯅᯩᯀᯉ᯲ ᯇᯒᯇᯒ, ᯀᯤ ᯉᯀᯰᯩ ᯑᯬ ᯖᯰᯄ᯦ᯘ᯲ ᯇᯉᯒᯬ᯲ᯖᯒᯬ᯲ ᯤᯑᯀᯉᯬ᯲ ᯉᯪ ᯇᯉᯪᯉᯉᯬ᯲ᯑᯒᯮ᯲", ᯉᯉᯪ᯲ᯉ.
"Anggo so songon i do, ale amang indang manortor ahu", ninna Si Boru Tibal Tudosan muse .
"ᯀᯰᯎᯬ ᯘᯬ ᯘᯬᯝᯉᯬ᯲ ᯤ ᯑᯬ, ᯀᯞᯩ ᯀᯔᯰ ᯀᯉᯪ᯲ᯑᯰ ᯔᯉᯒᯬ᯲ᯖᯒᯬ᯲ ᯀᯂᯮ", ᯉᯉᯪ᯲ᯉ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲ ᯔᯮᯘᯩ.
"Unang so i do sibahen na manortor boru ni raja i, ba aha ia nirimberimbean para-para i" , ninna angka :paninondur i. Dung i saut ma dirimbe-rimbei nasida para-para i.
"ᯥᯉᯰ ᯘᯬ ᯤ ᯑᯬ ᯘᯪᯅᯂᯉᯩ᯲ ᯉ ᯔᯉᯒᯬ᯲ᯖᯒᯬ᯲ ᯅᯬᯒᯮ ᯉᯪ ᯒᯐ ᯤ, ᯅ ᯀᯂ ᯤᯀ ᯉᯪᯒᯔᯪ᯲ᯅᯩᯒᯔᯪ᯲ᯅᯩᯀᯉ᯲ ᯇᯒᯇᯒ ᯤ", ᯉᯉᯪ᯲ᯉ ᯀᯰᯄ᯦: ᯇᯉᯪᯉᯉᯬ᯲ᯑᯒᯮ᯲ ᯤ. ᯑᯮᯰ ᯤ ᯘᯀᯖᯮ᯲ ᯔ ᯑᯪᯒᯔᯪ᯲ᯅᯩᯒᯔᯪ᯲ᯅᯩᯤ ᯉᯘᯪᯑ ᯇᯒᯇᯒ ᯤ.
Manortor ma antong Si Boru Jongjong Anian Si Boru Tibal Tudosan, tung na so moranian do , soada tudosanna, pangurdot ni dagingna, pandauk ni tanganna.
ᯔᯉᯒᯬ᯲ᯖᯒᯬ᯲ ᯔ ᯀᯉ᯲ᯖᯬᯰ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲, ᯖᯮᯰ ᯉ ᯘᯬ ᯔᯬᯒᯉᯪᯀᯉ᯲ ᯑᯬ, ᯘᯬᯀᯑ ᯖᯮᯑᯬᯘᯉ᯲ᯉ, ᯇᯝᯒᯮ᯲ᯑᯖᯬ᯲ ᯉᯪ ᯑᯎᯪᯰᯉ, ᯇᯉ᯲ᯑᯀᯄ᯦ᯮ᯲ ᯉᯪ ᯖᯝᯉ᯲ᯉ.
Longang ma sude paninondur i, patupeut ma gual-gual sian tangan ni porgonsi, angkadekdek ma dohot diingot porsarune be mangurngat sarunena.
ᯞᯬᯝᯰ ᯔ ᯘᯮᯑᯩ ᯇᯉᯪᯉᯉᯬ᯲ᯑᯒᯮ᯲ ᯤ, ᯇᯖᯮᯇᯩᯀᯖᯮ᯲ ᯔ ᯎᯮᯀᯞ᯲ᯎᯮᯀᯞ᯲ ᯘᯪᯀᯉ᯲ ᯖᯝᯉ᯲ ᯉᯪ ᯇᯒᯬ᯲ᯎᯉᯬ᯲ᯘᯪ, ᯀᯰᯄᯱ ᯑᯄᯰᯩᯑᯄᯰᯩ ᯔ ᯑᯬᯂᯖᯬ᯲ ᯑᯪᯤᯝᯖᯬ᯲ ᯇᯒᯬ᯲ᯘᯒᯮᯉᯩ ᯅᯩ ᯔᯝᯒᯮ᯲ᯝᯖ᯲ ᯘᯒᯮᯉᯩᯉ.
Ia dung songon i, didok Boru Tibal Tudosan ma: "Inang, sapot ni nipingki, soro ni aringkon ; apala tung manortor ahu sahali, nunga masa na so uhum on! Inang 'da ba inang, angkadekdek gual-gual, mordabuan angka ogung. Songon i ma hape hangalan ni Si Boru Jongjong Anian Si Boru Tibal Tudosan" , ninna. Dung i sae ma gondang i, tiur ma siulubalang ari.
ᯤᯀ ᯑᯮᯰ ᯘᯬᯝᯉᯬ᯲ ᯤ, ᯑᯪᯑᯄ᯦ᯬ᯲ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲ ᯔ:" ᯤᯉᯰ, ᯘᯇᯖᯬ᯲ ᯉᯪ ᯉᯪᯇᯪᯰᯄ᯦ᯪ, ᯘᯬᯒᯬ ᯉᯪ ᯀᯒᯪᯰᯄ᯦ᯉᯬ᯲; ᯀᯇᯞ ᯖᯮᯰ ᯔᯉᯒᯬ᯲ᯖᯒᯬ᯲ ᯀᯂᯮ ᯘᯂᯞᯪ ᯉᯮᯝ ᯔᯘ ᯉ ᯘᯬ ᯥᯂᯔᯮ᯲ ᯀᯉᯬ᯲! ᯤᯉᯰ ᯑ ᯅ ᯤᯉᯰ, ᯀᯰᯄ᯦ ᯑᯄᯰᯩ᯲ᯑᯄᯰᯩ᯲ ᯎᯮᯀᯞ᯲ᯎᯮᯀᯞ᯲, ᯔᯒᯬ᯲ᯑᯅᯮᯀᯉ᯲ ᯀᯰᯄ᯦ ᯀᯬᯎᯮᯰ ᯘᯬᯝᯉᯬ᯲ ᯤ ᯔ ᯂᯇᯩ ᯂᯝᯞᯉ᯲ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲", ᯉᯉ᯲ᯪ᯲ᯉ. ᯑᯮᯰ ᯤ ᯘᯀᯩ ᯔ ᯎᯉᯬ᯲ᯑᯰ ᯤ, ᯖᯪᯀᯒᯮ᯲ ᯔ ᯘᯪᯥᯞᯮ ᯅᯞᯰ ᯀᯒᯪ.
Ia dung ma i, dipauli Datu na Sumurung, portaoar na lumobi ma pantangan, portonunan ni boruna i, pantangan andang-andang, pantangan undung-undung, pantangan onding-onding, na rumahut-rahut ibana, na pinijor-pijor holing, songon rahut ni ogung oloan, portonunan ni Si-Boru Jongjong Anian Si Boru Tibal Tudosan, Mortonun ma ibana antong disi.
ᯤᯀ ᯑᯮᯰ ᯔ ᯤ, ᯑᯪᯇᯥᯞᯪ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ ᯔ ᯇᯉ᯲ᯖᯝᯉ᯲, ᯇᯒᯬ᯲ᯖᯬᯉᯮᯉᯉ᯲ ᯉᯪ ᯅᯬᯒᯮᯉ ᯤ, ᯇᯉ᯲ᯖᯝᯉ᯲ ᯀᯉ᯲ᯑᯰᯀᯉ᯲ᯑᯰ, ᯇᯉ᯲ᯖᯝᯉ᯲ ᯀᯉᯮ᯲ᯑᯮᯰᯀᯉᯮ᯲ᯑᯮᯰ ᯇᯉ᯲ᯖᯝᯉ᯲ ᯀᯉᯬ᯲ᯑᯪᯰᯀᯉᯬ᯲ᯑᯪᯰ, ᯉ ᯒᯮᯔᯂᯖᯮ᯲ ᯒᯂᯖᯮ᯲ ᯤᯅᯉ, ᯉ ᯇᯪᯉᯪᯐᯒᯬ᯲ᯇᯪᯐᯒᯬ᯲ ᯂᯬᯞᯪᯰ, ᯘᯬᯝᯉᯬ᯲ ᯒᯂᯖᯮ᯲ ᯉᯪ ᯀᯬᯎᯮᯰ ᯀᯬᯞᯬᯀᯉ᯲, ᯇᯒᯬ᯲ᯖᯬᯉᯮᯉᯉ᯲ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲, ᯔᯒᯬ᯲ᯖᯬᯉᯉᯮ᯲ ᯔ ᯤᯅᯉ ᯀᯉ᯲ᯖᯬᯰ ᯑᯪᯘᯪ.
Ia soara ni baligana i, songon sidomdom borngin, songon sigontam arian, songon na morolop-olop, songon na moria-ia, songon na mangkatai, songon na manjou-jou di situan raja doli.
ᯤᯀ ᯘᯬᯀᯒ ᯉᯪ ᯅᯞᯪᯎᯉ ᯤ, ᯘᯬᯝᯉᯬ᯲ ᯘᯪᯑᯔᯬ᯲ᯑᯔᯬ᯲ ᯅᯒᯬ᯲ᯝᯉᯪ᯲ ᯘᯬᯝᯉᯬ᯲ ᯘᯪᯎᯉᯬ᯲ᯖᯔ᯲ ᯀᯒᯪᯀᯉ᯲, ᯘᯬᯝᯉᯬ᯲ ᯉ ᯔᯬᯒᯬᯞᯇᯬ᯲ᯀᯬᯞᯇᯬ᯲, ᯘᯬᯝᯉᯬ᯲ ᯉ ᯔᯬᯒᯪᯀᯤᯀ, ᯘᯬᯝᯉᯬ᯲ ᯉ ᯔᯰᯄ᯦ᯖᯤ, ᯘᯬᯝᯉᯬ᯲ ᯉ ᯔᯉ᯲ᯐᯬᯥᯐᯬᯥ ᯑᯪ ᯘᯪᯖᯮᯀᯉ᯲ ᯒᯐ ᯑᯬᯞᯪ.
Umbege i antong angka situan raja doli-doli, morudur-udur ma nasida, morumbol-umbol ro tu lambung pantanganna i, angka anak ni na sangap, tubu ni na maulibulung, angka porpahean na uli jala portali-tali horung-korung.
ᯀᯔᯮ᯲ᯅᯩᯎᯩ ᯤ ᯀᯉ᯲ᯖᯬᯰ ᯀᯰᯄ᯦ ᯘᯪ ᯖᯮᯀᯉ᯲ ᯒᯐ ᯑᯬᯞᯪᯑᯬᯞᯪ, ᯔᯬᯒᯮᯑᯒᯮ᯲ᯥᯑᯒᯮ᯲ ᯔ ᯉᯘᯪᯑ, ᯔᯒᯬ᯲ᯀᯔᯮ᯲ᯅᯞᯬ᯲ᯀᯔᯮ᯲ᯅᯞᯬ᯲ ᯒᯬ ᯖᯮ ᯞᯔ᯲ᯅᯮᯰ ᯇᯉ᯲ᯖᯝᯉ᯲ᯉ ᯤ, ᯀᯰᯄ᯦ ᯀᯉᯄ᯦᯲ ᯉᯪ ᯉ ᯘᯝᯇ᯲, ᯖᯮᯅᯮ ᯉᯪ ᯉ ᯔᯥᯞᯪᯅᯮᯞᯮᯰ, ᯀᯰᯄ᯦ ᯇᯒᯬ᯲ᯇᯂᯩᯀᯉ᯲ ᯉ ᯥᯞᯪ ᯐᯞ ᯇᯒᯬ᯲ᯖᯞᯪᯖᯞᯪ ᯂᯬᯒᯮᯰᯂᯬᯒᯮᯰ
Alai atik pe songon i torop angka siraja ni doli-doli ro tu lambung pantangan ni Si Boru Jongjong Anian Si Boru Tibal Tudosan, inda tung adong barani, na hum roha mandok hata sangkambaba tu ibana.
ᯀᯞᯤ ᯀᯖᯄ᯦ᯪ᯲ ᯇᯩ ᯘᯬᯝᯉᯬ᯲ ᯤ ᯖᯬᯒᯇᯬ᯲ ᯀᯰᯄ᯦ ᯘᯪᯒᯐ ᯉᯪ ᯑᯬᯞᯪᯑᯬᯞᯪ ᯒᯬ ᯖᯮ ᯞᯔ᯲ᯅᯮᯰ ᯇᯉ᯲ᯖᯝᯉ᯲ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲, ᯀᯉᯪ᯲ᯑ ᯖᯮᯰ ᯀᯑᯬᯰ ᯅᯒᯉᯪ, ᯉ ᯂᯔᯮ᯲ ᯒᯬᯂ ᯔᯉ᯲ᯑᯄ᯦ᯬ᯲ ᯂᯖ ᯘᯰᯄ᯦ᯔ᯲ᯅᯅ ᯖᯮ ᯤᯅᯉ.
Masiboan utina pe antong angka doli-doli na ro i, masipatuduhon lehetna, tung na so .adong do na sininta ni roha Si Boru Jongjong Anian, tung na so ada do sian i na tinodo ni simalolongna.
ᯔᯘᯪᯅᯬᯀᯉ᯲ ᯥᯖᯪᯉ ᯇᯩ ᯀᯉ᯲ᯖᯬᯰ ᯀᯰᯄ᯦ ᯑᯬᯞᯪᯑᯬᯞᯪ ᯉ ᯒᯬ ᯤ, ᯔᯘᯪᯇᯖᯮᯑᯮᯂᯉᯬ᯲ ᯞᯩᯂᯖᯩ᯲ᯉ, ᯖᯮᯰ ᯉ ᯘᯬ ᯀᯑᯬᯰ ᯑᯬ ᯉ ᯘᯪᯉᯉᯪ᯲ᯖ ᯉᯪ ᯒᯬᯂ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲, ᯖᯮᯰ ᯉ ᯘᯬᯀᯑ ᯑᯬ ᯘᯪᯀᯉ᯲ ᯤ ᯉ ᯖᯪᯉᯬᯑᯬ ᯉᯪ ᯘᯪᯔᯞᯬᯞᯬᯰᯉ.
Suak-suak ni dingding binahen sulu-sulu ni api, inda tung adong patudoson songon Si Boru Jongjong Anian Si Boru Tibal Tudosan di siulubalang ari. •
ᯘᯮᯀᯄ᯦᯲ᯘᯮᯀᯄ᯦᯲ ᯉᯪ ᯑᯪᯰᯑᯪᯰ ᯅᯪᯉᯂᯉᯩ᯲ ᯘᯮᯞᯮᯘᯮᯞᯮ ᯉᯪ ᯀᯇᯪ, ᯀᯉᯬ᯲ᯑ ᯖᯮᯰ ᯀᯑᯬᯰ ᯇᯖᯮᯑᯬᯘᯉᯬ᯲ ᯘᯬᯝᯉᯬ᯲ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲ ᯑᯪ ᯘᯪᯥᯞᯮᯅᯞᯰ ᯀᯒᯪ.
Ia morbarita ma porbarita, mangalu-alu ma pangalu-alu, sar ma barita ni Si Boru Jongjong Anian tu hapoltahan ni bulan , tu habinsaran ni mata ni ari.
ᯤᯀ ᯔᯒᯬ᯲ᯅᯒᯪᯖ ᯔ ᯇᯒᯬ᯲ᯅᯒᯪᯖ, ᯔᯝᯞᯮᯀᯞᯮ ᯔ ᯇᯝᯞᯮᯀᯞᯮ, ᯘᯒ᯲ ᯔ ᯅᯒᯪᯖ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯖᯮ ᯂᯇᯞᯬ᯲ᯖᯂᯉ᯲ ᯉᯪ ᯅᯮᯞᯉ᯲, ᯖᯮ ᯂᯅᯉᯬ᯲ᯘᯒᯉ᯲ ᯉᯪ ᯔᯖ ᯉᯪ ᯀᯒᯪ
Dibege Nai Datu Tantan Debata Guru Satia Bulan, laho tu pordatuan, Guru Satia Raja , ia laho tu porrajaan, na morgoar Si Aji Pastimalaning ia laho tu pordolian, na morgoar Si Tuan Purbalaning, ia laho tu pangulaan, na morgoar Si Songkir Ulubalang, ia laho tu habeguon, i ma halak Guru Satia Raja, naung tangkas di undang-undang, naung tasak di hata hata, naung singkop di porguruan, naung tang di porbinotoanna.
ᯑᯪᯅᯩᯎᯩ ᯉᯤ ᯑᯖᯮ ᯖᯉ᯲ᯖᯉ᯲ ᯑᯩᯅᯖ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯞᯂᯬ ᯖᯮ ᯇᯒᯬ᯲ᯑᯖᯮᯀᯉ᯲, ᯎᯮᯒᯮ ᯘᯖᯪᯀ ᯒᯐ, ᯤᯀ ᯞᯂᯬ ᯖᯮ ᯇᯒᯬ᯲ᯒᯐᯀᯉ᯲, ᯉ ᯔᯒᯬ᯲ᯎᯬᯀᯒ᯲ ᯘᯪ ᯀᯐᯪ ᯇᯘ᯲ᯖᯪᯔᯞᯉᯪᯰ ᯤᯀ ᯞᯂᯬ ᯖᯮ ᯇᯒᯬ᯲ᯑᯬᯞᯪᯀᯉ᯲, ᯉ ᯔᯒᯬ᯲ᯎᯬᯀᯒ᯲ ᯘᯪ ᯖᯮᯀᯉ᯲ ᯇᯒᯮ᯲ᯅᯞᯉᯪᯰ, ᯤᯀ ᯞᯂᯬ ᯖᯮ ᯇᯝᯮᯞᯀᯉ᯲, ᯉ ᯔᯒᯬ᯲ᯎᯬᯀᯒ᯲ ᯘᯪ ᯘᯬᯰᯄ᯦ᯒᯪ᯲ ᯥᯞᯮᯅᯞᯰ, ᯤᯀ ᯞᯂᯬ ᯖᯮ ᯂᯅᯩᯎᯮᯀᯉᯬ᯲, ᯤ ᯔ ᯂᯞᯄ᯦᯲ ᯎᯮᯒᯮ ᯘᯖᯪᯀ ᯒᯐ, ᯉᯀᯮᯰ ᯖᯰᯄ᯦ᯘ᯲ ᯑᯪ ᯀᯉᯮ᯲ᯑᯰᯀᯉᯮ᯲ᯑᯰ, ᯉᯀᯮᯰ ᯖᯘᯄ᯦᯲ ᯑᯪ ᯂᯖᯂᯖ, ᯉᯀᯮᯰ ᯘᯪᯰᯄ᯦ᯇᯬ᯲ ᯑᯪ ᯇᯒᯬ᯲ᯎᯮᯒᯮᯀᯉ᯲, ᯉᯀᯮᯰ ᯖᯰ ᯑᯪ ᯇᯒᯬ᯲ᯅᯪᯉᯬᯖᯬᯀᯉ᯲ᯉ.
Dibuat ma imbulu ni horbo dibahen tu garung-garung: dibuat imbulu ni hoda, dibahen tu garung-garung, dibuat imbulu ni lombu, dibahen tu garung-garung; dipapungu ma i sudena.
ᯑᯪᯅᯮᯀᯖ᯲ ᯔ ᯀᯔᯪ᯲ᯅᯮᯞᯮ ᯉᯪ ᯂᯒᯬ᯲ᯅᯬ ᯑᯪᯅᯂᯉᯩ᯲ ᯖᯮ ᯎᯒᯮᯰᯎᯒᯮᯰ: ᯑᯪᯅᯮᯀᯖ᯲ ᯀᯔᯪ᯲ᯅᯮᯞᯮ ᯉᯪ ᯂᯬᯑ, ᯑᯪᯅᯂᯉᯩ᯲ ᯖᯮ ᯎᯒᯮᯰᯎᯒᯮᯰ, ᯑᯪᯅᯮᯀᯖ᯲ ᯀᯔᯪ᯲ᯅᯮᯞᯮ ᯉᯪ ᯞᯔᯬ᯲ᯅᯮ ᯑᯪᯅᯂᯉᯩ᯲ ᯖᯮ ᯎᯒᯮᯰᯎᯒᯮᯰ ᯑᯪᯇᯇᯮᯝᯮ ᯔ ᯤ ᯘᯮᯑᯩᯉ.
Dung i borhat ma ibana, diboan ma tungkotna, tungkot maradang adang, tungkot morudung-udung, tungkot laho mordalan, siarudan laho hundul. Mordalan ma ibana sahat tu huta ni Datu na Sumurung, portaoar na lumobi, dibege ma soara ni baliga ni Si Boru Jongjong Anian Si Boru Tibal Tudusan, na so moranian, na so. mortudosan.
ᯑᯮᯰ ᯤ ᯅᯒᯬ᯲ᯂᯖ᯲ ᯔ ᯤᯅᯉ, ᯑᯪᯅᯬᯀᯉ᯲ ᯔ ᯖᯮᯰᯄ᯦ᯖᯬ᯲ᯉ, ᯖᯮᯰᯄ᯦ᯖᯬ᯲ ᯔᯒᯑᯰᯀᯑᯰ, ᯖᯰᯄ᯦ᯖᯬ᯲ ᯔᯬᯒᯮᯑᯮᯰᯥᯑᯮᯰ ᯖᯮᯰᯂᯖᯬ᯲ ᯞᯂᯬ ᯔᯒᯬ᯲ ᯑᯞᯉ᯲, ᯘᯪᯀᯒᯮᯑᯉ᯲ ᯞᯂᯬ ᯂᯉᯮ᯲ᯑᯞᯮ᯲ ᯔᯒᯬ᯲ᯑᯞᯉ᯲ ᯔ ᯤᯅᯉ ᯘᯂᯖ᯲ ᯖᯮ ᯂᯮᯖ ᯉᯪ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ, ᯑᯪᯅᯩᯎᯩ ᯔ ᯘᯬᯀᯒ ᯉᯪ ᯅᯞᯪᯎ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪᯅᯬᯒᯮ ᯖᯪᯅᯞ᯲ ᯖᯮᯑᯮᯘᯉ᯲, ᯉ ᯘᯬ ᯔᯬᯒᯉᯪᯀᯉ᯲, ᯉ ᯘᯬ ᯔᯒ᯲ᯬ᯲ᯖᯮᯑᯬᯘᯉ᯲.
Di na laho bongot ibana tu huta, diida ma di baba harbangan, gana-gana sipitu ulu, sipitu hali mamereng, ia sahali ibana mamereng, sahalak mate bahenonna, ia pitu hali ibana mamereng, pitu halak mate jonggoronna, asa indada na tartaon panailina, ai lobi do songon pangonai ni porhas panjonggorna.
ᯑᯪ ᯉ ᯞᯂᯬ ᯅᯬᯝᯖᯬ᯲ ᯤᯅᯉ ᯖᯮ ᯂᯮᯖ, ᯑᯪᯤᯑ ᯔ ᯑᯪ ᯅᯅ ᯂᯒ᯲ᯅᯝᯉ᯲, ᯎᯉᯎᯉ ᯘᯪᯇᯪᯖᯮ ᯥᯞᯮ, ᯘᯪᯇᯪᯖᯮ ᯂᯞᯪ ᯔᯔᯩᯒᯩ᯦, ᯤᯀ ᯘᯂᯞᯪ ᯤᯅᯉ ᯔᯔᯩᯒᯩ᯦, ᯘᯂᯞᯄ᯦᯲ ᯔᯖᯩ ᯅᯂᯩᯉᯉᯬ᯲ᯉ, ᯤᯀ ᯇᯪᯖᯮ ᯂᯞᯪ ᯤᯅᯉ ᯔᯔᯩᯒᯩ᯦, ᯇᯪᯖᯮ ᯂᯞᯄ᯦᯲ ᯔᯖᯩ ᯐᯬᯰᯎᯬᯒᯉᯬ᯲ᯉ, ᯀᯘ ᯀᯉᯪ᯲ᯑᯑ ᯉ ᯖᯒ᯲ᯖᯀᯉᯬ᯲ ᯇᯉᯤᯞᯪᯉ, ᯀᯤ ᯞᯬᯅᯪ ᯑᯬ ᯘᯬᯝᯉᯬ᯲ ᯇᯝᯬᯉᯤ ᯉᯪ ᯇᯒᯬ᯲ᯂᯘ᯲ ᯇᯉ᯲ᯐᯬᯰᯎᯒᯬ᯲ᯉ.
Dung i dituju Guru Satia Bulan ma gana-gana i, gabe mordekdehan ma matana.
ᯑᯮᯰ ᯤ ᯑᯪᯖᯮᯐᯮ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯎᯉᯎᯉ ᯤ, ᯎᯅᯩ ᯔᯒᯬ᯲ᯑᯄᯩ᯦᯲ᯑᯩᯂᯉ᯲ ᯔ ᯔᯖᯉ.
Dung i manaili ma Si Boru Jongjong Anian, diida ma naung sega gana-gana i dituju baoa i, gabe didok ma tu amana: "Beha ma i, ale amang, datu na sumurung, hehe ma ho, ai nunga lengse gana-ganaan na di harbangan an, dibahen baoa, na so tinanda an!" ninna.
ᯑᯮᯰ ᯤ ᯔᯉᯤᯞᯪ ᯔ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲, ᯑᯪᯤᯑ ᯔ ᯉᯀᯮᯰ ᯘᯩᯎ ᯎᯉᯎᯉ ᯤ ᯑᯪᯖᯮᯐᯮ ᯅᯀᯬᯀ ᯤ, ᯎᯅᯩ ᯑᯪᯑᯄ᯦ᯬ᯲ ᯔ ᯖᯮ ᯀᯔᯉ: "ᯅᯩᯂ ᯔ ᯤ, ᯀᯞᯩ ᯀᯔᯰ, ᯑᯖᯮ ᯉ ᯘᯮᯔᯮᯒᯮᯰ, ᯂᯩᯂᯩ ᯔ ᯂᯬ, ᯀᯤ ᯉᯮᯝ ᯞᯰᯩᯘᯩ ᯎᯉᯎᯉᯀᯉ᯲ ᯉ ᯑᯪ ᯂᯒ᯲ᯅᯝᯉ᯲ ᯀᯉ᯲, ᯑᯪᯅᯂᯉᯩ᯲ ᯅᯀᯬᯀ, ᯉ ᯘᯬ ᯖᯪᯉᯉ᯲ᯑ ᯀᯉ᯲!" ᯉᯉᯪ᯲ᯉ.
Alai didok Pambarbar na Sumurung ma mangalusi, "Ba ise ma na hum, tung ise ma barani mandonohi gana-ganaanta i, anggo so na naeng mago do ibana" , ninna.
ᯀᯞᯤ ᯑᯪᯑᯄ᯦ᯬ᯲ ᯇᯔ᯲ᯅᯒ᯲ᯅᯒ᯲ ᯉ ᯘᯮᯔᯮᯒᯮᯰ ᯔ ᯔᯝᯞᯮᯘᯪ, "ᯅ ᯤᯘᯩ ᯔ ᯉ ᯂᯔᯮ᯲, ᯖᯮᯰ ᯤᯘᯩ ᯔ ᯅᯒᯉᯪ ᯔᯉ᯲ᯑᯬᯉᯬᯂᯪ ᯎᯉᯎᯉᯀᯉ᯲ᯖ ᯤ, ᯀᯰᯎᯬ ᯘᯬ ᯉᯉᯀᯰᯩ ᯔᯎᯬ ᯑᯬ ᯤᯅᯉ", ᯉᯉᯪ᯲ᯉ
Dung i didok si Boru Jongjong Anian ma muse, "Rohangki nian, ale amang; alai beha ma bahenon, nunga angkadabu matana dibahen baoa na so tinanda rupa, na so binoto goar" , ninna.
ᯑᯮᯰ ᯤ ᯑᯪᯑᯄ᯦ᯬ᯲ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯔ ᯔᯮᯘᯩ, "ᯒᯬᯂᯰᯄ᯦ᯪ ᯉᯪᯀᯉ᯲, ᯀᯞᯩ ᯀᯔᯰ; ᯀᯞᯤ ᯅᯩᯂ ᯔ ᯅᯂᯩᯉᯉᯬ᯲, ᯉᯮᯝ ᯀᯰᯄ᯦ ᯑᯅᯮ ᯔᯖᯉ ᯑᯪᯅᯂᯉᯩ᯲ ᯅᯀᯬᯀ ᯉ ᯘᯬ ᯖᯪᯉᯉ᯲ᯑ ᯒᯮᯇ, ᯉ ᯘᯬ ᯅᯪᯉᯬᯖᯬ ᯎᯬᯀᯒ᯲", ᯉᯉᯪ᯲ᯉ
Didok Datu na Sumurung ma muse , "Ai burjum do i, ale inang, tutu do i na nidokmi?" ninna.
ᯑᯪᯑᯄ᯦ᯬ᯲ ᯑᯖᯮ ᯉ ᯘᯮᯔᯮᯒᯮᯰ ᯔ ᯔᯮᯘᯩ," ᯀᯤ ᯅᯒᯮ᯲ᯐᯔᯮ᯲ ᯑᯬ ᯤ, ᯀᯞᯩ ᯤᯉᯰ, ᯖᯮᯖᯮ ᯑᯬ ᯤ ᯉ ᯉᯪᯑᯄ᯦ᯬ᯲ᯔᯪ?" ᯉᯉᯪ᯲ᯉ.
Dung i didok Si Boru Tibal Tudosan ma muse: "Haru-silu ma amang, haru ida ma ne!" ninna.
ᯑᯮᯰ ᯤ ᯑᯪᯑᯄ᯦ᯬ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲ ᯔ ᯔᯮᯘᯩ: "ᯂᯒᯮ ᯘᯪᯞᯮ ᯔ ᯀᯔᯰ, ᯂᯒᯮ ᯤᯑ ᯔ ᯉᯩ! "ᯉᯉᯪ᯲ᯉ.
"Beha ma i, inang, Boru Jongjong Anian, ua tung malua ibana sian harbangan, beha ma tu alaman, ai disi do biang sang sing dohot babiat sibolang dohot gompul morunung-unung, dohot nasa ragam ni pandoit, bisa na so hadonohan", ninna Datu na Sumurung, portaor na lumobi.
"ᯅᯩᯂ ᯔ ᯤ, ᯤᯉᯰ, ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ,ᯥᯀ ᯖᯮᯰ ᯔᯞᯮᯀ ᯤᯅᯉ ᯘᯪᯀᯉ᯲ ᯂᯒ᯲ᯅᯝᯉ᯲, ᯅᯩᯂ ᯔ ᯖᯮ ᯀᯞᯔᯉ᯲, ᯀᯤ ᯑᯪᯘᯪ ᯑᯬ ᯅᯪᯀᯰ ᯘᯰᯘᯪᯰ ᯑᯬᯂᯖᯬ᯲ ᯅᯅᯪᯀᯖ᯲ ᯘᯪᯅᯬᯞᯰ ᯑᯬᯂᯖᯬ᯲ ᯎᯔᯬ᯲ᯇᯞᯮ᯲ ᯔᯬᯒᯮᯉᯮᯰᯥᯉᯮᯰ ᯑᯬᯂᯖᯬ᯲ ᯉᯘ ᯒᯎᯔ᯲ ᯉᯪ ᯇᯉ᯲ᯑᯬᯀᯖᯪ᯲, ᯅᯪᯘ ᯉ ᯘᯬ ᯂᯑᯬᯉᯬᯂᯉ᯲", ᯉᯉᯪ᯲ᯉ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯒ᯲ ᯉ ᯞᯮᯔᯬᯅᯪ.
"Atik pe songon i, ale amang" , ninna Si Boru Jongjong Anian Si Boru Tibal Tudosan, "indang dianggalhon i huroha".
"ᯀᯖᯂᯪ᯲ ᯇᯩ ᯘᯬᯝᯉᯬ᯲ ᯤ, ᯀᯞᯩ ᯀᯔᯰ", ᯉᯉᯪ᯲ᯉ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲, "ᯀᯉᯪ᯲ᯑᯰ ᯑᯪᯀᯰᯎᯞ᯲ᯂᯉᯬ᯲ ᯤ ᯂᯮᯒᯬᯂ".
Dung i dipasang Datu na Sumurung, portaoar na lumobi ma sude ula-ulana, luhut boto-botoanna, alai nang pe dipasang i luhutna, so do, indang manjadi.
ᯑᯮᯰ ᯤ ᯑᯪᯇᯘᯰ ᯑᯖᯮ ᯉ ᯘᯮᯔᯮᯒᯮᯰ ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ ᯔ ᯘᯮᯑᯩ ᯥᯞᯥᯞᯉ, ᯞᯮᯂᯖᯮ᯲ ᯅᯬᯖᯬᯅᯬᯖᯬᯀᯉ᯲ᯉ, ᯀᯞᯤ ᯉᯰ ᯇᯩ ᯑᯪᯇᯘᯰ ᯤ ᯞᯮᯂᯖᯮ᯲ᯉ, ᯘᯬ ᯑᯬ, ᯀᯉᯪ᯲ᯑᯰ ᯔᯉ᯲ᯐᯑᯪ.
Mordalan ma antong Guru Satia Bulan, sahat ma ibana tu lambung pantangan, portonunan ni Si Boru Jongjong Anian i, gabe disungkun ma ibana, "Ise do hamu, ale anak ni rajanami, na ro sian dia do hamu?" ninna.
ᯔᯒᯬ᯲ᯑᯞᯉ᯲ ᯔ ᯀᯉ᯲ᯖᯬᯰ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯘᯂᯖ᯲ ᯔ ᯤᯅᯉ ᯖᯮ ᯞᯔ᯲ᯅᯮᯰ ᯇᯉ᯲ᯖᯝᯉ᯲, ᯇᯒᯬ᯲ᯖᯬᯉᯮᯉᯉ᯲ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯤ, ᯎᯅᯩ ᯑᯪᯘᯮᯰᯄ᯦ᯉᯮ᯲ ᯔ ᯤᯅᯉ, "ᯤᯘᯩ ᯑᯬ ᯂᯔᯮ ᯀᯞᯩ ᯀᯉᯄ᯦᯲ ᯉᯪ ᯒᯐᯉᯔᯪ, ᯉ ᯒᯬ ᯘᯪᯀᯉ᯲ ᯑᯪᯀ ᯑᯬ ᯂᯔᯮ? "ᯉᯉᯪ᯲ᯉ.
Dung i ninna ma mangalusi: "Guru Satia Bulan do ahu; ale boru ni rajanami, na ro sian Paradang-adangan, mangalului na so jumpang, tumadingkon naung dapot."
ᯑᯮᯰ ᯤ ᯉᯉᯪ᯲ᯉ ᯔ ᯔᯝᯞᯮᯘᯪ: "ᯎᯮᯒᯮ ᯘᯖᯪᯀ ᯅᯮᯞᯉ᯲ ᯑᯬ ᯀᯂᯮ; ᯀᯞᯩ ᯅᯬᯒᯮ ᯉᯪ ᯒᯐᯉᯔᯪ, ᯉ ᯒᯬ ᯘᯪᯀᯉ᯲ ᯇᯒᯑᯰᯀᯑᯝᯉ᯲, ᯔᯝᯞᯮᯞᯮᯤ ᯉ ᯘᯬ ᯐᯔᯮ᯲ᯇᯰ, ᯖᯮᯔᯑᯪᯰᯄ᯦ᯉᯬ᯲ ᯉᯀᯮᯰ ᯑᯇᯖᯬ᯲."
"Molo i ma hamu hape, ba ro ma hamu mornapuran tu pantangan on!" ninna Boru Jongjong Anian Si Boru Tibal Tudosan.
"ᯔᯬᯞᯬ ᯤ ᯔ ᯂᯔᯮ ᯂᯇᯩ, ᯅ ᯒᯬ ᯔ ᯂᯔᯮ ᯔᯒᯬ᯲ᯉᯇᯮᯒᯉ᯲ ᯖᯮ ᯇᯉ᯲ᯖᯝᯉ᯲ ᯀᯉᯬ᯲! "ᯉᯉᯪ᯲ᯉ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲.
Ia tangga ni pantanganna i, songon raut pornabung do tajomna, songon piso horis, songon hujur pamunu. Alai dung diida Guru Satia Bulan, na songon i do hape tangga i, indang na boi degehononna, morpingkir ma ibana di hata sidohononna.
ᯤᯀ ᯖᯰᯎ ᯉᯪ ᯇᯉ᯲ᯖᯝᯉ᯲ᯉ ᯤ, ᯘᯬᯝᯉᯬ᯲ ᯒᯀᯖᯮ᯲ ᯇᯒᯬ᯲ᯉᯅᯮᯰ ᯑᯬ ᯖᯐᯔᯬ᯲ᯉ, ᯘᯬᯝᯉᯬ᯲ ᯇᯪᯘᯬ ᯂᯬᯒᯘᯪ᯲, ᯘᯬᯝᯉᯬ᯲ ᯂᯮᯐᯒᯮ᯲ ᯇᯔᯮᯉᯮ ᯀᯞᯤ ᯑᯮᯰ ᯑᯪᯤᯑ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯉ ᯘᯬᯝᯉᯬ᯲ ᯤ ᯑᯬ ᯂᯇᯩ ᯖᯰᯎ ᯤ, ᯀᯉᯪ᯲ᯑᯰ ᯉ ᯅᯬᯤ ᯑᯩᯎᯩᯂᯬᯉᯉᯬ᯲ᯉ, ᯔᯒᯬ᯲ᯇᯪᯰᯄ᯦ᯒᯪ᯲ ᯔ ᯤᯅᯉ ᯑᯪ ᯂᯖ ᯘᯪᯑᯬᯂᯬᯉᯉᯬ᯲ᯉ
Dung i ninna ma, "Sahali. nari ma, ianggo mornapuran, ale boru ni rajanami, na ringkot do pe langkangku, naeng gira mulak tu huta ni dainang" , ninna.
ᯑᯮᯰ ᯤ ᯉᯉᯪ᯲ᯉ ᯔ, "ᯘᯂᯞᯪ ᯉᯒᯪ ᯔ, ᯤᯀᯰᯎᯬ ᯔᯒᯬ᯲ᯉᯇᯮᯒᯉ᯲, ᯀᯞᯩ ᯅᯬᯒᯮ ᯉᯪ ᯒᯐᯉᯔᯪ, ᯉ ᯒᯪᯰᯄ᯦ᯖᯬ᯲ ᯑᯬ ᯇᯩ ᯞᯰᯄᯰ᯦ᯄ᯦ᯮ, ᯉᯀᯰᯩ ᯎᯪᯒ ᯔᯮᯞᯄ᯦᯲ ᯖᯮ ᯂᯮᯖ ᯉᯪ ᯑᯤᯉᯰ ", ᯉᯉᯪ᯲ᯉ.
Hape nian, na so barani do ibana manaek tu pantanganna i, dibahen tajom ni tanggana , na songon raut pornabung i, dung i mulak ma ibana.
ᯂᯇᯩ ᯉᯪᯀᯉ᯲, ᯉ ᯘᯬ ᯅᯒᯉᯪ ᯑᯬ ᯤᯅᯉ ᯔᯉᯀᯄᯩ᯦᯲ ᯖᯮ ᯇᯉ᯲ᯖᯝᯉ᯲ᯉ ᯤ, ᯑᯪᯅᯂᯉᯩ᯲ ᯖᯐᯔᯬ᯲ ᯉᯪ ᯖᯰᯎᯉ, ᯉ ᯘᯬᯝᯉᯬ᯲ ᯒᯀᯖᯮ᯲ ᯇᯒᯬ᯲ᯉᯅᯮᯰ ᯤ, ᯑᯮᯰ ᯤ ᯔᯮᯞᯄ᯦᯲ ᯔ ᯤᯅᯉ.
Dung i leleng ma di porlelengan, lalap ma di parlalapan, laos so muli do Si Boru Jongjong Anian Si Boru Tibal Tudosan.
ᯑᯮᯰ ᯤ ᯞᯩᯞᯰᯩ ᯔ ᯑᯪ ᯇᯒᯬ᯲ᯞᯩᯞᯩᯝᯉ᯲, ᯞᯞᯇ᯲ ᯔ ᯑᯪ ᯇᯒ᯲ᯞᯞᯇᯉ᯲, ᯞᯀᯘᯬ᯲ ᯘᯬ ᯔᯮᯞᯪ ᯑᯬ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲.
Marsidomdom-sidomdom ma songon soara ni ansuan, adong na nangkok tu dolok, adong na tuat tu toruan, mudur-udur doli doli, angka sipanggal bulang-bulang, paida-ida halak Si Boru Jongjong Anian Si Boru Tibal Tudosan, tu pantangan portonunan, sada sitiop hajutna, dua siatup napuranna, ianggo hinaulina, tung na so adong do tudosanna.
ᯔᯒ᯲ᯘᯪᯑᯔᯬ᯲ᯑᯔᯬ᯲ᯘᯪᯑᯔᯬ᯲ᯑᯔᯬ᯲ ᯔ ᯘᯬᯝᯉᯬ᯲ ᯘᯬᯀᯒ ᯉᯪ ᯀᯉ᯲ᯘᯮᯀᯉ᯲, ᯀᯑᯬᯰ ᯉ ᯉᯰᯄ᯦ᯄ᯦ᯬ᯲ ᯖᯮ ᯑᯬᯞᯄ᯦᯲, ᯀᯑᯬᯰ ᯉ ᯖᯮᯀᯖ᯲ ᯖᯮ ᯖᯬᯒᯮᯀᯉ᯲, ᯔᯮᯑᯒᯮ᯲ᯥᯑᯒᯒᯮ᯲ ᯑᯬᯞᯪᯑᯬᯞᯪ, ᯀᯰᯄ᯦ ᯘᯪᯇᯰᯎᯞ᯲ ᯅᯮᯞᯰᯅᯮᯞᯰ, ᯇᯤᯑᯤᯑ ᯂᯞᯄ᯦᯲ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲, ᯖᯮ ᯇᯉ᯲ᯖᯝᯉ᯲ ᯇᯒᯬ᯲ᯖᯬᯉᯮᯉᯉ᯲, ᯘᯑ ᯘᯪᯖᯪᯀᯇᯬ᯲ ᯂᯐᯖᯮ᯲ᯉ, ᯑᯮᯀ ᯘᯪᯀᯖᯇᯮ᯲ ᯉᯇᯮᯒᯉ᯲ᯉ, ᯤᯀᯰᯎᯬ ᯂᯪᯉᯥᯞᯪᯉ, ᯖᯮᯰ ᯉ ᯘᯬ ᯀᯑᯬᯰ ᯑᯬ ᯖᯮᯑᯬᯘᯉ᯲ᯉ
Alai atik pe songon i, sai pasimpar pasebur siraja ni doli-doli paida-ida ibana, tung na so adong do nanggo sada sian i na sinonom ni rohana Ai ingkon sialagundi na bolon do panampulan ni siala so mimbar hinobolon, ingkon suman dohot rupana asa jadi siadopanna.
ᯀᯞᯤ ᯀᯖᯄ᯦ᯪ᯲ ᯇᯩ ᯘᯬᯝᯉᯬ᯲ ᯤ, ᯘᯤ ᯇᯘᯔᯪ᯲ᯇᯒ᯲ᯇᯘᯩᯅᯒᯮ᯲ ᯘᯪᯒᯐ ᯉᯪ ᯑᯬᯞᯪᯑᯬᯞᯪ ᯇᯤᯑᯤᯑ ᯤᯅᯉ, ᯖᯮᯰ ᯉ ᯘᯬ ᯀᯑᯬᯰ ᯑᯬ ᯉᯰᯎᯬ ᯘᯑ ᯘᯪᯀᯉ᯲ ᯤ ᯉ ᯘᯪᯉᯬᯉᯔᯬ᯲ ᯉᯪ ᯒᯬᯂᯉ ᯀᯤ ᯀᯪᯰᯂᯉᯬ᯲ ᯘᯪᯀᯞ ᯎᯉᯮ᯲ᯑᯪ ᯉ ᯅᯬᯞᯉᯬ᯲ ᯑᯬ ᯇᯉᯔ᯲ᯇᯮᯞᯉ᯲ ᯉᯪ ᯘᯪᯀᯞ ᯘᯬ ᯔᯔᯪ᯲ᯅᯒ᯲ ᯂᯪᯉᯅᯬᯞᯉᯬ᯲, ᯀᯪᯰᯂᯉᯬ᯲ ᯘᯮᯔᯉ᯲ ᯑᯬᯂᯖᯬ᯲ ᯒᯮᯇᯉ ᯀᯘ ᯐᯑᯪ ᯘᯪᯀᯑᯬᯇᯉ᯲ᯉ.
Alai dung mulak guru Satia Bulan sian lambung pantangan ni Si Boru Jongjong Anian i, marsak ma rohana laho ma ibana muse morguru, patasak porbinotoanna.
ᯀᯞᯤ ᯑᯮᯰ ᯔᯮᯞᯄ᯦᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯘᯪᯀᯉ᯲ ᯞᯔ᯲ᯅᯮᯰ ᯇᯉ᯲ᯖᯝᯉ᯲ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯤ, ᯔᯒ᯲ᯘᯄ᯦᯲ ᯔ ᯒᯬᯂᯉ ᯞᯂᯬ ᯔ ᯤᯅᯉ ᯔᯮᯘᯩ ᯔᯒᯬ᯲ᯎᯮᯒᯮ, ᯇᯖᯘᯄ᯦᯲ ᯇᯒᯬ᯲ᯅᯪᯉᯬᯖᯬᯀᯉ᯲ᯉ
Alai nang Si Boru Jongjong Anian, longang do rohana morningot rupa ni Guru Satia Bulan, na soada anianna, ai saut ma tutu sialagundi na bolon panampulan ni sihala, ai dos ma nasida di hinabolon, tung suman dohot·rupana.
ᯀᯞᯤ ᯉᯰ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲, ᯞᯬᯝᯰ ᯑᯬ ᯒᯬᯂᯉ ᯔᯒᯬ᯲ᯉᯪᯝᯖᯬ᯲ ᯒᯮᯇ ᯉᯪ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯉ ᯘᯬᯀᯑ ᯀᯉᯪᯀᯉ᯲ᯉ, ᯀᯤ ᯘᯀᯖᯮ᯲ ᯔ ᯖᯮᯖᯮ ᯘᯪᯀᯞᯎᯉᯮ᯲ᯑᯪ ᯉ ᯅᯬᯞᯉᯬ᯲ ᯇᯉᯔ᯲ᯇᯮᯞᯉ᯲ ᯉᯪ ᯘᯪᯂᯞ, ᯀᯤ ᯑᯘᯬ᯲ ᯔ ᯉᯘᯪᯑ ᯑᯪ ᯂᯪᯉᯅᯬᯞᯉᯬ᯲, ᯖᯮᯰ ᯘᯮᯔᯉ᯲ ᯑᯬᯂᯖᯬ᯲ ᯒᯮᯇᯉ.
Ia dung dipatasak Guru Satia Bulan boto-botoanna, dipulung ma ramuan, borhat ma ibana, ditogihon ma sonduhanna, asa adong bahen donganna, manopot Si Boru Jongjong Anian, na hundul di pantanganna.
ᯤᯀ ᯑᯮᯰ ᯑᯪᯇᯖᯘᯄ᯦᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯅᯬᯖᯬᯅᯬᯖᯬᯀᯉ᯲ᯉ, ᯑᯪᯇᯮᯞᯮᯰ ᯔ ᯒᯔᯮᯀᯉ᯲, ᯅᯒᯬ᯲ᯂᯖ᯲ ᯔ ᯤᯅᯉ, ᯑᯪᯖᯬᯎᯪᯂᯉᯬ᯲ ᯔ ᯘᯉᯬ᯲ᯑᯮᯂᯉ᯲ᯉ, ᯀᯘ ᯀᯑᯬᯰ ᯅᯂᯉᯩ᯲ ᯑᯬᯝᯉ᯲ᯉ, ᯔᯉᯬᯇᯖᯬ᯲ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲, ᯉ ᯂᯉᯮ᯲ᯑᯞᯮ᯲ ᯑᯪ ᯇᯉ᯲ᯖᯝᯉ᯲ᯉ.
Alai di na mordalan i nasida, ro ma udan, gabe manisio ma nasida tu sada liang. Hape, di na so pangkiriman, di na so panagaman, hinsu ma liang panisioanasida i, ai indada liang i tutu, baba ni ulok do hape, laos dibondut ma nasida tu bagasan.
ᯀᯞᯤ ᯑᯪ ᯉ ᯔᯒᯬ᯲ᯑᯞᯉ᯲ ᯤ ᯉᯘᯪᯑ, ᯒᯬ ᯔ ᯥᯑᯉ᯲, ᯎᯅᯩ ᯔᯉᯪᯘᯪᯀᯬ ᯔ ᯉᯘᯪᯑ ᯖᯮ ᯘᯑ ᯞᯪᯀᯰ ᯂᯇᯩ, ᯑᯪ ᯉᯘᯬ ᯇᯰᯄ᯦ᯪᯒᯪᯔᯉ᯲, ᯑᯪ ᯉᯘᯬ ᯇᯉᯎᯔᯉ᯲, ᯂᯉᯪ᯲ᯘᯮ ᯔ ᯞᯪᯀᯰ ᯇᯉᯪᯘᯪᯀᯬᯀᯉᯘᯪᯑ ᯤ, ᯀᯤ ᯀᯉᯪ᯲ᯑᯑ ᯞᯪᯀᯰ ᯤ ᯖᯮᯖᯮ, ᯅᯅ ᯉᯪ ᯥᯞᯂᯬ᯲ ᯑᯬ ᯂᯇᯩ, ᯞᯀᯘᯬ᯲ ᯑᯪ ᯅᯉᯬ᯲ᯑᯖᯮ᯲ ᯔ ᯉᯘᯪᯑ ᯖᯮ ᯅᯎᯘᯉ᯲.
Dung songon i, naeng ma seaton ni Guru Satia Bulan pusu-pusu ni ulok i di bagasan, gabe mangkuling ma ulok i, "Tunduk ma ahu, ale rajanami, unang ma saut gotap pusu pusungki", ninna.
ᯑᯮᯰ ᯘᯬᯝᯉᯬ᯲ ᯤ, ᯉᯀᯰᯩ ᯔ ᯘᯩᯀᯖᯉᯬ᯲ ᯉᯪ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯇᯮᯘᯮᯇᯮᯘᯮ ᯉᯪ ᯥᯞᯄ᯦ᯬ᯲ ᯤ ᯑᯪ ᯅᯎᯘᯉ᯲, ᯎᯅᯩ ᯔᯰᯄ᯦ᯮᯞᯪᯰ ᯔ ᯥᯞᯄ᯦ᯬ᯲ ᯤ, "ᯖᯉᯮ᯲ᯑᯄ᯦ᯮ᯲ ᯔ ᯀᯂᯮ, ᯀᯞᯩ ᯒᯐᯉᯔᯪ, ᯥᯉᯰ ᯔ ᯘᯀᯖᯮ᯲ ᯎᯬᯖᯇ᯲ ᯇᯮᯘᯮᯇᯮᯘᯮᯰᯄ᯦ᯪ", ᯉᯉᯪ᯲ᯉ.
"Ba molo songon i, dia ma hatunduhanmu?" ninna Guru Satia Bulan manungkun sian bagasan butuha ni ulok i.
"ᯅ ᯔᯬᯞᯬ ᯘᯬᯝᯉᯬ᯲ ᯤ, ᯑᯪᯀ ᯔ ᯂᯖᯉᯮ᯲ᯑᯮᯄ᯦ᯉ᯲ᯔᯮ?" ᯉᯉᯪ᯲ᯉ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔᯉᯮᯰᯄ᯦ᯉᯮ᯲ ᯘᯪᯀᯉ᯲ ᯅᯎᯘᯉ᯲ ᯅᯮᯖᯮᯂ ᯉᯪ ᯥᯞᯄ᯦ᯬ᯲ ᯤ.
Dung i didok ulok i ma muse, "Asal ma unang saut dibuat ho pusu-pusungki, hulehon pe ihurhon di ho ; ai molo dipatuduhon ho i muse manang tu aha, maleu do i jala mabiar, i ma antong ihur ni ulok, na morgoar sibalun bide.
ᯑᯮᯰ ᯤ ᯑᯪᯑᯄ᯦ᯬ᯲ ᯥᯞᯄ᯦ᯬ᯲ ᯤ ᯔ ᯔᯮᯘᯩ, "ᯀᯘᯞ᯲ ᯔ ᯥᯉᯰ ᯘᯀᯖᯮ᯲ ᯑᯪᯅᯮᯀᯖ᯲ ᯂᯬ ᯇᯮᯘᯮᯇᯮᯘᯮᯰᯄ᯦ᯪ, ᯂᯮᯞᯩᯂᯉᯬ᯲ ᯇᯩ ᯤᯂᯒᯮ᯲ᯂᯉᯬ᯲ ᯑᯪ ᯂᯬ; ᯀᯤ ᯔᯬᯞᯬ ᯑᯪᯇᯖᯮᯑᯮᯂᯉᯬ᯲ ᯂᯬ ᯤ ᯔᯮᯘᯩ ᯔᯉᯰ ᯖᯮ ᯀᯂ, ᯔᯞᯩᯥ ᯑᯬ ᯤ ᯐᯞ ᯔᯅᯪᯀᯒ᯲, ᯤ ᯔ ᯀᯉ᯲ᯖᯬᯰ ᯤᯂᯒᯮ᯲ ᯉᯪ ᯥᯞᯄ᯦ᯬ᯲, ᯉ ᯔᯒᯬ᯲ᯎᯬᯀᯒ᯲ ᯘᯪ ᯅᯞᯉᯮ᯲ ᯅᯪᯑᯩ.
Ia dung ma inon, malua ma nasida sian butuha ni ulok i, diboan nasida ma dohot ihurna i, mordalan ma nasida, sahat tu harbangan ni portaoar na sumurung.
ᯤᯀ ᯑᯮᯰ ᯔ ᯤᯉᯉᯬ᯲, ᯔᯞᯮᯀ ᯔ ᯉᯘᯪᯑ ᯘᯪᯀᯉ᯲ ᯅᯮᯖᯮᯂ ᯉᯪ ᯥᯞᯄ᯦ᯬ᯲ ᯤ, ᯑᯪᯅᯬᯀᯉ᯲ ᯉᯘᯪᯑ ᯔ ᯑᯬᯂᯖᯬ᯲ ᯤᯂᯒᯮ᯲ᯉ ᯤ, ᯔᯒᯬ᯲ᯑᯞᯉ᯲ ᯔ ᯉᯘᯪᯑ, ᯘᯂᯖ᯲ ᯖᯮ ᯂᯒ᯲ᯅᯝᯉ᯲ ᯉᯪ ᯇᯒᯬ᯲ᯖᯀᯬᯀᯒ᯲ ᯉ ᯘᯮᯔᯮᯒᯮᯰ.
Alai dung sahat nasida ro disi, ro ma biang sangsing, sijaga portungkoan manahopi nasida; alai dipatuduhon ma ihur ni ulok'balun bide i, gabe morpo ma hagarangon ni biang i.
ᯀᯞᯤ ᯑᯮᯰ ᯘᯂᯖ᯲ ᯉᯘᯪᯑ ᯒᯬ ᯑᯪᯘᯪ, ᯒᯬ ᯔ ᯅᯪᯀᯰ ᯘᯰᯘᯪᯰ, ᯘᯪ ᯐᯎ ᯇᯒᯬ᯲ᯖᯮᯰᯄ᯦ᯬᯀᯉ᯲ ᯔᯉᯂᯬᯇᯪ ᯉᯘᯪᯑ; ᯀᯞᯤ ᯑᯪᯇᯖᯮᯑᯮᯂᯉᯬ᯲ ᯔ ᯤᯂᯒᯮ᯲ ᯉᯪ ᯥᯞᯄ᯦ᯬ᯲ ᯅᯞᯉᯮ᯲ ᯅᯪᯑᯩ ᯤ, ᯎᯅᯩ ᯔᯒᯬ᯲ᯇᯬ ᯔ ᯂᯎᯒᯝᯉᯬ᯲ ᯉᯪ ᯅᯪᯀᯰ ᯤ.
Dung sahat nasida muse ro di alaman , ro ma ulok naeng mamargut nasida; alai dipatuduhon ma ihur ni ulok i, gabe monjap ma ulok i, so ma bisana.
ᯑᯮᯰ ᯘᯂᯖ᯲ ᯉᯘᯪᯑ ᯔᯮᯘᯩ ᯒᯬ ᯑᯪ ᯀᯞᯔᯉ᯲, ᯒᯬ ᯔ ᯥᯞᯄ᯦ᯬ᯲ ᯉᯀᯰᯩ ᯔᯔᯒ᯲ᯎᯖᯮ᯲ ᯉᯘᯪᯑ; ᯀᯞᯤ ᯑᯪᯇᯖᯮᯑᯮᯂᯉᯬ᯲ ᯔ ᯤᯂᯒᯮ᯲ ᯉᯪ ᯥᯞᯄ᯦ᯬ᯲ ᯤ, ᯎᯅᯩ ᯔᯉᯬ᯲ᯐᯇ᯲ ᯔ ᯥᯞᯄ᯦ᯬ᯲ ᯤ, ᯘᯬ ᯔ ᯅᯪᯘᯉ.
Songon i muse ma dibahen tu gompul morunung-unung, tu babiat sibolang.
ᯘᯬᯝᯉᯬ᯲ ᯤ ᯔᯮᯘᯩ ᯔ ᯑᯪᯅᯂᯉᯩ᯲ ᯖᯮ ᯎᯔᯬ᯲ᯇᯞᯮ᯲ ᯔᯬᯒᯮᯉᯮᯰᯥᯉᯮᯰ ᯖᯮ ᯅᯅᯪᯀᯖ᯲ ᯘᯪᯅᯬᯞᯰ.
Ia dung ma inon, dipajonok Guru Satia Bulan ma tu pantangan ni Si Boru Jongjong Anian i, didok ma hatana songon on, "0, situngko ni dulang, sipusuk ni langge , siboru ni datulang, iboto ni Jae! Ua asi ma roham, lehon ma saotik napuran i di ahu!" ninna.
ᯤᯀ ᯑᯮᯰ ᯔ ᯤᯉᯉᯬ᯲, ᯑᯪᯇᯐᯬᯉᯄ᯦ᯬ᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯖᯮ ᯇᯉ᯲ᯖᯝᯉ᯲ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯤ, ᯑᯪᯑᯄ᯦ᯬ᯲ ᯔ ᯂᯖᯉ ᯘᯬᯝᯉᯬ᯲ ᯀᯉᯬ᯲, "ᯀᯬ, ᯘᯪᯖᯮᯰᯄ᯦ᯬ ᯉᯪ ᯑᯮᯞᯰ, ᯘᯪᯇᯮᯘᯄ᯦ᯮ᯲ ᯉᯪ ᯞᯰᯎᯩ, ᯘᯪ ᯅᯬᯒᯮ ᯉᯪ ᯑᯖᯮᯞᯰ, ᯤᯅᯬᯖᯬ ᯉᯪ ᯐᯀᯩ! ᯥᯀ ᯀᯘᯪ ᯔ ᯒᯬᯂᯔ᯲, ᯞᯩᯂᯉᯬ᯲ ᯔ ᯘᯀᯬᯖᯄ᯦ᯪ᯲ ᯉᯇᯮᯒᯉ᯲ ᯤ ᯑᯪ ᯀᯂᯮ!" ᯉᯉᯪ᯲ᯉ.
Dung i didok Si Boru Jongjong Anian Si Boru Tibal Tudosan ma mangalusi, "I ma tutu, ale silaklak ni singkoru, sirege-rege ni ampung, sianak ni namboru, ibebere ni damang! Ro ma damang tu son, molo naeng ho mornapuran; ai horbo ni tuan gunung manggagat di dangka-dangka, sagat damang mornapuran, asal unang mago longeanna", ninna.
ᯑᯮᯰ ᯤ ᯑᯪᯑᯄ᯦ᯬ᯲ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲ ᯔ ᯔᯝᯞᯮᯘᯪ, "ᯤ ᯔ ᯖᯮᯖᯮ, ᯀᯞᯩ ᯘᯪᯞᯄ᯦᯲ᯞᯄ᯦᯲ ᯉᯪ ᯘᯪᯰᯄ᯦ᯬᯒᯮ, ᯘᯪ ᯒᯩᯎᯩᯒᯩᯎᯩ ᯉᯪ ᯀᯔ᯲ᯇᯮᯰ ᯘᯪ ᯀᯉᯄ᯦᯲ ᯉᯪ ᯉᯔ᯲ᯅᯬᯒᯮ, ᯤᯅᯩᯅᯩᯒᯩ ᯉᯪ ᯑᯔᯰ! ᯒᯬ ᯔ ᯑᯔᯰ ᯖᯮᯘᯉᯬ᯲, ᯔᯬᯞᯬ ᯉᯀᯰᯩ ᯂᯬ ᯔᯒᯬ᯲ᯉᯇᯮᯒᯉ᯲; ᯀᯤ ᯂᯒᯬ᯲ᯅᯬ ᯉᯪ ᯖᯮᯀᯉ᯲ ᯎᯮᯉᯮᯰ ᯔᯰᯎᯎᯖ᯲ ᯑᯪ ᯑᯰᯄ᯦ᯑᯰᯄ᯦, ᯘᯎᯖ᯲ ᯑᯔᯰ ᯔᯒᯬ᯲ᯉᯇᯮᯒᯉ᯲, ᯀᯘᯞ᯲ ᯥᯉᯰ ᯔᯎᯬ ᯞᯬᯝᯩᯀᯉ᯲ᯉ", ᯉᯉᯪ᯲ᯉ.
Dung i dipatuduhon Guru Satia Bulan ma ihur ni ulok i tu tangga i, gabe angkaropang ma i, angkaleu, nangkok ma ibana tu pantangan i laho mornapuran.
ᯑᯮᯰ ᯤ ᯑᯪᯇᯖᯮᯑᯮᯂᯉᯬ᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯤᯂᯒᯮ᯲ ᯉᯪ ᯥᯞᯄ᯦ᯬ᯲ ᯤ ᯖᯮ ᯖᯰᯎ ᯤ, ᯎᯅᯩ ᯀᯰᯄ᯦ ᯒᯬᯇᯰ ᯔ ᯤ, ᯀᯰᯄ᯦ ᯞᯩᯥ, ᯉᯰᯄ᯦ᯄ᯦ᯬ᯲ ᯔ ᯤᯅᯉ ᯖᯮ ᯇᯉ᯲ᯖᯝᯉ᯲ ᯤ ᯞᯂᯬ ᯔᯒᯬ᯲ᯉᯇᯮᯒᯉ᯲
Dung songon i, longang ma roha ni Si Boru Jongjong Anian Si Boru Tibal Tudosan, dung boi nangkok Guru Satia Bulan tu pantanganna, ai so boi masuk nian manang ise tu si, ia so holan ibana.
ᯑᯮᯰ ᯘᯬᯝᯉᯬ᯲ ᯤ, ᯞᯬᯝᯰ ᯔ ᯒᯬᯂ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲, ᯑᯮᯰ ᯅᯬᯤ ᯉᯰᯄ᯦ᯄ᯦ᯬ᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯖᯮ ᯇᯉ᯲ᯖᯝᯉ᯲ᯉ, ᯀᯤ ᯘᯬᯅᯬᯤ ᯔᯘᯄ᯦ᯮ᯲ ᯉᯪᯀᯉ᯲ ᯔᯉᯰ ᯤᯘᯩ ᯖᯮ ᯘᯪ, ᯤᯀ ᯘᯬ ᯂᯬᯞᯉ᯲ ᯤᯅᯉ.
Songon na hohom ma ibana jolo dohot mamereng pordagingon ni Guru Satia Bulan i, ai sialagundi do panampulan ni bulung sihala, ai tudos do nasida di hinabolon, apala suman do dohot rupana.
ᯘᯬᯝᯉᯬ᯲ ᯉ ᯂᯬᯂᯔᯬ᯲ ᯔ ᯤᯅᯉ ᯐᯬᯞᯬ ᯑᯬᯂᯖᯬ᯲ ᯔᯔᯩᯒᯩᯰ ᯇᯒᯬ᯲ᯑᯎᯪᯝᯉᯬ᯲ ᯉᯪ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯤ, ᯀᯤ ᯘᯪ ᯀᯞᯎᯉᯮ᯲ᯑᯪ ᯑᯬ ᯇᯉᯔ᯲ᯇᯮᯞᯉ᯲ ᯉᯪ ᯅᯮᯞᯮᯰ ᯘᯪᯂᯞ, ᯀᯤ ᯖᯮᯑᯘᯬ᯲ ᯑᯬ ᯉᯘᯪᯑ ᯑᯪ ᯂᯪᯉᯅᯬᯞᯉᯬ᯲, ᯀᯇᯞ ᯘᯮᯔᯉ᯲ ᯑᯬ ᯑᯬᯂᯖᯬ᯲ ᯒᯮᯇᯉ.
Ia dung songon i, laho ma ibana jolo tu jabu ni amana, dialap ma hajutna siat porsanggoloman, ai naeng do jolo bahenonna undang-undang tu Guru Satia Bulan, patuat uti-utian, mambahen guna-gunaan, paboa boru ni Datu na Sumurung ibana, portaoar na lumobi, na morgoar Ompu Raja lang Debata.
ᯤᯀ ᯑᯮᯰ ᯘᯬᯝᯉᯬ᯲ ᯤ, ᯞᯂᯬ ᯔ ᯤᯅᯉ ᯐᯬᯞᯬ ᯖᯮ ᯐᯅᯮ ᯉᯪ ᯀᯔᯉ, ᯑᯪᯀᯞᯇ᯲ ᯔ ᯂᯐᯖᯮ᯲ᯉ ᯘᯪᯀᯖ᯲ ᯇᯒᯬ᯲ᯘᯰᯎᯬᯞᯬᯔᯉ᯲, ᯀᯤ ᯉᯀᯰᯩ ᯑᯬ ᯐᯬᯞᯬ ᯅᯂᯩᯉᯉᯬ᯲ᯉ ᯀᯉᯮ᯲ᯑᯰᯀᯉᯮ᯲ᯑᯰ ᯖᯮ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯇᯖᯮᯀᯖ᯲ ᯥᯖᯪᯥᯖᯪᯀᯉ᯲, ᯔᯔ᯲ᯅᯂᯉᯩ᯲ ᯎᯮᯉᯎᯮᯉᯀᯉ᯲, ᯇᯅᯬᯀ ᯅᯬᯒᯮ ᯉᯪ ᯑᯖᯮ ᯉ ᯘᯮᯔᯮᯒᯮᯰ ᯤᯅᯉ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ, ᯉ ᯔᯒᯬ᯲ᯎᯬᯀᯒ᯲ ᯀᯔᯬ᯲ᯇᯮ ᯒᯐ ᯞᯰ ᯑᯩᯅᯖ.
Diboan ma antong hajutna i, dilehon ma tu Guru Satia Bulan, hajut sietek-etek, siat porsanggoloman.
ᯑᯪᯅᯬᯀᯉ᯲ ᯔ ᯀᯉ᯲ᯖᯬᯰ ᯂᯐᯖᯮ᯲ᯉ ᯤ ,ᯑᯪᯞᯩᯂᯉᯬ᯲ ᯔ ᯖᯮ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯂᯐᯖᯮ᯲ ᯘᯪᯀᯩᯖᯄᯩ᯦ᯀᯩᯖᯄᯩ᯦᯲, ᯘᯪᯀᯖ᯲ ᯇᯒᯬ᯲ᯘᯰᯎᯬᯞᯬᯔᯉ᯲.
Ia dung dijalo Guru Satia Bulan hajut i, didok ma, "Ba dia do hapur, ale boru ni datulang?" ninna.
ᯤᯀ ᯑᯮᯰ ᯑᯪᯐᯞᯬ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯂᯐᯖᯮ᯲ ᯤ, ᯑᯪᯑᯄ᯦ᯬ᯲ ᯔ, "ᯅ ᯑᯪᯀ ᯑᯬ ᯂᯇᯒᯮ᯲, ᯀᯞᯩ ᯅᯬᯒᯮ ᯉᯪ ᯑᯖᯮᯞᯰ?" ᯉᯉᯪ᯲ᯉ.
"Dingkan toru do hapur, ale anak ni namboru, tu si ma sigat hamu!"
"ᯑᯪᯰᯄ᯦ᯉ᯲ ᯖᯬᯒᯮ ᯑᯬ ᯂᯇᯒᯮ᯲, ᯀᯞᯩ ᯀᯉᯄ᯦᯲ ᯉᯪ ᯉᯔ᯲ᯅᯬᯒᯮ, ᯖᯮ ᯘᯪ ᯔ ᯘᯪᯎᯖ᯲ ᯂᯔᯮ!"
Dung i sai dirungkari Guru Satia Bulan ma sude pangisi ni hajut porsanggoloman i, longang ma rohana, ai atik pe i na sai metmet, sirsir do saampang holan napuran, saampang holan gambir, saampang holan hapur, songon i be dohot na asing.
ᯑᯮᯰ ᯤ ᯘᯤ ᯑᯪᯒᯮᯰᯄ᯦ᯒᯪ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯘᯮᯑᯩ ᯇᯝᯪᯘᯪ ᯉᯪ ᯂᯐᯖᯮ᯲ ᯇᯒᯬ᯲ᯘᯰᯎᯬᯞᯬᯔᯉ᯲ ᯤ, ᯞᯬᯝᯰ ᯔ ᯒᯬᯂᯉ, ᯀᯤ ᯀᯖᯄ᯦ᯪ᯲ ᯇᯩ ᯤ ᯉᯘ ᯤ ᯔᯖᯩ᯲ᯔᯖᯩ᯲, ᯘᯒᯪ᯲ᯘᯒᯪ᯲ ᯑᯬ ᯘᯀᯔ᯲ᯇᯰ ᯂᯬᯞᯉ᯲ ᯉᯇᯮᯒᯉ᯲, ᯘᯀᯔ᯲ᯇᯰ ᯂᯬᯞᯉ᯲ ᯎᯔ᯲ᯅᯒᯪ᯲, ᯘᯀᯔ᯲ᯇᯰ ᯂᯬᯞᯉ᯲ ᯂᯇᯒᯮ᯲, ᯘᯬᯝᯉᯬ᯲ ᯤ ᯅᯩ ᯑᯬᯂᯖᯬ᯲ ᯉ ᯀᯘᯪᯰ.
Ia dung songon i, mangkatai ma nasida, didok Si Boru Jongjong Anian ma, "Nitiptip sanggar, ale anak ni raja bolon, bahen huru
huruan, jolo sinungkun marga, asa botoon portuturan. Ba nunga mordemban hita di atas ni papan dohot gulang-gulang, tangkas ma paboa, manang na ise do hamu!"
ᯤᯀ ᯑᯮᯰ ᯘᯬᯝᯉᯬ᯲ ᯤ, ᯔᯰᯄ᯦ᯖᯤ ᯔ ᯉᯘᯪᯑ, ᯑᯪᯑᯄ᯦ᯬ᯲ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯔ, "ᯉᯪᯖᯇᯪ᯲ᯖᯇᯪ᯲ ᯘᯰᯎᯒ᯲, ᯀᯞᯩ ᯀᯉᯄ᯦᯲ ᯉᯪ ᯒᯐ ᯅᯬᯞᯉᯬ᯲, ᯅᯂᯉᯩ᯲ ᯂᯮᯒᯮᯂᯮᯒᯮᯀᯉ᯲, ᯐᯬᯞᯬ ᯘᯪᯉᯮᯰᯄ᯦ᯉᯮ᯲ ᯔᯒ᯲ᯎ, ᯀᯘ ᯅᯬᯖᯬᯀᯉᯬ᯲ ᯇᯒᯬ᯲ᯖᯮᯖᯮᯒᯉ᯲. ᯅ ᯉᯮᯝ ᯔᯒᯬ᯲ᯑᯔᯩ᯲ᯅᯉ᯲ ᯂᯪᯖ ᯑᯪ ᯀᯖᯘ᯲ ᯉᯪ ᯇᯇᯉ᯲ ᯑᯬᯂᯖᯬ᯲ ᯎᯮᯞᯰᯎᯮᯞᯰ, ᯖᯰᯄ᯦ᯘ᯲ ᯔ ᯇᯅᯬᯀ, ᯔᯉᯰ ᯉ ᯤᯘᯩ ᯑᯬ ᯂᯔᯮ!"
"Olo ma tutu, boru ni rajanami, ianggo panungkunonmi, alusan ma tutu , ai nunga mordemban hita , di atas ni papan, di toru ni gulang-gulung, jala di tarisopo, pantangan portonunan. Ahu ma Guru Satia Bulan" , ninna. "Alai ise ma ia hamu?" ninna muse .
"ᯀᯬᯞᯬ ᯔ ᯖᯮᯖᯮ, ᯅᯬᯒᯮ ᯉᯪ ᯒᯐᯉᯔᯪ, ᯤᯀᯰᯎᯬ ᯇᯉᯮᯰᯄ᯦ᯮᯉᯉᯬ᯲ᯔᯪ, ᯀᯞᯮᯘᯉ᯲ ᯔ ᯖᯮᯖᯮ, ᯀᯤ ᯉᯮᯝ ᯔᯒᯬ᯲ᯑᯔ᯲ᯩ᯲ᯅᯉ᯲ ᯂᯪᯖ, ᯑᯪ ᯀᯖᯘ᯲ ᯉᯪ ᯇᯇᯉ᯲, ᯑᯪ ᯖᯬᯒᯮ ᯉᯪ ᯎᯮᯞᯰᯎᯮᯞᯮᯰ, ᯐᯞ ᯑᯪ ᯖᯒᯪᯘᯬᯇᯬ, ᯇᯉ᯲ᯖᯝᯉ᯲ ᯇᯒᯬ᯲ᯖᯬᯉᯮᯉᯉ᯲. ᯀᯂᯮ ᯔ ᯎᯮᯒᯮ ᯘᯖᯪᯀ ᯅᯮᯞᯉ᯲", ᯉᯉᯪ᯲ᯉ. "ᯀᯞᯤ ᯤᯘᯩ ᯔ ᯤᯀ ᯂᯔᯮ?" ᯉᯉᯪ᯲ᯉ ᯔᯮᯘᯩ.
"Olo, ale anak ni namboru, ahu ma Si Boru Jongjong Anian Si Boru Tibal Tudosan. Asa molo ho ma hape Guru Satia Bulan, dia ma diboan ho sian hapoltahan ni bulan? Dia ma baliga puli tu gota ni si morgala-gala, dia ma barita na uli, paboa damang sangkambaba!" ninna si Boru Jongjong Anian.
"ᯀᯬᯞᯬ, ᯀᯞᯩ ᯀᯉᯄ᯦᯲ ᯉᯪ ᯉᯔ᯲ᯅᯬᯒᯮ, ᯀᯂᯮ ᯔ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲. ᯀᯘ ᯔᯬᯞᯬ ᯂᯬ ᯔ ᯂᯇᯩ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯑᯪᯀ ᯔ ᯑᯪᯅᯬᯀᯉ᯲ ᯂᯬ ᯘᯪᯀᯉ᯲ ᯂᯇᯞᯬ᯲ᯖᯂᯉ᯲ ᯉᯪ ᯅᯮᯞᯉ᯲?ᯑᯪᯀ ᯔ ᯅᯞᯪᯎ ᯇᯮᯞᯪ ᯖᯮ ᯎᯬᯖ ᯉᯪ ᯘᯪ ᯔᯒ᯲ᯬ᯲ᯎᯞᯎᯞ, ᯑᯪᯀ ᯔ ᯅᯒᯪᯖ ᯉ ᯥᯞᯪ, ᯇᯅᯬᯀ ᯑᯔᯰ ᯘᯰᯄ᯦ᯔ᯲ᯅᯅ! "ᯉᯉᯪ᯲ᯉ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲.
Dung i didok Guru Satia Bulan ma mangalusi, "Adong do huida habang pidong ambaroba, songgop sitapi-tapi tu dolok simorari, na hurang dibuati, na lobi ditambai" , ninna.
ᯑᯮᯰ ᯤ ᯑᯪᯑᯄ᯦ᯬ᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯔᯝᯞᯮᯘᯪ, "ᯀᯑᯬᯰ ᯑᯬ ᯂᯮᯤᯑ ᯂᯅᯰ ᯇᯪᯑᯬᯰ ᯀᯔ᯲ᯅᯒᯬᯅ, ᯘᯬᯰᯎᯇᯬ᯲ ᯘᯪᯖᯇᯪᯖᯇᯪ ᯖᯮ ᯑᯬᯞᯄ᯦ᯬ᯲ ᯘᯪ ᯔᯬᯒᯒᯪ, ᯉ ᯂᯮᯒᯰ ᯑᯪᯅᯮᯀᯖᯪ, ᯉ ᯞᯬᯅᯪ ᯑᯪᯖᯔ᯲ᯅᯤ", ᯉᯉᯪ᯲ᯉ.
Dung i didok Si Boru Jongjong Anian ma muse mangalusi, "Sada do badanna, dua uluna. Aha do i Guru Satia Bulan?"
ᯑᯮᯰ ᯤ ᯑᯪᯑᯄ᯦ᯬ᯲ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯔ ᯔᯮᯘᯩ ᯔᯝᯞᯮᯘᯪ, "ᯘᯑ ᯑᯬ ᯅᯑᯉ᯲ᯉ, ᯑᯮᯀ ᯥᯞᯮᯉ. ᯀᯂ ᯑᯬ ᯤ ᯎᯮᯒᯮ ᯘᯖᯪᯀ ᯅᯮᯞᯉ᯲?"
"Anduhur mortutu, lote mortio-tio, ndada jengkar mandok na tutu, indada gait mandok na toho. Ulosmi do i dohot natinonunmi". ninna Guru Satia Bulan, "balintang ma pagabe tumandakkon sitadoan arinta ma manggabe, tondinta masigomgoman, ale boru ni rajanami", ninna.
"ᯀᯉ᯲ᯑᯮᯂᯒᯮ᯲ ᯔᯒᯬ᯲ᯖᯮᯖᯮ, ᯞᯬᯖᯩ ᯔᯒᯬ᯲ᯖᯪᯀᯬᯖᯪᯀᯬ, ᯉ᯲ᯑᯑ ᯐᯰᯩᯄ᯦ᯒ᯲ ᯔᯉ᯲ᯑᯄ᯦ᯬ᯲ ᯉ ᯖᯮᯖᯮ, ᯀᯉᯪ᯲ᯑᯑ ᯎᯀᯖᯪ᯲ ᯔᯉ᯲ᯑᯄ᯦ᯬ᯲ ᯉ ᯖᯬᯂᯬ. ᯥᯞᯘᯬ᯲ᯔᯪ ᯑᯬ ᯤ ᯑᯬᯂᯖᯬ᯲ ᯉ ᯖᯪᯉᯬᯉᯉᯮ᯲ᯔᯪ". ᯉᯉᯪ᯲ᯉ ᯎᯮᯒᯮ ᯘᯖᯪᯀ ᯅᯮᯞᯉ᯲, "ᯅᯞᯉᯪ᯲ᯖᯰ ᯔ ᯇᯎᯅᯩ ᯖᯮᯔᯉ᯲ᯑᯄ᯦᯲ᯄ᯦ᯉᯬ᯲ ᯘᯪᯖᯑᯬᯀᯉ᯲ ᯀᯒᯉᯪ᯲ᯖ ᯔ ᯔᯰᯎᯅᯩ, ᯖᯉᯬ᯲ᯑᯉᯪ᯲ᯖ ᯔᯘᯪᯎᯔᯬ᯲ᯎᯬᯔᯉ᯲, ᯀᯞᯩ ᯅᯬᯒᯮ ᯉᯪ ᯒᯐᯉᯔᯪ", ᯉᯉᯪ᯲ᯉ.
Ia dung ma sangon i, manungkun ma muse Guru Satia Bulan, "Beha do, ale boru ni datulang, siulahon do dembanmuna on?" ninna.
ᯤᯀ ᯑᯮᯰ ᯔ ᯘᯬᯝᯉᯬ᯲ ᯤ, ᯔᯉᯮᯰᯄ᯦ᯉᯮ᯲ ᯔ ᯔᯮᯘᯩ ᯎᯮᯒᯮ ᯘᯖᯪᯀ ᯅᯮᯞᯉ᯲, "ᯅᯩᯂ ᯑᯬ, ᯀᯞᯩ ᯅᯬᯒᯮ ᯉᯪ ᯑᯖᯮᯞᯰ, ᯘᯪᯥᯞᯂᯉᯬ᯲ ᯑᯬ ᯑᯔᯩ᯲ᯅᯉ᯲ᯔᯮᯉ ᯀᯉᯬ᯲?" ᯉᯉᯪ᯲ᯉ
"Ba demban siulahon do, anak ni rajanami" , ninna Si Boru Jongjong Ani an mangalusi.
"ᯅ ᯑᯔᯩ᯲ᯅᯉ᯲ ᯘᯪᯥᯞᯂᯉᯬ᯲ ᯑᯬ, ᯀᯉᯄ᯦᯲ ᯉᯪ ᯒᯐᯉᯔᯪ", ᯉᯉᯪ᯲ᯉ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯔᯝᯞᯮᯘᯪ.
Dung i dibahen nasida ma janji, patoluna ma nasida ro mangulak dembanna i.
ᯑᯮᯰ ᯤ ᯑᯪᯅᯂᯉᯩ᯲ ᯉᯘᯪᯑ ᯔ ᯐᯉ᯲ᯐᯪ, ᯇᯖᯬᯞᯮᯉ ᯔ ᯉᯘᯪᯑ ᯒᯬ ᯔᯝᯮᯞᯄ᯦᯲ ᯑᯔᯩ᯲ᯅᯉ᯲ᯉ ᯤ.
Mulak ma nasida, dipapintor ma langkana, tu huta ni guruna, dipaboa ma sude Pangalahona, undang-undangan na binahen ni Si Boru Jongjong Anian Si Boru Tibal Tudosan i tu ibana, ninna ma, "Ale gurunami! Hutopot do Si Boru Jongjong Anian, boru ni datu na Sumurung, portaoar na lumobi, dibahen do tu ahu undang-undangan na maol situtu; metmet do nian hajutna, siat porsanggoloman, ia dung husigat isina, adong, do sadampang demban, sadampang gambir, sadampang pining sadampang hapur, songon i dohot timbaho; tung longang situtu do ahu jala mabiar ala ni i" , ninna.
ᯔᯮᯞᯄ᯦᯲ ᯔ ᯉᯘᯪᯑ, ᯑᯪᯇᯇᯉᯪ᯲ᯖᯒᯬ᯲ ᯔ ᯞᯰᯄ᯦ᯉ, ᯖᯮ ᯂᯮᯖ ᯉᯪ ᯎᯮᯒᯮᯉ, ᯑᯪᯇᯅᯬᯀ ᯔ ᯘᯮᯑᯩ ᯇᯝᯞᯂᯬᯉ, ᯀᯉᯮ᯲ᯑᯰᯀᯉᯮ᯲ᯑᯝᯉ᯲ ᯉ ᯅᯪᯉᯂᯉᯩ᯲ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲ ᯤ ᯖᯮ ᯤᯅᯉ, ᯉᯉᯪ᯲ᯉ ᯔ," ᯀᯞᯩ ᯎᯮᯒᯮᯉᯔᯪ! ᯂᯮᯖᯬᯇᯖᯬ᯲ ᯑᯬ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲, ᯅᯬᯒᯮ ᯉᯪ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ, ᯑᯪᯅᯂᯉᯩ᯲ ᯑᯬ ᯖᯮ ᯀᯂᯮ ᯀᯉᯮ᯲ᯑᯰᯀᯉᯮ᯲ᯑᯝᯉ᯲ ᯉ ᯔᯀᯞᯬ᯲ ᯘᯪᯖᯮᯖᯮ ; ᯔᯖᯩ᯲ᯔᯖᯩ᯲ ᯑᯬ ᯉᯪᯀᯉ᯲ ᯂᯐᯖᯮ᯲ᯉ, ᯘᯪᯀᯖ᯲ ᯇᯒᯬ᯲ᯘᯰᯎᯬᯞᯬᯔᯉ᯲, ᯤᯀ ᯑᯮᯰ ᯂᯮᯘᯪᯎᯖ᯲ ᯤᯘᯪᯉ, ᯀᯑᯬᯰ, ᯑᯬ ᯘᯑᯔ᯲ᯇᯰ ᯑᯔᯩ᯲ᯅᯉ᯲, ᯘᯑᯔ᯲ᯇᯰ ᯎᯔ᯲ᯅᯒᯪ᯲, ᯘᯑᯔ᯲ᯇᯰ ᯇᯪᯉᯪᯰ ᯘᯑᯔ᯲ᯇᯰ ᯂᯇᯒᯮ᯲, ᯘᯬᯝᯉᯬ᯲ ᯤ ᯑᯬᯂᯖᯬ᯲ ᯖᯔᯪ᯲ᯅᯂᯬ; ᯖᯮᯰ ᯞᯬᯝᯰ ᯘᯪᯖᯮᯖᯮ ᯑᯬ ᯀᯂᯮ ᯐᯞ ᯔᯅᯪᯀᯒ᯲ ᯀᯞ ᯉᯪ ᯤ", ᯉᯉᯪ᯲ᯉ.
Alai didok guruna i ma, na morgoar Surta Malim, "Molo songon i, tullang hamu ma sada horbo bahen ulakna, alai so tung mapisik dibahen hamu agiaha sian i.
ᯀᯞᯤ ᯑᯪᯑᯂᯬ᯲ ᯎᯮᯒᯮᯉ ᯤ ᯔ, ᯉ ᯔᯒᯬ᯲ᯎᯬᯀᯒ᯲ ᯘᯒᯮ᯲ᯖ ᯔᯞᯔᯪ᯲, "ᯔᯬᯞᯬ ᯘᯬᯝᯉᯬ᯲ ᯤ, ᯖᯞᯮ᯲ᯞᯰ ᯂᯔᯮᯔ ᯘᯑ ᯂᯒᯬ᯲ᯅᯬ ᯅᯂᯉᯩ᯲ ᯥᯞᯄ᯦᯲ᯉ, ᯀᯞᯤ ᯘᯬ ᯖᯮᯰ ᯇᯪᯘᯄ᯦ᯪ᯲ ᯑᯪᯅᯂᯉᯩ᯲ ᯂᯔᯮ ᯀᯎᯪᯀᯂ ᯘᯪᯀᯉ᯲ ᯤ
Adong do di son sada seakborhu, tu si ma onjat hamu sude na sahorbo i, dung i taruhon hamu ma i, lehon hamu ma sigatan ni Si Boru Jongjong Anian Si Boru Tibal Tudosan" , ninna.
ᯀᯑᯬᯰ ᯑᯬ ᯑᯪᯘᯉᯬ᯲ ᯘᯑ ᯘᯩᯀᯄ᯦᯲ᯅᯒᯬ᯲ᯂᯮ, ᯖᯮ ᯘᯪ ᯔ ᯀᯉᯬ᯲ᯐᯖ᯲ ᯂᯔᯮ ᯘᯮᯑᯩ ᯉ ᯘᯂᯒᯬ᯲ᯅᯬ ᯤ, ᯑᯮᯰ ᯤ ᯖᯒᯮᯂᯉᯬ᯲ ᯂᯔᯮ ᯔ ᯤ, ᯞᯩᯂᯉᯬ᯲ ᯂᯔᯮ ᯔ ᯘᯪᯎᯖᯉ᯲ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲", ᯉᯉᯪ᯲ᯉ.
Dung i dipatupa nasida ma songon na nidok ni guruna i, ia dung sidung na sahorbo i dipormasak nasida, so mapisik agiaha, dionjat nasida ma sudena, siat do antong tu seakborhu na sasada i.
ᯑᯮᯰ ᯤ ᯑᯪᯇᯖᯮᯇ ᯉᯘᯪᯑ ᯔ ᯘᯬᯝᯉᯬ᯲ ᯉ ᯉᯪᯑᯄ᯦ᯬ᯲ ᯉᯪ ᯎᯮᯒᯮᯉ ᯤ, ᯤᯀ ᯑᯮᯰ ᯘᯪᯑᯮᯰ ᯉ ᯘᯂᯬᯒ᯲ᯅᯬ ᯤ ᯑᯪᯇᯒᯬ᯲ᯔᯘᯄ᯦᯲ ᯉᯘᯪᯑ, ᯘᯬᯔᯇᯪᯘᯄ᯦ᯪ᯲ ᯀᯎᯪᯀᯂ, ᯑᯪᯀᯉᯬ᯲ᯐᯖ᯲ ᯉᯘᯪᯑ ᯔ ᯘᯮᯑᯩᯉ, ᯘᯪᯀᯖ᯲ ᯑᯬ ᯀᯉ᯲ᯖᯬᯰ ᯖᯮ ᯘᯩᯀᯂ᯲ᯅᯒᯬ᯲ᯂᯮ ᯉ ᯘᯘᯑ ᯤ.
Dung i borhat ma nasida mandapothon Si Boru Jongjong Anian, diboan nasida ma seakborhu, na morsijuhut na sahorbo i. Alai nunga salpu tingki ni janjinasida di halalahonasida i.
ᯑᯮᯰ ᯤ ᯅᯒᯬ᯲ᯂᯖ᯲ ᯔ ᯉᯘᯪᯑ ᯔᯉ᯲ᯑᯇᯖᯬ᯲ᯂᯉᯬ᯲ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲, ᯑᯪᯅᯬᯀᯉ᯲ ᯉᯘᯪᯑ ᯔ ᯘᯩᯀᯄ᯦᯲ᯅᯒᯬ᯲ᯂᯮ, ᯉ ᯔᯒᯬ᯲ᯘᯪᯐᯮᯂᯖᯮ᯲ ᯉ ᯘᯂᯬᯒ᯲ᯅᯬ ᯤ. ᯀᯞᯤ ᯉᯮᯝ ᯘᯞ᯲ᯇᯮ ᯖᯪᯰᯄ᯦ᯪ ᯉᯪ ᯐᯉ᯲ᯐᯪᯉᯘᯪᯑ ᯑᯪ ᯂᯞᯞᯂᯬᯉᯘᯪᯑ ᯤ
Ia dung diida Si Boru Jongjong Anian nasida dohot katobanna i, didok ma hatana songon on, "U ale anak ni rajanami, boasa ma paoto-otoonmu boru adi, ai indada diingot hamu padan; pangose do hamu, ai nunga salpu tingki ni janji", ninna.
ᯤᯀ ᯑᯮᯰ ᯑᯪᯤᯑ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯉᯘᯪᯑ ᯑᯬᯂᯖᯬ᯲ ᯂᯖᯬᯅᯉ᯲ᯉ ᯤ, ᯑᯪᯑᯂᯬ᯲ ᯔ ᯂᯖᯉ ᯘᯬᯝᯉᯬ᯲ ᯀᯉᯬ᯲, "ᯥ ᯀᯞᯩ ᯀᯉᯄ᯦᯲ ᯉᯪ ᯒᯐᯉᯔᯪ, ᯅᯬᯀᯘ ᯔ ᯇᯀᯬᯖᯬᯀᯬᯖᯬᯀᯉᯬ᯲ᯔᯮ ᯅᯬᯒᯮᯀᯑᯪ, ᯀᯤ ᯀᯉᯪ᯲ᯑᯑ ᯑᯪᯤᯝᯖᯬ᯲ ᯂᯔᯮ ᯇᯑᯉ᯲; ᯇᯝᯬᯘᯩ ᯑᯬ ᯂᯔᯮ, ᯀᯤ ᯉᯮᯝ ᯘᯞ᯲ᯇᯮ ᯖᯪᯰᯄ᯦ᯪ ᯉᯪ ᯐᯉ᯲ᯐᯪ", ᯉᯉᯪ᯲ᯉ.
Alai didok Guru Satia Bulan ma hatana mangalusi: "Hahuaon ma i, ale boru ni rajanami! Huingot do nian padanta i; alai ala na adong di hami an halak na paturunhon, gabe lalap hami maninondur. I do alana umbahen na so ro hami di janjinta i", ninna.
ᯀᯞᯤ ᯑᯪᯑᯄ᯦ᯬ᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯂᯖᯉ ᯔᯝᯞᯮᯘᯪ: "ᯂᯂᯮᯀᯀᯉᯬ᯲ ᯔ ᯤ, ᯀᯞᯩ ᯅᯬᯒᯮ ᯉᯪ ᯒᯐᯉᯔᯪ! ᯂᯮᯤᯝᯖᯬ᯲ ᯑᯬ ᯉᯪᯀᯉ᯲ ᯇᯑᯉ᯲ᯖ ᯤ; ᯀᯞᯤ ᯀᯞ ᯉ ᯀᯑᯬᯰ ᯑᯪ ᯂᯔᯪᯀᯉ᯲ ᯂᯞᯄ᯦᯲ ᯉ ᯇᯖᯮᯒᯉᯮ᯲ᯂᯉᯬ᯲, ᯎᯅᯩ ᯞᯞᯇ᯲ ᯂᯔᯪ ᯔᯉᯪᯉᯉᯬ᯲ᯑᯒᯮ᯲. ᯤ ᯑᯬ ᯀᯞᯉ ᯀᯔᯮ᯲ᯅᯂᯉᯩ᯲ ᯉ ᯘᯬ ᯒᯬ ᯂᯔᯪ ᯑᯪ ᯐᯉ᯲ᯐᯉᯪ᯲ᯖ ᯤ", ᯉᯉᯪ᯲ᯉ.
Dung i didok Si Boru Tibal Tudosan ma muse, "Ba molo songon i, sianak ni namboru, ua tung boan ma juhut i nian nanggo saotik daionniba", ninna.
ᯑᯮᯰ ᯤ ᯑᯪᯑᯄ᯦ᯬ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲ ᯔ ᯔᯮᯘᯩ, "ᯅ ᯔᯬᯞᯬ ᯘᯬᯝᯉᯬ᯲ ᯤ, ᯘᯪᯀᯉᯄ᯦᯲ ᯉᯪ ᯉᯔ᯲ᯅᯬᯒᯮ, ᯥᯀ ᯖᯮᯰ ᯅᯬᯀᯉ᯲ ᯔ ᯐᯮᯂᯖᯮ᯲ ᯤ ᯉᯪᯀᯉ᯲ ᯉᯰᯎᯬ ᯘᯀᯬᯖᯄ᯦ᯪ᯲ ᯑᯤᯀᯉᯬ᯲ ᯉᯪᯅ", ᯉᯉᯪ᯲ᯉ.
Dung i didok Guru Satia Bulan ma mangalusi, "Anggo i da, siboru ni datulang, adong do di son huboanhami saotik", ninna, huhut dilehon seakborhu binoannasida i.
ᯑᯮᯰ ᯤ ᯑᯪᯑᯂᯬ᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯔᯝᯞᯮᯘᯪ, "ᯀᯰᯎᯬ ᯤ ᯑ, ᯘᯪ ᯅᯬᯒᯮ ᯉᯪ ᯑᯖᯮᯞᯰ, ᯀᯑᯬᯰ ᯑᯬ ᯑᯪᯘᯉᯬ᯲ ᯂᯮᯅᯬᯀᯉ᯲ᯂᯔᯪ ᯘᯀᯬᯖᯄ᯦ᯪ᯲", ᯉᯉᯪ᯲ᯉ, ᯂᯮᯂᯖᯮ᯲ ᯑᯪᯞᯩᯂᯉᯬ᯲ ᯘᯩᯀᯄ᯦᯲ᯅᯒᯬ᯲ᯂᯮ ᯅᯪᯉᯬᯀᯉ᯲ᯉᯘᯪᯑ ᯤ.
Disigat Si Boru Jongjong Anian ma seakborhu i, jumpangsa ma tanggo-tanggo. Dung i didok ma, "Boasa so boanonmu nanggo saotik ate-atena i?" ninna.
ᯑᯪᯘᯪᯎᯖ᯲ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯔ ᯘᯩᯀᯄ᯦᯲ᯅᯒᯬ᯲ᯂᯮ ᯤ, ᯐᯔᯮ᯲ᯇᯰᯘ ᯔ ᯖᯰᯎᯬᯖᯰᯎᯬ. ᯑᯮᯰ ᯤ ᯑᯪᯑᯄ᯦ᯬ᯲ ᯔ, "ᯅᯬᯀᯘ ᯘᯬ ᯅᯬᯀᯉᯉᯬ᯲ᯔᯮ ᯉᯰᯎᯬ ᯘᯀᯬᯖᯄ᯦ᯪ᯲ ᯀᯖᯩᯀᯖᯩᯉ ᯤ? "ᯉᯉᯪ᯲ᯉ.
"Dingkan toru sigat hamu ; disi do adong saotik", ninna Guru Satia mangalusi.
"ᯑᯪᯰᯄ᯦ᯉ᯲ ᯖᯬᯒᯮ ᯘᯪᯎᯖ᯲ ᯂᯔᯮ; ᯑᯪᯘᯪ ᯑᯬ ᯀᯑᯬᯰ ᯘᯀᯬᯖᯄ᯦ᯪ᯲", ᯉᯉᯪ᯲ᯉ ᯎᯮᯒᯮ ᯘᯖᯪᯀ ᯔᯝᯞᯮᯘᯪ.
Dung i sai dirungkari Si Boru Tibal Tudosan ma jagal i, purguk ma antong mansai godang, ai pungu do disi juhut ni na sada horbo, disi do sude ate-atena, songon i holiholina ro di butuhana, inda tung mapisik agia sibukna ro di gotana.
ᯑᯮᯰ ᯤ ᯘᯤ ᯑᯪ ᯒᯮᯰᯄ᯦ᯒᯪ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲ ᯔ ᯐᯎᯞ᯲ ᯤ, ᯇᯒᯮ᯲ᯎᯄ᯦ᯮ᯲ ᯔ ᯀᯉ᯲ᯖᯬᯰ ᯔᯉ᯲ᯘᯤ ᯎᯬᯑᯰ, ᯀᯤ ᯇᯮᯝᯮ ᯑᯬ ᯑᯪᯘᯪ ᯐᯮᯂᯖᯮ᯲ ᯉᯪ ᯉ ᯘᯑ ᯂᯒᯬ᯲ᯅᯬ, ᯑᯪᯘᯪ ᯑᯬ ᯘᯮᯑᯩ ᯀᯖᯩᯀᯖᯩᯉ, ᯘᯬᯝᯉᯬ᯲ ᯤ ᯂᯬᯞᯪᯂᯬᯞᯪᯉ ᯒᯬ ᯑᯪ ᯅᯮᯖᯮᯂᯉ, ᯀᯉᯪ᯲ᯑ ᯖᯮᯰ ᯔᯇᯪᯘᯄ᯦ᯪ᯲ ᯀᯎᯪᯀ ᯘᯪᯅᯄ᯦ᯮ᯲ᯉ ᯒᯬ ᯑᯪ ᯎᯬᯖᯉ.
Dung i mansai longang ma Si Boru Jongjong Anian Si Boru Tibal Tudosan mida bahen-bahenanna i, morpingkir ma rohana di bagasan, taringot tu Guru Satia Bulan, ninna rohana ma, "Tung anak ni na tarbarita do on huroha jala tubu ni na hadohan goar: anak ni ise ma on hulaning, na sumurung i?"
ᯑᯮᯰ ᯤ ᯔᯉ᯲ᯘᯤ ᯞᯬᯝᯰ ᯔ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲ ᯔᯪᯑ ᯅᯂᯩᯉ᯲ᯅᯂᯩᯉᯉ᯲ᯉ ᯤ, ᯔᯒᯬ᯲ᯇᯪᯰᯄ᯦ᯒᯪ᯲ ᯔ ᯒᯬᯂᯉ ᯑᯪ ᯅᯎᯘᯉ᯲, ᯖᯒᯪᯝᯖᯬ᯲ ᯖᯮ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯉᯉᯪ᯲ᯉ ᯒᯬᯂᯉ ᯔ," ᯖᯮᯰ ᯀᯉᯄ᯦᯲ ᯉᯪ ᯉ ᯖᯒ᯲ᯅᯒᯪᯖ ᯑᯬ ᯀᯉᯬ᯲ ᯂᯮᯒᯬᯂ ᯐᯞ ᯖᯮᯅᯮ ᯉᯪ ᯉ ᯂᯑᯬᯂᯉ᯲ ᯎᯬᯀᯒ᯲ : ᯀᯉᯄ᯦᯲ ᯉᯪ ᯤᯘᯩ ᯔ ᯀᯉᯬ᯲ ᯂᯮᯞᯉᯪᯰ, ᯉ ᯘᯮᯔᯮᯒᯮᯰ ᯤ?"
ia dung ma songon inon, masisisean ma nasida taringot di hata saut, unduk masioloan ma nasida disi.
ᯤᯀ ᯑᯮᯰ ᯔ ᯘᯬᯝᯉᯬ᯲ ᯤᯉᯉᯬ᯲, ᯔᯘᯪᯘᯪᯘᯩᯀᯉ᯲ ᯔ ᯉᯘᯪᯑ ᯖᯒᯪᯝᯖᯬ᯲ ᯑᯪ ᯂᯖ ᯘᯀᯖᯮ᯲, ᯀᯉᯮ᯲ᯑᯄ᯦ᯮ᯲ ᯔᯘᯪᯀᯬᯞᯬᯀᯉ᯲ ᯔ ᯉᯘᯪᯑ ᯑᯪᯘᯪ.
Dung i disuru Si Boru Jongjong Anian ma inana mangalompa indahan di jabu, asa mangan halak Guru Satia Bulan dohot siraja ni hatobanna, asa disi ma hataonna utang, manang sadia do sinamot boanonna.
ᯑᯮᯰ ᯤ ᯑᯪᯘᯮᯒᯮ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯔ ᯤᯉᯉ ᯔᯝᯞᯔᯬ᯲ᯇ ᯀᯉᯪ᯲ᯑᯂᯉ᯲ ᯑᯪᯐᯅᯮ ᯀᯘ ᯔᯝᯉ᯲ ᯂᯞᯄ᯦᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯑᯬᯂᯖᯬ᯲ ᯘᯪ ᯒᯐ ᯉᯪ ᯂᯖᯬᯅᯉ᯲ᯉ, ᯀᯘ ᯑᯪᯘᯪ ᯔ ᯂᯖᯀᯉᯬ᯲ᯉ ᯥᯖᯰ, ᯔᯉᯰ ᯘᯑᯪᯀ ᯑᯬ ᯘᯪᯉᯔᯖᯬ᯲ ᯅᯬᯀᯉᯉᯬ᯲ᯉ.
Dung masak indahan i didahan porsonduk bolon, dijou ma nasida mangan, dipasuhar ma ulu ni amak bahen hundulanna, mangundang Guru Satia Bulan, sigodang uti-utian, sideak boto botoan.
ᯑᯮᯰ ᯔᯘᯄ᯦᯲ ᯀᯉᯪ᯲ᯑᯂᯉ᯲ ᯤ ᯑᯪᯑᯂᯉ᯲ ᯇᯒᯬ᯲ᯘᯉᯬ᯲ᯑᯄ᯦ᯮ᯲ ᯅᯬᯞᯉᯬ᯲, ᯑᯪ ᯐᯬᯥ ᯔ ᯉᯘᯪᯑ ᯔᯝᯉ᯲, ᯑᯪᯇᯘᯮᯂᯒ᯲ ᯔ ᯥᯞᯮ ᯉᯪ ᯀᯔᯄ᯦᯲ ᯅᯂᯉᯩ᯲ ᯂᯉᯮ᯲ᯑᯮᯞᯉ᯲ᯉ, ᯔᯝᯉᯮ᯲ᯑᯰ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯘᯪ ᯎᯬᯑᯰ ᯥᯖᯪᯥᯖᯪᯀᯉ᯲, ᯘᯪᯑᯩᯀᯄ᯦᯲ ᯅᯬᯖᯬᯅᯬᯖᯬᯀᯉ᯲.
Didok ina ni Si Boru Jongjong Anian i ma, "Hundul ma damang, ale Guru Satia Bulan, mangan ma hamuna!"
ᯑᯪᯑᯄ᯦ᯬ᯲ ᯤᯉ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯤ ᯔ, "ᯂᯉᯮ᯲ᯑᯞᯮ᯲ ᯔ ᯑᯔᯰ, ᯀᯞᯩ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯔᯝᯉ᯲ ᯔ ᯂᯔᯮᯉ!"
Alai didok Guru Satia Bulan ma mangalusi, "Beasa ma bahenonmu, ale inang, morhangalan bao adi, indang hea suhar ulu ni amak ianggo di lumbannami?!"
ᯀᯞᯤ ᯑᯪᯑᯂᯬ᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯔᯝᯞᯮᯘᯪ, "ᯅᯩᯀᯘ ᯔ ᯅᯂᯩᯉᯉᯬ᯲ᯔᯮ, ᯀᯞᯩ ᯤᯉᯰ, ᯔᯒᯬ᯲ᯂᯝᯞᯉ᯲ ᯅᯀᯬᯀᯑᯪ, ᯀᯉᯪ᯲ᯑᯰ ᯂᯩᯀ ᯘᯮᯂᯒ᯲ ᯥᯞᯮ ᯉᯪ ᯀᯔᯄ᯦᯲ ᯤ ᯀᯰᯎᯬ ᯑᯪ ᯞᯔᯮ᯲ᯅᯉ᯲ᯉᯔᯪ?!"
"Ba molo songon i, pinaune pe, amang", ninna ina ni Si Boru Jongjong Anian Si Boru Tibal ,Tudosan.
"ᯅ ᯔᯬᯞᯬ ᯘᯬᯝᯉᯬ᯲ ᯤ, ᯇᯪᯉᯥᯉᯩ ᯇᯩ, ᯀᯔᯰ", ᯉᯉᯪ᯲ᯉ ᯤᯉ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲, ᯖᯮᯑᯬᯘᯉ᯲.
Ia dung sidung songon i, didompakkon nasida ma sipanganon, dipasang Guru Satia Bulan ma boto-botoanna, ula-ula sitampar dasar, atik tung beha adong na so sipanganon di indahan dohot lompan i.
ᯤᯀ ᯑᯮᯰ ᯘᯪᯑᯮᯰ ᯘᯬᯝᯉᯬ᯲ ᯤ, ᯑᯪᯑᯔᯬ᯲ᯇᯄ᯦᯲ᯄ᯦ᯉᯬ᯲ ᯉᯘᯪᯑ ᯔ ᯘᯪᯇᯝᯉᯉᯬ᯲, ᯑᯪᯇᯘᯰ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯅᯬᯖᯬᯅᯬᯖᯬᯀᯉ᯲ᯉ, ᯥᯞᯀᯥᯞ ᯘᯪᯖᯔ᯲ᯇᯒ᯲ ᯑᯘᯒ᯲, ᯀᯖᯄ᯦ᯪ᯲ ᯖᯮᯰ ᯅᯩᯂ ᯀᯑᯬᯰ ᯉ ᯘᯬ ᯘᯪᯇᯝᯉᯉᯬ᯲ ᯑᯪ ᯀᯉᯪ᯲ᯑᯂᯉ᯲ ᯑᯬᯂᯖᯬ᯲ ᯞᯔᯬ᯲ᯇᯉ᯲ ᯤ.
Dung sidung nasida mangan, manungkun ma natoras ni Si Boru Jongjong Anian, ninna ma tu Guru Satia Bulan, "Tek tek, amang, mula ni gondang; serser mula ni tortor, sungkun mula ni hata. Asa na manungkun ma ahu nuaeng:- Apala aha do na niulamu, umbahen ro hamu tu son?" ninna.
ᯑᯮᯰ ᯘᯪᯑᯮᯰ ᯉᯘᯪᯑ ᯔᯝᯉ᯲, ᯔᯉᯮᯰᯄ᯦ᯉᯮ᯲ ᯔ ᯉᯖᯬᯒᯘ᯲ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲, ᯉᯉᯪ᯲ᯉ ᯔ ᯖᯮ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯖᯄᯰᯩ᯲ᯖᯄᯰᯩ᯲, ᯀᯔᯰ, ᯔᯮᯞ ᯉᯪ ᯎᯉᯬ᯲ᯑᯰ; ᯘᯒᯩ᯲ᯘᯒᯩ᯲ ᯔᯮᯞ ᯉᯪ ᯖᯒᯬ᯲ᯖᯒᯬ᯲, ᯘᯮᯰᯄ᯦ᯉᯮ᯲ ᯔᯮᯞ ᯉᯪ ᯂᯖ. ᯀᯘ ᯉ ᯔᯉᯮᯰᯄ᯦ᯉᯮ᯲ ᯔ ᯀᯂᯮ ᯉᯮᯀᯀᯰᯩ:-ᯀᯇᯞ ᯀᯂ ᯑᯬ ᯉ ᯉᯪᯥᯞᯔᯮ, ᯀᯔᯮ᯲ᯅᯂᯉᯩ᯲ ᯒᯬ ᯂᯔᯮ ᯖᯮ ᯘᯉᯬ᯲?" ᯉᯉᯪ᯲ᯉ.
Dung i ninna Guru Satia Bulan ma mangalusi, "Ianggo panungkunmuna i da, rajanami, alusan ma tutu. Naung tangkas do husise borumuna, naung unduk masioloan do hami di hata saut. Asa nuaeng pe, ba manungkun sinamot do ahu, manang sadia arga ni borumuna i, ia tung asi rohamuna di na songon iba on, anak ni na pogos" , ninna Guru Satia Bulan. •
ᯑᯮᯰ ᯤ ᯉᯉᯪ᯲ᯉ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯔᯝᯞᯮᯘᯪ, "ᯀᯪᯀᯰᯎᯬ ᯇᯉᯮᯰᯄ᯦ᯉᯮ᯲ᯔᯮᯉ ᯤ ᯑ, ᯒᯐᯉᯔᯪ, ᯀᯞᯮᯘᯉ᯲ ᯔ ᯖᯮᯖᯮ ᯉᯀᯮᯰ ᯖᯰᯄ᯦ᯘ᯲ ᯑᯬ ᯂᯮᯘᯪᯘᯩ ᯅᯬᯒᯮᯔᯮᯉ, ᯉᯀᯮᯰ ᯀᯉᯮ᯲ᯑᯄ᯦ᯮ᯲ ᯔᯘᯪᯀᯬᯞᯬᯀᯉ᯲ ᯑᯬ ᯂᯔᯪ ᯑᯪ ᯂᯖ ᯘᯀᯖᯮ᯲. ᯀᯘ ᯉᯮᯀᯀᯰᯩ ᯇᯩ, ᯅ ᯔᯉᯮᯰᯄ᯦ᯉᯮ᯲ ᯘᯪᯉᯔᯖᯬ᯲ ᯑᯬ ᯀᯂᯮ, ᯔᯉᯰ ᯘᯑᯪᯀ ᯀᯒ᯲ᯎ ᯉᯪ ᯅᯬᯒᯮᯔᯮᯉ ᯤ, ᯤᯀ ᯖᯮᯰ ᯀᯘᯪ ᯒᯬᯂᯔᯮᯉ ᯑᯪ ᯉ ᯘᯬᯝᯉᯬ᯲ ᯤᯅ ᯀᯉᯬ᯲, ᯀᯉᯄ᯦᯲ ᯉᯪ ᯉ ᯇᯬᯎᯘᯬ᯲", ᯉᯉᯪ᯲ᯉ ᯎᯮᯒᯮ ᯘᯖᯪᯀ ᯅᯮᯞᯉ᯲.
"Ianggo i do hape, umbahen na ro hamuna , ba sijalo na godang do ahu, ai tuk do bahenonmu ; ingkon singkop do goar ni nasa sinamot lehononmu boli ni borungki, asa saut i di ho", ninna Datu na Sumurung, portaoar lumobi.
"ᯤᯀᯰᯎᯬ ᯤ ᯑᯬ ᯂᯇᯩ, ᯀᯔᯮ᯲ᯅᯂᯉᯩ᯲ ᯉ ᯒᯬ ᯂᯔᯮᯉ, ᯅ ᯘᯪᯐᯞᯬ ᯉ ᯎᯬᯑᯰ ᯑᯬ ᯀᯂᯮ, ᯀᯤ ᯖᯄ᯦ᯮ᯲ ᯑᯬ ᯅᯂᯩᯉᯉᯬ᯲ᯔᯮ; ᯀᯪᯰᯄ᯦ᯉᯬ᯲ ᯘᯪᯰᯄ᯦ᯇᯬ᯲ ᯑᯬ ᯎᯬᯀᯒ᯲ ᯉᯪ ᯉᯘ ᯘᯪᯉᯔᯖᯬ᯲ ᯞᯩᯂᯬᯉᯉᯬ᯲ᯔᯮ ᯅᯬᯞᯪ ᯉᯪ ᯅᯬᯒᯮᯰᯄ᯦ᯪ, ᯀᯘ ᯘᯀᯖᯮ᯲ ᯤ ᯑᯪ ᯂᯬ", ᯉᯉᯪ᯲ᯉ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯀᯒ᯲ ᯞᯮᯔᯬᯅᯪ.
Dung i didok Guru Satia Bulan ma mangalusi: "Ba ianggo i do, asal ma saut di ahu borumuna i, lehononku do nasa na tarlehon ahu."
ᯑᯮᯰ ᯤ ᯑᯪᯑᯄ᯦ᯬ᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯔᯝᯞᯮᯘᯪ: "ᯅ ᯤᯀᯰᯎᯬ ᯤ ᯑᯬ, ᯀᯘᯞ᯲ ᯔ ᯘᯀᯖᯮ᯲ ᯑᯪ ᯀᯂᯮ ᯅᯬᯒᯮᯔᯮᯉ ᯤ, ᯞᯩᯂᯬᯉᯉᯬ᯲ᯄ᯦ᯮ ᯑᯬ ᯉ ᯘ ᯉ ᯖᯒ᯲ᯞᯩᯂᯉᯬ᯲ ᯀᯂᯮ."
Dung songon i pangkataionnasida, ditogihon Guru Satia Bulan ma nasida tu toru, asa patuduhononna sinamot silehonon na.
ᯑᯮᯰ ᯘᯬᯝᯉᯬ᯲ ᯤ ᯇᯰᯂᯖᯤᯀᯉᯬ᯲ ᯉᯘᯪᯑ, ᯑᯪᯖᯬᯎᯪᯂᯉᯬ᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯉᯘᯪᯑ ᯖᯮ ᯖᯬᯒᯮ, ᯀᯘ ᯇᯖᯮᯑᯮᯂᯬᯉᯉᯬ᯲ᯉ ᯘᯪᯉᯔᯖᯬ᯲ ᯘᯪᯞᯩᯂᯬᯉᯉᯬ᯲ᯉ.
Dung sahat nasida ro di toru, dibuat ma angka imbulu na pinapunguna i di garung-garung i.
ᯑᯮᯰ ᯘᯂᯖ᯲ ᯉᯘᯪᯑ ᯒᯬ ᯑᯪ ᯖᯬᯒᯮ, ᯑᯪᯅᯮᯀᯖ᯲ ᯔ ᯀᯰᯄ᯦ ᯀᯔᯪ᯲ᯅᯮᯞᯮ ᯉ ᯇᯪᯉᯇᯮᯝᯮᯉ ᯤ ᯑᯪ ᯎᯒᯮᯰᯎᯒᯮᯰ ᯤ
Dibuat ma imbulu ni horbo, gabe horbo ma niida torop di si; dibuat imbulu ni lombu, gabe lombu ma torop idaon disi ; dibuat imbulu ni hoda , gabe hoda ma torop idaon disi; songon i ma dibahen patubu angka pinahan na asing.
ᯑᯪᯅᯮᯀᯖ᯲ ᯔ ᯀᯔᯪ᯲ᯅᯮᯞᯮ ᯉᯪ ᯂᯒᯬ᯲ᯅᯬ, ᯎᯅᯩ ᯂᯒᯬ᯲ᯅᯬ ᯔ ᯉᯪᯤᯑ ᯖᯬᯒᯇᯬ᯲ ᯑᯪᯘᯪ; ᯑᯪᯅᯮᯀᯖ᯲ ᯀᯔᯪ᯲ᯅᯮᯞᯮ ᯉᯪ ᯞᯔᯬ᯲ᯅᯮ, ᯎᯅᯩ ᯞᯔᯬ᯲ᯅᯮ ᯔ ᯖᯬᯒᯇᯬ᯲ ᯤᯑᯀᯉᯬ᯲ ᯑᯪᯘᯪ; ᯑᯪᯅᯮᯀᯖ᯲ ᯀᯔᯪ᯲ᯅᯮᯞᯮ ᯉᯪ ᯂᯬᯑ, ᯎᯅᯩ ᯂᯬᯑ ᯔ ᯖᯬᯒᯇᯬ᯲ ᯤᯑᯀᯉᯬ᯲ ᯑᯪᯘᯪ; ᯘᯬᯝᯉᯬ᯲ ᯤ ᯔ ᯑᯪᯅᯂᯉᯩ᯲ ᯇᯖᯮᯅᯮ ᯀᯰᯄ᯦ ᯇᯪᯉᯂᯉ᯲ ᯉ ᯀᯘᯪᯰ.
Ia _dung sidung dipatuduhon nasa ragam ni pahan-pahanan, diullus muse ma pura pura, dionjati ma mas tu bagasan, dipatubu ma godang ringgit, dibahen ma i tu pinggan ribar, dipasahat ma i sudena tu Datu na Sumurung, portaor na lumobi, bahen boli ni Si Boru Jongjong Anian Si Boru Tibal Tudosan, hau jadi-jadian, jolma na so hatudosan.
ᯤᯀ ᯑᯮᯰ ᯘᯪᯑᯮᯰ ᯑᯪᯇᯖᯮᯑᯮᯂᯉᯬ᯲ ᯉᯘ ᯒᯎᯔ᯲ ᯉᯪ ᯇᯂᯉ᯲ᯇᯂᯉᯉ᯲, ᯑᯪᯀᯞᯮ᯲ᯞᯘᯮ᯲ ᯔᯮᯘᯩ ᯔ ᯇᯮᯒᯇᯮᯒ, ᯑᯪᯀᯉᯬ᯲ᯐᯖᯪ ᯔ ᯔᯘ᯲ ᯖᯮ ᯅᯎᯘᯉ᯲, ᯑᯪᯇᯖᯮᯅᯮ ᯔ ᯎᯬᯑᯰ ᯒᯪᯰᯎᯖᯪ᯲, ᯑᯪᯅᯂᯉᯩ᯲ ᯔ ᯤ ᯖᯮ ᯇᯪᯰᯎᯉ᯲ ᯒᯪᯅᯒ᯲, ᯑᯪᯇᯘᯂᯖ᯲ ᯔ ᯤ ᯘᯮᯑᯩᯉ ᯖᯮ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯒ᯲ ᯉ ᯞᯮᯔᯬᯅᯪ, ᯅᯂᯉᯩ᯲ ᯅᯬᯞᯪ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲, ᯂᯥ ᯐᯑᯪᯐᯑᯪᯀᯉ᯲, ᯐᯬᯞ᯲ᯔ ᯉ ᯘᯬ ᯂᯖᯮᯑᯬᯘᯉ᯲.
I ma mula ni boli ni boru sapura-pura na hinisik,dohot ringgit sapinggan ribar, satangan baju.
ᯤ ᯔ ᯔᯮᯞ ᯉᯪ ᯅᯬᯞᯪ ᯉᯪ ᯅᯬᯒᯮ ᯘᯇᯮᯒᯇᯮᯒ ᯉ ᯂᯪᯉᯪᯘᯂᯪ᯲, ᯑᯬᯂᯖᯬ᯲ ᯒᯪᯰᯎᯪᯖ᯲ ᯘᯇᯪᯰᯎᯉ᯲ ᯒᯪᯅᯒ᯲, ᯘᯖᯝᯉ᯲ ᯅᯐᯮ.
Ia nunga sahat sinamot i sudena, mangkuling ma Datu na Sumurung, portaoar na lumobi, didok ma tu Guru Satia Bulan, "Ba nunga tutu saut dilehon ho sinamotmi, boli ni borungku Si Boru Jongjong Anian Si Boru Tibal Tudosan, na so maranian, na so mortudosan, ba saut ma i tutu di ho.
ᯤᯀ ᯉᯮᯝ ᯘᯂᯖ᯲ ᯘᯪᯉᯔᯖᯬ᯲ ᯤ ᯘᯮᯑᯩᯉ, ᯔᯰᯄ᯦ᯮᯞᯪᯰ ᯔ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ, ᯑᯪᯑᯄ᯦ᯬ᯲ ᯔ ᯖᯮ ᯎᯮᯒᯮ ᯘᯖᯪᯀ ᯅᯮᯞᯉ᯲, "ᯅ ᯉᯮᯝ ᯖᯮᯖᯮ ᯘᯀᯖᯮ᯲ ᯑᯪᯞᯩᯂᯉᯬ᯲ ᯂᯬ ᯘᯪᯉᯔᯖᯬ᯲ᯔᯪ, ᯅᯬᯞᯪ ᯉᯪ ᯅᯬᯒᯮᯰᯄ᯦ᯮ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲, ᯉ ᯘᯬ ᯔᯒᯉᯪᯀᯉ᯲, ᯉ ᯘᯬ ᯔᯒᯬ᯲ᯖᯮᯑᯬᯘᯉ᯲, ᯅ ᯘᯖᯮ᯲ ᯔ ᯤ ᯖᯮᯖᯮ ᯑᯪ ᯂᯬ.
Alai adong dope dohononku di ho, na so jadi dohononmu do goarhu dohot goar ni angka hasubanganmu ; anggo tung dohononmu do i, na paleahon do ho di hami, mulak ma sinamotmu, indang saut borungki boanonmu", ninna.
ᯀᯞᯤ ᯀᯑᯬᯰ ᯑᯬ ᯇᯩ ᯑᯬᯂᯬᯉᯉᯬ᯲ᯄ᯦ᯮ ᯑᯪ ᯂᯬ, ᯉ ᯘᯬ ᯐᯑᯪ ᯑᯬᯂᯬᯉᯉᯬ᯲ᯔᯮ ᯑᯬ ᯎᯬᯀᯒ᯲ᯂᯮ ᯑᯬᯂᯖᯬ᯲ ᯎᯬᯀᯒ᯲ ᯉᯪ ᯀᯰᯄ᯦ ᯂᯘᯮᯅᯝᯉ᯲ᯔᯮ; ᯀᯰᯎᯬ ᯖᯮᯰ ᯑᯬᯂᯬᯉᯉᯬ᯲ᯔᯮ ᯑᯬ ᯤ, ᯉ ᯇᯞᯩᯀᯂᯉᯬ᯲ ᯑᯬ ᯂᯬ ᯑᯪ ᯂᯔᯪ, ᯔᯮᯞᯄ᯦᯲ ᯔ ᯘᯪᯉᯔᯖᯬ᯲ᯔᯮ, ᯀᯉᯪ᯲ᯑᯰ ᯘᯀᯖᯮ᯲ ᯅᯬᯒᯮᯰᯄ᯦ᯪ ᯅᯬᯀᯉᯉᯬ᯲ᯔᯮ", ᯉᯉᯪ᯲ᯉ.
"Ba angka dia ma huroha, ale amang, asa huboto pasidingonku? Patut do i na nidokmu i, ai sitongka do tutu dohononku goar ni baongku dohot nasa hasubanganku", ninna Guru Satia Bulan. ·
"ᯅ ᯀᯰᯄ᯦ ᯑᯪᯀ ᯔ ᯂᯮᯒᯬᯂ, ᯀᯞᯩ ᯀᯔᯰ, ᯀᯘ ᯂᯮᯅᯬᯖᯬ ᯇᯘᯪᯑᯪᯝᯉᯬ᯲ᯄ᯦ᯮ? ᯇᯖᯖᯮ᯲ ᯑᯬ ᯤ ᯉ ᯉᯪᯑᯄ᯦ᯬ᯲ᯔᯮ ᯤ, ᯀᯤ ᯘᯪᯖᯬᯰᯄ᯦ ᯑᯬ ᯖᯮᯖᯮ ᯑᯬᯂᯬᯉᯉᯬ᯲ᯄ᯦ᯮ ᯎᯬᯀᯒ᯲ ᯉᯪ ᯅᯀᯬᯰᯄ᯦ᯮ ᯑᯬᯂᯖᯬ᯲ ᯉᯘ ᯂᯘᯮᯅᯝᯉ᯲ᯄ᯦ᯮ", ᯉᯉᯪ᯲ᯉ ᯎᯮᯒᯮ ᯘᯖᯪᯀ ᯅᯮᯞᯉ᯲.
Dung i didok Portaoar na Sumurung ma, "ianggo i, ale bere, paboaonku ma, ai taho do godangna, angka hata goar-goar na so boi dohononmu. Tangkas ma tangihon, asa ingotonmu; lului ma hata pasilihon, unang be i dohononmu, ai sude sigoaranki, luhut do i goar ni porsubangonmu.
ᯑᯮᯰ ᯤ ᯑᯪᯑᯄ᯦ᯬ᯲ ᯇᯒᯬ᯲ᯖᯀᯬᯀᯒ᯲ ᯉ ᯘᯮᯔᯮᯒᯮᯰ ᯔ, "ᯤᯀᯰᯎᯬ ᯤ, ᯀᯞᯩ ᯅᯩᯒᯩ, ᯇᯅᯬᯀᯀᯉᯬ᯲ᯄ᯦ᯮ ᯔ, ᯀᯤ ᯖᯂᯬ ᯑᯬ ᯎᯬᯑᯰᯉ, ᯀᯰᯄ᯦ ᯂᯖ ᯎᯬᯀᯒ᯲ᯎᯬᯀᯒ᯲ ᯉ ᯘᯬ ᯅᯬᯤ ᯑᯬᯂᯬᯉᯉᯬ᯲ᯔᯮ . ᯖᯰᯄ᯦ᯘ᯲ ᯔ ᯖᯝᯪᯂᯉᯬ᯲, ᯀᯘ ᯤᯝᯬᯖᯉᯬ᯲ᯔᯮ; ᯞᯮᯞᯮᯤ ᯔ ᯂᯖ ᯇᯘᯪᯞᯪᯂᯉᯬ᯲, ᯥᯉᯰ ᯅᯩ ᯤ ᯑᯬᯂᯬᯉᯉᯬ᯲ᯔᯮ, ᯀᯤ ᯘᯮᯑᯩ ᯘᯪᯎᯬᯀᯒᯉ᯲ᯄ᯦ᯪ, ᯞᯮᯂᯖᯮ᯲ ᯑᯬ ᯤ ᯎᯬᯀᯒ᯲ ᯉᯪ ᯇᯒᯬ᯲ᯘᯮᯅᯝᯉᯬ᯲ᯔᯮ.
Asa angka on ma na so jadi dohononmu, paboa na olo ho pasangaphon ahu: ulu, obuk, pinggol, mata dohot nasa goar-goar na di daging.
ᯀᯘ ᯀᯰᯄ᯦ ᯀᯉᯬ᯲ ᯔ ᯉ ᯘᯬ ᯐᯑᯪ ᯑᯬᯂᯬᯉᯉᯬ᯲ᯔᯮ, ᯇᯅᯬᯀ ᯉ ᯀᯬᯞᯬ ᯂᯬ ᯇᯘᯝᯇ᯲ᯂᯉᯬ᯲ ᯀᯂᯮ: ᯥᯞᯮ, ᯀᯬᯅᯄ᯦ᯮ᯲, ᯇᯪᯰᯎᯞᯬ᯲, ᯔᯖ ᯑᯬᯂᯖᯬ᯲ ᯉᯘ ᯎᯬᯀᯒ᯲ᯎᯬᯀᯒ᯲ ᯉ ᯑᯪ ᯑᯎᯪᯰ.
Dung i: ompu, ama, ina, na nioli, bere dohot nasa portuturan,
ᯑᯮᯰ ᯤ : ᯀᯔᯬ᯲ᯇᯮ, ᯀᯔ, ᯤᯉ, ᯉ ᯉᯪᯀᯬᯞᯪ, ᯅᯩᯒᯩ ᯑᯬᯂᯖᯬ᯲ ᯉᯘ ᯇᯒᯬ᯲ᯖᯮᯖᯮᯒᯉ᯲,
Dung i: ulos, baju, mas hepeng, indahan, sira, aek dohot nasa goar-goaran ni ugasan.
ᯑᯮᯰ ᯤ : ᯥᯞᯘᯬ᯲, ᯅᯐᯮ, ᯔᯘ᯲ ᯂᯩᯇᯰᯩ, ᯀᯉᯪ᯲ᯑᯂᯉ᯲, ᯘᯪᯒ, ᯀᯀᯄᯩ᯦᯲ ᯑᯬᯂᯖᯬ᯲ ᯉᯘ ᯎᯬᯀᯒ᯲ᯎᯬᯀᯒᯉ᯲ ᯉᯪ ᯥᯎᯘᯉ᯲
Molo boi i pasidingonmu, na so jadi dohononmu, ala luhutna i goar ni porsubangonmu, saut ma ho gabe helangku; saut ma borungki di ho, bahen siadopanmu, ai pos ma rohangku, na morsangap ahu bahenonmu, Alai tangkas ma dok damang, anggo so boi do i oloanmu, indada na manjua ahu paulak sinamotmu, gabe borungki, lului damang boru ni halak olionmu", ninna.
ᯔᯬᯞᯬ ᯅᯬᯤ ᯤ ᯇᯘᯪᯑᯪᯝᯉᯬ᯲ᯔᯮ, ᯉ ᯘᯬ ᯐᯑᯪ ᯑᯬᯂᯬᯉᯉᯬ᯲ᯔᯮ, ᯀᯞ ᯞᯮᯂᯖᯮ᯲ᯉ ᯤ ᯎᯬᯀᯒ᯲ ᯉᯪ ᯇᯒᯬ᯲ᯘᯮᯅᯝᯉᯬ᯲ᯔᯮ, ᯘᯀᯖᯮ᯲ ᯔ ᯂᯬ ᯎᯅᯩ ᯂᯩᯞᯰᯄ᯦ᯮ; ᯘᯀᯖᯮ᯲ ᯔ ᯅᯬᯒᯮᯰᯄ᯦ᯪ ᯑᯪ ᯂᯬ, ᯅᯂᯉᯩ᯲ ᯘᯪᯀᯑᯬᯇᯉ᯲ᯔᯮ, ᯀᯤ ᯇᯘᯬ᯲ ᯔ ᯒᯬᯂᯰᯄ᯦ᯮ, ᯉ ᯔᯒᯬ᯲ᯘᯝᯇ᯲ ᯀᯂᯮ ᯅᯂᯩᯉᯉᯬ᯲ᯔᯮ, ᯀᯞᯤ ᯖᯰᯄ᯦ᯘ᯲ ᯔ ᯑᯄ᯦ᯬ᯲ ᯑᯔᯰ, ᯀᯰᯎᯬ ᯘᯬ ᯅᯬᯤ ᯑᯬ ᯤ ᯀᯬᯞᯬᯀᯉ᯲ᯔᯮ, ᯀᯉᯪ᯲ᯑᯑ ᯉ ᯔᯉ᯲ᯐᯮᯀ ᯀᯂᯮ ᯇᯥᯞᯄ᯦᯲ ᯘᯪᯉᯔᯖᯬ᯲ᯔᯮ, ᯎᯅᯩ ᯅᯬᯒᯮᯰᯄ᯦ᯪ, ᯞᯮᯞᯮᯤ ᯑᯔᯰ ᯅᯬᯒᯮ ᯉᯪ ᯂᯞᯄ᯦᯲ ᯀᯬᯞᯪᯀᯉᯬ᯲ᯔᯮ", ᯉᯉᯪ᯲ᯉ.
Dung i marsak ma roha ni Guru Satia Bulan umbege na nidok ni Portaoar na Sumurung i, ai indada na boi di rohana pasidingonna sude na nidokna i; dung i dipangido ma janji tu na naeng simatuana i, di bagasan tolu ari ibana mamingkiri angka hata sipasidingon i, dung pe i musengani, asa ulahanna ro tu huta i, paboa hon ujung ni pingkiranna, manang na boi pasidingonna angka goar • na nidokna i.
ᯑᯮᯰ ᯤ ᯔᯒ᯲ᯘᯄ᯦᯲ ᯔ ᯒᯬᯂ ᯉᯪ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯀᯔᯮ᯲ᯅᯩᯎᯩ ᯉ ᯉᯪᯑᯄ᯦ᯬ᯲ ᯉᯪ ᯇᯒᯬ᯲ᯖᯀᯬᯀᯒ᯲ ᯉ ᯘᯮᯔᯮᯒᯮᯰ ᯤ, ᯀᯤ ᯀᯉᯪ᯲ᯑᯑ ᯉ ᯅᯬᯤ ᯑᯪ ᯒᯬᯂᯉ ᯇᯘᯪᯑᯪᯝᯉᯬ᯲ᯉ ᯘᯮᯑᯩ ᯉ ᯉᯪᯑᯄ᯦ᯬ᯲ᯉ ᯤ; ᯑᯮᯰ ᯤ ᯑᯪᯇᯝᯪᯑᯬ ᯔ ᯐᯉ᯲ᯐᯪ ᯖᯮ ᯉᯉᯀᯰᯩ ᯘᯪᯔᯖᯮᯀᯉ ᯤ, ᯑᯪ ᯅᯎᯘᯉ᯲ ᯖᯬᯞᯮ ᯀᯒᯪ ᯤᯅᯉ ᯔᯔᯪᯰᯄ᯦ᯪᯒᯪ ᯀᯰᯄ᯦ ᯂᯖ ᯘᯪᯇᯘᯪᯑᯪᯝᯉᯬ᯲ ᯤ, ᯑᯮᯰ ᯇᯩ ᯤ ᯔᯮᯘᯩᯝᯉᯪ ,ᯀᯘ ᯥᯞᯂᯉ᯲ᯉ ᯒᯬ ᯖᯮ ᯂᯮᯖ ᯤ, ᯇᯅᯬᯀᯂᯉᯬ᯲ ᯥᯐᯮᯰ ᯉᯪ ᯇᯪᯰᯄ᯦ᯪᯒᯉ᯲ᯉ, ᯔᯉᯰ ᯉ ᯅᯬᯤ ᯇᯘᯪᯑᯪᯝᯉᯬ᯲ᯉ ᯀᯰᯄ᯦ ᯎᯬᯀᯒ᯲ ᯉ ᯉᯪᯑᯄ᯦ᯬ᯲ᯉ ᯤ.
Dung i mulak ma jolo Guru Satia Bulan, mansai marsak do rohana, umpingkir pangidoan ni Portaoar na Sumurung, na nidok na tu ibana; digalmit ma hurumna, ditompuk lambiakna, angka berbur ma iluna ditangkupi hambirangna.
ᯑᯮᯰ ᯤ ᯔᯮᯞᯄ᯦᯲ ᯔ ᯐᯬᯞᯬ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯔᯉ᯲ᯘᯤ ᯔᯒ᯲ᯘᯄ᯦᯲ ᯑᯬ ᯒᯬᯂᯉ, ᯀᯔᯮ᯲ᯇᯪᯰᯄ᯦ᯒᯪ᯲ ᯇᯝᯪᯑᯬᯀᯉ᯲ ᯉᯪ ᯇᯬᯒ᯲ᯖᯀᯬᯀᯒ᯲ ᯉ ᯘᯮᯔᯮᯒᯮᯰ, ᯉ ᯉᯪᯑᯄ᯦ᯬ᯲ᯉ ᯖᯮ ᯤᯅᯉ; ᯑᯪᯎᯞ᯲ᯔᯖᯪ᯲ ᯔ ᯂᯮᯒᯔᯮ᯲ᯉ, ᯑᯪᯖᯔᯬ᯲ᯇᯄ᯦ᯮ᯲ ᯞᯔ᯲ᯅᯪᯀᯄ᯦᯲ᯉ, ᯀᯰᯄ᯦ ᯅᯒᯩ᯲ᯅᯒᯮ᯲ ᯔ ᯤᯞᯮᯉ ᯑᯪᯖᯰᯄ᯦ᯮᯇᯪ ᯂᯔ᯲ᯅᯪᯒᯰᯉ.
Ia dung sai tangis ibana diida sada boru natua-tua, disungkun ma ibana, ninna ma: "Boasa sai tangis ho, ale Guru Satia Bulan? Aha do na niarsakkonmu, ale anak ni na hadohan goar?"
ᯤᯀ ᯑᯮᯰ ᯘᯤ ᯖᯝᯘᯪ᯲ ᯤᯅᯉ ᯑᯪᯤᯑ ᯘᯑ ᯅᯬᯒᯮ ᯉᯖᯮᯀᯖᯮᯀ, ᯑᯪ ᯘᯮᯰᯄ᯦ᯉᯮ᯲ ᯔ ᯤᯅᯉ, ᯉᯉᯪ᯲ᯉ ᯔ: "ᯅᯬᯀᯘ ᯘᯤ ᯖᯝᯘᯪ᯲ ᯂᯬ, ᯀᯞᯩ ᯎᯮᯒᯮ ᯘᯖᯪᯀ ᯅᯮᯞᯉ᯲?ᯀᯂ ᯑᯬ ᯉ ᯉᯪᯀᯒ᯲ᯘᯄ᯦᯲ᯄ᯦ᯉᯬ᯲ᯔᯮ, ᯀᯞᯩ ᯀᯉᯄ᯦᯲ ᯉᯪ ᯉ ᯂᯑᯬᯂᯉ᯲ ᯎᯬᯀᯒ᯲?"
Dung i dipaboa ma 'holong ni rohana di Si Boru Jongjong Anian Si Boru Tibal Tudosan, halak na so moranian, na soada mortudosan, dohot naung sahat i sudena sinamotna, holan angka hata na pinangido ni amana Portaoar na Sumurung i nama dipingkir rohana, na so boi pasidingonna.
ᯑᯮᯰ ᯤ ᯑᯪᯇᯅᯬᯀ ᯔ ᯂᯬᯞᯬᯰ ᯉᯪ ᯒᯬᯂᯉ ᯑᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲, ᯂᯞᯄ᯦᯲ ᯉ ᯘᯬ ᯔᯬᯒᯉᯪᯀᯉ᯲, ᯉ ᯘᯬ ᯀᯑ ᯔᯒᯬ᯲ᯖᯮᯑᯬᯘᯉ᯲, ᯑᯬᯂᯖᯬ᯲ ᯉᯀᯮᯰ ᯘᯂᯖ᯲ ᯤ ᯘᯮᯑᯩᯉ ᯘᯪᯉᯔᯖᯬ᯲ᯉ, ᯂᯬᯞᯉ᯲ ᯀᯰᯄ᯦ ᯂᯖ ᯉ ᯇᯪᯉᯝᯪᯑᯬ ᯉᯪ ᯀᯔᯉ ᯇᯒᯬ᯲ᯖᯀᯬᯀᯒ᯲ ᯉ ᯘᯮᯔᯮᯒᯮᯰ ᯤ ᯉ ᯔ ᯑᯪᯇᯪᯰᯄ᯦ᯒᯪ᯲ ᯒᯬᯂᯉ, ᯉ ᯘᯬ ᯅᯬᯤ ᯇᯘᯪᯑᯪᯝᯉᯬ᯲ᯉ.
Dung i didok muse ma tu boru natuatua i, "Taganan nama ahu langge unang singkoru; ba taganan na ma ahu mate unang mangolu, anggo tung so saut be Si Boru Jongjong Anian Si Boru Tibal Tudosan bahen siadopan", ninna.
ᯑᯮᯰ ᯤ ᯑᯪᯑᯄ᯦ᯬ᯲ ᯔᯮᯘᯩ ᯔ ᯖᯮ ᯅᯬᯒᯮ ᯉᯖᯮᯀᯖᯮᯀ ᯤ, "ᯖᯎᯉᯉ᯲ ᯉ ᯔ ᯀᯂᯮ ᯞᯰᯎᯩ ᯥᯉᯰ ᯘᯪᯰᯄ᯦ᯬᯒᯮ; ᯅ ᯖᯎᯉᯉ᯲ ᯉ ᯔ ᯀᯂᯮ ᯔᯖᯩ ᯥᯉᯰ ᯔᯝᯬᯞᯮ, ᯀᯰᯎᯬ ᯖᯮᯰ ᯘᯬ ᯘᯀᯖᯮ᯲ ᯅᯩ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲ ᯅᯂᯉᯩ᯲ ᯘᯪᯀᯑᯬᯇᯉ᯲", ᯉᯉᯪ᯲ᯉ.
Alai patut do antong dohononna songon i, ai hau siala gundi do panampulan ni sihala, ai dos do hinabolonnasida, tung suman do dohot rupana.
ᯀᯞᯤ ᯇᯖᯖᯮ᯲ ᯑᯬ ᯀᯉ᯲ᯖᯬᯰ ᯑᯬᯂᯬᯉᯉᯬ᯲ᯉ ᯘᯬᯝᯉᯬ᯲ ᯤ, ᯀᯤ ᯂᯥ ᯘᯪᯀᯞᯎᯉᯮ᯲ᯑᯪ ᯑᯬ ᯇᯉᯔ᯲ᯇᯮᯞᯉ᯲ ᯉᯪ ᯘᯪᯂᯞ, ᯀᯤ ᯑᯘᯬ᯲ ᯑᯬ ᯂᯪᯉᯅᯬᯞᯉᯬ᯲ ᯉᯘᯪᯑ, ᯖᯮᯰ ᯘᯮᯔᯉ᯲ ᯑᯬ ᯑᯬᯂᯖᯬ᯲ ᯒᯮᯇᯉ.
Dung i didok boru natuatua i ma muse tu Guru Satia Bulan, "Ai angka dia ma huroha, na so jadi dohononmi didok?" ninna.
ᯑᯮᯰᯤᯑᯪᯑᯬᯂ᯲ᯅᯬᯒᯮᯉᯖᯮᯀᯖᯮᯀᯤᯔᯔᯮᯘᯩᯖᯮᯎᯮᯒᯮᯘᯖᯪᯀᯅᯮᯞᯉ᯲,"ᯀᯤᯀᯰᯂᯑᯪᯀᯔᯂᯮᯒᯬᯂ,ᯉᯘᯬᯐᯑᯪᯑᯬᯂᯬᯉᯬᯉ᯲ᯔᯪᯑᯪᯑᯬᯂ᯲?"ᯉᯪᯉ᯲ᯉ.
Jadi dipajojor ma sude na pinangido ni Portaoar na Sumurung i, didok ma, ulu, mata, horbo, hoda, mas, babi, solu dohot mansai lan angka na asing goar na so jadi dohononna.
ᯐᯑᯪ ᯑᯪᯇᯐᯬᯐᯒᯬ᯲ ᯔ ᯘᯮᯑᯩᯉ ᯇᯪᯉᯝᯪᯑᯬ ᯉᯪ ᯇᯒᯬ᯲ᯖᯀᯬᯀᯒ᯲ ᯉ ᯘᯮᯔᯮᯒᯮᯰ ᯤ, ᯑᯪᯑᯂᯬ᯲ ᯔ, ᯥᯞᯮ, ᯔᯖ, ᯂᯒᯬ᯲ᯅᯬ, ᯂᯬᯑ, ᯔᯘ᯲, ᯅᯅᯪ, ᯘᯬᯞᯮ ᯑᯬᯂᯖᯬ᯲ ᯔᯉ᯲ᯘᯤ ᯞᯉ᯲ ᯀᯰᯄ᯦ ᯉ ᯀᯘᯪᯰ ᯎᯬᯀᯒ᯲ ᯉ ᯘᯬ ᯐᯑᯪ ᯑᯬᯂᯬᯉᯉᯬ᯲ᯉ.
Dung i didok boru natuatua i ma muse, "Ianggo i do hape, unang pola sai tangis ho ; dohot na sai mura! Ba molo so boi, ninna, dohononmu ulu, ba simanjujung ma dok; mata ninna, ba simalolong dok ; obuk ninna, ba sitarupon dok ; pos roham, saut do boruna i di ho, anggo holan i do jut ni roham", ninna; diajarhon ma dohot goar-goar ni na asing i sudena tu Guru Satia Bulan.
ᯑᯮᯰ ᯤ ᯑᯪᯑᯄ᯦ᯬ᯲ ᯅᯬᯒᯮ ᯉᯖᯮᯀᯖᯮᯀ ᯤ ᯔ ᯔᯮᯘᯩ, "ᯤᯀᯰᯎᯬ ᯤ ᯑᯬ ᯂᯇᯩ, ᯥᯉᯰ ᯇᯬᯞ ᯘᯤ ᯖᯝᯘᯪ᯲ ᯂᯬ; ᯑᯬᯂᯖᯬ᯲ ᯉ ᯘᯤ ᯔᯮᯒ! ᯅ ᯔᯬᯞᯬ ᯘᯬ ᯅᯬᯤ, ᯉᯉᯪ᯲ᯉ, ᯑᯬᯂᯬᯉᯉᯬ᯲ᯔᯮ ᯥᯞᯮ, ᯅ ᯘᯪᯔᯉ᯲ᯐᯮᯐᯮᯰ ᯔ ᯑᯄ᯦ᯬ᯲; ᯔᯖ ᯉᯉᯪ᯲ᯉ, ᯅ ᯘᯪᯔᯞᯬᯞᯬᯰ ᯑᯄ᯦ᯬ᯲; ᯀᯬᯅᯄ᯦ᯮ᯲ ᯉᯉᯪᯉ, ᯅ ᯘᯪᯖᯒᯮᯇᯉᯬ᯲ ᯑᯄ᯦ᯬ᯲; ᯇᯘᯬ᯲ ᯒᯬᯂᯔ᯲, ᯘᯀᯖᯮ᯲ ᯑᯬ ᯅᯬᯒᯮᯉ ᯤ ᯑᯪ ᯂᯬ, ᯀᯰᯎᯬ ᯂᯬᯞᯉ᯲ ᯤ ᯑᯬ ᯐᯖᯮ᯲ ᯉᯪ ᯒᯬᯂᯔ᯲", ᯉᯉᯪ᯲ᯉ; ᯑᯪᯀᯐᯒ᯲ᯂᯉᯬ᯲ ᯔ ᯑᯬᯂᯖᯬ᯲ ᯎᯬᯀᯒ᯲ᯎᯬᯀᯒ᯲ ᯉᯪ ᯉ ᯀᯘᯪᯰ ᯤ ᯘᯮᯑᯩᯉ ᯖᯮ ᯎᯮᯒᯮ ᯘᯖᯪᯀ ᯅᯮᯞᯉ᯲.
Dung i mansai las ma roha ni Guru Satia Bulan, laho ma ibana tu lumban ni simatuana dung jumpang padannasida i.
ᯑᯮᯰ ᯤ ᯔᯉ᯲ᯘᯤ ᯞᯘ᯲ ᯔ ᯒᯬᯂ ᯉᯪ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯞᯂᯬ ᯔ ᯤᯅᯉ ᯖᯮ ᯞᯮᯔ᯲ᯅᯉ᯲ ᯉᯪ ᯘᯪᯔᯖᯮᯀᯉ ᯑᯮᯰ ᯐᯔᯮ᯲ᯇᯰ ᯇᯑᯉ᯲ᯉᯘᯪᯑ ᯤ.
Ia dung jolo sidung nasida morsipanganon, manungkun ma Datu na Sumurung portaoar na lumobi tu Guru Satia Bulan, ninna ma, "Beha do ujung ni pingkiranmu, di sude na hudok i, ale bere? Boi do pasilionmu angka hata na hudok i sude?" ninna.
ᯤᯀ ᯑᯮᯰ ᯐᯬᯞᯬ ᯘᯪᯑᯮᯰ ᯉᯘᯪᯑ ᯔᯒᯬ᯲ᯘᯪᯇᯝᯉᯉᯬ᯲, ᯔᯉᯮᯰᯄ᯦ᯉᯮ᯲ ᯔ ᯑᯖᯮ ᯉ ᯘᯮᯔᯮᯒᯮᯰ ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ ᯖᯮ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯉᯉᯪ᯲ᯉ ᯔ, "ᯅᯩᯂ ᯑᯬ ᯥᯐᯮᯰ ᯉᯪ ᯇᯪᯰᯄ᯦ᯪᯒᯉ᯲ᯔᯮ, ᯑᯪ ᯘᯮᯑᯩᯉ ᯂᯮᯑᯄ᯦ᯬ᯲ ᯤ, ᯀᯞᯩ ᯅᯩᯒᯩ? ᯅᯬᯤ ᯑᯬ ᯇᯘᯪᯞᯪᯀᯉᯬ᯲ᯔᯮ ᯀᯰᯄ᯦ ᯂᯖ ᯉ ᯂᯮᯑᯄ᯦ᯬ᯲ ᯤ ᯘᯮᯑᯩ?" ᯉᯉᯪ᯲ᯉ.
Jadi didok Guru Satia Bulan ma mangalusi, "Na maol do i nian patupaon, sude na nidokmuna i, ale tulang natuatua ; alai asal ma saut borumuna i di iba, ba hahuaon, nioloan, nama pasilihon sude goar na nidokmuna i, Antong tangihon hamu ma, asa hupajojor!" ninna.
ᯐᯑᯪ ᯑᯪᯑᯄ᯦ᯬ᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯔᯝᯞᯮᯘᯪ, "ᯉᯔᯀᯞᯬ᯲ ᯑᯬ ᯤ ᯉᯪᯀᯉ᯲ ᯇᯖᯮᯇᯀᯉᯬ᯲, ᯘᯮᯑᯩ ᯉ ᯉᯪᯑᯄ᯦ᯬ᯲ᯔᯮᯉ ᯤ, ᯀᯞᯩ ᯖᯮᯞᯰ ᯉ ᯖᯮᯀᯖᯮᯀ; ᯀᯞᯤ ᯀᯘᯞ᯲ ᯔ ᯘᯀᯖᯮ᯲ ᯅᯬᯒᯮᯔᯮᯉ ᯤ ᯑᯪ ᯤᯅ, ᯅ ᯂᯂᯮᯀᯀᯉᯬ᯲, ᯉᯪᯀᯬᯞᯬᯀᯉ᯲, ᯉ ᯔ ᯇᯘᯪᯞᯪᯂᯉᯬ᯲ ᯘᯮᯑᯩ ᯎᯬᯀᯒ᯲ ᯉ ᯉᯪᯑᯄ᯦ᯬ᯲ᯔᯮᯉ ᯤ, ᯀᯉ᯲ᯖᯬᯰ ᯖᯝᯪᯂᯉᯬ᯲ ᯂᯔᯮ ᯔ, ᯀᯘ ᯂᯮᯇᯐᯬᯐᯒᯬ᯲! "ᯉᯉᯪ᯲ᯉ.
Dung i dipajojor ma antong songon on: ᯑᯮᯰ ᯤ ᯑᯪᯇᯐᯬᯐᯒᯬ᯲ ᯔ ᯀᯉ᯲ᯖᯬᯰ ᯘᯬᯝᯉᯬ᯲ ᯀᯉᯬ᯲:
Ulu = simanjujung; ᯥᯞᯮ = ᯘᯪᯔᯉ᯲ᯐᯮᯐᯮᯰ
obuk = sitarupon; ᯀᯬᯅᯄ᯦ᯮ᯲ = ᯘᯪᯖᯒᯮᯇᯉᯬ᯲
pinggol = simanangi; ᯇᯪᯰᯎᯞᯬ᯲ = ᯘᯪᯔᯉᯝᯪ
mata = simalolong; ᯔᯖ = ᯘᯪᯔᯞᯬᯞᯬᯰ
pamangan = simangkudap; ᯇᯔᯝᯉ᯲ = ᯘᯪᯔᯰᯄ᯦ᯮᯑᯇ᯲
abara = porsitangkingori; ᯀᯅᯒ = ᯇᯒᯬ᯲ᯘᯪᯖᯰᯄ᯦ᯪᯝᯬᯒᯪ
mangompa = morsitangkingon; ᯔᯝᯬᯔ᯲ᯇ = ᯔᯒᯬ᯲ᯘᯪᯖᯰᯄ᯦ᯪᯝᯉᯬ᯲
susu = sitairon; ᯘᯮᯘᯮ = ᯘᯪᯖᯤᯒᯉᯬ᯲
tangan = simangido, simanginon; ᯖᯝᯉ᯲ = ᯘᯪᯔᯝᯪᯑᯬ,ᯘᯪᯔᯝᯪᯉᯉᯬ᯲
butuha = siubeon; ᯅᯮᯖᯮᯂ = ᯘᯪᯥᯅᯩᯀᯉᯬ᯲
pat = simanjojak; ᯇᯖ᯲ = ᯘᯪᯔᯉ᯲ᯐᯬᯐᯄ᯦᯲
porhohom = posoara igilon. ᯇᯒᯬ᯲ᯂᯬᯂᯔᯬ᯲ = ᯇᯬᯘᯬᯀᯒ ᯤᯎᯪᯞᯉᯬ᯲
Dung i, hinamulian, na nioli = siadopan ; ᯑᯮᯰ ᯤ, ᯂᯪᯉᯔᯮᯞᯪᯀᯉ᯲, ᯉ ᯉᯪᯀᯬᯞᯪ = ᯘᯪᯀᯑᯬᯇᯉ᯲
ompu, pahompu = sisumbaon; ᯀᯔᯬ᯲ᯇᯮ ᯇᯂᯔᯬ᯲ᯇᯮ = ᯘᯪᯘᯔᯮ᯲ᯅᯀᯉᯬ᯲
ama = na sumuan; ᯀᯔ = ᯉ ᯘᯮᯔᯮᯀᯉ᯲
ina = na mangintubu (ia baoa mandok); ᯤᯉ = ᯉ ᯔᯝᯉᯪ᯲ᯖᯮᯅᯮ (ᯤᯀ ᯅᯀᯬᯀ ᯔᯉ᯲ᯑᯄ᯦ᯬ᯲)
ina = na umbeu (ia boru-boru mandok); ᯤᯉ = ᯉ ᯀᯔᯮ᯲ᯅᯩᯥ (ᯤᯀ ᯅᯬᯒᯮᯅᯬᯒᯮ ᯔᯉ᯲ᯑᯄ᯦ᯬ᯲)
anak = sinuan tunas; ᯀᯉᯄ᯦᯲ = ᯘᯪᯉᯮᯀᯉ᯲ ᯖᯮᯉᯘ᯲
boru = sinuan beu ; ᯅᯬᯒᯮ = ᯘᯪᯉᯮᯀᯉ᯲ ᯅᯩᯥ
tulang, nantulang, bere = sibijaon ; ᯖᯮᯞᯰ ᯉᯉ᯲ᯖᯮᯞᯰ ᯅᯩᯒᯩ = ᯘᯪᯅᯪᯐᯀᯉᯬ᯲
amangboru, namboru = siunungbane, silumbane; ᯀᯔᯰᯅᯬᯒᯮ, ᯉᯔ᯲ᯅᯬᯒᯮ = ᯘᯪᯥᯉᯮᯰᯅᯉᯩ, ᯘᯪᯞᯔᯮ᯲ᯅᯉᯩ
lae, eda = si lansapon ; ᯞᯀᯩ, ᯀᯩᯑ = ᯘᯪᯞᯉ᯲ᯘᯇᯉᯬ᯲
haha, anggi = siadosan, sialosan ; ᯂᯂ, ᯀᯰᯎᯪ = ᯘᯪᯀᯑᯬᯘᯉ᯲, ᯘᯪᯀᯞᯬᯘᯉ᯲
iboto = ibot; ᯤᯅᯬᯖᯬ = ᯤᯅᯖᯬ᯲
ibotona =- situan ni ibotna; ᯤᯅᯬᯖᯬᯉ = ᯘᯪᯖᯮᯀᯉ᯲ ᯉᯪ ᯤᯅᯖᯬ᯲ᯉ
ibotongku = pinaribothu; ᯤᯅᯬᯖᯬᯰᯄ᯦ᯮ = ᯇᯪᯉᯒᯪᯅᯖᯬ᯲ᯂᯮ
simatua baoa = amang na umbalos; ᯘᯪᯔᯖᯮᯀ ᯅᯀᯬᯀ = ᯀᯔᯰ ᯉ ᯀᯔᯮ᯲ᯅᯞᯘᯬ᯲
simatua boru = inang na umbalos; ᯘᯪᯔᯖᯮᯀ ᯅᯬᯒᯮ = ᯤᯉᯰ ᯉ ᯀᯔᯮ᯲ᯅᯞᯘᯬ᯲
hela = amang na binalos; ᯂᯩᯞ = ᯀᯔᯰ ᯉ ᯅᯪᯉᯞᯘᯬ᯲
parumaen = inang na binalos. ᯇᯒᯮᯔᯀᯉᯩ᯲ = ᯤᯉᯰ ᯉ ᯅᯪᯉᯞᯘᯬ᯲
Dung i: Ulos = siteburon ; ᯑᯮᯰ ᯤ: ᯥᯞᯘᯬ᯲ = ᯘᯪᯖᯩᯅᯮᯒᯉᯬ᯲
baju = saem sipoholon ; ᯅᯐᯮ = ᯘᯀᯔᯩ᯲ ᯘᯪᯇᯬᯂᯬᯞᯉᯬ᯲
mas = sigumorsing; ᯔᯘ᯲ = ᯘᯪᯎᯮᯔᯒᯬ᯲ᯘᯪᯰ
hepeng, ringgit = sihumisik; ᯂᯩᯇᯩᯰ, ᯒᯪᯰᯎᯖᯪ᯲ = ᯘᯪᯂᯮᯔᯪᯘᯄ᯦ᯪ᯲
eme, indahan = paiogon ; ᯀᯩᯔᯩ, ᯀᯉᯪ᯲ᯑᯂᯉ᯲ = ᯇᯤᯀᯬᯎᯉᯬ᯲
sira = silumangsaijur; ᯘᯪᯒ = ᯘᯪᯞᯮᯔᯰᯘᯤᯐᯒᯮ᯲
aek = silumanlan; ᯀᯀᯄᯩ᯦ = ᯘᯪᯞᯮᯔᯉ᯲ᯞᯉ᯲
dengke = urat ni hapongkion ; ᯑᯰᯩᯄᯩ᯦ = ᯥᯒᯖ᯲ ᯉᯪ ᯂᯇᯬᯰᯄ᯦ᯪᯀᯉᯬ᯲
solu = sirinsiron, siruminsir; ᯘᯬᯞᯮ = ᯘᯪᯒᯉᯪ᯲ᯘᯪᯒᯉᯬ᯲, ᯘᯪᯒᯮᯔᯉᯪ᯲ᯘᯒᯪ᯲
hole = sibulung ᯂᯬᯞᯩ = ᯘᯪᯅᯮᯞᯮᯰ
bira; ruma, jabu, bagas = isian ni agalangon ; ᯅᯪᯒ; ᯒᯮᯔ, ᯐᯅᯮ , ᯅᯎᯘ᯲ = ᯤᯘᯪᯀᯉ᯲ ᯉᯪ ᯀᯎᯞᯝᯉᯬ᯲
sopo = isian ni hatungkolon; ᯘᯬᯇᯬ = ᯤᯘᯪᯀᯉ᯲ ᯉᯪ ᯂᯖᯮᯰᯂᯬᯞᯉᯬ᯲
api = sigumorgor, sihumilas; ᯀᯇᯪ = ᯘᯪᯎᯮᯔᯒᯬ᯲ᯎᯒᯬ᯲, ᯘᯪᯂᯮᯔᯪᯞᯘ᯲
horbo = silumatahon ; ᯂᯒᯬ᯲ᯅᯬ = ᯘᯪᯞᯮᯔᯖᯂᯉᯬ᯲
hoda = sijumambe ihur; ᯂᯬᯑ = ᯘᯪᯐᯮᯔᯔ᯲ᯅᯩ ᯤᯂᯒᯮ᯲
lombu = silomlom di robean; ᯞᯔᯬ᯲ᯅᯮ = ᯘᯪᯞᯔᯬ᯲ᯞᯔᯬ᯲ ᯑᯪ ᯒᯬᯅᯩᯀᯉ᯲
babi = simomangkat ni nambur; ᯅᯅᯪ = ᯘᯪᯔᯔᯰᯄ᯦ᯖ᯲ ᯉᯪ ᯉᯔ᯲ᯅᯒᯮ᯲
asu, biang = siteuon; ᯀᯘᯮ, ᯅᯪᯀᯰ = ᯘᯪᯖᯩᯥᯀᯉᯬ᯲
hatoban = halung ni na mauli bulung ; ᯂᯖᯬᯅᯉ᯲ = ᯂᯞᯮᯰ ᯉᯪ ᯉ ᯔᯥᯞᯪ ᯅᯮᯞᯮᯰ
hauma = tonga ni lobongon ; ᯂᯥᯔ = ᯖᯬᯝ ᯉᯪ ᯞᯬᯅᯬᯝᯉᯬ᯲
tahu-tahu = siantuk na risi ; ᯖᯂᯮᯖᯂᯮ = ᯘᯪᯀᯉ᯲ᯖᯄ᯦ᯮ᯲ ᯉ ᯒᯪᯘᯪ
napuran = sirumata bulung na opat, sada haroburan; ᯉᯇᯮᯒᯉ᯲ = ᯘᯪᯒᯮᯔᯖ ᯅᯮᯞᯮᯰ ᯉ ᯀᯬᯇᯖ᯲, ᯘᯑ ᯂᯒᯬᯅᯮᯒᯉ᯲
mornapuran = morsirumata bulung; ᯔᯒᯬ᯲ᯉᯇᯮᯒᯉ᯲ = ᯔᯒᯬ᯲ᯘᯪᯒᯮᯔᯖ ᯅᯮᯞᯮᯰ
duhut-duhut = silu muhut ; ᯑᯮᯂᯖᯮ᯲ᯑᯮᯂᯖᯮ᯲ = ᯘᯪᯞᯮ ᯔᯮᯂᯖᯮ᯲
bodil = sitenggar ni banua; ᯅᯬᯑᯞᯪ᯲ = ᯘᯪᯖᯰᯩᯎᯒ᯲ ᯉᯪ ᯅᯉᯮᯀ
hujur, giringan, raut, piso (dohot na suman tu si) = sirumantos; ᯂᯮᯐᯒᯮ᯲, ᯎᯪᯒᯪᯝᯉ᯲, ᯒᯀᯖᯮ᯲, ᯇᯪᯘᯬ (ᯑᯬᯂᯖᯬ᯲ ᯉ ᯘᯮᯔᯉ᯲ ᯖᯮ ᯘᯪ) = ᯘᯪᯒᯮᯔᯉ᯲ᯖᯘᯬ᯲
tonun = sitipahon; ᯖᯬᯉᯉᯮ᯲ = ᯘᯪᯖᯪᯇᯂᯉᯬ᯲
mortonun = morsitipahon; ᯔᯒᯬ᯲ᯖᯬᯉᯉᯮ᯲ = ᯔᯒᯬ᯲ᯘᯪᯖᯪᯇᯂᯉᯬ᯲
manuk = simorhuruk ; ᯔᯉᯄ᯦ᯮ᯲ = ᯘᯪᯔᯒᯬ᯲ᯂᯮᯒᯄ᯦ᯮ᯲
bagot = silumambe ᯅᯎᯖᯬ᯲ = ᯘᯪᯞᯮᯔᯔ᯲ᯅᯩ
hodong; tuak = hua ni silumambe hodong; ᯂᯬᯑᯬᯰ; ᯖᯮᯀᯄ᯦᯲ = ᯂᯮᯀ ᯉᯪ ᯘᯪᯞᯮᯔᯔ᯲ᯅᯩ ᯂᯬᯑᯬᯰ
hau = sinaiton; ᯂᯥ = ᯘᯪᯉᯤᯖᯉᯬ᯲
dolok = simanabun; ᯑᯬᯞᯄ᯦ᯬ᯲ = ᯘᯪᯔᯉᯅᯉᯮ᯲
lombang = siruruson ; ᯞᯔᯬ᯲ᯅᯰ = ᯘᯪᯒᯮᯒᯮᯘᯉᯬ᯲
bulu = situlison; ᯅᯮᯞᯮ = ᯘᯪᯖᯮᯞᯪᯘᯉᯬ᯲
onan = porsingguran, nantiga porsaoran; ᯀᯬᯉᯉ᯲ = ᯇᯒᯬ᯲ᯘᯪᯰᯎᯮᯒᯉ᯲, ᯉᯉ᯲ᯖᯪᯎ ᯇᯒᯬ᯲ᯘᯀᯬᯒᯉ᯲
halang ulu = porpidoan ; ᯂᯞᯰ ᯥᯞᯮ = ᯇᯒᯬ᯲ᯇᯪᯑᯬᯀᯉ᯲
hundul = morsijuguhon ; ᯂᯉᯮ᯲ᯑᯞᯮ᯲ = ᯔᯒᯬ᯲ᯘᯪᯐᯮᯎᯮᯂᯉᯬ᯲
na susa (so morhasoan) = hundul-pualpualon, tinjang pangalaloon ; ᯉ ᯘᯮᯘ (ᯘᯬ ᯔᯒᯬ᯲ᯂᯘᯬᯀᯉ᯲) = ᯂᯉᯮ᯲ᯑᯞᯮ᯲ ᯇᯮᯀᯞ᯲ᯇᯮᯀᯞᯉᯬ᯲, ᯖᯉᯪ᯲ᯐᯰ ᯇᯝᯞᯞᯬᯀᯉᯬ᯲
anak sasada mate = na sonson sagak di panabian ; ᯀᯉᯄ᯦᯲ ᯘᯘᯑ ᯔᯖᯩ = ᯉ ᯘᯉᯬ᯲ᯘᯉᯬ᯲ ᯘᯎᯄ᯦᯲ ᯑᯪ ᯇᯉᯅᯪᯀᯉ᯲
anak sasada = songon halak kalak na tarpunjung, songon tandiang na hapuloan ; ᯀᯉᯄ᯦᯲ ᯘᯘᯑ = ᯘᯬᯰᯝᯉᯬ᯲ ᯂᯞᯄ᯦᯲ ᯄ᯦ᯞᯄ᯦᯲ ᯉ ᯖᯒ᯲ᯇᯉᯮ᯲ᯐᯮᯰ, ᯘᯬᯝᯉᯬ᯲ ᯖᯉ᯲ᯑᯪᯀᯰ ᯉ ᯂᯇᯮᯞᯬᯀᯉ᯲
tali = sipudoron; ᯖᯞᯪ = ᯘᯪᯇᯮᯑᯬᯒᯉᯬ᯲
hatoropan = mangajana; ᯂᯖᯬᯒᯬᯇᯉ᯲ = ᯔᯝᯐᯉ
halak dongan sahorja = simardung ni bulunta; ᯂᯞᯄ᯦᯲ ᯑᯬᯝᯉ᯲ ᯘᯂᯒᯬ᯲ᯐ = ᯘᯪᯔᯒ᯲ᯑᯮᯰ ᯉᯪ ᯅᯮᯞᯉᯮ᯲ᯖ
mornonang = morsimangkudap; ᯔᯒᯬ᯲ᯉᯬᯉᯰ = ᯔᯒᯬ᯲ᯘᯪᯔᯰᯂᯮᯑᯇ᯲
mangkatahatai dohot dongan sahorja = morsimangkudaphon simardung ni bulunta ;ᯔᯰᯄ᯦ᯖᯂᯖᯤ ᯑᯬᯂᯖᯬ᯲ ᯑᯬᯝᯉ᯲ ᯘᯂᯒᯬ᯲ᯐ = ᯔᯒᯬ᯲ᯘᯪᯔᯰᯂᯮᯑᯇ᯲ᯂᯉᯬ᯲ ᯘᯪᯔᯒ᯲ᯑᯮᯰ ᯉᯪ ᯅᯮᯞᯉᯮ᯲ᯖ
leleng mangolu = mauja matoga; ᯞᯩᯞᯰᯩ ᯔᯝᯬᯞᯮ = ᯔᯥᯐ ᯔᯖᯬᯎ
huta = tonga ni asean ; ᯂᯮᯖ = ᯖᯬᯝ ᯉᯪ ᯀᯘᯩᯀᯉ᯲
halak = simardung; ᯂᯞᯄ᯦᯲ = ᯘᯪᯔᯒ᯲ᯑᯮᯰ
sada simardung = sada halak; ᯘᯑ ᯘᯪᯔᯒ᯲ᯑᯮᯰ = ᯘᯑ ᯂᯞᯄ᯦᯲
dua simardung = dua halak; ᯑᯮᯀ ᯘᯪᯔᯒ᯲ᯑᯮᯰ = ᯑᯮᯀ ᯂᯞᯄ᯦᯲
borngin = sihabornginan; ᯅᯬᯒ᯲ᯝᯉᯪ᯲ = ᯘᯪᯂᯅᯒᯬ᯲ᯝᯪᯉᯉ᯲
arian = siharianan; ᯀᯒᯪᯀᯉ᯲ = ᯘᯪᯂᯒᯪᯀᯉᯉ᯲
porsoro ni ari = lubanglubang' panarean, talaga panduduran; ᯇᯬᯒ᯲ᯘᯬᯒᯬ ᯉᯪ ᯀᯒᯪ = ᯞᯮᯅᯰᯞᯮᯅᯰ ᯇᯉᯒᯩᯀᯉ᯲, ᯖᯞᯎ ᯇᯉ᯲ᯑᯮᯑᯮᯒᯉ᯲
naek pangabahan = magodang panaguan ; ᯉᯀᯄᯩ᯦᯲ ᯇᯝᯅᯂᯉ᯲ = ᯔᯎᯬᯑᯰ ᯇᯉᯎᯮᯀᯉ᯲
surut pangabahan = maetek panaguan; ᯘᯮᯒᯖᯮ᯲ ᯇᯝᯅᯂᯉ᯲ = ᯔᯀᯩᯖᯄᯩ᯦᯲ ᯇᯉᯎᯮᯀᯉ᯲
sahit = siaginon; ᯘᯂᯖᯬ᯲ = ᯘᯪᯀᯎᯪᯉᯉᯬ᯲
tanoman = situmandok, situmalin; ᯖᯉᯬᯔᯉ᯲ = ᯘᯪᯖᯮᯔᯉ᯲ᯑᯄ᯦ᯬ᯲, ᯘᯪᯖᯮᯔᯞᯉᯪ᯲
lagu = palilung; ᯞᯎᯮ = ᯇᯞᯪᯞᯮᯰ
hamatean = padang silungunon; ᯂᯔᯖᯩᯀᯉ᯲ = ᯇᯑᯰ ᯘᯪᯞᯮᯝᯮᯉᯉᯬ᯲
mate= marobur. ᯔᯖᯩ = ᯔᯒᯬᯅᯒᯮ᯲
Dung sidung dipajojor Guru Satia Bulan i saluhutna, didok ma tu simatuana i: "Paborhat ma hami dohat borum, ale tulang, asa laho hami tu lumbannami!" ninna.
ᯑᯮᯰ ᯘᯪᯑᯮᯰ ᯑᯪᯇᯐᯬᯐᯒᯬ᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯤ ᯘᯞᯮᯂᯖᯮ᯲ᯉ, ᯑᯪᯑᯄ᯦ᯬ᯲ ᯔ ᯖᯮ ᯘᯪᯔᯖᯮᯀᯉ ᯤ: "ᯇᯅᯒᯬ᯲ᯂᯖ᯲ ᯔ ᯂᯔᯪ ᯑᯬᯂᯖᯬ᯲ ᯅᯬᯒᯔᯮ᯲, ᯀᯞᯩ ᯖᯮᯞᯰ, ᯀᯘ ᯞᯂᯬ ᯂᯔᯪ ᯖᯮ ᯞᯔᯮ᯲ᯅᯉ᯲ᯉᯔᯪ!" ᯉᯉᯪ᯲ᯉ
Alai didok simatuana i ma mangalusi: "indang na manjua ahu paborhat hamuna, ale bere; alai adong dope pangidoanku tu hamuna; molo boi i patupaonmuna, ba i pe asa saut borungki boanonmuna" , ninna.
ᯀᯞᯤ ᯑᯪᯑᯄ᯦ᯬ᯲ ᯘᯪᯔᯖᯮᯀᯉ ᯤ ᯔ ᯔᯝᯞᯮᯘᯪ: "ᯀᯉᯪ᯲ᯑᯰ ᯉ ᯔᯉ᯲ᯐᯮᯀ ᯀᯂᯮ ᯇᯅᯒᯬ᯲ᯂᯖ᯲ ᯂᯔᯮᯉ, ᯀᯞᯩ ᯅᯩᯒᯩ; ᯀᯞᯤ ᯀᯑᯬᯰ ᯑᯬ ᯇᯩ ᯇᯝᯪᯑᯬᯀᯉ᯲ᯄ᯦ ᯖᯮ ᯂᯔᯮᯉ; ᯔᯬᯞᯬ ᯅᯬᯤ ᯤᯇᯖᯮᯇᯀᯉᯬ᯲ᯔᯮᯉ, ᯅ ᯤ ᯇᯩ ᯀᯘ ᯘᯀᯖᯮ᯲ ᯅᯬᯒᯮᯰᯄ᯦ᯪ ᯅᯬᯀᯉᯉᯬ᯲ᯔᯮᯉ", ᯉᯉᯪ᯲ᯉ.
"Ba dia dope huroha, ale tulang Haru dok hamu ma·, asa huboto manang na boi patupaonku!" ninna Guru Satia Bulan.
"ᯅ ᯑᯪᯀ ᯑᯬ ᯇᯩ ᯂᯮᯒᯬᯂ, ᯀᯞᯩ ᯖᯮᯞᯰ ᯂᯒᯮ ᯑᯄ᯦ᯬ᯲ ᯂᯔᯮ ᯔ·, ᯀᯘ ᯂᯮᯅᯬᯖᯬ ᯔᯉᯰ ᯉ ᯅᯬᯤ ᯇᯖᯮᯇᯀᯉᯬ᯲ᯄ᯦ᯮ! "ᯉᯉᯪ᯲ᯉ ᯎᯮᯒᯮ ᯘᯖᯪᯀ ᯅᯮᯞᯉ᯲.
Dung i didok simatuana i ma : "Saburhononku ma sude longa, na pitu ampang, na pitu pormasan pitu jual pitu solup dohot pitu bale dohot pitunggim tu duhut-duhutan; dung i ingkon papunguonmu ma i muse mulak tu ingananna dung husaburhon. Ia boi do i patupaonmu, ba i pe asa saut hamu paborhatonku dohot borungku tu lumban ni natorasmu", ninna.
ᯑᯮᯰ ᯤ ᯑᯪᯑᯄ᯦ᯬ᯲ ᯘᯪᯔᯖᯮᯀᯉ ᯤ ᯔ: "ᯘᯅᯒᯮ᯲ᯂᯬᯉᯉᯬ᯲ᯄ᯦ᯮ ᯔ ᯘᯮᯑᯩ ᯞᯬᯝ, ᯉ ᯇᯪᯖᯮ ᯀᯔ᯲ᯇᯰ, ᯉ ᯇᯪᯖᯮ ᯇᯒᯬ᯲ᯔᯘᯉ᯲ ᯇᯪᯖᯮ ᯐᯮᯀᯞ᯲ ᯇᯪᯖᯮ ᯘᯬᯞᯇᯮ᯲ ᯑᯬᯂᯖᯬ᯲ ᯇᯪᯖᯮ ᯅᯞᯩ ᯑᯬᯂᯖᯬ᯲ ᯇᯪᯖᯮᯰᯎᯔᯪ᯲ ᯖᯮ ᯑᯮᯂᯖᯮ᯲ᯑᯮᯂᯮᯖᯉ᯲; ᯑᯮᯰ ᯤ ᯀᯪᯰᯄ᯦ᯉᯬ᯲ ᯇᯇᯮᯝᯮᯀᯉᯬ᯲ᯔᯮ ᯔ ᯤ ᯔᯮᯘᯩ ᯔᯮᯞᯄ᯦᯲ ᯖᯮ ᯤᯝᯉᯉ᯲ᯉ ᯑᯮᯰ ᯂᯮᯘᯅᯒᯮ᯲ᯂᯉᯬ᯲. ᯤᯀ ᯅᯬᯤ ᯑᯬ ᯤ ᯇᯖᯮᯇᯀᯉᯬ᯲ᯔᯮ, ᯅ ᯤ ᯇᯩ ᯀᯘ ᯘᯀᯖᯮ᯲ ᯂᯔᯮ ᯇᯅᯒᯬ᯲ᯂᯖᯉᯬ᯲ᯄ᯦ᯮ ᯑᯬᯂᯖᯬ᯲ ᯅᯬᯒᯮᯰᯄ᯦ᯮ ᯖᯮ ᯞᯔᯮ᯲ᯅᯉ᯲ ᯉᯪ ᯉᯖᯬᯒᯘ᯲ᯔᯮ", ᯉᯉᯪ᯲ᯉ.
Jadi marsak ma roha ni Guru Satia Bulan umbege hata ni simatuana i, mulak ma ibana huhut tangis mandapothon boru (natua-tua) na mangajari ibana i; dialu-aluhon ma tu si jut ni rohana mamingkir maol ni pangidoan ni simatuana i.
ᯐᯑᯪ ᯔᯒ᯲ᯘᯄ᯦᯲ ᯔ ᯒᯬᯂ ᯉᯪ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯀᯔᯮ᯲ᯅᯩᯎᯩ ᯂᯖ ᯉᯪ ᯘᯪᯔᯖᯮᯀᯉ ᯤ, ᯔᯮᯞᯄ᯦᯲ ᯔ ᯤᯅᯉ ᯂᯮᯂᯖᯮ᯲ ᯖᯝᯘᯪ᯲ ᯔᯉ᯲ᯑᯇᯖᯬ᯲ᯂᯉᯬ᯲ ᯅᯬᯒᯮ(ᯉᯖᯮᯀᯖᯮᯀ) ᯉ ᯔᯝᯐᯒᯪ ᯤᯅᯉ ᯤ; ᯑᯪᯀᯞᯮᯀᯞᯮᯂᯉᯬ᯲ ᯔ ᯖᯮ ᯘᯪ ᯐᯖᯮ᯲ ᯉᯪ ᯒᯬᯂᯉ ᯔᯔᯪᯰᯄ᯦ᯒᯪ᯲ ᯔᯀᯞᯬ᯲ ᯉᯪ ᯇᯝᯪᯑᯬᯀᯉ᯲ ᯉᯪ ᯘᯪᯔᯖᯮᯀᯉ ᯤ.
Jadi dung dibege boru natuatua i sude hata na nidokna i, ninna ma, "Unang pola sai marsak ho, anggo holan i do, ai na mura do i! Anak ni raja do ho, anak ni na hasantian, tubu ni na morsangap jala na hadohan goar.
ᯐᯑᯪ ᯑᯮᯰ ᯑᯪᯅᯩᯎᯩ ᯅᯬᯒᯮ ᯉᯖᯮᯀᯖᯮᯀ ᯤ ᯘᯮᯑᯩ ᯂᯖ ᯉ ᯉᯪᯑᯄ᯦ᯬ᯲ᯉ ᯤ, ᯉᯉᯪ᯲ᯉ ᯔ, "ᯥᯉᯰ ᯇᯬᯞ ᯘᯤ ᯔᯒ᯲ᯘᯄ᯦᯲ ᯂᯬ, ᯀᯰᯎᯬ ᯂᯬᯞᯉ᯲ ᯤ ᯑᯬ, ᯀᯤ ᯉ ᯔᯮᯒ ᯑᯬ ᯤ! ᯀᯉᯄ᯦᯲ ᯉᯪ ᯒᯐ ᯑᯬ ᯂᯬ, ᯀᯉᯄ᯦᯲ ᯉᯪ ᯉ ᯂᯘᯉ᯲ᯖᯪᯀᯉ᯲, ᯖᯮᯅᯮ ᯉᯪ ᯉ ᯔᯒᯬ᯲ᯘᯝᯇ᯲ ᯐᯞ ᯉ ᯂᯑᯬᯂᯉ᯲ ᯎᯬᯀᯒ᯲.
Tonggo ma sude raja ni manuk-manuk, sude na morgoar pidong, asa i mamutihi longa i dung di saburhon, paulakkon tu ingananna i!" ninna.
ᯖᯬᯰᯎᯬ ᯔ ᯘᯮᯑᯩ ᯒᯐ ᯉᯪ ᯔᯉᯄ᯦ᯮ᯲ᯔᯉᯄ᯦ᯮ᯲, ᯘᯮᯑᯩ ᯉ ᯔᯒᯬ᯲ᯎᯬᯀᯒ᯲ ᯇᯪᯑᯬᯰ, ᯀᯘ ᯤ ᯔᯔᯮᯖᯪᯂᯪ ᯞᯬᯝ ᯤ ᯑᯮᯰ ᯑᯪᯘᯅᯒᯮ᯲ᯂᯉᯬ᯲, ᯇᯥᯞᯄ᯦᯲ᯄ᯦ᯉᯬ᯲ ᯖᯮ ᯤᯝᯉᯉ᯲ᯉ ᯤ!" ᯉᯉᯪ᯲ᯉ.
Dung songon i ajar ni boru natua-tua i, mulak ma Guru Satia Bulan tu lumban ni simatuana inon, didok ma songon on, "Hahuaon i, ale rajanami, asal ma saut di ahu borumuna i, haru saburhon hamu ma longa na nidokmuna i, asa huputihi mulak tu inga nanna!" ninna.
ᯑᯮᯰ ᯘᯬᯝᯉᯬ᯲ ᯤ ᯀᯐᯒ᯲ ᯉᯪ ᯅᯬᯒᯮ ᯉᯖᯮᯀᯖᯮᯀ ᯤ, ᯔᯮᯞᯄ᯦᯲ ᯔ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯖᯮ ᯞᯔᯮ᯲ᯅᯉ᯲ ᯉᯪ ᯘᯪᯔᯖᯮᯀᯉ ᯤᯉᯉᯬ᯲, ᯑᯪᯑᯄ᯦ᯬ᯲ ᯔ ᯘᯬᯝᯉᯬ᯲ ᯀᯉᯬ᯲, "ᯂᯂᯮᯀᯀᯉᯬ᯲ ᯤ, ᯀᯞᯩ ᯒᯐᯉᯔᯪ, ᯀᯘᯞ᯲ ᯔ ᯘᯀᯖᯮ᯲ ᯑᯪ ᯀᯂᯮ ᯅᯬᯒᯮᯔᯮᯉ ᯤ, ᯂᯒᯮ ᯘᯅᯒᯮ᯲ᯂᯉᯬ᯲ ᯂᯔᯮᯔ ᯞᯬᯝ ᯉ ᯉᯪᯑᯄ᯦ᯬ᯲ᯔᯮᯉ ᯤ, ᯀᯘ ᯂᯮᯇᯮᯖᯪᯂᯪ ᯔᯮᯞᯄ᯦᯲ ᯖᯮ ᯤᯝᯉᯉ᯲ᯉ!" ᯉᯉᯪ᯲ᯉ.
Dung i disaburhon Datu na Sumurung, portaoar na lumobi ma sude longa i, didokkon ma i putihan ni Guru Satia Bulan, asa mulak tu ingananna.
ᯑᯮᯰ ᯤ ᯑᯪᯘᯅᯒᯮ᯲ᯂᯉᯬ᯲ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ ᯔ ᯘᯮᯑᯩ ᯞᯬᯝ ᯤ, ᯑᯪᯑᯄ᯦ᯬ᯲ᯄ᯦ᯉᯬ᯲ ᯔ ᯤ ᯇᯮᯖᯪᯂᯉ᯲ ᯉᯪ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯀᯘ ᯔᯮᯞᯄ᯦᯲ ᯖᯮ ᯤᯝᯉᯉ᯲ᯉ
Jadi mortonggo ma Guru Satia Bulan dijou ma nasa manuk-manuk, saguman ni nasa pidong, gabe ro ma i luhutna mamutihi longa i. Ia dung pungu longa i sude mangulahi, ba dipasung ma i muse tu ingananna hian. Dung i didok ma muse tu simatuana i, "Paborhat ma hami, ale rajanami, asa laho hami dohot borum tu lumbannami, ai nunga hupasaut songon na nidokmuna i", ninna.
ᯐᯑᯪ ᯔᯒᯬ᯲ᯖᯬᯰᯎᯬ ᯔ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯑᯪᯐᯬᯥ ᯔ ᯉᯘ ᯔᯉᯄ᯦ᯮ᯲ᯔᯉᯄ᯦ᯮ᯲, ᯘᯎᯮᯔᯉ᯲ ᯉᯪ ᯉᯘ ᯇᯪᯑᯬᯰ, ᯎᯅᯩ ᯒᯬ ᯔ ᯤ ᯞᯮᯂᯖᯮ᯲ᯉ ᯔᯔᯮᯖᯪᯂᯪ ᯞᯬᯝ ᯤ. ᯤᯀ ᯑᯮᯰ ᯇᯮᯝᯮ ᯞᯬᯝ ᯤ ᯘᯮᯑᯩ ᯔᯝᯮᯞᯂᯪ, ᯅ ᯑᯪᯇᯘᯮᯰ ᯔ ᯤ ᯔᯮᯘᯩ ᯖᯮ ᯤᯝᯉᯉ᯲ᯉ ᯂᯪᯀᯉ᯲. ᯑᯮᯰ ᯤ ᯑᯪᯑᯄ᯦ᯬ᯲ ᯔ ᯔᯮᯘᯩ ᯖᯮ ᯘᯪᯔᯖᯮᯀᯉ ᯤ, " ᯇᯅᯒᯬ᯲ᯂᯖ᯲ ᯔ ᯂᯔᯪ, ᯀᯞᯩ ᯒᯐᯉᯔᯪ, ᯀᯘ ᯞᯂᯬ ᯂᯔᯪ ᯑᯬᯂᯖᯬ᯲ ᯅᯬᯒᯔᯮ᯲ ᯖᯮ ᯞᯔᯮ᯲ᯅᯉ᯲ᯉᯔᯪ, ᯀᯤ ᯉᯮᯝ ᯂᯮᯇᯘᯀᯖᯮ᯲ ᯘᯬᯝᯉᯬ᯲ ᯉ ᯉᯪᯑᯄ᯦ᯬ᯲ᯔᯮᯉ ᯤ", ᯉᯉᯪ᯲ᯉ.
Alai didok simatuana i ma mangalusi, "Na denggan do i tutu; las do rohangku paborhat hamu ; alai jolo boan ma di ahu sada hoda na mortanduk, hambing bolon na so mortanduk dohot sada manuk na so morbaringbing dohot sada lote na morlai-lai. Asal ma hatop ijumpang hamuna, diboan hamu tu ahu ; hatop do hamu paborhatonku", ninna.
ᯀᯞᯤ ᯑᯪᯑᯄ᯦ᯬ᯲ ᯘᯪᯔᯖᯮᯀᯉ ᯤ ᯔ ᯔᯝᯞᯮᯘᯪ, "ᯉ ᯑᯰᯩᯎᯉ᯲ ᯑᯬ ᯤ ᯖᯮᯖᯮ; ᯞᯘ᯲ ᯑᯬ ᯒᯬᯂᯰᯄ᯦ᯮ ᯇᯅᯒᯬ᯲ᯂᯖ᯲ᯂᯔᯮ; ᯀᯞᯤ ᯐᯬᯞᯬ ᯅᯬᯀᯉ᯲ ᯔ ᯑᯪ ᯀᯂᯮ ᯘᯑ ᯂᯬᯑ ᯉ ᯔᯒᯬ᯲ᯖᯉ᯲ᯑᯄ᯦ᯮ, ᯂᯔ᯲ᯅᯪᯰ ᯅᯬᯞᯉᯬ᯲ ᯉ ᯘᯬ ᯔᯒᯬ᯲ᯖᯉ᯲ᯑᯄ᯦ᯮ᯲ ᯑᯬᯂᯖᯬ᯲ ᯘᯑ ᯔᯉᯄ᯦ᯮ᯲ ᯉ ᯘᯬ ᯔᯒᯬ᯲ᯅᯒᯪᯰᯅᯪᯰ ᯑᯬᯂᯖᯬ᯲ ᯘᯑ ᯞᯬᯖᯩ ᯉ ᯔᯒᯬ᯲ᯞᯤᯞᯤ. ᯀᯘᯞ᯲ ᯔ ᯂᯖᯇᯬ᯲ ᯤ ᯐᯔᯮ᯲ᯇᯰᯂᯔᯮᯉ, ᯑᯪᯅᯬᯀᯉ᯲ᯂᯔᯮ ᯖᯮ ᯀᯂᯮ; ᯂᯖᯇᯬ᯲ ᯑᯬ ᯂᯔᯮ ᯇᯅᯒᯬ᯲ᯂᯖᯉᯬ᯲ᯄ᯦ᯮ", ᯉᯉᯪ᯲ᯉ.
Dung i marsak ma muse roha ni Guru Satia Bulan umbege hatana i, mulak ma ibana mandapothon boru natua-tua i, dipaboa ma muse pangidoan ni simatuana i.
ᯑᯮᯰ ᯤ ᯔᯒ᯲ᯘᯄ᯦᯲ ᯔ ᯔᯮᯘᯩ ᯒᯬᯂ ᯉᯪ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯀᯔᯮ᯲ᯅᯩᯎᯩ ᯂᯖᯉ ᯤ, ᯔᯮᯞᯄ᯦᯲ ᯔ ᯤᯅᯉ ᯔᯉ᯲ᯑᯇᯖᯬ᯲ᯂᯉᯬ᯲ ᯅᯬᯒᯮ ᯉᯖᯮᯀᯖᯮᯀ ᯤ, ᯑᯪᯇᯅᯬᯀ ᯔ ᯔᯮᯘᯩ ᯇᯝᯪᯑᯬᯀᯉ᯲ ᯉᯪ ᯘᯪᯔᯖᯮᯀᯉ ᯤ
Dung i didok boru natua-tua i ma, "Laho ma ho muli, pangke ma nasa na binotom, bahen ma nasa sibahenonmu, patuat ma nasa boto-botoanmu, mandormai boruna i, molo naeng saut i di ho, ai nunga siat i bahenon ni Debata", ninna tu Guru Satia Bulan.
ᯑᯮᯰ ᯤ ᯑᯪᯑᯄ᯦ᯬ᯲ ᯅᯬᯒᯮ ᯉᯖᯮᯀᯖᯮᯀ ᯤ ᯔ, "ᯞᯂᯬ ᯔ ᯂᯬ ᯔᯮᯞᯪ, ᯇᯰᯄ᯦ᯩ ᯔ ᯉᯘ ᯉ ᯅᯪᯉᯬᯖᯔᯬ᯲, ᯅᯂᯉᯩ᯲ ᯔ ᯉ ᯘ ᯘᯪᯅᯂᯩᯉᯉᯬ᯲ᯔᯮ, ᯇᯖᯮᯀᯖ᯲ ᯔ ᯉᯘ ᯅᯬᯖᯬᯅᯬᯖᯬᯀᯉ᯲ᯔᯮ, ᯔᯉ᯲ᯑᯒᯬ᯲ᯔᯤ ᯅᯬᯒᯮᯉ ᯤ, ᯔᯬᯞᯬ ᯉᯀᯰᯩ ᯘᯀᯖᯮ᯲ ᯤ ᯑᯪ ᯂᯬ, ᯀᯤ ᯉᯮᯝ ᯘᯪᯀᯖ᯲ ᯤ ᯅᯂᯩᯉᯉᯬ᯲ ᯉᯪ ᯑᯩᯅᯖ", ᯉᯉᯪ᯲ᯉ ᯖᯮ ᯎᯮᯒᯮ ᯘᯖᯪᯀ ᯅᯮᯞᯉ᯲.
Jadi laho ma Guru Satia Bulan manopot guruna Datu Surta Malim, dipangido ma sian i dorma na sumurung. Dung i didokkon guruna i ma ibana manulung, didokkon ma buatonna nasa ranggas, tar sanjongkal be ganjangna. Ia dung pungu i luhutna di pulung, diboan ma i tu huta, dibahen ma tu si dohot ramuan na asing, ditabashon guruna i ma tabas ni dorma sitogu losung, si sunggul na modom, sipahehe na hundul, sihidahida na mordalan.
ᯐᯑᯪ ᯞᯂᯬ ᯔ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔᯉᯬᯇᯖᯬ᯲ ᯎᯮᯒᯮᯉ ᯑᯖᯮ ᯘᯒᯮ᯲ᯖ ᯔᯞᯔᯪ᯲, ᯑᯪᯇᯝᯪᯑᯬ ᯔ ᯘᯪᯀᯉ᯲ ᯤ ᯑᯒᯬ᯲ᯔ ᯉ ᯘᯮᯔᯮᯒᯮᯰ. ᯑᯮᯰ ᯤ ᯑᯪᯑᯄ᯦ᯬ᯲ᯄ᯦ᯉᯬ᯲ ᯎᯮᯒᯮᯉ ᯤ ᯔ ᯤᯅᯉ ᯔᯉᯮᯞᯮᯰ, ᯑᯪᯑᯄ᯦ᯬ᯲ᯄ᯦ᯉᯬ᯲ ᯔ ᯅᯮᯀᯖᯉᯬ᯲ᯉ ᯉᯘ ᯒᯰᯎᯘ᯲, ᯖᯒ᯲ᯘᯉ᯲ᯐᯬᯰᯄ᯦ᯞ᯲ ᯅᯩ ᯎᯉ᯲ᯐᯰ ᯉ. ᯤᯀ ᯑᯮᯰ ᯇᯮᯝᯮ ᯤ ᯞᯮᯂᯖᯮ᯲ᯉ ᯑᯪᯇᯮᯞᯮᯰ, ᯑᯪᯅᯬᯀᯉ᯲ ᯔ ᯤ ᯖᯮ ᯂᯮᯖ, ᯑᯪᯅᯂᯉᯩ᯲ ᯔ ᯖᯮ ᯘᯪ ᯑᯬᯂᯖᯬ᯲ ᯒᯔᯮᯀᯉ᯲ ᯉ ᯀᯘᯪᯰ, ᯑᯪᯖᯅᯘ᯲ᯂᯉᯬ᯲ ᯎᯮᯒᯮᯉ ᯤ ᯔ ᯖᯅᯘ᯲ ᯉᯪ ᯑᯒᯬ᯲ᯔ ᯘᯪᯖᯬᯎᯮ ᯞᯬᯘᯮᯰ, ᯘᯪᯘᯮᯰᯎᯞᯮ᯲ ᯉ ᯔᯬᯑᯔᯬ᯲, ᯘᯪᯇᯂᯩᯂᯩ ᯉ ᯂᯉᯮ᯲ᯑᯞᯮ᯲, ᯘᯪᯂᯪᯑᯂᯪᯑ ᯉ ᯔᯒᯬ᯲ᯑᯞᯉ᯲.
Ia dung sidung i ditabashon, ditutung nasida ma ranggas na pinapunguna i, gabe mangibul ma timusna i laho tu huta ni Datu na Sumurung, portaoar na lumobi, tu pantangan portonunan ni Si Boru Jongjong Anian Si Boru Tibal Tudosan.
ᯤᯀ ᯑᯮᯰ ᯘᯪᯑᯮᯰ ᯤ ᯑᯪᯖᯅᯘ᯲ᯂᯉᯬ᯲, ᯑᯪᯖᯮᯖᯮᯰ ᯉᯘᯪᯑ ᯔ ᯒᯰᯎᯘ᯲ᯉ ᯇᯪᯉᯇᯮᯝᯮᯉ ᯤ, ᯎᯅᯩ ᯔᯝᯪᯅᯞᯮ᯲ ᯔ ᯖᯪᯔᯘᯮ᯲ᯉ ᯤ ᯞᯂᯬ ᯖᯮ ᯂᯮᯖ ᯉᯪ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ, ᯖᯮ ᯇᯉ᯲ᯖᯝᯉ᯲ ᯇᯒᯬ᯲ᯖᯬᯉᯮᯉᯉ᯲ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲.
Gabe sai humasungseng ma ibana di portonunanna i, sai guga ma rohana, hehe hundul ma ibana, sai songon na hiniaphon ma ate-atena tu Guru Satia Bulan.
ᯎᯅᯩ ᯘᯤ ᯂᯮᯔᯘᯮᯰᯘᯰᯩ ᯔ ᯤᯅᯉ ᯑᯪ ᯇᯒᯬ᯲ᯖᯬᯉᯮᯉᯉ᯲ᯉ ᯤ, ᯘᯤ ᯎᯮᯎ ᯔ ᯒᯬᯂᯉ, ᯂᯩᯂᯩ ᯂᯉᯮ᯲ᯑᯞᯮ᯲ ᯔ ᯤᯅᯉ, ᯘᯤ ᯘᯬᯝᯉᯬ᯲ ᯉ ᯂᯪᯉᯪᯀᯇ᯲ᯂᯉᯬ᯲ ᯔ ᯀᯖᯩᯀᯖᯩᯉ ᯖᯮ ᯎᯮᯒᯮ ᯘᯖᯪᯀ ᯅᯮᯞᯉ᯲.
Ia dung songon i ibana diida amana Datu na Sumurung, portaoar na lumobi, ro ma hatana manungkun boruna i, "Boasa sai songon na humasusa ho, ale angkora?" ninna.
ᯤᯀ ᯑᯮᯰ ᯘᯬᯝᯉᯬ᯲ ᯤ ᯤᯅᯉ ᯑᯪᯤᯑ ᯀᯔᯉ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ, ᯒᯬ ᯔ ᯂᯖᯉ ᯔᯉᯮᯰᯂᯉᯮ᯲ ᯅᯬᯒᯮᯉ ᯤ, "ᯅᯬᯀᯘ ᯘᯤ ᯘᯬᯝᯉᯬ᯲ ᯉ ᯂᯮᯔᯘᯮᯘ ᯂᯬ, ᯀᯞᯩ ᯀᯰᯄ᯦ᯬᯒ? "ᯉᯉᯪ᯲ᯉ.
Dung i didok Si Boru Jongjong Anian ma mangalusi, "Aha ma so songon i ahu, ale amang, ai so huboto manang na di puding ku · nuaeng Guru Satia Bulan manang na di jolongku; so huboto manang na tu dia ibana dapothononku, ai sai songon na bineta-beta do rohangku, sai songon .na hiniaphon do ate-atengku", ninna. '
ᯑᯮᯰ ᯤ ᯑᯪᯑᯂᯬ᯲ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯔ ᯔᯝᯞᯮᯘᯪ, "ᯀᯂ ᯔ ᯘᯬ ᯘᯬᯝᯉᯬ᯲ ᯤ ᯀᯂᯮ, ᯀᯞᯩ ᯀᯔᯰ, ᯀᯤ ᯘᯬ ᯂᯮᯅᯬᯖᯬ ᯔᯉᯰ ᯉ ᯑᯪ ᯇᯮᯑᯪᯰᯄ᯦ᯮ ᯉᯮᯀᯀᯰᯩ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔᯉᯰ ᯉ ᯑᯪ ᯐᯬᯞᯬᯰᯄ᯦ᯮ; ᯘᯬ ᯂᯮᯅᯬᯖᯬ ᯔᯉᯰ ᯉ ᯖᯮᯑᯪᯀ ᯤᯅᯉ ᯑᯇᯖᯬ᯲ᯂᯬᯉᯉᯬ᯲ᯄ᯦ᯮ, ᯀᯤ ᯘᯤ ᯘᯬᯝᯉᯬ᯲ ᯉ ᯅᯪᯉᯩᯖᯅᯩᯖ ᯑᯬ ᯒᯬᯂᯰᯄ᯦ᯮ, ᯘᯤ ᯘᯬᯝᯉᯬ᯲ ᯉ ᯂᯪᯉᯪᯀᯇ᯲ᯂᯉᯬ᯲ ᯑᯬ ᯀᯖᯩᯀᯖᯰᯩᯄ᯦ᯮ", ᯉᯉᯪ᯲ᯉ.
Dung i dimuruhi amana i ma ibana ala ni hatana i, didok ma, "Tung na so jadi do ho laho tu si, anggo so jolo boanon ni Guru Satia Bulan tu ahu na hupangido tu ibana i", ninna.
ᯑᯮᯰ ᯤ ᯑᯪᯔᯮᯒᯮᯂᯪ ᯀᯔᯉ ᯤ ᯔ ᯤᯅᯉ ᯀᯞ ᯉᯪ ᯂᯖᯉ ᯤ, ᯑᯪᯑᯄ᯦ᯬ᯲ ᯔ, "ᯖᯮᯰ ᯉ ᯘᯬ ᯐᯑᯪ ᯑᯬ ᯂᯬ ᯞᯂᯬ ᯖᯮ ᯘᯪ, ᯀᯰᯎᯬ ᯘᯬ ᯐᯬᯞᯬ ᯅᯬᯀᯉᯉᯬ᯲ ᯉᯪ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯖᯮ ᯀᯂᯮ ᯉ ᯂᯮᯇᯝᯪᯑᯬ ᯖᯮ ᯤᯅᯉ ᯤ", ᯉᯉᯪ᯲ᯉ
Alai indang tartaon Si Boru Jongjong Anian be pangkida-hida ni ate-atena, ai nunga hona sipanggila-gila ni Guru Satia Bulan ibana, dung dipasang dorma i, puas ma ibana tu balian, diihut-ihut ma timus na ro i, pajumpang ma ibana dohot Guru Satia Bulan di tongan dalan, ai nunga ro hian i manomu-nomu ibana, laos diboan ma ibana tu hutana.
ᯀᯞᯤ ᯀᯉᯪ᯲ᯑᯰ ᯖᯒ᯲ᯖᯀᯉᯬ᯲ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯅᯩ ᯇᯰᯂᯪᯑᯂᯪᯑ ᯉᯪ ᯀᯖᯩᯀᯖᯩᯉ, ᯀᯤ ᯉᯮᯝ ᯂᯬᯉ ᯘᯪ ᯇᯰᯎᯪᯞᯎᯪᯞ ᯉᯪ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯤᯅᯉ, ᯑᯮᯰ ᯑᯪᯇᯘᯰ ᯑᯒᯬ᯲ᯔ ᯤ, ᯇᯮᯀᯘ᯲ ᯔ ᯤᯅᯉ ᯖᯮ ᯅᯞᯪᯀᯉ᯲, ᯑᯪᯤᯂᯖᯮ᯲ᯤᯂᯖᯮ᯲ ᯔ ᯖᯪᯔᯘᯮ᯲ ᯉ ᯒᯬ ᯤ, ᯇᯐᯔᯮ᯲ᯇᯰ ᯔ ᯤᯅᯉ ᯑᯬᯂᯖᯬ᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯑᯪ ᯖᯬᯝᯉ᯲ ᯑᯞᯉ᯲, ᯀᯤ ᯉᯮᯝ ᯒᯬ ᯂᯪᯀᯉ᯲ ᯤ ᯔᯉᯬᯔᯮᯉᯬᯔᯮ ᯤᯅᯉ, ᯞᯀᯬᯘ᯲ ᯑᯪᯅᯬᯀᯉ᯲ ᯔ ᯤᯅᯉ ᯖᯮ ᯂᯮᯖᯉ.
Ia dung diboto Datu na Sumurung, partaoar na lumobi, naung manurun boruna i, songon on ma porhusarion ni rohana di bagasan,
ᯤᯀ ᯑᯮᯰ ᯑᯪᯅᯬᯖᯬ ᯑᯖᯮ ᯉ ᯘᯮᯔᯮᯒᯮᯰ, ᯇᯒ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ, ᯉᯀᯮᯰ ᯔᯉᯮᯒᯉᯮ᯲ ᯅᯬᯒᯮᯉ ᯤ, ᯘᯬᯝᯉᯬ᯲ ᯀᯉᯬ᯲ ᯔ ᯇᯒᯬ᯲ᯂᯮᯘᯒᯪᯀᯉᯬ᯲ ᯉᯪ ᯒᯬᯂᯉ ᯑᯪ ᯅᯎᯘᯉ᯲,
"Hurangna do i tahe di ahu, di pambahenanki; ai atik pe naung sahat sude tu ahu sinamot na nilehonna i, sai huganjangi dope nonang mambahen undang-undangan i.
"ᯂᯮᯒᯰᯉ ᯑᯬ ᯤ ᯖᯂᯩ ᯑᯪ ᯀᯂᯮ, ᯑᯪᯇᯔ᯲ᯅᯂᯩᯉᯉ᯲ᯄ᯦ᯪ; ᯀᯤ ᯀᯖᯄ᯦ᯪ᯲ ᯇᯩ ᯉᯀᯮᯰ ᯘᯂᯖ᯲ ᯘᯮᯑᯩ ᯖᯮ ᯀᯂᯮ ᯘᯪᯉᯔᯖᯬ᯲ ᯉ ᯉᯪᯞᯩᯂᯉᯬ᯲ᯉ ᯤ, ᯘᯤ ᯂᯮᯎᯉ᯲ᯐᯝᯪ ᯑᯬ ᯇᯩ ᯉᯬᯉᯰ ᯔᯔ᯲ᯅᯂᯉᯩ᯲ ᯀᯉᯮ᯲ᯑᯰᯀᯉᯮ᯲ᯑᯝᯉ᯲ ᯤ.
Patut do muruk Guru Satia Bulan di pambahenanki, tama do ibana mamasang dorma manggila-gila borungki. Husuru ma na mangalapi nasida siraja ni naposongki, asa denggan nasida hupaborhat, borungku siangkup ni helangki", ninna rohana.
ᯇᯖᯖᯮ᯲ ᯑᯬ ᯔᯮᯒᯄ᯦ᯮ᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯑᯪ ᯇᯔ᯲ᯅᯂᯩᯉᯉ᯲ᯄ᯦ᯪ, ᯖᯔ ᯑᯬ ᯤᯅᯉ ᯔᯔᯘᯰ ᯑᯒᯬ᯲ᯔ ᯔᯰᯎᯪᯞᯎᯪᯞ ᯅᯬᯒᯮᯰᯄ᯦ᯪ. ᯂᯮᯘᯮᯒᯮ ᯔ ᯉ ᯔᯝᯞᯇᯪ ᯉᯘᯪᯑ ᯘᯪᯒᯐ ᯉᯪ ᯉ ᯇᯬᯘᯬᯰᯄ᯦ᯪ, ᯀᯘ ᯑᯰᯩᯎᯉ᯲ ᯉᯘᯪᯑ ᯂᯮᯇᯅᯒᯬ᯲ᯂᯖ᯲, ᯅᯬᯒᯮᯰᯄ᯦ᯮ ᯘᯪᯀᯰᯄ᯦ᯇᯮ᯲ ᯉᯪ ᯂᯩᯞᯰᯄ᯦ᯪ", ᯉᯉᯪ᯲ᯉ ᯒᯬᯂᯉ.
Dung i disuru ma raja ni hatobanna mangalapi boruna dohot helana, pintor ro ma antong mandapothon ibana tu hutana.
ᯑᯮᯰ ᯤ ᯑᯪᯘᯮᯒᯮ ᯔ ᯒᯐ ᯉᯪ ᯂᯖᯬᯅᯉ᯲ᯉ ᯔᯝᯞᯇᯪ ᯅᯬᯒᯮ ᯉ ᯑᯬᯂᯖᯬ᯲ ᯂᯩᯞᯉ, ᯇᯉᯪ᯲ᯖᯒᯬ᯲ ᯒᯬ ᯔ ᯀᯉ᯲ᯖᯬᯰ ᯔᯉ᯲ᯑᯇᯖᯬ᯲ᯂᯉᯬ᯲ ᯤᯅᯉ ᯖᯮ ᯂᯮᯖᯉ.
Ia dung ro nasida, mangkuling ma ibana, songon on ma didok tu helana, "Hurangna do i di ho, ale bere; molo so boi nian patupaonmu na hudok i sude, ba i do nian paboaonmu tu ahu."
ᯤᯀ ᯑᯮᯰ ᯒᯬ ᯉᯘᯪᯑ, ᯔᯰᯄ᯦ᯮᯞᯪᯰ ᯔ ᯤᯅᯉ, ᯘᯬᯝᯉᯬ᯲ ᯀᯉᯬ᯲ ᯔ ᯑᯪᯑᯄ᯦ᯬ᯲ ᯖᯮ ᯂᯩᯞᯉ, "ᯂᯮᯒᯰᯉ ᯑᯬ ᯤ ᯑᯪ ᯂᯬ, ᯀᯞᯩ ᯅᯩᯒᯩ; ᯔᯬᯞᯬ ᯘᯬ ᯅᯬᯤ ᯉᯪᯀᯉ᯲ ᯇᯖᯮᯇᯀᯉᯬ᯲ᯔᯮ ᯉ ᯂᯮᯑᯄ᯦ᯬ᯲ ᯤ ᯘᯮᯑᯩ, ᯅ ᯤ ᯑᯬ ᯉᯪᯀᯉ᯲ ᯇᯅᯬᯀᯀᯉᯬ᯲ᯔᯮ ᯖᯮ ᯀᯂᯮ."
Anggo i, dormam do dipasang ho mameta-meta borungki, songon na mambahen haurahon di Si Boru Tibal Tudosan i. Alai atik pe i songon i, ale bere, indang pola sadia murukku, borhatanku ma hamu ture; di ari patoluna, borhat ma hamu muse, laho tu lumbanmuna, disi ma hamu morune", ninna.
ᯀᯰᯎᯬ ᯤ, ᯑᯒᯬ᯲ᯔᯔ᯲ ᯑᯬ ᯑᯪᯇᯘᯰ ᯂᯬ ᯔᯔᯩᯖᯔᯩᯖ ᯅᯬᯒᯮᯰᯄ᯦ᯪ, ᯘᯬᯝᯉᯬ᯲ ᯉ ᯔᯔ᯲ᯅᯂᯉᯩ᯲ ᯂᯥᯒᯂᯉᯬ᯲ ᯑᯪ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲ ᯤ. ᯀᯞᯤ ᯀᯖᯄ᯦ᯪ᯲ ᯇᯩ ᯤ ᯘᯬᯝᯉᯬ᯲ ᯤ, ᯀᯞᯩ ᯅᯩᯒᯩ, ᯀᯉᯪ᯲ᯑᯰ ᯇᯬᯞ ᯘᯑᯪᯀ ᯔᯮᯒᯄ᯦ᯮ᯲ᯄ᯦ᯮ, ᯅᯒᯬ᯲ᯂᯖᯉ᯲ᯄ᯦ᯮ ᯔ ᯂᯔᯮ ᯖᯮᯒᯩ; ᯑᯪ ᯀᯒᯪ ᯇᯖᯬᯞᯮᯉ, ᯅᯒᯬ᯲ᯂᯖ᯲ ᯔ ᯂᯔᯮ ᯔᯮᯘᯩ, ᯞᯂᯬ ᯖᯮ ᯞᯔᯮ᯲ᯅᯉ᯲ᯔᯮᯉ, ᯑᯪᯘᯪ ᯔ ᯂᯔᯮ ᯔᯬᯒᯮᯉᯩ", ᯉᯉᯪ᯲ᯉ.
Dung i ninna helana i ma mangalusi. "Olo, rajanami, nunga hurangna i di ahu, alai atik pe songon i, na poso dope ahu, na so sadia roha, na so sadia lagu; asa siajaranmuna dope ahu", ninna.
ᯑᯮᯰ ᯤ ᯉᯉᯪ᯲ᯉ ᯂᯩᯞᯉ ᯤ ᯔ ᯔᯝᯞᯮᯘᯪ. "ᯀᯬᯞᯬ, ᯒᯐᯉᯔᯪ, ᯉᯮᯝ ᯂᯮᯒᯰᯉ ᯤ ᯑᯪ ᯀᯂᯮ, ᯀᯞᯤ ᯀᯖᯄ᯦ᯪ᯲ ᯇᯩ ᯘᯬᯝᯉᯬ᯲ ᯤ, ᯉᯇᯬᯘᯬ ᯑᯬ ᯇᯩ ᯀᯂᯮ, ᯉ ᯘᯬ ᯘᯑᯪᯀ ᯒᯬᯂ, ᯉ ᯘᯬ ᯘᯑᯪᯀ ᯞᯎᯮ; ᯀᯘ ᯘᯪᯀᯐᯒᯉ᯲ᯔᯮᯉ ᯑᯬ ᯇᯩ ᯀᯂᯮ", ᯉᯉᯪ᯲ᯉ.
Dung i diparade Datu na Sumurung, portaoar na lumobi ma angka pauseangna siboanon ni boruna ; dipasingkop ma dohot sipanganon usungonna.
ᯑᯮᯰ ᯤ ᯑᯪᯇᯒᯑᯩ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ ᯔ ᯀᯰᯄ᯦ ᯇᯥᯘᯩᯀᯰ ᯉ ᯘᯪᯅᯬᯀᯉᯉᯬ᯲ ᯉᯪ ᯅᯬᯒᯮᯉ; ᯑᯪ ᯇᯘᯪᯰᯄ᯦ᯇᯬ᯲ ᯔ ᯑᯬᯂᯖᯬ᯲ ᯘᯪᯇᯝᯉᯉᯬ᯲ ᯥᯘᯮᯝᯉᯬ᯲ᯉ.
Ia dung jumpang ari patoluna, didok boruna i ma, "Borhat ma hami, ale amang, tu lumbannami!" ·ninna.
ᯤᯀ ᯑᯮᯰ ᯐᯔᯮ᯲ᯇᯰ ᯀᯒᯪ ᯇᯖᯬᯞᯮᯉ, ᯑᯪᯑᯄ᯦ᯬ᯲ ᯅᯬᯒᯮᯉ ᯤ ᯔ, "ᯅᯒᯬ᯲ᯂᯖ᯲ ᯔ ᯂᯔᯪ, ᯀᯞᯩ ᯀᯔᯰ, ᯖᯮ ᯞᯔᯮ᯲ᯅᯉ᯲ᯉᯔᯪ! "·ᯉᯉᯪ᯲ᯉ
Dung i didok amana i ma mangalusi, "Ba borhat ma tutu dainang, rap dohot helangki. Gabe ma dainang, sorangan ni laklak, sorangan ni singkoru, sorangan ni anak, sorangan ni boru, Gabe ma hamuna jala morbarita, godang ma hodamu dohot lombumuna; alai indang piga ia anakmu, alai sai torop ma ia pinompar muna!" ninna.
ᯑᯮᯰ ᯤ ᯑᯪᯑᯄ᯦ᯬ᯲ ᯀᯔᯉ ᯤ ᯔ ᯔᯝᯞᯮᯘᯪ, "ᯅ ᯅᯒᯬ᯲ᯂᯖ᯲ ᯔ ᯖᯮᯖᯮ ᯑᯤᯉᯰ, ᯒᯇ᯲ ᯑᯬᯂᯖᯬ᯲ ᯂᯩᯞᯰᯄ᯦ᯪ. ᯎᯅᯩ ᯔ ᯑᯤᯉᯰ, ᯘᯬᯒᯝᯉ᯲ ᯉᯪ ᯞᯄ᯦᯲ᯞᯄ᯦᯲, ᯘᯬᯒᯝᯉ᯲ ᯉᯪ ᯘᯪᯰᯄ᯦ᯬᯒᯮ, ᯘᯬᯒᯝᯉ᯲ ᯉᯪ ᯀᯉᯄ᯦᯲, ᯘᯬᯒᯝᯉ᯲ ᯉᯪ ᯅᯬᯒᯮ, ᯎᯅᯩ ᯔ ᯂᯔᯮᯉ ᯐᯞ ᯔᯒᯬ᯲ᯅᯒᯪᯖ, ᯎᯬᯑᯰ ᯔ ᯂᯬᯑᯔᯮ ᯑᯬᯂᯖᯬ᯲ ᯞᯔᯬ᯲ᯅᯮᯔᯮᯉ; ᯀᯞᯤ ᯀᯉᯪ᯲ᯑᯰ ᯇᯪᯎ ᯤᯀ ᯀᯉᯄ᯦᯲ᯔᯮ, ᯀᯞᯤ ᯘᯤ ᯖᯬᯒᯇᯬ᯲ ᯔ ᯤᯀ ᯇᯪᯉᯔᯬ᯲ᯇᯒ᯲ᯔᯮᯉ! "ᯉᯉᯪ᯲ᯉ
Dung songon i didok Datu na Sumurung, borhat ma Si Boru Jongjong Anian, dohot hinamulianna i, tu hutanasida, diboan ma dohot angka pauseang na nilehon ni amana i.
ᯑᯮᯰ ᯘᯬᯝᯉᯬ᯲ ᯤ ᯑᯪᯑᯄ᯦ᯬ᯲ ᯑᯖᯮ ᯉ ᯘᯮᯔᯮᯒᯮᯰ, ᯅᯒᯬ᯲ᯂᯖ᯲ ᯔ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲, ᯑᯬᯂᯖᯬ᯲ ᯂᯪᯉᯔᯮᯞᯪᯀᯉ᯲ᯉ ᯤ, ᯖᯮ ᯂᯮᯖᯉᯘᯪᯑ, ᯑᯪ ᯅᯬᯀᯉ᯲ ᯔ ᯑᯬᯂᯖᯬ᯲ ᯀᯰᯄ᯦ ᯇᯥᯘᯩᯀᯰ ᯉ ᯉᯪᯞᯩᯂᯉᯬ᯲ ᯉᯪ ᯀᯔᯉ ᯤ.
Ia dung ma inon, jus ma ninna solu, sar ma ninna tahu-tahu ; pur ma barita, sar alu-alu tu Datu Panggana, songon i dohot tu Portigatiga Torus, naung dipamuli Datu na Sumurung, portaoar na lumobi, Si Boru Jongjong Anian Si Boru Tibal Tudosan, hau jadi-jadian, na so mortudosan, tu Guru Satia Bulan, anak ni na tarbarita, tubu ni na hadohan goar, so pamotoannasida.
ᯤᯀ ᯑᯮᯰ ᯔ ᯤᯉᯉᯬ᯲, ᯐᯘᯮ᯲ ᯔ ᯉᯉᯪ᯲ᯉ ᯘᯬᯞᯮ, ᯘᯒ᯲ ᯔ ᯉᯉᯪ᯲ᯉ ᯖᯂᯮᯖᯂᯮ; ᯇᯒᯮ᯲ ᯔ ᯅᯒᯪᯖ, ᯘᯒ᯲ ᯀᯞᯮᯀᯞᯮ ᯖᯮ ᯑᯖᯮ ᯇᯰᯎᯉ, ᯘᯬᯝᯉᯬ᯲ ᯤ ᯑᯬᯂᯖᯬ᯲ ᯖᯮ ᯇᯒᯬ᯲ᯖᯪᯎᯖᯪᯎ ᯖᯬᯒᯘᯮ᯲, ᯉᯀᯮᯰ ᯑᯪᯇᯔᯮᯞᯪ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ, ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲, ᯂᯥ ᯐᯑᯪᯐᯑᯪᯀᯉ᯲, ᯉ ᯘᯬ ᯔᯒᯬ᯲ᯖᯮᯑᯬᯘᯉ᯲, ᯖᯮ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯀᯉᯄ᯦᯲ ᯉᯪ ᯉ ᯖᯒ᯲ᯅᯒᯪᯖ, ᯖᯮᯅᯮ ᯉᯪ ᯉ ᯂᯑᯬᯂᯉ᯲ ᯎᯬᯀᯒ᯲, ᯘᯬ ᯇᯔᯬᯖᯬᯀᯉ᯲ᯉᯘᯪᯑ.
Dung i disuru ma pangulu mandok hata tu Datu na Sumurung, portaoar na lumobi, manang na dia do umbahen na hum rohana pamuli Si Boru Jongjong Anian Si Boru Tibal Tudosan so pamotoannasida.
ᯑᯮᯰ ᯤ ᯑᯪ ᯘᯮᯒᯮ ᯔ ᯇᯝᯮᯞᯮ ᯔᯉ᯲ᯑᯄ᯦ᯬ᯲ ᯂᯖ ᯖᯮ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ, ᯔᯉᯰ ᯉ ᯑᯪᯀ ᯑᯬ ᯀᯔᯮ᯲ᯅᯂᯉᯩ᯲ ᯉ ᯂᯔᯮ᯲ ᯒᯬᯂᯉ ᯇᯔᯮᯞᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲ ᯘᯬ ᯇᯔᯬᯖᯬᯀᯉ᯲ᯉᯘᯪᯑ.
Jadi dung sahat pangulu i tu huta ni Portaoar na Sumurung, didok ma hatana songon on , "Ale rajanami, Datu na Sumurung, portaoar na lumobi! Boasa ma pamulionmu, antong Si Boru Jongjong Anian Si Boru Tibal Tudosan, ai na ginana ni Datu Panggana do i, bao pambarbar na sumurung jala na pinorulosan ni bao Portigatiga Torus? Angatmu do i, toismu tu nasida, ai nasida do nampuna boru disi", ninna.
ᯐᯑᯪ ᯑᯮᯰ ᯘᯂᯖ᯲ ᯇᯝᯮᯞᯮ ᯤ ᯖᯮ ᯂᯮᯖ ᯉᯪ ᯇᯒᯬ᯲ᯖᯀᯬᯀᯒ᯲ ᯉ ᯘᯮᯔᯮᯒᯮᯰ, ᯑᯪᯑᯄ᯦ᯬ᯲ ᯔ ᯂᯖᯉ ᯘᯬᯝᯉᯬ᯲ ᯀᯉᯬ᯲,"ᯀᯞᯩ ᯒᯐᯉᯔᯪ, ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ!ᯅᯬᯀᯘ ᯔ ᯇᯔᯮᯞᯪᯀᯉᯬ᯲ᯔᯮ, ᯀᯉ᯲ᯖᯬᯰ ᯘᯪᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲, ᯀᯤ ᯉ ᯎᯪᯉᯉ ᯉᯪ ᯑᯖᯮ ᯇᯰᯎᯉ ᯑᯬ ᯤ, ᯅᯀᯬ ᯇᯔ᯲ᯅᯒ᯲ᯅᯒ᯲ ᯉ ᯘᯮᯔᯮᯒᯮᯰ ᯐᯞ ᯉ ᯇᯪᯉᯬᯒᯮᯞᯬᯘᯉ᯲ ᯉᯪ ᯅᯀᯬ ᯇᯒ᯲ᯬ᯲ᯖᯪᯎᯖᯪᯎ ᯖᯬᯒᯘᯮ᯲? ᯀᯝᯖ᯲ ᯔᯮ ᯑᯬ ᯤ, ᯖᯬᯀᯘᯪ᯲ᯔᯮ ᯖᯮ ᯉᯘᯪᯑ, ᯀᯤ ᯉᯘᯪᯑ ᯑᯬ ᯉᯔ᯲ᯇᯮᯉ ᯅᯬᯒᯮ ᯑᯪᯘᯪ", ᯉᯉᯪ᯲ᯉ.
Alai didok Portaoar na Sumurung ma mangalusi, "Palias ma hatam; ai godang na ginana ni halak, na pinorulosan ni deba, anggo so boi mangolu bahenonna, ba tu aha dohononna?!" Ahu do ama ni Si Boru Jongjong Anian, ai ahu do mambahen i mangolu, indang aha na niantoan ni Pambarbar na Sumurung disi · dohot portigatiga torus. I ma hatangku", ninna.
ᯀᯞᯤ ᯑᯪᯑᯄ᯦ᯬ᯲ ᯇᯒᯬ᯲ᯖᯀᯬᯀᯒ᯲ ᯉ ᯘᯮᯔᯮᯒᯮᯰ ᯔ ᯔᯝᯞᯮᯘᯪ, "ᯇᯞᯪᯀᯘ᯲ ᯔ ᯂᯖᯔ᯲; ᯀᯤ ᯎᯬᯑᯰ ᯉ ᯎᯪᯉᯉ ᯉᯪ ᯂᯞᯄ᯦᯲, ᯉ ᯇᯪᯉᯬᯒᯮᯞᯬᯘᯉ᯲ ᯉᯪ ᯑᯩᯅ, ᯀᯰᯎᯬ ᯘᯬ ᯅᯬᯤ ᯔᯝᯬᯞᯮ ᯅᯂᯩᯉᯉᯬ᯲ᯉ, ᯅ ᯖᯮ ᯀᯂ ᯑᯬᯂᯬᯉᯉᯬ᯲ᯉ?! "ᯀᯂᯮ ᯑᯬ ᯀᯔ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲, ᯀᯤ ᯀᯂᯮ ᯑᯬ ᯔᯔ᯲ᯅᯂᯉᯩ᯲ ᯤ ᯔᯝᯬᯞᯮ, ᯀᯉᯪ᯲ᯑᯰ ᯀᯂ ᯉ ᯉᯪᯀᯉ᯲ᯖᯬᯀᯉ᯲ ᯉᯪ ᯇᯔ᯲ᯅᯒ᯲ᯅᯒ᯲ ᯉ ᯘᯮᯔᯮᯒᯮᯰ ᯑᯪᯘᯪ· ᯑᯬᯂᯖᯬ᯲ ᯇᯒᯬ᯲ᯖᯪᯎᯖᯪᯎ ᯖᯬᯒᯘᯮ᯲. ᯤ ᯔ ᯂᯖᯰᯄ᯦ᯮ", ᯉᯉᯪ᯲ᯉ.
Dung i didok pangulu i ma muse, "Ba molo i ma ujung ni hatam, ale Datu na Sumurung, portaoar na lumobi, indang tarbahen so mormusu be hamu dohot nasida, siala ni Si Boru Jongjong Anian ; alai anggo siat nian sipaingot tu hamu be, unang pola sahat ro di gora, mordenggan ma hamu!" ninna.
ᯑᯮᯰ ᯤ ᯑᯪᯑᯄ᯦ᯬ᯲ ᯇᯝᯮᯞᯮ ᯤ ᯔ ᯔᯮᯘᯩ, "ᯅ ᯔᯬᯞᯬ ᯤ ᯔ ᯥᯐᯮᯰ ᯉᯪ ᯂᯖᯔ᯲, ᯀᯞᯩ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ, ᯀᯉᯪ᯲ᯑᯰ ᯖᯒ᯲ᯅᯂᯉᯩ᯲ ᯘᯬ ᯔᯒᯬ᯲ᯔᯮᯘᯮ ᯅᯩ ᯂᯔᯮ ᯑᯬᯂᯖᯬ᯲ ᯉᯘᯪᯑ, ᯘᯪᯀᯞ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲; ᯀᯞᯤ ᯀᯰᯎᯬ ᯘᯪᯀᯖ᯲ ᯉᯪᯀᯉ᯲ ᯘᯪᯇᯤᯝᯖᯬ᯲ ᯖᯮ ᯂᯔᯮ ᯅᯩ, ᯥᯉᯰ ᯇᯬᯞ ᯘᯂᯖ᯲ ᯒᯬ ᯑᯪ ᯎᯬᯒ, ᯔᯒᯬ᯲ᯑᯰᯩᯎᯉ᯲ ᯔ ᯂᯔᯮ!" ᯉᯉᯪ᯲ᯉ.
Dung i didok Portaoar na Sumurung ma mangalusi, "Anggo i, mormusu pe taho, indang pola mabiar ahu.
ᯑᯮᯰ ᯤ ᯑᯪᯑᯄ᯦ᯬ᯲ ᯇᯒᯬ᯲ᯖᯀᯬᯀᯒ᯲ ᯉ ᯘᯮᯔᯮᯒᯮᯰ ᯔ ᯔᯝᯞᯮᯘᯪ, "ᯀᯰᯎᯬ ᯤ, ᯔᯒᯬ᯲ᯔᯮᯘᯮ ᯇᯩ ᯖᯂᯬ, ᯀᯉᯪ᯲ᯑᯰ ᯇᯬᯞ ᯔᯅᯪᯀᯒ᯲ ᯀᯂᯮ.
Ditutu ma pegena morhori-hori harangan ; dituntun ma lomo ni ate-atena, inda unang so boi do hutampar? Indang aha dohononna taringot tu borungku Si Boru Jongjong Anian Si Boru Tibal Tudosan, na so maranian, na so mortudosan. Ahu do ama ni i, ai ahu do mambahen taoar tu si umbahen na mangolu. Anggo so toho na hudok i, juap an tong songon na mormeam; alai anggo toho do na hudok i, sai talu nasida bahenonku," ninna.
ᯑᯪᯖᯮᯖᯮ ᯔ ᯇᯩᯎᯩ ᯉ ᯔᯒᯬ᯲ᯂᯬᯒᯪᯂᯬᯒᯪ ᯂᯒᯝᯉ᯲; ᯑᯪ ᯖᯉᯮ᯲ᯖᯉᯮ᯲ ᯔ ᯞᯬᯔᯬ ᯉᯪ ᯀᯖᯩᯀᯖᯩᯉ, ᯀᯉᯪ᯲ᯑ ᯥᯉᯰ ᯘᯬ ᯅᯬᯤ ᯑᯬ ᯂᯮᯖᯔ᯲ᯇᯒ᯲? ᯀᯉᯪ᯲ᯑᯰ ᯀᯂ ᯑᯬᯂᯬᯉᯉᯬ᯲ ᯉ ᯖᯒᯪᯝᯖᯬ᯲ ᯖᯮ ᯅᯬᯒᯮᯰᯄ᯦ᯮ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲, ᯉ ᯘᯬ ᯔᯒᯉᯪᯀᯉ᯲, ᯉ ᯘᯬ ᯔᯬᯒ᯲ᯖᯮᯑᯬᯘᯉ᯲. ᯀᯂᯮ ᯑᯬ ᯀᯔᯉᯪ ᯤ, ᯀᯤ ᯀᯂᯮ ᯑᯬ ᯔᯔ᯲ᯅᯂᯉᯩ᯲ ᯖᯀᯬᯀᯒ᯲ ᯖᯮ ᯘᯪ ᯀᯔᯮ᯲ᯅᯂᯉᯩ᯲ ᯉ ᯔᯝᯬᯞᯮ. ᯀᯰᯎᯬ ᯘᯬ ᯖᯬᯂᯬ ᯉ ᯂᯮᯑᯄ᯦ᯬ᯲ ᯤ, ᯐᯮᯀᯇ᯲ ᯀᯉ᯲ ᯖᯬᯰ ᯘᯬᯝᯉᯬ᯲ ᯉ ᯔᯒᯬ᯲ᯔᯩᯀᯔ᯲; ᯀᯞᯤ ᯀᯰᯎᯬ ᯖᯬᯂᯬ ᯑᯬ ᯉ ᯂᯮᯑᯄ᯦ᯬ᯲ ᯤ, ᯘᯤ ᯖᯞᯮ ᯉᯘᯪᯑ ᯅᯂᯩᯉᯉᯬ᯲ᯄ᯦ᯮ," ᯉᯉᯪ᯲ᯉ.
"Ba molo tung sai i ma pandokmu, ujung ni hatam, ba i ma paboaon tu halak an na dua" , ninna pangulu i.
"ᯅ ᯔᯬᯞᯬ ᯖᯮᯰ ᯘᯤ ᯤ ᯔ ᯇᯉ᯲ᯑᯄ᯦ᯬ᯲ᯔᯮ, ᯥᯐᯮᯰ ᯉᯪ ᯂᯖᯔ᯲, ᯅ ᯤ ᯔ ᯇᯅᯬᯀᯀᯉᯬ᯲ ᯖᯮ ᯂᯞᯄ᯦᯲ ᯀᯉ᯲ ᯉ ᯑᯮᯀ", ᯉᯉᯪ᯲ᯉ ᯇᯝᯮᯞᯮ ᯤ.
Dung i laho ma pangulu i mandapothon Pambarbar na Sumurung, panggana na lumobi dohot Portigatiga Torus, dipaboa ma tu nasida sude hata ni portaoar na sumurung i.
ᯑᯮᯰ ᯤ ᯞᯂᯬ ᯔ ᯇᯝᯮᯞᯮ ᯤ ᯔᯉ᯲ᯑᯇᯖᯬ᯲ᯂᯉᯬ᯲ ᯇᯔ᯲ᯅᯒ᯲ᯅᯒ᯲ ᯉ ᯘᯮᯔᯮᯒᯮᯰ, ᯇᯰᯎᯉ ᯉ ᯞᯮᯔᯬᯅᯪ ᯑᯬᯂᯖᯬ᯲ ᯇᯒᯬ᯲ᯖᯪᯎᯖᯪᯎ ᯖᯬᯒᯘᯮ᯲, ᯑᯪᯇᯅᯬᯀ ᯔ ᯖᯮ ᯉᯘᯪᯑ ᯘᯮᯑᯩ ᯂᯖ ᯉᯪ ᯇᯒᯬ᯲ᯖᯀᯬᯀᯒ᯲ ᯉ ᯘᯮᯔᯮᯒᯮᯰ ᯤ.
Dung dibege nasida hatana i, didok ma mangalusi, "Angatna do i, toisna, tung songon i hape dohononna?! Anggo tutu do hami manggana i dohot mambahen ulosna, dohot mambahen mas tu pinggol ni Si Boru Jongjong Anian, ba talu ma ibana bahenonnami. Alai molo so tutu do na hudokhami juap ma tutu songon na mor meam. I ma siudiyonnami" , ninna nasida na dua.
ᯑᯮᯰ ᯑᯪ ᯅᯩᯎᯩ ᯉᯘᯪᯑ ᯂᯖᯉ ᯤ, ᯑᯪᯑᯄ᯦ᯬ᯲ ᯔ ᯔᯝᯞᯮᯘᯪ, "ᯀᯝᯖ᯲ᯉ ᯑᯬ ᯤ, ᯖᯬᯀᯘᯪ᯲ᯉ, ᯖᯮᯰ ᯘᯬᯝᯉᯬ᯲ ᯤ ᯂᯇᯩ ᯑᯬᯂᯬᯉᯉᯬ᯲ᯉ?! ᯀᯰᯎᯬ ᯖᯮᯖᯮ ᯑᯬ ᯂᯔᯪ ᯔᯰᯎᯉ ᯤ ᯑᯬᯂᯖᯬ᯲ ᯔᯔ᯲ᯅᯂᯉᯩ᯲ ᯥᯞᯘᯬ᯲ᯉ, ᯑᯬᯂᯖᯬ᯲ ᯔᯔ᯲ᯅᯂᯉᯩ᯲ ᯔᯘ᯲ ᯖᯮ ᯇᯪᯰᯎᯞᯬ᯲ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲, ᯅ ᯖᯞᯮ ᯔ ᯤᯅᯉ ᯅᯂᯩᯉᯉᯬ᯲ᯉᯔᯪ. ᯀᯞᯤ ᯔᯬᯞᯬ ᯘᯬ ᯖᯮᯖᯮ ᯑᯬ ᯉ ᯂᯮᯑᯄ᯦ᯬ᯲ᯂᯔᯪ ᯐᯮᯀᯇ᯲ ᯔ ᯖᯮᯖᯮ ᯘᯬᯝᯉᯬ᯲ ᯉ ᯔᯒᯬ᯲ᯔᯩᯀᯔ᯲. ᯤ ᯔ ᯘᯪᯥᯑᯪᯛᯉᯬ᯲ᯉᯔᯪ", ᯉᯉᯪ᯲ᯉ ᯉᯘᯪᯑ ᯉᯑᯮᯀ.
Dung i tole ma nasida sampak aek, pultop ma gora i, masibodilan ma nasida. Leleng ma di porlelengan, lalap di porlalapan, nasida na mangula gora i, suda indahanna, suda juhutna, matostos sangkalanna, maputput buluna, laos so mornaujung goranasida i, ganup ari nasida masibodilan.
ᯑᯮᯰ ᯤ ᯖᯬᯞᯩ ᯔ ᯉᯘᯪᯑ ᯘᯔ᯲ᯇᯄ᯦᯲ ᯀᯀᯄᯰᯩ᯲, ᯇᯞᯮ᯲ᯖᯇᯬ᯲ ᯔ ᯎᯬᯒ ᯤ, ᯔᯘᯪᯅᯬᯑᯪᯞᯉ᯲ ᯔ ᯉᯘᯪᯑ ᯞᯩᯞᯰᯩ ᯔ ᯑᯪ ᯇᯒᯬ᯲ᯞᯩᯞᯩᯝᯉ᯲, ᯞᯞᯇ᯲ ᯑᯪ ᯇᯒᯬ᯲ᯞᯞᯇᯉ᯲, ᯉᯘᯪᯑ ᯉ ᯔᯝᯮᯞ ᯎᯬᯒ ᯤ, ᯘᯮᯑ ᯀᯉᯪ᯲ᯑᯂᯉ᯲ᯉ, ᯘᯮᯑ ᯐᯮᯂᯖᯮ᯲ᯉ, ᯔᯖᯘᯬ᯲ᯖᯘᯬ᯲ ᯘᯰᯄ᯦ᯞᯉ᯲ᯉ, ᯔᯇᯖᯮ᯲ᯇᯖᯮ᯲ ᯅᯮᯞᯮᯉ, ᯞᯀᯘᯬ᯲ ᯘᯬ ᯔᯒᯬ᯲ᯉ ᯥᯐᯮᯰ ᯎᯬᯒ ᯉᯘᯪᯑ ᯤ, ᯎᯉᯇᯮ᯲ ᯀᯒᯪ ᯉᯘᯪᯑ ᯔᯘᯪᯅᯬᯑᯪᯞᯉ᯲.
Andalu pe soada jala bonang pe so adong; na talu pe soada, na monang pe so adong; juap di bodil, juap di hujur, ia indahanna suda.
ᯀᯉ᯲ᯑᯞᯮ ᯇᯩ ᯘᯬᯀᯑ ᯐᯞ ᯅᯬᯉᯰ ᯇᯩ ᯘᯬ ᯀᯑᯬᯰ; ᯉ ᯖᯞᯮ ᯇᯩ ᯘᯬᯀᯑ, ᯉ ᯔᯬᯉᯰ ᯇᯩ ᯘᯬ ᯀᯑᯬᯰ; ᯐᯮᯀᯇ᯲ ᯑᯪ ᯅᯬᯑᯞᯪ᯲, ᯐᯮᯀᯇ᯲ ᯑᯪ ᯂᯮᯐᯒᯮ᯲, ᯤᯀ ᯀᯉᯪ᯲ᯑᯂᯉ᯲ ᯉ ᯘᯮᯑ
Ia adong ma sada halak, na margoar Si Siak Bagi Si Aji Gajagaja, na laho tu ramba-ramba masiporbue ni hau harangan, asa adong panganonna.
ᯤᯀ ᯀᯑᯬᯰ ᯔ ᯘᯑ ᯂᯞᯄ᯦᯲, ᯉ ᯔᯒ᯲ᯎᯬᯀᯒ᯲ ᯘᯪ ᯘᯪᯀᯄ᯦᯲ ᯅᯎᯪ ᯘᯪ ᯀᯐᯪ ᯎᯐᯎᯐ, ᯉ ᯞᯂᯬ ᯖᯮ ᯒᯔ᯲ᯅᯒᯔ᯲ᯅ ᯔᯘᯪᯇᯒᯬ᯲ᯅᯮᯀᯩ ᯉᯪ ᯂᯥ ᯂᯒᯝᯉ᯲, ᯀᯘ ᯀᯑᯬᯰ ᯇᯝᯉᯉᯬ᯲ᯉ.
Ia dung sahat ibana ro di harangan i, ro ma singgar madabu, gabe laho ma ibana manisio tu hau na ruangon, hundul ma ibana disi.
ᯤᯀ ᯑᯮᯰ ᯘᯂᯖ᯲ ᯤᯅᯉ ᯒᯬ ᯑᯪ ᯂᯒᯝᯉ᯲ ᯤ, ᯒᯬ ᯔ ᯘᯪᯰᯎᯒ᯲ ᯔᯑᯅᯮ, ᯎᯅᯩ ᯞᯂᯬ ᯔ ᯤᯅᯉ ᯔᯉᯪᯘᯪᯀᯬ ᯖᯮ ᯂᯥ ᯉ ᯒᯮᯀᯝᯉᯬ᯲, ᯂᯉᯮ᯲ᯑᯞᯮ᯲ ᯔ ᯤᯅᯉ ᯑᯪᯘᯪ.
Dung i adong ma dibege ibana angka anak ni bodat mangkatai, songon on ma didok na sada, "Oe, loja ni angka jolma i, na mangula gora i, lola nasida so mulaulaon, tondan nasida so mangula, holan paida-ida hepeng, boli ni Si Boru Jongjong Anian Si Boru Tibal Tudosan i. Tung na oto ma nang angka raja porhata i ; na sai mura sihataon, so boi uhumonna", ninna.
ᯑᯮᯰ ᯤ ᯀᯑᯬᯰ ᯔ ᯑᯪᯅᯩᯎᯩ ᯤᯅᯉ ᯀᯰᯄ᯦ ᯀᯉᯄ᯦᯲ ᯉᯪ ᯅᯬᯑᯖ᯲ ᯔᯰᯄ᯦ᯖᯤ, ᯘᯬᯝᯉᯬ᯲ ᯀᯉᯬ᯲ ᯔ ᯑᯪᯑᯄ᯦ᯬ᯲ ᯉ ᯘᯑ, "ᯀᯬᯀᯩ ᯞᯬᯐ ᯉᯪ ᯀᯰᯄ᯦ ᯐᯞᯬ᯲ᯔ ᯤ, ᯉ ᯔᯝᯮᯞ ᯎᯬᯒ ᯤ, ᯞᯬᯞ ᯉᯘᯪᯑ ᯘᯬ ᯔᯮᯞ ᯥᯞᯀᯉᯬ᯲, ᯖᯉᯬ᯲ᯑᯉ᯲ ᯉᯘᯪᯑ ᯘᯬ ᯔᯝᯮᯞ, ᯂᯬᯞᯉ᯲ ᯇᯤᯑᯤᯑ ᯂᯩᯇᯰᯩ, ᯅᯬᯞᯪ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲ ᯤ. ᯖᯮᯰ ᯉ ᯀᯬᯖᯬ ᯔ ᯉᯰ ᯀᯰᯄ᯦ ᯒᯐ ᯇᯒᯬ᯲ᯂᯖ ᯤ; ᯉ ᯘᯤ ᯔᯮᯒ ᯘᯪᯂᯖᯀᯉᯬ᯲, ᯘᯬ ᯅᯬᯤ ᯥᯂᯮᯔᯉᯬ᯲ᯉ", ᯉᯉᯪ᯲ᯉ.
Alai ro ma dongan ni bodat i mangalusi, "Ba dia ma nian bahenonmu, aut tung sura ho manguhum, gora ni jolma manisia i?" ninna.
ᯀᯞᯤ ᯒᯬ ᯔ ᯑᯬᯝᯉ᯲ ᯉᯪ ᯅᯬᯑᯖ᯲ ᯤ ᯔᯝᯞᯮᯘᯪ, "ᯅ ᯑᯪᯀ ᯔ ᯉᯪᯀᯉ᯲ ᯅᯂᯩᯉᯉᯬ᯲ᯔᯮ, ᯀᯀᯖᯮ᯲ ᯖᯮᯰ ᯘᯮᯒ ᯂᯬ ᯔᯝᯮᯂᯔᯮ᯲, ᯎᯬᯒ ᯉᯪ ᯐᯞᯬ᯲ᯔ ᯔᯉᯪᯘᯪᯀ ᯤ? "ᯉᯉᯪ᯲ᯉ.
"A, na so tarbahen do iba gabe jolma manisia ; aut tung sura na tarbahen mura situtu do i uhumon. Ai aut dibahen Pambarbar na Sumurung, panggana na lumobi sijalo upa ompu; dung i Datu na Sumurung, portaoar na lumobi ma dibahen ama pangintubu, suhut porboru; dung i Portigatiga Torus i ma dibahen sijalo upa tulang, ai i do sibahen abitna dohot paheanna ; ba diporulosi halak do berena.
"ᯀ ᯉ ᯘᯬ ᯖᯒ᯲ᯅᯂᯉᯩ᯲ ᯑᯬ ᯤᯅ ᯎᯅᯩ ᯐᯞᯬ᯲ᯔ ᯔᯉᯪᯘᯪᯀ; ᯀᯀᯖᯮ᯲ ᯖᯮᯰ ᯘᯮᯒ ᯉ ᯖᯒ᯲ᯅᯂᯉᯩ᯲ ᯔᯮᯒ ᯘᯪᯖᯮᯖᯮ ᯑᯬ ᯤ ᯥᯂᯮᯔᯉᯬ᯲ ᯀᯤ ᯀᯀᯖᯮ᯲ ᯑᯪᯅᯂᯉᯩ᯲ ᯇᯔ᯲ᯅᯒ᯲ᯅᯒ᯲ ᯉᯘᯮᯔᯮᯒᯮᯰ, ᯇᯰᯎᯉ ᯉ ᯞᯮᯔᯬᯅᯪ ᯘᯪ ᯐᯞᯬ ᯥᯇ ᯀᯔᯬᯇᯮ ᯑᯮᯰ ᯤ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ ᯔ ᯑᯪᯅᯂᯉᯩ᯲ ᯀᯔ ᯇᯝᯉᯪ᯲ᯖᯮᯅᯮ ᯘᯮᯂᯖᯮ᯲ ᯇᯒᯬ᯲ᯅᯬᯒᯮ; ᯑᯮᯰ ᯤ ᯇᯒᯬ᯲ᯖᯪᯎᯖᯪᯎ ᯖᯬᯒᯘᯮ᯲ ᯤ ᯔ ᯑᯪᯅᯂᯉᯩ᯲ ᯘᯪ ᯐᯞᯬ ᯥᯇ ᯖᯮᯞᯰ, ᯀᯤ ᯤ ᯑᯬ ᯘᯪᯅᯂᯉᯩ᯲ ᯀᯅᯖᯪ᯲ᯉ ᯑᯬᯂᯖᯬ᯲ ᯇᯂᯩᯀᯉ᯲ᯉ; ᯅ ᯑᯪᯇᯬᯒᯮᯞᯬᯘᯪ ᯂᯞᯄ᯦᯲ ᯑᯬ ᯅᯩᯒᯩᯉ.
Aut na songon i dibahen angka raja porhata i uhumnasida, nunga tibu morujung gora i, sae sihataon. Anggo i, dioloi .nasida do tondan so mangula, lola so mulaulaon, bahenon ni sihataon na sai mura" , ninna.
ᯀᯀᯖᯮ᯲ ᯉ ᯘᯬᯝᯉᯬ᯲ ᯤ ᯑᯪᯅᯂᯉᯩ᯲ ᯀᯰᯄ᯦ ᯒᯐ ᯇᯒᯬ᯲ᯂᯖ ᯤ ᯥᯂᯔᯮ᯲ ᯉᯘᯪᯑ, ᯉᯮᯝ ᯖᯪᯅᯮ ᯔᯬᯒᯮᯐᯮᯰ ᯎᯬᯒ ᯤ, ᯘᯀᯩ ᯘᯪᯂᯖᯀᯉᯬ᯲ ᯀᯰᯎᯬ ᯤ, ᯑᯪᯀᯬᯞᯬᯤ. ᯉᯘᯪᯑ ᯑᯬ ᯖᯉᯬ᯲ᯑᯉ᯲ ᯘᯬ ᯔᯝᯮᯞ, ᯞᯬᯞ ᯘᯬ ᯔᯮᯞᯥᯞᯀᯉᯬ᯲, ᯅᯂᯩᯉᯉᯬ᯲ ᯉᯪ ᯘᯪᯂᯖᯀᯉᯬ᯲ ᯉ ᯘᯤ ᯔᯮᯒ", ᯉᯉᯪ᯲ᯉ.
Dung songon i dibege Si Aji Gajagaja pangkataion ni bodat i, siang ma singgar i, mulak ma ibana sian harangan. Manurbu ma di poring, mangarabi ma di tandiang; marpingkir ma ibana borngin, patupahonsa ia arian.
ᯑᯮᯰ ᯘᯬᯝᯉᯬ᯲ ᯤ ᯑᯪᯅᯩᯎᯩ ᯘᯪ ᯀᯐᯪ ᯎᯐᯎᯐ ᯇᯰᯄ᯦ᯖᯤᯀᯉᯬ᯲ ᯉᯪ ᯅᯬᯑᯖ᯲ ᯤ, ᯘᯪᯀᯰ ᯔ ᯘᯪᯰᯎᯒ᯲ ᯤ, ᯔᯮᯞᯄ᯦᯲ ᯔ ᯤᯅᯉ ᯘᯪᯀᯉ᯲ ᯂᯒᯝᯉ᯲. ᯔᯉᯒᯮ᯲ᯅᯮ ᯔ ᯑᯪ ᯇᯬᯒᯪᯰ, ᯔᯝᯒᯅᯪ ᯔ ᯑᯪ ᯖᯉ᯲ᯑᯪᯀᯰ; ᯔᯒ᯲ᯇᯪᯰᯄ᯦ᯒᯪ᯲ ᯔ ᯤᯅᯉ ᯅᯒᯬ᯲ᯝᯉᯪ᯲, ᯇᯖᯮᯇᯂᯉᯬ᯲ᯘ ᯤᯀ ᯀᯒᯪᯀᯉ᯲
Dung i ditopot ibana ma Datu na Sumurung, portaoar na lumobi, didok ma hatana songon on, "Beha do, ale rajanami! Ia tung hupahata ma goramuna on? Loja hamu, tondan so mangula, pagodang-godang harugian" , ninna.
ᯑᯮᯰ ᯤ ᯑᯪᯖᯬᯇᯖᯬ᯲ ᯤᯅᯉ ᯔ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ, ᯑᯪᯑᯄ᯦ᯬ᯲ ᯔ ᯂᯖᯉ ᯘᯬᯝᯉᯬ᯲ ᯀᯉᯬ᯲, "ᯅᯩᯂ ᯑᯬ, ᯀᯞᯩ ᯒᯐᯉᯔᯪ! ᯤᯀ ᯖᯮᯰ ᯂᯮᯇᯂᯖ ᯔ ᯎᯬᯒᯔᯮᯉ ᯀᯉᯬ᯲? ᯞᯬᯐ ᯂᯔᯮ ᯖᯉᯬ᯲ᯑᯉ᯲ ᯘᯬᯔᯝᯮᯞ, ᯇᯎᯬᯑᯰᯎᯬᯑᯰ ᯂᯒᯮᯎᯪᯀᯉ᯲", ᯉᯉᯪ᯲ᯉ.
Alai didok Datu na Sumurung, portaoar na lumobi ma mangalusi, "Oe, ale Aji Gajagaja! Haru angka raja, na pande morhata, na sangap na sumurung, nunga mulak pahatahon, so bolas pahataonna. Ba lam ho ma, ale Siak Bagi lapung hiap?" ninna.
ᯀᯞᯤ ᯑᯪᯑᯄ᯦ᯬ᯲ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ ᯔ ᯔᯝᯞᯮᯘᯪ," ᯀᯬᯀᯩ ᯀᯞᯩ ᯀᯐᯪ ᯎᯐᯎᯐ! ᯂᯒᯮ ᯀᯰᯄ᯦ ᯒᯐ, ᯉ ᯇᯉ᯲ᯑᯩ ᯔᯒᯬ᯲ᯂᯖ, ᯉ ᯘᯝᯇ᯲ ᯉ ᯘᯮᯔᯮᯒᯮᯰ, ᯉᯮᯝ ᯔᯮᯞᯄ᯦᯲ ᯇᯂᯖᯂᯉᯬ᯲, ᯘᯬ ᯅᯬᯞᯘ᯲ ᯇᯂᯖᯀᯉᯬ᯲ᯉ. ᯅ ᯞᯔ᯲ ᯂᯬ ᯔ, ᯀᯞᯩ ᯘᯪᯀᯄ᯦᯲ ᯅᯎᯪ ᯞᯇᯮᯰ ᯂᯪᯀᯇ᯲?" ᯉᯉᯪ᯲ᯉ.
Dung i didok ma muse, "Unang songon i da, rajanami! Mulak pe angka raja pahatahon goramuna on, indada dohononku. na so malo nasida manimbang uhum. Alai on do dohononku: anggo so goar ni uhum na toho do sidohononku, inda mulak ahu?" ninna.
ᯑᯮᯰ ᯤ ᯑᯪᯑᯄ᯦ᯬ᯲ ᯔ ᯔᯮᯘᯩ," ᯥᯉᯰ ᯘᯬᯝᯉᯬ᯲ ᯤ ᯑ, ᯒᯐᯉᯔᯪ! ᯔᯮᯞᯄ᯦᯲ ᯇᯩ ᯀᯰᯄ᯦ ᯒᯐ ᯇᯂᯖᯂᯉᯬ᯲ ᯎᯬᯒᯔᯮᯉ ᯀᯉᯬ᯲, ᯀᯉᯪ᯲ᯑᯑ ᯑᯬᯂᯬᯉᯉᯬ᯲ᯄ᯦ᯮ. ᯉ ᯘᯬ ᯔᯞᯬ ᯉᯘᯪᯑ ᯔᯉᯔᯪ᯲ᯅᯰ ᯥᯂᯔᯮ᯲ ᯀᯞᯤ ᯀᯉᯬ᯲ ᯑᯬ ᯑᯬᯂᯬᯉᯉᯬ᯲ᯄ᯦ᯮ: ᯀᯰᯎᯬ ᯘᯬ ᯎᯬᯀᯒ᯲ ᯉᯪ ᯥᯂᯔᯮ᯲ᯉ ᯖᯬᯂᯬ ᯑᯬ ᯘᯪᯑᯬᯂᯬᯉᯉᯬ᯲ᯄ᯦ᯮ, ᯀᯉᯪ᯲ᯑ ᯔᯮᯞᯄ᯦᯲ ᯀᯂᯮ? "ᯉᯉᯪ᯲ᯉ.
"Molo songon i", ninna Portaoar na Sumurung, "tu duru ma hata mabuk, tu tonga-tonga ma hata uhum ; pahata ma gora i, indang panjua ahu di uhum na tingkos" , ninna.
"ᯔᯬᯞᯬ ᯘᯬᯝᯉᯬ᯲ ᯤ", ᯉᯉᯪ᯲ᯉ ᯇᯒᯬ᯲ᯖᯀᯬᯀᯒ᯲ ᯉ ᯘᯮᯔᯮᯒᯮᯰ, "ᯖᯮ ᯑᯮᯒᯮ ᯔ ᯂᯖ ᯔᯅᯄ᯦ᯮ᯲, ᯖᯮ ᯖᯬᯝᯖᯬᯝ ᯔ ᯂᯖ ᯥᯂᯔᯮ᯲; ᯇᯂᯖ ᯔ ᯎᯬᯒ ᯤ, ᯀᯉᯪ᯲ᯑᯰ ᯇᯉ᯲ᯐᯮᯀ ᯀᯂᯮ ᯑᯪ ᯥᯂᯔᯮ᯲ ᯉ ᯖᯪᯰᯄ᯦ᯘᯬ᯲", ᯉᯉᯪ᯲ᯉ.
Ia dung songon i, laho ma Si Aji Gajagaja tu Datu Panggana, pambarbar na sumurung, dohot tu Portigatiga Torus, didok ma tu nasida, asa pahataonna gora i. Ia dung unduk masioloan nasida, di na olo pahataon, gabe pongpang ma gora i dibahen Si Siak Bagi Si Aji Gajagaja, digondit ma titi ni ari asa mordompak nasida.
ᯤᯀ ᯑᯮᯰ ᯘᯬᯝᯉᯬ᯲ ᯤ, ᯞᯂᯬ ᯔ ᯘᯪ ᯀᯐᯪ ᯎᯐᯎᯐ ᯖᯮ ᯑᯖᯮ ᯇᯰᯎᯉ, ᯇᯔ᯲ᯅᯒ᯲ᯅᯒ᯲ ᯉ ᯘᯮᯔᯮᯒᯮᯰ, ᯑᯬᯂᯖᯬ᯲ ᯖᯮ ᯇᯒᯬ᯲ᯖᯪᯎᯖᯪᯎ ᯖᯬᯒᯘᯮ᯲, ᯑᯪᯑᯄ᯦ᯬ᯲ ᯔ ᯖᯮ ᯉᯘᯪᯑ, ᯀᯘ ᯇᯂᯖᯀᯉᯬ᯲ᯉ ᯎᯬᯒ ᯤ. ᯤᯀ ᯑᯮᯰ ᯀᯉᯮ᯲ᯑᯄ᯦ᯮ᯲ ᯔᯘᯪᯀᯬᯞᯬᯀᯉ᯲ ᯉᯘᯪᯑ, ᯑᯪ ᯉ ᯀᯬᯞᯬ ᯇᯂᯖᯀᯉᯬ᯲, ᯎᯅᯩ ᯇᯬᯰᯇᯰ ᯔ ᯎᯬᯒ ᯤ ᯑᯪᯅᯂᯉᯩ᯲ ᯘᯪ ᯘᯪᯀᯄ᯦᯲ ᯅᯎᯪ ᯘᯪ ᯀᯐᯪ ᯎᯐᯎᯐ, ᯑᯪ ᯎᯉᯬ᯲ᯑᯖᯪ᯲ ᯔ ᯖᯪᯖᯪ ᯉᯪ ᯀᯒᯪ ᯀᯘ ᯔᯒᯬ᯲ᯑᯔᯬ᯲ᯇᯄ᯦᯲ ᯉᯘᯪᯑ.
Dung jumpang titi ni ari i, ro 'be ma nasida tu porholangan, mordompak ma nasida dibahen si Siak Bagi. Ia dung pungu nasida disi, mangkuling ma ibana, didok ma hatana songon on, "Alia do upangku lehononmuna, ia sae hupahata porbadaanmuna on?" ninna. ᯑᯮᯰ ᯐᯮᯔ᯲ᯇᯰ ᯖᯪᯖᯪ ᯉᯪ ᯀᯒᯪ ᯤ, ᯒᯬ ᯅᯩ ᯔ ᯉᯘᯪᯑ ᯖᯮ ᯇᯒᯬ᯲ᯂᯬᯞᯝᯉ᯲, ᯔᯒᯬ᯲ᯑᯔᯬ᯲ᯇᯄ᯦᯲ ᯔ ᯉᯘᯪᯑ ᯑᯪᯅᯂᯉᯩ᯲ ᯘᯪ ᯘᯪᯀᯄ᯦᯲ ᯅᯎᯪ. ᯤᯀ ᯑᯮᯰ ᯇᯮᯝᯮ ᯉᯘᯪᯑ ᯑᯪᯘᯪ, ᯔᯰᯄ᯦ᯮᯞᯪᯰ ᯔ ᯤᯅᯉ, ᯑᯪᯑᯄ᯦ᯬ᯲ ᯔ ᯂᯖ ᯉ ᯘᯬᯝᯉᯬ᯲ ᯀᯉᯬ᯲, "ᯀᯞᯪᯀ ᯑᯬ ᯥᯇᯰᯄ᯦ᯮ ᯞᯩᯂᯬᯉᯉᯬ᯲ᯔᯮᯉ, ᯤᯀ ᯘᯀᯩ ᯂᯮᯇᯂᯖ ᯇᯒᯬ᯲ᯅᯑᯀᯉ᯲ᯔᯮᯉ ᯀᯉᯬ᯲?" ᯉᯉᯪ᯲ᯉ
Dung i didok angka suhut porgora i ma, "Unang so tingkos do uhummu, ture timbanganmu, sitotari na rundut, siangkat na polin, sipijor na ganggang, ba lehonon do .godang upam: ogung, mas, ringgit dohot angka na asing."
ᯑᯮᯰ ᯤ ᯑᯪᯑᯄ᯦ᯬ᯲ ᯀᯰᯄ᯦ ᯘᯮᯂᯖᯮ᯲ ᯇᯒᯬ᯲ᯎᯬᯒ ᯤ ᯔ," ᯥᯉᯰ ᯘᯬ ᯖᯪᯰᯄ᯦ᯘᯬ᯲ ᯑᯬ ᯥᯂᯔᯮ᯲ᯔᯮ, ᯖᯮᯒᯩ ᯖᯔᯪ᯲ᯅᯝᯉ᯲ᯔᯮ, ᯘᯪᯖᯬᯖᯒᯪ ᯉ ᯒᯉᯮ᯲ᯑᯖᯮ᯲, ᯘᯪᯀᯰᯄ᯦ᯖ᯲ ᯉ ᯇᯬᯞᯉᯪ᯲, ᯘᯪᯇᯪᯐᯒᯬ᯲ ᯉ ᯎᯰᯎᯰ, ᯅ ᯞᯩᯂᯬᯉᯉᯬ᯲ ᯑᯬ. ᯎᯬᯑᯰ ᯥᯇᯔ᯲: ᯀᯬᯎᯮᯰ, ᯔᯘ᯲, ᯒᯪᯰᯎᯖᯪ᯲ ᯑᯬᯂᯖᯬ᯲ ᯀᯰᯄ᯦ ᯉ ᯀᯘᯪᯰ."
"Molo songon i, nunga na uli", ninna Si Aji Gajagaja, "on ma uhumhu: Unang be sai gulut hamu morgora, boti ma bahen hamu . taringot tu Si boru Jongjong Anian Si Boru Tibal Tudosan Hau Jadijadian na Soada Mortudosan.
"ᯔᯬᯞᯬ ᯘᯬᯝᯉᯬ᯲ ᯤ, ᯉᯮᯝ ᯉ ᯥᯞᯪ", ᯉᯉᯪ᯲ᯉ ᯘᯪ ᯀᯐᯪ ᯎᯐᯎᯐ, "ᯀᯉᯬ᯲ ᯔ ᯥᯂᯔᯮ᯲ᯂᯮ: ᯥᯉᯰ ᯅᯩ ᯘᯤ ᯎᯮᯞᯖᯮ᯲ ᯂᯔᯮ ᯔᯒᯬ᯲ᯎᯬᯒ, ᯅᯬᯖᯪ ᯔ ᯅᯂᯉᯩ᯲ ᯂᯔᯮ. ᯖᯒᯪᯝᯖᯬ᯲ ᯖᯮ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲ ᯂᯥ ᯐᯑᯪᯐᯑᯪᯀᯉ᯲ ᯉ ᯘᯬᯀᯑ ᯔᯒᯬ᯲ᯖᯮᯑᯬᯘᯉ᯲.
Sijalo upa ompu ma bahen hamu Pambarbar na Sumurung, panggana na lumobi, ai ibana do toho mambarbar dohot manggana Si Boru Jongjong Anian.
ᯘᯪᯐᯞᯬ ᯥᯇ ᯀᯔᯬ᯲ᯇᯮ ᯔ ᯅᯂᯉᯩ᯲ ᯂᯔᯮ ᯇᯔ᯲ᯅᯒ᯲ᯅᯒ᯲ ᯉ ᯘᯮᯔᯮᯒᯮᯰ, ᯇᯰᯎᯉ ᯉ ᯞᯮᯔᯬᯅᯪ, ᯀᯤ ᯤᯅᯉ ᯑᯬ ᯖᯬᯂᯬ ᯔᯔ᯲ᯅᯒ᯲ᯅᯒ᯲ ᯑᯬᯂᯖᯬ᯲ ᯔᯰᯎᯉ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲.
Sijalo upa tulang ma bahen hamu Portigatiga Torus, ai toho do dibahen ibana ulosna dohot nasa paheanna.
ᯘᯪᯐᯞᯬ ᯥᯇ ᯖᯮᯞᯰ ᯔ ᯅᯂᯉᯩ᯲ ᯂᯔᯮ ᯇᯒᯬ᯲ᯖᯪᯎᯖᯪᯎ ᯖᯬᯒᯘᯮ᯲, ᯀᯤ ᯖᯬᯂᯬ ᯑᯬ ᯑᯪᯅᯂᯉᯩ᯲ ᯤᯅᯉ ᯥᯞᯘᯬ᯲ ᯉ ᯑᯬᯂᯖᯬ᯲ ᯉᯘ ᯇᯂᯩᯀᯉ᯲ᯉ.
Dung i ianggo ama pangintubu, i ma Datu na Sumurung, portaoar na lumobi, portaoar pangabang-abang, portaoar pangubung-ubung, siubung hosa mate, siparata naung busuk, ai toho do taoarna mambahen, asa mangolu Si Boru Jongjong Anian hau jadijadian, jolma na so hatudosan" , ninna. .
ᯑᯮᯰ ᯤ ᯤᯀᯰᯎᯬ ᯀᯔ ᯇᯝᯉᯪ᯲ᯖᯮᯅᯮ, ᯤ ᯔ ᯑᯖᯮ ᯉ ᯘᯮᯔᯮᯒᯮᯰ, ᯇᯒᯬ᯲ᯖᯀᯬᯀᯒ᯲ ᯉ ᯞᯮᯔᯬᯅᯪ, ᯇᯒᯬ᯲ᯖᯀᯬᯀᯒ᯲ ᯇᯝᯅᯰᯀᯅᯰ, ᯇᯒᯬ᯲ᯖᯀᯬᯀᯒ᯲ ᯇᯝᯮᯅᯮᯰᯥᯅᯮᯰ, ᯘᯪᯥᯅᯮᯰ ᯂᯬᯘ ᯔᯖᯩ, ᯘᯪᯇᯒᯖ ᯉᯀᯮᯰ ᯅᯮᯘᯄ᯦ᯮ᯲, ᯀᯤ ᯖᯬᯂᯬ ᯑᯬ ᯖᯀᯬᯀᯒ᯲ᯉ ᯔᯔ᯲ᯅᯂᯉᯩ᯲, ᯀᯘ ᯔᯝᯬᯞᯮ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯂᯥ ᯐᯑᯪᯐᯑᯪᯀᯉ᯲, ᯐᯞᯬ᯲ᯔ ᯉ ᯘᯬ ᯂᯖᯮᯑᯬᯘᯉ᯲", ᯉᯉᯪ᯲ᯉ.
Dung songon i timbanganna, uhum na ginoarna, dibege sude halak na di pordompahan i, luhut ma angka raja manohoi dohot mangondolhon uhum i, gabe i ma sautna, sae sihataon i, denggan be ma nasida muse masiebatebatan, masipiring-piringan morningot portuturannasida i.
ᯑᯮᯰ ᯘᯬᯝᯉᯬ᯲ ᯤ ᯖᯔᯪ᯲ᯅᯝᯉ᯲ᯉ, ᯥᯂᯔᯮ᯲ ᯉ ᯎᯪᯉᯬᯀᯒ᯲ᯉ, ᯑᯪᯅᯩᯎᯩ ᯘᯮᯑᯩ ᯂᯞᯄ᯦᯲ ᯉ ᯑᯪ ᯇᯒᯬ᯲ᯑᯔᯬ᯲ᯇᯂᯉ᯲ ᯤ, ᯞᯮᯂᯖᯮ᯲ ᯔ ᯀᯰᯄ᯦ ᯒᯐ ᯔᯉᯬᯂᯬᯤ ᯑᯬᯂᯖᯬ᯲ ᯔᯝᯉᯬ᯲ᯑᯞᯬ᯲ᯂᯉᯬ᯲ ᯥᯂᯔᯮ᯲ ᯤ, ᯎᯅᯩ ᯤ ᯔ ᯘᯀᯖᯮ᯲ᯉ, ᯘᯀᯩ ᯘᯪᯂᯖᯀᯉᯬ᯲ ᯤ, ᯑᯰᯩᯎᯉ᯲ ᯅᯩ ᯔ ᯉᯘᯪᯑ ᯔᯮᯘᯩ ᯔᯘᯪᯀᯩᯅᯖ᯲ᯀᯩᯅᯖᯉ᯲, ᯔᯘᯪᯇᯪᯒᯪᯰᯇᯪᯒᯪᯝᯉ᯲ ᯔᯒᯬ᯲ᯉᯪᯝᯖᯬ᯲ ᯇᯒᯬ᯲ᯖᯮᯖᯮᯒᯉ᯲ᯉᯘᯪᯑ ᯤ.
Si Aji Gajagaja pe, diboan ibana ma sude upa morhata, naung pinadanhon ni angka suhut i tu ibana.
ᯘᯪ ᯀᯐᯪ ᯎᯐᯎᯐ ᯇᯩ, ᯑᯪᯅᯬᯀᯉ᯲ ᯤᯅᯉ ᯔ ᯘᯮᯑᯩ ᯥᯇ ᯔᯒᯬ᯲ᯂᯖ, ᯉᯀᯮᯰ ᯇᯪᯉᯑᯉ᯲ᯂᯉᯬ᯲ ᯉᯪ ᯀᯰᯄ᯦ ᯘᯮᯂᯖᯮ᯲ ᯤ ᯖᯮ ᯤᯅᯉ.
Dung ma inon, hu ma di bulanna, gok ma di taonna, dung gabe gabean Si Boru Jongjong Anian Si Boru Tibal Tudosan, hape matua so olo tubu na di hiringan manuk, matua so olo topak na di dalom laut; ia dagingna nunga mansai morniang mangae.
ᯑᯮᯰ ᯔ ᯤᯉᯉᯬ᯲, ᯂᯮ ᯔ ᯑᯪ ᯅᯮᯞᯉ᯲ᯉ, ᯎᯄ᯦ᯬ᯲ ᯔ ᯑᯪ ᯖᯀᯉᯬ᯲ᯉ, ᯑᯮᯰ ᯎᯅᯩᯎᯅᯩᯀᯉ᯲ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪ ᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲, ᯂᯇᯩ ᯔᯖᯮᯀ ᯘᯬ ᯀᯬᯞᯬ ᯖᯮᯅᯮ ᯉ ᯑᯪ ᯂᯪᯒᯪᯝᯉ᯲ ᯔᯉᯄ᯦ᯮ᯲, ᯔᯖᯮᯀ ᯘᯬ ᯀᯬᯞᯬ ᯖᯬᯇᯄ᯦᯲ ᯉ ᯑᯪ ᯑᯞᯔᯬ᯲ ᯞᯀᯖᯮ᯲; ᯤᯀ ᯑᯎᯪᯰᯉ ᯉᯮᯝ ᯔᯉ᯲ᯘᯤ ᯔᯒᯬ᯲ᯉᯪᯀᯰ ᯔᯝᯀᯩ.
Dung i didok Guru Satia Bulan ma mandok jolmana i, "Aha do pangidoanmu, sinta-sinta ni roham, ale inang siadopan asa tiur haroan, sorang na di dalom laut?" ninna.
ᯑᯮᯰ ᯤ ᯑᯪᯑᯄ᯦ᯬ᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯔᯉ᯲ᯑᯄ᯦ᯬ᯲ ᯐᯞᯬ᯲ᯔᯉ ᯤ,"ᯀᯂ ᯑᯬ ᯇᯝᯪᯑᯬᯀᯉ᯲ᯔᯮ, ᯘᯉᯪ᯲ᯖᯘᯉᯪ᯲ᯖ ᯉᯪ ᯒᯬᯂᯔ᯲, ᯀᯞᯩ ᯤᯉᯰ ᯘᯪ ᯀᯑᯬᯇᯉ᯲ ᯀᯘ ᯖᯪᯀᯒᯮ᯲ ᯂᯒᯬᯀᯉ᯲, ᯘᯬᯒᯰ ᯉ ᯑᯪ ᯑᯞᯔᯬ᯲ ᯞᯀᯖᯮ?" ᯉᯉᯪ᯲ᯉ.
Dung i didok jolmana i ma mangalusi, "Unang damang pa hutur-hutur bulung ni bulu, parigat-rigat bulung ni goal, parungka rungka hinalungun , pasigatsigat hinadangol, ale amang siadopan", ninna , "atik tung so dapot i ma on jalahanmu."
ᯑᯮᯰ ᯤ ᯑᯪᯑᯄᯱᯬ᯲ ᯐᯞᯬ᯲ᯔᯉ ᯤ ᯔ ᯔᯝᯞᯮᯘᯪ,"ᯥᯉᯰ ᯑᯔᯰ ᯇᯂᯮᯖᯒᯮ᯲ᯂᯮᯖᯒᯮ᯲ ᯅᯮᯞᯮᯰ ᯉᯪ ᯅᯮᯞᯮ, ᯇᯒᯪᯎᯖ᯲ᯒᯪᯎᯖ᯲ᯅᯮᯞᯮᯰ ᯉᯪ ᯎᯬᯀᯞᯬ᯲, ᯇᯒᯮᯰᯄ᯦ᯒᯮᯰᯄ᯦ ᯂᯪᯉᯞᯮᯝᯉᯮ᯲, ᯇᯘᯪᯎᯖ᯲ᯘᯪᯎᯖ᯲ ᯂᯪᯉᯑᯝᯞᯬ᯲, ᯀᯞᯩ ᯀᯔᯰ ᯘᯪᯀᯑᯬᯇᯉ᯲", ᯉᯉᯪ᯲ᯉ, "ᯀᯖᯄ᯦ᯪ᯲ ᯖᯮᯰ ᯘᯬ ᯑᯇᯖᯬ᯲ ᯤ ᯔ ᯀᯉᯬ᯲ ᯐᯞᯂᯉ᯲ᯔᯮ
"Aha huroha, boru ni raja bolon; anggo boi do luluan, mansot tu dia: hujalahi ; mulakna, molo tung so jumpang", ninna Guru Satia Bulan.
"ᯀᯂ ᯂᯮᯒᯬᯂ, ᯅᯬᯒᯮ ᯉᯪ ᯒᯐ ᯅᯬᯞᯉᯬ᯲; ᯀᯰᯎᯬ ᯅᯬᯤ ᯑᯬ ᯞᯮᯞᯮᯀᯉ᯲, ᯔᯉ᯲ᯘᯖᯬ᯲ ᯖᯮ ᯑᯪᯀ: ᯂᯮᯐᯞᯂᯪ; ᯔᯮᯞᯄ᯦᯲ᯉ, ᯔᯬᯞᯬ ᯖᯮᯰ ᯘᯬ ᯐᯔᯮ᯲ᯇᯰ ᯉᯉᯪ᯲ᯉ ᯎᯮᯒᯮ ᯘᯖᯪᯀ ᯅᯮᯞᯉ᯲.
"Ba, molo songon i, ale amang siadopan; lului damang ma ate ate ni ulok dari, ai i do na naeng panganonku, na sininta ni ro hangku" , ninna jolmana i.
"ᯅ, ᯔᯬᯞᯬ ᯘᯬᯝᯉᯬ᯲ ᯤ, ᯀᯞᯩ ᯀᯔᯰ ᯘᯪᯀᯑᯬᯇᯉ᯲; ᯞᯮᯞᯮᯤ ᯑᯔᯰ ᯔ ᯀᯖᯩᯀᯖᯩ ᯉᯪ ᯥᯞᯄ᯦ᯬ᯲ ᯑᯒᯪ, ᯀᯤ ᯤ ᯑᯬ ᯉ ᯉᯀᯰᯩ ᯇᯝᯉᯉᯬ᯲ᯄ᯦ᯮ, ᯉ ᯘᯪᯉᯉᯪ᯲ᯖ ᯉᯪ ᯒᯬᯂᯰᯄ᯦ᯮ", ᯉᯉᯪ᯲ᯉ ᯐᯞᯬ᯲ᯔᯉ ᯤ.
Dung i laho ma Guru Satia Bulan, tu harangan na limuton, tu tombak na ngolngolan, tu pongki na ngirngiran, tu mombang boru, diida ma disi sada ulok dari. Dung i diumpat ma pisona piso horis, disaputi ma dagingna dohot ijuk, dibahen ma dohot taoar, dihatahon ma subutan ni sitampar dasar, disunggul ma ulok i. Dung tarsunggul ulok i, dipargut ma ibana, gabe sangkot ma ngingina di ijuk i. Dung i ditampulhon ibana ma piso horisna i tu ulok i, tipul ma dibahen , gabe dilapa ma i mambuat ate-atena; diboan ma i tu huta, dilehon ma i panganon ni jolmana.
ᯑᯮᯰ ᯤ ᯞᯂᯬ ᯔ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯖᯮ ᯂᯒᯝᯉ᯲ ᯉ ᯞᯪᯔᯮᯖᯉᯬ᯲, ᯖᯮ ᯖᯔᯬ᯲ᯅᯄ᯦᯲ ᯉ ᯝᯞᯬ᯲ᯝᯬᯞᯉ᯲, ᯖᯮ ᯇᯬᯰᯄ᯦ᯪ ᯉ ᯝᯒᯪ᯲ᯝᯪᯒᯉ᯲, ᯖᯮ ᯔᯔᯬ᯲ᯅᯰ ᯅᯬᯒᯮ, ᯑᯪᯤᯑ ᯔ ᯑᯪᯘᯪ ᯘᯑ ᯥᯞᯄ᯦ᯬ᯲ ᯑᯒᯪ. ᯑᯮᯰ ᯤ ᯑᯪᯀᯔᯮ᯲ᯇᯖ᯲ ᯔ ᯇᯪᯘᯬᯉ ᯇᯪᯘᯬ ᯂᯬᯒᯘᯪ᯲, ᯑᯪᯘᯇᯮᯖᯪ ᯔ ᯑᯎᯪᯰᯉ ᯑᯬᯂᯖᯬ᯲ ᯤᯐᯄ᯦ᯮ᯲, ᯑᯪᯅᯂᯉᯩ᯲ ᯔ ᯑᯬᯂᯖᯬ᯲ ᯖᯀᯬᯀᯒ᯲, ᯑᯪᯂᯖᯂᯉᯬ᯲ ᯔ ᯘᯮᯅᯮᯖᯉ᯲ ᯉᯪ ᯘᯪᯖᯔ᯲ᯇᯒ᯲ ᯑᯘᯒ᯲, ᯑᯪᯘᯮᯰᯎᯞᯮ᯲ ᯔ ᯥᯞᯄ᯦ᯬ᯲ ᯤ. ᯑᯮᯰ ᯖᯒ᯲ᯘᯮᯰᯎᯞᯮ᯲ ᯥᯞᯄ᯦ᯬ᯲ ᯤ, ᯑᯪᯇᯒ᯲ᯎᯖᯮ᯲ ᯔ ᯤᯅᯉ, ᯎᯅᯩ ᯘᯰᯄ᯦ᯖᯬ᯲ ᯔ ᯝᯪᯝᯪᯉ ᯑᯪ ᯤᯐᯄ᯦ᯮ᯲ ᯤ. ᯑᯮᯰ ᯤ ᯑᯪᯖᯔ᯲ᯇᯞᯮ᯲ᯂᯉᯬ᯲ ᯤᯅᯉ ᯔ ᯇᯪᯘᯬ ᯂᯬᯒᯘᯪ᯲ᯉ ᯤ ᯖᯮ ᯥᯞᯄ᯦ᯬ᯲ ᯤ, ᯖᯪᯇᯞᯮ᯲ ᯔ ᯑᯪᯅᯂᯉᯩ᯲, ᯎᯅᯩ ᯑᯪᯞᯇ ᯔ ᯤ ᯔᯔ᯲ᯅᯮᯀᯖ᯲ ᯀᯖᯩᯀᯖᯩᯉ; ᯑᯪᯅᯬᯀᯉ᯲ ᯔ ᯤ ᯖᯮ ᯂᯮᯖ, ᯑᯪᯞᯩᯂᯉᯬ᯲ ᯔ ᯤ ᯇᯝᯉᯉᯬ᯲ ᯉᯪ ᯐᯞᯬ᯲ᯔᯉ.
Humipas ma antong dihilala Si Boru Jongjong Anian, dung dipangan ate-ate ni ulok i; alai laos so olo do sorang ianggo na di bortian.
ᯂᯮᯔᯪᯇᯘ᯲ ᯔ ᯀᯉ᯲ᯖᯬᯰ ᯑᯪᯂᯪᯞᯞ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲, ᯑᯮᯰ ᯑᯪᯇᯝᯉ᯲ ᯀᯖᯩᯀᯖᯩ ᯉᯪ ᯥᯞᯄ᯦ᯬ᯲ ᯤ ; ᯀᯞᯤ ᯞᯀᯘᯬ᯲ ᯘᯬ ᯀᯬᯞᯬ ᯑᯬ ᯘᯬᯒᯰ ᯤᯀᯰᯎᯬ ᯉ ᯑᯪ ᯅᯒᯬ᯲ᯖᯪᯀᯉ᯲.
Dung i muse di laonlaon ni ari, morsahit-sahit ma jolmana i, gabe disungkun Guru Satia Bulan ma ibana, "Aha dope dipangido roham
naeng panganonmu, ale boru ni rajanami?" ninna.
ᯑᯮᯰ ᯤ ᯔᯮᯘᯩ ᯑᯪ ᯞᯀᯉᯬ᯲ᯞᯀᯉᯬ᯲ ᯉᯪ ᯀᯒᯪ, ᯔᯒᯬ᯲ᯘᯂᯖᯪ᯲ᯘᯂᯖ᯲ᯪ᯲ ᯔ ᯐᯞᯬ᯲ᯔᯉ ᯤ, ᯎᯅᯩ ᯑᯪᯘᯮᯰᯄ᯦ᯉᯮ᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯤᯅᯉ, "ᯀᯂ ᯑᯬ ᯇᯩ ᯑᯪᯇᯝᯪᯑᯬ ᯒᯬᯂᯔ᯲ ᯉᯀᯰᯩ ᯇᯝᯉᯉᯬ᯲ᯔᯮ, ᯀᯞᯩ ᯅᯬᯒᯮ ᯉᯪ ᯒᯐᯉᯔᯪ?" ᯉᯉᯬ᯲ᯉ.
"Ate-ate ni lali piuan ma nian, aut jumpang, ale anak ni rajanami, ninna jolmana i mangalusi.
"ᯀᯖᯩᯀᯖᯩ ᯉᯪ ᯞᯞᯪ ᯇᯪᯥᯀᯉ᯲ ᯔ ᯉᯪᯀᯉ᯲, ᯀᯀᯖᯮ᯲ ᯐᯔᯮ᯲ᯇᯰ, ᯀᯞᯩ ᯀᯉᯄ᯦᯲ ᯉᯪ ᯒᯐᯉᯔᯪ, ᯉᯉᯪ᯲ᯉ ᯐᯞᯬ᯲ᯔᯉ ᯤ ᯔᯝᯞᯮᯘᯪ.
Dung i laho ma ibana mandiori lali piuan ; dung dapotsa, dibuat ma ateatena i, dilehon panganon ni jolmana i. Humipas ma antong dihilala, adung dipangan ate-ate ni pidong i.
ᯑᯮᯰ ᯤ ᯞᯂᯬ ᯔ ᯤᯅᯉ ᯔᯉ᯲ᯑᯪᯀᯬᯒᯪ ᯞᯞᯪ ᯇᯪᯥᯀᯉ᯲; ᯑᯮᯰ ᯑᯇᯖᯬ᯲ᯘ, ᯑᯪᯅᯮᯀᯖ᯲ ᯔ ᯀᯖᯩᯀᯖᯩᯉ ᯤ, ᯑᯪᯞᯩᯂᯉᯬ᯲ ᯇᯝᯉᯉᯬ᯲ ᯉᯪ ᯐᯞᯬ᯲ᯔᯉ ᯤ. ᯂᯮᯔᯪᯇᯘ᯲ ᯔ ᯀᯉ᯲ᯖᯬᯰ ᯑᯪᯂᯪᯞᯞ, ᯀᯑᯮᯰ ᯑᯪᯇᯝᯉ᯲ ᯀᯖᯩᯀᯖᯩ ᯉᯪ ᯇᯪᯑᯬᯰ ᯤ
Alai muse, mangulahi ma 'sahitna i, gabe disungkun Guru Satia Bulan ma ibana, manang aha dope na naeng panganonna.
ᯀᯞᯤ ᯔᯮᯘᯩ, ᯔᯝᯮᯞᯂᯪ ᯔ ᯘᯂᯖᯪ᯲ᯉ ᯤ, ᯎᯅᯩ ᯑᯪᯘᯮᯰᯄ᯦ᯉᯮ᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯤᯅᯉ, ᯔᯉᯰ ᯀᯂ ᯑᯬ ᯇᯩ ᯉᯉᯀᯰᯩ ᯇᯝᯉᯉᯬ᯲ ᯉ.
Dung i didok jolmana i ma, "Gala-gala sirumondang bulan ma nian, na sataon manggus-anggus, na sataon moltuk-oltuk; dibahen hinadaina, dibahen hinatabona, unang na morihot dila, nunga toguonna" , ninna.
ᯑᯮᯰ ᯤ ᯑᯪᯑᯂᯬ᯲ ᯐᯞᯬ᯲ᯔᯉ ᯤ ᯔ," ᯎᯞᯎᯞ ᯘᯪᯒᯮᯔᯉᯬ᯲ᯑᯰ ᯅᯮᯞᯉ᯲ ᯔ ᯉᯪᯀᯉ᯲, ᯉ ᯘᯖᯀᯉᯬ᯲ ᯔᯰᯎᯘᯮ᯲ᯀᯰᯎᯘᯮ᯲, ᯉ ᯘᯖᯀᯉᯬ᯲ ᯔᯞᯬ᯲ᯖᯄ᯦ᯮ᯲ᯀᯞᯬ᯲ᯖᯄ᯦ᯮ᯲; ᯑᯪᯅᯂᯉᯩ᯲ ᯂᯪᯉᯑᯤᯉ, ᯑᯪᯅᯂᯉᯩ᯲ ᯂᯪᯉᯖᯅᯬᯉ, ᯥᯉᯰ ᯉ ᯔᯬᯒᯪᯂᯖᯬ᯲ ᯑᯪᯞ, ᯉᯮᯝ ᯖᯬᯎᯮᯀᯉᯬ᯲ᯉ", ᯉᯉᯪ᯲ᯉ.
Dung i tangis ma Guru Satia Bulan, laho ma ibana mangalului gala-gala i; ia dung dapotsa, mulak ma ibana mamboan i, laos dilehon ma panganon ni jolmana i. Humipas ma jolo dihilala, dung dipangan gala-gala i; alai muse, mangulahi do burhung, so boi morot.
ᯑᯮᯰ ᯤ ᯖᯝᯘᯪ᯲ ᯔ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯞᯂᯬ ᯔ ᯤᯅᯉ ᯔᯝᯞᯮᯞᯮᯤ ᯎᯞᯎᯞ ᯤ; ᯤᯀ ᯑᯮᯰ ᯑᯇᯖᯬ᯲ᯘ, ᯔᯮᯞᯄ᯦᯲ ᯔ ᯤᯅᯉ ᯔᯔ᯲ᯅᯬᯀᯉ᯲ ᯤ, ᯞᯀᯘᯬ᯲ ᯑᯪᯞᯩᯂᯉᯬ᯲ ᯔ ᯇᯝᯉᯉᯬ᯲ ᯉᯪ ᯐᯞᯬ᯲ᯔᯉ ᯤ. ᯂᯮᯔᯪᯇᯘ᯲ ᯔ ᯐᯬᯞᯬ ᯑᯪᯂᯪᯞᯞ, ᯑᯮᯰ ᯑᯪᯇᯝᯉ᯲ ᯎᯞᯎᯞ ᯤ; ᯀᯞᯤ ᯔᯮᯘᯩ, ᯔᯝᯮᯞᯂᯪ ᯑᯬ ᯅᯒᯮ᯲ᯂᯮᯰ, ᯘᯬ ᯅᯬᯤ ᯔᯬᯒᯖᯬ᯲.
Dung i sai marsak ma Guru Satia Bulan, didok ma muse 'tu na niolina i, "Ba dia do, ale inang? Ua tung tangkas ma paboa, manang na dia na sininta ni roham, tinodo ni simalolongmu, siallangon na naeng panganonmu; anggiat tubu na di bortian, sorang na di dalom laut", ninna.
ᯑᯮᯰ ᯤ ᯘᯤ ᯔᯒ᯲ᯘᯄ᯦᯲ ᯔ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯑᯪᯑᯄ᯦ᯬ᯲ ᯔ ᯔᯮᯘᯩ ᯖᯮ ᯉ ᯉᯪᯀᯬᯞᯪᯉ ᯤ, "ᯅᯑᯪᯀ ᯑᯬ, ᯀᯞᯩ ᯤᯉᯰ ᯥᯀ ᯖᯮᯰ ᯖᯰᯄ᯦ᯘ᯲ ᯔ ᯇᯅᯬᯀ, ᯔᯉᯰ ᯉ ᯑᯪᯀ ᯉ ᯘᯪᯉᯉᯪ᯲ᯖ ᯉᯪ ᯒᯬᯂᯔ᯲, ᯖᯪᯉᯬᯑᯬ ᯉᯪ ᯘᯪᯔᯞᯬᯞᯬᯰᯔᯮ, ᯘᯪᯀᯞ᯲ᯞᯝᯉᯬ᯲ ᯉ ᯉᯀᯰᯩ ᯇᯝᯉᯉᯬ᯲ᯔᯮ; ᯀᯰᯎᯪᯀᯖ᯲ ᯖᯮᯅᯮ ᯉ ᯑᯪ ᯅᯒᯬ᯲ᯖᯪᯀᯉ᯲, ᯘᯬᯒᯰ ᯉ ᯑᯪ ᯑᯞᯔᯬ᯲ ᯞᯀᯖᯮ᯲", ᯉᯉᯪ᯲ᯉ.
Alai ro ma alus ni jolmana i, "Rohangki nian, ale amang! Tung na so sorang dope na di bortian, anggo so jolo hupangan dope gaol siaunan dohot pinasa sigara ni api", ninna.
ᯀᯞᯤ ᯒᯬ ᯔ ᯀᯞᯘᯮ᯲ ᯉᯪ ᯐᯞᯬ᯲ᯔᯉ ᯤ, "ᯒᯬᯂᯰᯄ᯦ᯪ ᯉᯪᯀᯉ᯲, ᯀᯞᯩ ᯀᯔᯰ! ᯖᯮᯰ ᯉ ᯘᯬ ᯘᯬᯒᯰ ᯑᯬ ᯇᯩ ᯉ ᯑᯪ ᯅᯒᯬ᯲ᯖᯪᯀᯉ᯲, ᯀᯰᯎᯬ ᯘᯬ ᯐᯬᯞᯬ ᯂᯮᯇᯝᯉ᯲ ᯑᯬ ᯇᯩ ᯎᯀᯞᯬ᯲ ᯘᯪᯀᯥᯉᯉ᯲ ᯑᯬᯂᯖᯬ᯲ ᯇᯪᯉᯘ ᯘᯪᯎᯒ ᯉᯪ ᯀᯇᯪ", ᯉᯉᯪ᯲ᯉ.
Dung i laho ma Guru Satia Bulan mangalap i; diboan ma i laos dilehon panganon ni jolmana i.
ᯑᯮᯰ ᯤ ᯞᯂᯬ ᯔ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔᯝᯞᯇ᯲ ᯤ; ᯑᯪᯅᯬᯀᯉ᯲ ᯔ ᯤ ᯞᯀᯘᯬ᯲ ᯑᯪᯞᯩᯂᯉᯬ᯲ ᯇᯝᯉᯉᯬ᯲ ᯉᯪ ᯐᯞᯬ᯲ᯔᯉ ᯤ.
"Ba, aha dope, ale inang, na naeng panganonmu?" ninna · muse manungkun. '
"ᯅ, ᯀᯂ ᯑᯬᯇᯩ, ᯀᯞᯩ ᯤᯉᯰ, ᯉ ᯉᯀᯰᯩ ᯇᯝᯉᯉᯬ᯲ᯔᯮ? "ᯉᯉᯪ᯲ᯉ· ᯔᯮᯘᯩ ᯔᯉᯮᯰᯄ᯦ᯉᯮ᯲.
"ingkon panganonku dope ihan lumba-lumba, na manggagat di limut, na mandilat-dilat tu batu, na morsisik na saanduri, na mormata na samaung-maung".
"ᯀᯪᯰᯂᯉᯬ᯲ ᯇᯝᯉᯉᯬ᯲ᯄ᯦ᯮ ᯑᯬᯇᯩ ᯤᯂᯉ᯲ ᯞᯔᯮ᯲ᯅᯞᯔᯮ᯲ᯅ, ᯉ ᯔᯰᯎᯎᯖ᯲ ᯑᯪ ᯞᯪᯔᯖᯮ᯲, ᯉ ᯔᯉ᯲ᯑᯪᯞᯖ᯲ᯑᯪᯞᯖ᯲ ᯖᯮ ᯅᯖᯮ, ᯉ ᯔᯒᯬ᯲ᯘᯪᯘᯄ᯦ᯪ᯲ ᯉ ᯘᯀᯉ᯲ᯑᯮᯒᯪ, ᯉ ᯔᯒᯬ᯲ᯔᯖ ᯉ ᯘᯔᯀᯮᯰᯔᯀᯮᯰ"
Dijalahi Guru Satia Bulan ma nang i, alai laos so so rang do na di bortian, laos so topak na di hiringan manuk.
ᯑᯪᯐᯞᯂᯪ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯉᯰ ᯤ, ᯀᯞᯤ ᯞᯀᯘᯬ᯲ ᯘᯬ ᯘᯬᯒᯰ ᯑᯬ ᯉ ᯑᯪ ᯅᯒᯬ᯲ᯖᯪᯀᯉ᯲, ᯞᯀᯘᯬ᯲ ᯘᯬ ᯖᯬᯇᯄ᯦᯲ ᯉ ᯑᯪ ᯂᯪᯒᯪᯝᯉ᯲ ᯔᯉᯄ᯦ᯮ᯲.
Dung i mandel ma Guru Satia Bulan i, didok ma, "Na paloja-lojahon do ho di ahu, ale inang?" ninna.
ᯑᯮᯰ ᯤ ᯔᯉ᯲ᯑᯩᯞᯩ ᯔ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯤ, ᯑᯪᯑᯄ᯦ᯬ᯲ ᯔ," ᯉ ᯇᯞᯬᯐᯞᯬᯐᯂᯉᯬ᯲ ᯑᯬ ᯂᯬ ᯑᯪ ᯀᯂᯮ, ᯀᯞᯩ ᯤᯉᯰ?" ᯉᯉᯪ᯲ᯉ.
"Rohangki nian, ale amang! Alai tung na so sorang dope na di bortian, ianggo so jolo hupangan asu sijurame tunggal, huring boru-boru, baliang na bara", ninna.
"ᯒᯬᯂᯰᯄ᯦ᯪ ᯉᯪᯀᯉ᯲, ᯀᯞᯩ ᯀᯔᯰ! ᯀᯞᯤ ᯖᯮᯰ ᯉ ᯘᯬ ᯘᯬᯒᯰ ᯑᯬᯇᯩ ᯉ ᯑᯪ ᯅᯒᯬ᯲ᯖᯪᯀᯉ᯲, ᯤᯀᯰᯎᯬ ᯘᯬ ᯐᯬᯞᯬ ᯂᯮᯇᯝᯉ᯲ ᯀᯘᯮ ᯘᯪᯐᯮᯒᯔᯩ ᯖᯮᯰᯎᯞ᯲, ᯂᯮᯒᯪᯰ ᯅᯬᯒᯮᯅᯬᯒᯮ, ᯅᯞᯪᯀᯰ ᯉ ᯅᯒ", ᯉᯉᯪ᯲ᯉ.
"Ba, tung tutu ma sorang na di bortian, na di dalom laut, ia dung hubuat i, ale boru ni rajanami?" ninna Guru Satia Bulan tu jolmana i.
"ᯅ, ᯖᯮᯰ ᯖᯮᯖᯮ ᯔ ᯘᯬᯒᯰ ᯉ ᯑᯪ ᯅᯒᯬ᯲ᯖᯪᯀᯉ᯲, ᯉ ᯑᯪ ᯑᯞᯔᯬ᯲ ᯞᯀᯖᯮ᯲, ᯤᯀ ᯑᯮᯰ ᯂᯮᯅᯮᯀᯖ᯲ ᯤ, ᯀᯞᯩ ᯅᯬᯒᯮ ᯉᯪ ᯒᯐᯉᯔᯪ?" ᯉᯉᯪ᯲ᯉ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯖᯮ ᯐᯞᯬ᯲ᯔᯉ ᯤ.
"Ianggo ninna rohangku nian, ale anak ni rajanami", ninna jolmana i mangalusi.
"ᯤᯀᯰᯎᯬ ᯉᯉᯪ᯲ᯉ ᯒᯬᯂᯰᯄ᯦ᯮ ᯉᯪᯀᯉ᯲, ᯀᯞᯩ ᯀᯉᯄ᯦᯲ ᯉᯪ ᯒᯐᯉᯔᯪ", ᯉᯉᯪ᯲ᯉ ᯐᯞᯬ᯲ᯔᯉ ᯤ ᯔᯝᯞᯮᯘᯪ.
Ia dung dilehon i panganonna, hape laos so tiur do haroan, laos so adong ummaha sahitna, rap tangis ma nasida na dua.
ᯤᯀ ᯑᯮᯰ ᯑᯪᯞᯩᯂᯉᯬ᯲ ᯤ ᯇᯝᯉᯉᯬ᯲ᯉ, ᯂᯇᯩ ᯞᯀᯘᯬ᯲ ᯘᯬ ᯖᯪᯀᯒᯮ᯲ ᯑᯬ ᯂᯒᯬᯀᯉ᯲, ᯞᯀᯘᯬ᯲ ᯘᯬ ᯀᯑᯬᯰ ᯀᯔᯮ᯲ᯔᯂ ᯘᯂᯖᯪ᯲ᯉ ,ᯒᯇ᯲ ᯖᯝᯘᯪ᯲ ᯔ ᯉᯘᯪᯑ ᯉᯑᯮᯀ.
Dung i didok Guru Satia Bulan ma muse tu jolmana i, "Hahuaon, ale inang!. Haru paboa ma na naeng panganonmu ; ianggo halojaon niba i, ba tinaon.
ᯑᯮᯰ ᯤ ᯑᯪᯑᯄ᯦ᯬ᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯔᯮᯘᯩ ᯖᯮ ᯐᯞᯬ᯲ᯔᯉ ᯤ, "ᯂᯂᯮᯀᯀᯉᯬ᯲, ᯀᯞᯩ ᯤᯉᯰ! .ᯂᯒᯮ ᯇᯅᯬᯀ ᯔ ᯉ ᯉᯀᯰᯩ ᯇᯝᯉᯉᯬ᯲ᯔᯮ; ᯤᯀᯰᯎᯬ ᯂᯞᯬᯐᯀᯉᯬ᯲ᯉᯪᯅ ᯤ, ᯅ ᯖᯪᯉᯀᯉᯬ᯲
Andalu panduda, anduri pamiari; indang dapot tarjua pandokkon ni soro ni ari; nasa na boi jalahanki, tung ingkon do hujalahi. Unang ma songon na maila rupa dainang, matangga bohi, paboahon na di rohami" , ninna.
ᯀᯉ᯲ᯑᯞᯮ ᯇᯉ᯲ᯑᯮᯑ, ᯀᯉ᯲ᯑᯮᯒᯪ ᯇᯔᯪᯀᯒᯪ; ᯀᯉᯪ᯲ᯑᯰ ᯑᯇᯖᯬ᯲ ᯖᯒ᯲ᯐᯮᯀ ᯇᯉ᯲ᯑᯄ᯦ᯬ᯲ᯄ᯦ᯉᯬ᯲ ᯉᯪ ᯘᯬᯒᯬ ᯉᯪ ᯀᯒᯪ; ᯉᯘ ᯉ ᯅᯬᯤ ᯐᯞᯂᯉ᯲ᯄ᯦ᯪ, ᯖᯮᯰ ᯀᯪᯰᯄ᯦ᯉᯬ᯲ ᯑᯬ ᯂᯮᯐᯞᯂᯪ. ᯥᯉᯰ ᯔ ᯘᯬᯝᯉᯬ᯲ ᯉ ᯔᯤᯞ ᯒᯮᯇ ᯑᯤᯉᯰ, ᯔᯖᯰᯎ ᯅᯬᯂᯪ, ᯇᯅᯬᯀᯂᯉᯬ᯲ ᯉ ᯑᯪ ᯒᯬᯂᯔᯪ", ᯉᯉᯪ᯲ᯉ
Dung i ninna Si Boru Jongjong Anian ma mangalusi, "Sorang ma na di hiringan manuk, ale amang ; humiap ma langgunggung, masitungkol sopona ma halak, ia dung dibuat ho sada nari panganonku, i ma: manuk mira sialtong, iboto ni manuk boru-boru, na morsiajar mortatahuak di bulan sipahatolu.
ᯑᯮᯰ ᯤ ᯉᯉᯪ᯲ᯉ ᯘᯪᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯔ ᯔᯝᯞᯮᯘᯪ, "ᯘᯬᯒᯰ ᯔ ᯉ ᯑᯪ ᯂᯪᯒᯪᯝᯉ᯲ ᯔᯉᯄ᯦ᯮ᯲, ᯀᯞᯩ ᯀᯔᯰ; ᯂᯮᯔᯪᯀᯇ᯲ ᯔ ᯞᯰᯎᯮᯰᯎᯮᯰ, ᯔᯘᯪᯖᯮᯰᯄ᯦ᯞᯬ᯲ ᯘᯬᯇᯬᯉ ᯔ ᯂᯞᯄ᯦᯲, ᯤᯀ ᯑᯮᯰ ᯑᯪᯅᯮᯀᯖ᯲ ᯂᯬ ᯘᯑᯉᯒᯪ ᯇᯝᯉᯉᯬ᯲ᯄ᯦ᯮ, ᯤ ᯔ: ᯔᯉᯄ᯦ᯮ᯲ ᯔᯪᯒ ᯘᯪᯀᯞ᯲ᯖᯬᯰ, ᯤᯅᯬᯖᯬ ᯉᯪ ᯔᯉᯄ᯦ᯮ᯲ ᯅᯬᯒᯮᯅᯬᯒᯮ, ᯉ ᯔᯒᯬ᯲ᯘᯪᯀᯐᯒ᯲ ᯔᯒᯬ᯲ᯖᯖᯂᯮᯀᯄ᯦᯲ ᯑᯪ ᯅᯮᯞᯉ᯲ ᯘᯪᯇᯂ ᯖᯬᯞᯮ.
Binsar siulubalang ari, dipangulahon i, poltak sirumondang bulan, dipambauhon i", ninna.
ᯅᯉᯪ᯲ᯘᯒ᯲ ᯘᯪᯥᯞᯮᯅᯞᯰ ᯀᯒᯪ, ᯑᯪᯇᯝᯮᯞᯂᯉᯬ᯲ ᯤ, ᯇᯞᯬ᯲ᯖᯄ᯦᯲ ᯘᯪᯒᯮᯔᯉᯬ᯲ᯑᯰ ᯅᯮᯞᯉ᯲, ᯑᯪ ᯇᯔ᯲ᯅᯥᯂᯉᯬ᯲ ᯤ", ᯉᯉᯪ᯲ᯉ.
Dung i dibuat Guru Satia Bulan ma i, laos dilehon panganon ni jolmana i.
ᯑᯮᯰ ᯤ ᯑᯪᯅᯮᯀᯖ᯲ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯤ, ᯞᯀᯘᯬ᯲ ᯑᯪᯞᯩᯂᯉᯬ᯲ ᯇᯝᯉᯉᯬ᯲ ᯉᯪ ᯐᯞᯬ᯲ᯔᯉ ᯤ.
Ia dung dibuat i, humuntal ma langgunggung, mangkuling ma ronggur, ro ma udan so hasaongan dohot alogo na so hapudian.
ᯤᯀ ᯑᯮᯰ ᯑᯪᯅᯮᯀᯖ᯲ ᯤ, ᯂᯮᯔᯉᯮ᯲ᯖᯞ᯲ ᯔ ᯞᯰᯎᯮᯰᯎᯮᯰ, ᯔᯰᯄ᯦ᯮᯞᯪᯰ ᯔ ᯒᯬᯰᯎᯒᯮ᯲, ᯒᯬᯔ ᯥᯑᯉ᯲ ᯘᯬᯂᯘᯀᯬᯝᯉ᯲ ᯑᯬᯂᯖᯬ᯲ ᯀᯞᯬᯎᯬ ᯉ ᯘᯬᯂᯇᯮᯑᯪᯀᯉ᯲.
Sorang ma tutu na di bortian, topak ma na di dalom laut, na di hiringan manuk ni Si Boru Jongjong Anian ; diida antong, morporhas do, ai dua sahali tubu, sada baoa, sada boruboru.
ᯘᯬᯒᯰ ᯔ ᯖᯮᯖᯮ ᯉ ᯑᯪ ᯅᯒᯬ᯲ᯖᯪᯀᯉ᯲, ᯖᯬᯇᯄ᯦᯲ ᯔ ᯉ ᯑᯪ ᯑᯞᯔᯬ᯲ ᯞᯀᯖᯮ᯲, ᯉ ᯑᯪ ᯂᯪᯒᯪᯝᯉ᯲ ᯔᯉᯄ᯦ᯮ᯲ ᯉᯪ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲; ᯑᯪ ᯤᯑ ᯀᯉ᯲ᯖᯬᯰ, ᯔᯒᯬ᯲ᯇᯒᯬ᯲ᯂᯘ᯲ ᯑᯬ, ᯀᯤ ᯑᯮᯀ ᯘᯂᯞᯪ ᯖᯮᯅᯮ, ᯘᯑ ᯅᯀᯬᯀ, ᯘᯑ ᯅᯬᯒᯮᯅᯬᯒᯮ.
Bulung ni gaol pinariga-riga,
Andorang so tubu, naeng na hurang gira,
Hape ia dung tubu, nunga sumolsol bagina.
ᯅᯮᯞᯮᯰ ᯉᯪ ᯎᯀᯞᯬ᯲ ᯇᯪᯉᯒᯪᯎᯒᯪᯎ,
ᯀᯉ᯲ᯑᯬᯒᯰ ᯘᯬ ᯖᯮᯅᯮ, ᯉᯀᯰᯩ ᯉ ᯂᯮᯒᯰ ᯎᯪᯒ,
ᯂᯇᯩ ᯤᯀ ᯑᯮᯰ ᯖᯮᯅᯮ, ᯉᯮᯝ ᯘᯮᯔᯞᯬ᯲ᯘᯞᯬ᯲ ᯅᯎᯪᯉ.
Ai tubu poso-poso i rap dohot ibotona, masijoloanan do nasida, masijanggingan dohot pusokna.
ᯀᯤ ᯖᯮᯅᯮ ᯇᯬᯘᯬᯇᯬᯘᯬ ᯤ ᯒᯇ᯲ ᯑᯬᯂᯖᯬ᯲ ᯤᯅᯬᯖᯬᯉ, ᯔᯘᯪᯐᯬᯞᯬᯀᯉᯉ᯲ ᯑᯬ ᯉᯘᯪᯑ, ᯔᯘᯪᯐᯰᯎᯪᯝᯉ᯲ ᯑᯬᯂᯖᯬ᯲ ᯇᯮᯘᯄ᯦ᯬ᯲ᯉ.
Ia dung ma i, ditaha ma saganon, soban bulu soban hau, tole ma nasida mangkaroan. Saborngin dope dung tubu, nunga siup siupon, ai hatop do morbolon songon gundur, morgumbang songon. basoli, tole padua bornginhon, nunga hundul-hundul, sabulan dung topak, nunga mordalan-dalan, indang diboto na morsubang, masigogoitan do nasida na dua.
ᯤᯀ ᯑᯮᯰ ᯔ ᯤ, ᯑᯪᯖᯂ ᯔ ᯘᯎᯉᯉᯬ᯲, ᯘᯬᯅᯉ᯲ ᯅᯮᯞᯮ ᯘᯬᯅᯉ᯲ ᯂᯥ, ᯖᯬᯞᯩ ᯔ ᯉᯘᯪᯑ ᯔᯰᯄ᯦ᯒᯬᯀᯉ᯲. ᯘᯅᯒᯬ᯲ᯝᯉᯪ᯲ ᯑᯬᯇᯩ ᯑᯮᯰ ᯖᯮᯅᯮ, ᯉᯮᯝ ᯘᯪᯀᯇᯮ᯲ᯘᯪᯥᯇᯉᯬ᯲, ᯀᯤ ᯂᯖᯇᯬ᯲ ᯑᯬ ᯔᯒᯬ᯲ᯅᯬᯞᯉᯬ᯲ ᯘᯬᯝᯉᯬ᯲ ᯎᯉᯮ᯲ᯑᯒᯮ᯲, ᯔᯒᯬ᯲ᯎᯔᯮ᯲ᯅᯰ ᯘᯬᯝᯉᯬ᯲ . ᯅᯘᯬᯞᯪ, ᯖᯬᯞᯩ ᯇᯑᯮᯀ ᯅᯒᯬ᯲ᯝᯉᯪ᯲ᯂᯉᯬ᯲, ᯉᯮᯝ ᯂᯉᯮ᯲ᯑᯞᯮ᯲ᯂᯉᯮ᯲ᯑᯞᯮ᯲, ᯘᯅᯮᯞᯉ᯲ ᯑᯮᯰ ᯖᯬᯇᯄ᯦᯲, ᯉᯮᯝ ᯔᯒᯬ᯲ᯑᯞᯉ᯲ᯑᯞᯉ᯲, ᯀᯉᯪ᯲ᯑᯰ ᯑᯪᯅᯬᯖᯬ ᯉ ᯔᯒᯬ᯲ᯘᯮᯅᯰ, ᯔᯘᯪᯎᯬᯎᯬᯤᯖᯉ᯲ ᯑᯬ ᯉᯘᯪᯑ ᯉᯑᯮᯀ
Dung diida natorasna i songon inon pangalahonasida digalmit ma hurumna, digotil lambiakna, angkadekdek ma iluna, binahen ni arsak ni rohana; didok ma tutu angka anakkonna i, "Tongka do masigogoitan na moriboto" , ninna.
ᯑᯮᯰ ᯑᯪᯤᯑ ᯉᯖᯬᯒᯘ᯲ᯉ ᯤ ᯘᯬᯝᯉᯬ᯲ ᯤᯉᯉᯬ᯲ ᯇᯝᯞᯂᯬ ᯉᯘᯪᯑ ᯑᯪᯎᯞ᯲ᯔᯖᯪ᯲ ᯔ ᯂᯮᯒᯔᯮ᯲ᯉ, ᯑᯪᯎᯬᯖᯞᯪ᯲ ᯞᯔ᯲ᯅᯪᯀᯄ᯦᯲ᯉ, ᯀᯰᯄ᯦ ᯑᯄᯩ᯦᯲ᯑᯩᯄᯩ᯦᯲ ᯔ ᯤᯞᯮᯉ, ᯅᯪᯉᯂᯉᯩ᯲ ᯉᯪ ᯀᯒ᯲ᯘᯄ᯦᯲ ᯉᯪ ᯒᯬᯂᯉ; ᯑᯪᯑᯄ᯦ᯬ᯲ ᯔ ᯖᯮᯖᯮ ᯀᯰᯄ᯦ ᯀᯉᯄ᯦᯲ᯄ᯦ᯉᯬ᯲ᯉ ᯤ, "ᯖᯬᯰᯄ᯦ ᯑᯬ ᯔᯘᯪᯎᯬᯎᯬᯤᯖᯉ᯲ ᯉ ᯔᯬᯒᯪᯅᯬᯖᯬ", ᯉᯉᯪ᯲ᯉ.
Alai didok nasida be ma mangalusi, "Aha disi, ale inang! Rosu ni rohangku do i di ibotongki!"
ᯀᯞᯤ ᯑᯪᯑᯄ᯦ᯬ᯲ ᯉᯘᯪᯑ ᯅᯩ ᯔ ᯔᯝᯞᯮᯘᯪ, "ᯀᯂ ᯑᯪᯘᯪ, ᯀᯞᯩ ᯤᯉᯰ! ᯒᯬᯘᯮ ᯉᯪ ᯒᯬᯂᯰᯄ᯦ᯮ ᯑᯬ ᯤ ᯑᯪ ᯤᯅᯬᯖᯬᯰᯄ᯦ᯪ!"
Ia dung ma inon , dipungka na tubu i ma goarna : Si Aji Donda Hatahutan , guru na sungkot ro di langit, datu na tondal di tano, porjumbak siupar mangalele ma goar ni baoa i. Si Boru Sopak Panaluan, pordorma na sumurung, donna sihutu ni asu ma goar ni ibotona i.
ᯤᯀ ᯑᯮᯰ ᯔ ᯤᯉᯉᯬ᯲, ᯑᯪᯇᯮᯰᯄ᯦ ᯉ ᯖᯮᯅᯮ ᯤ ᯔ ᯎᯬᯀᯒ᯲ᯉ: ᯘᯪ ᯀᯐᯪ ᯑᯉᯬ᯲ᯑ ᯂᯖᯂᯮᯖᯉ᯲, ᯎᯮᯒᯮ ᯉ ᯘᯮᯰᯄ᯦ᯖᯬ᯲ ᯒᯬ ᯑᯪ ᯞᯝᯖᯪ᯲, ᯑᯖᯮ ᯉ ᯖᯉᯬ᯲ᯑᯞ᯲ ᯑᯪ ᯖᯉᯬ, ᯇᯒᯬ᯲ᯐᯔᯮ᯲ᯅᯄ᯦᯲ ᯘᯪᯥᯇᯒ᯲ ᯔᯝᯞᯩᯞᯩ ᯔ ᯎᯬᯀᯒ᯲ ᯉᯪ ᯅᯀᯬᯀ ᯤ. ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲, ᯇᯒᯬ᯲ᯑᯒᯬ᯲ᯔ ᯉ ᯘᯮᯔᯮᯒᯮᯰ, ᯑᯉᯬ᯲ᯉ ᯘᯪ ᯂᯮᯖᯮ ᯉᯪ ᯀᯘᯮ ᯔ ᯎᯬᯀᯒ᯲ ᯉᯪ ᯤᯅᯬᯖᯬᯉ ᯤ.
Dung godang-godang ansimunnasida, ingkon rap do nasida mangan, na so tupa morsijoloi. Dung i didok Si Boru Jongjong Anian ma tu nasida na dua, "Indang ture i ale , na binahenmu i, ai morsubang' bolon do halak na moriboto" , ninna.
ᯑᯮᯰ ᯎᯬᯑᯰᯎᯬᯑᯰ ᯀᯉ᯲ᯘᯪᯔᯉᯮ᯲ ᯉᯘᯪᯑ, ᯀᯪᯰᯄ᯦ᯉᯬ᯲ ᯒᯇ᯲ ᯑᯬ ᯉᯘᯪᯑ ᯔᯝᯉ᯲, ᯉ ᯘᯬ ᯖᯮᯇ ᯔᯒᯬ᯲ᯘᯪᯐᯬᯞᯬᯤ. ᯑᯮᯰ ᯤ ᯑᯪᯑᯄ᯦ᯬ᯲ ᯘᯪᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯔ ᯖᯮ ᯉᯘᯪᯑ ᯉᯑᯮᯀ, "ᯀᯉᯪ᯲ᯑᯰ ᯖᯮᯒᯩ ᯤ ᯀᯞᯩ, ᯉ ᯅᯪᯉᯂᯉᯩ᯲ᯔᯮ ᯤ, ᯀᯤ ᯔᯒᯬ᯲ᯘᯮᯅᯰ ᯅᯬᯞᯉᯬ᯲ ᯑᯬ ᯂᯞᯄ᯦᯲ ᯉ ᯔᯬᯒᯪᯅᯬᯖᯬ", ᯉᯉᯪ᯲ᯉ.
Alai didok Si Aji Donda Hatahutan ma mangalusi hata ni inana i, "Holong ni rohangku do i da, inang, di ibotongki" , ninna. -
ᯀᯞᯤ ᯑᯪᯑᯄ᯦ᯬ᯲ ᯘᯪ ᯀᯐᯪ ᯑᯉᯬ᯲ᯑ ᯂᯖᯂᯮᯖᯉ᯲ ᯔ ᯔᯝᯞᯮᯘᯪ ᯂᯖ ᯉᯪ ᯤᯉᯉ ᯤ, "ᯂᯬᯞᯬᯰ ᯉᯪ ᯒᯬᯂᯰᯄ᯦ᯮ ᯑᯬ ᯤ ᯑ, ᯤᯉᯰ, ᯑᯪ ᯤᯅᯬᯖᯬᯰᯄ᯦ᯪ", ᯉᯉᯪ᯲ᯉ.
Dung i leleng ma muse di porlelengan, lalap ma di porlalapan, dijou Si Boru Jongjong Anian ma muse boruna Si Boru Sopak Panaluan i, didok ma tu si songon na nidokna tu Si Aji Donda Hatahutan . Alai didok ma alusna, "Holong ni rohangku do i, da inang, di ibotongki" .
ᯑᯮᯰ ᯤ ᯞᯩᯞᯰᯩ ᯔ ᯔᯮᯘᯩ ᯑᯪ ᯇᯒᯬ᯲ᯞᯩᯞᯩᯝᯉ᯲, ᯞᯞᯇ᯲ ᯔ ᯑᯪ ᯇᯒᯬ᯲ᯞᯞᯇᯉ᯲, ᯑᯪᯐᯬᯥ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯔ ᯔᯮᯘᯩ ᯅᯬᯒᯮᯉ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲ ᯤ, ᯑᯪᯑᯄ᯦ᯬ᯲ ᯔ ᯖᯮᯘᯪ ᯘᯬᯝᯉᯬ᯲ ᯉ ᯉᯪᯑᯂᯬ᯲ᯉ ᯖᯮ ᯘᯪ ᯀᯐᯪ ᯑᯉᯬ᯲ᯑ ᯂᯖᯂᯮᯖᯉ᯲. ᯀᯞᯤ ᯑᯪᯑᯄ᯦ᯬ᯲ ᯔ ᯀᯞᯘᯮ᯲ᯉ, "ᯂᯬᯞᯬᯰ ᯉᯪ ᯒᯬᯂᯰᯄ᯦ᯮ ᯑᯬ ᯤ, ᯑᯤᯉᯰ, ᯑᯪ ᯤᯅᯬᯖᯬᯰᯄ᯦ᯪ"
Dung songon i, digalmit ma hurumna, ditompuk lambiakna, angkadekdek ma iluna, ditangkupi hambirangna , ai indada maila be diida anakkonna na dua i masigogoitan dohot masisande-sandean.
ᯑᯮᯰ ᯘᯬᯝᯉᯬ᯲ ᯤ, ᯑᯪᯎᯞ᯲ᯔᯖᯪ᯲ ᯔ ᯂᯮᯒᯔᯮ᯲ᯉ, ᯑᯪᯖᯔᯬ᯲ᯇᯄ᯦ᯮ᯲ ᯞᯔ᯲ᯅᯪᯀᯄ᯦᯲ᯉ, ᯀᯰᯄ᯦ ᯑᯄ᯦ᯩ᯦᯲ᯑᯄ᯦ᯩᯰ᯲ ᯔ ᯤᯞᯮᯉ, ᯑᯪᯖᯰᯄ᯦ᯮᯇᯪ ᯂᯔ᯲ᯅᯪᯒᯰᯉ, ᯀᯤ ᯀᯉᯪ᯲ᯑᯑ ᯔᯤᯞ ᯅᯩ ᯑᯪᯤᯑ ᯀᯉᯄ᯦᯲ᯄ᯦ᯉᯬ᯲ᯉ ᯉᯑᯮᯀ ᯤ ᯔᯘᯪᯎᯬᯎᯬᯤᯖᯉ᯲ ᯑᯬᯂᯖᯬ᯲ ᯔᯘᯪᯘᯉ᯲ᯑᯩᯘᯉ᯲ᯑᯩᯀᯉ᯲.
Nang pe sai dipinsang nian nasida, indang be dipaotap mangulahon na so uhum, pasombu hisap ni dagingna. Nang pe torop halak mornida hajahaton ni Si Aji Donda Hatahutan rap dohot ibotona i, indang adong dihailahon, atik pe nian tihas bolon i.
ᯉᯰ ᯇᯩ ᯘᯤ ᯑᯪᯇᯉᯪ᯲ᯘᯰ ᯉᯪᯀᯉ᯲ ᯉᯘᯪᯑ, ᯀᯉᯪ᯲ᯑᯰ ᯅᯩ ᯑᯪᯇᯀᯬᯖᯇ᯲ ᯔᯝᯮᯞᯂᯉᯬ᯲ ᯉ ᯘᯬ ᯥᯂᯔᯮ᯲, ᯇᯘᯔᯬ᯲ᯅᯮ ᯂᯪᯘᯇ᯲ ᯉᯪ ᯑᯎᯪᯰᯉ. ᯉᯰ ᯇᯩ ᯖᯬᯒᯇᯬ᯲ ᯂᯞᯄ᯦᯲ ᯔᯒᯬ᯲ᯉᯪᯑ ᯂᯐᯂᯖᯉᯬ᯲ ᯉᯪ ᯘᯪ ᯀᯐᯪ ᯑᯉᯬ᯲ᯑ ᯂᯖᯂᯮᯖᯉ᯲ ᯒᯇ᯲ ᯑᯬᯂᯖᯬ᯲ ᯤᯅᯬᯖᯬᯉ ᯤ, ᯀᯉᯪ᯲ᯑᯰ ᯀᯑᯬᯰ ᯑᯪᯂᯤᯞᯂᯉᯬ᯲ , ᯀᯖᯄ᯦ᯪ᯲ ᯇᯩ ᯉᯪᯀᯉ᯲ ᯖᯪᯂᯘ᯲ ᯅᯬᯞᯉᯬ᯲ ᯤ.
"inang, soro ni aringki, sambor ni nipingkon, haurahon ni ahu lapung i, di pambahen ni anakkonkon" , ninna Si Boru Jongjong Anian di bagasan rohana.
"ᯤᯉᯰ, ᯘᯬᯒᯬ ᯉᯪ ᯀᯒᯪᯰᯄ᯦ᯪ, ᯘᯔ᯲ᯅᯒᯬ᯲ ᯉᯪ ᯉᯪᯇᯪᯰᯄ᯦ᯉᯬ᯲, ᯂᯥᯒᯂᯉᯬ᯲ ᯉᯪ ᯀᯂᯮ ᯞᯇᯮᯰ ᯤ, ᯑᯪᯇᯔ᯲ᯅᯂᯉᯩ᯲ ᯉᯪ ᯀᯉᯄ᯦᯲ᯄ᯦ᯉᯬ᯲ ᯉᯉᯪ᯲ᯉ ᯘᯪᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯑᯪ ᯅᯎᯘᯉ᯲ ᯒᯬᯂᯉ.
Dung i didok ma mandok anakna i, "Ua laho ma damang, mangguru hadatuon; ai so sinamot soada, so hepeng na hurang. ai sasada ho do anakku, tampuk ni pusu-pusungku, ihot ni ate atengku.
ᯑᯮᯰ ᯤ ᯑᯪᯑᯄ᯦ᯬ᯲ ᯔ ᯔᯉ᯲ᯑᯄ᯦ᯬ᯲ ᯀᯉᯄ᯦᯲ᯉ ᯤ," ᯥᯀ ᯞᯂᯬ ᯔ ᯑᯔᯰ, ᯔᯰᯎᯮᯒᯮ ᯂᯑᯖᯮᯀᯉᯬ᯲; ᯀᯤ ᯘᯬ ᯘᯪᯉᯔᯖᯬ᯲ ᯘᯬᯀᯑ, ᯘᯬ ᯂᯩᯇᯰᯩ ᯉ ᯂᯮᯒᯰ. ᯀᯤ ᯘᯘᯑ ᯂᯬ ᯑᯬ ᯀᯉᯄ᯦᯲ᯄ᯦ᯮ, ᯖᯔ᯲ᯇᯄ᯦ᯮ᯲ ᯉᯪ ᯇᯮᯘᯮᯇᯮᯘᯮᯰᯄ᯦ᯮ, ᯤᯂᯖᯬ᯲ ᯉᯪ ᯀᯖᯩᯀᯖᯰᯩᯄ᯦ᯮ.
Las ari di jolo ruma, sinarat amak tu jolo sopo ; las ari di jolo sopo ; sinarat amak tu jolo ruma ; na laga mangan do datu, na so siar mangula, siuli ulos na so pola mortonun, silehet tali tali, na so pola manuhor, sigongkonon mangan do i, siapoan minum, sisungkunon di ari na uli, di bulan na denggan.
ᯞᯘ᯲ ᯀᯒᯪ ᯑᯪ ᯐᯬᯞᯬ ᯒᯮᯔ, ᯘᯪᯉᯒᯖ᯲ ᯀᯔᯄ᯦᯲ ᯖᯮ ᯐᯬᯞᯬ ᯘᯬᯇᯬ; ᯞᯘ᯲ ᯀᯒᯪ ᯑᯪ ᯐᯬᯞᯬ ᯘᯬᯇᯬ; ᯘᯪᯉᯒᯖ᯲ ᯀᯔᯄ᯦᯲ ᯖᯮ ᯐᯬᯞᯬ ᯒᯮᯔ; ᯉ ᯞᯎ ᯔᯝᯉ᯲ ᯑᯬ ᯑᯖᯮ, ᯉ ᯘᯬ ᯘᯪᯀᯒ᯲ ᯔᯝᯮᯞ, ᯘᯪᯥᯞᯪ ᯥᯞᯘᯬ᯲ ᯉ ᯘᯬ ᯇᯬᯞ ᯔᯒᯬ᯲ᯖᯬᯉᯉᯮ᯲, ᯘᯪ ᯞᯩᯂᯖᯩ᯲ ᯖᯞᯪᯖᯞᯪ, ᯉ ᯘᯬ ᯇᯬᯞ ᯔᯉᯮᯂᯒᯬ᯲, ᯘᯪ ᯎᯬᯰᯄ᯦ᯬᯉᯉᯬ᯲ ᯔᯝᯉ᯲ ᯑᯬ ᯤ, ᯘᯪ ᯀᯇᯬᯀᯉ᯲ ᯔᯪᯉᯔᯮ᯲, ᯘᯪ ᯘᯮᯰᯄ᯦ᯮᯉᯉᯬ᯲ ᯑᯪ ᯀᯒᯪ ᯉ ᯥᯞᯪ, ᯑᯪ ᯅᯮᯞᯉ᯲ ᯉ ᯑᯰᯩᯎᯉ᯲.
Asa guruhon damang ma hadatuon i, asa i hasurunganmu sian donganmu jolma!" ninna.
ᯀᯘ ᯎᯮᯒᯮᯂᯉᯬ᯲ ᯑᯔᯰ ᯔ ᯂᯑᯖᯮᯀᯉᯬ᯲ ᯤ, ᯀᯘ ᯤ ᯂᯘᯮᯒᯮᯝᯉ᯲ᯔᯮ ᯘᯪᯀᯉ᯲ ᯑᯬᯝᯉ᯲ᯔᯮ ᯐᯞᯬ᯲ᯔ! "ᯉᯉᯪ᯲ᯉ.
Alai didok pe songon i, asa humolang do di rohana anakna i sian ibotona Si Boru Sopak Panaluan i, unang sai didatdati nasida hajahatonna i.
ᯀᯞᯤ ᯑᯪᯑᯄ᯦ᯬ᯲ ᯇᯩ ᯘᯬᯝᯉᯬ᯲ ᯤ, ᯀᯘ ᯂᯮᯔᯬᯞᯰ ᯑᯬ ᯑᯪᯒᯬᯂᯉ ᯀᯉᯄ᯦᯲ᯉ ᯤ ᯘᯪᯀᯉ᯲ ᯤᯅᯬᯖᯬᯉ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲ ᯤ, ᯥᯉᯰ ᯘᯤ ᯑᯪᯑᯖ᯲ᯑᯖᯪ ᯉᯘᯪᯑ ᯂᯐᯂᯖᯉᯬ᯲ᯉ ᯤ.
Dung i didok anakna i ma mangalusi, "Denggan ma i, ale inang alai molo borhat ma ahu , jou ma jolo ibotongki asa jolo hupasombu siholhu, ai padua-dua do hami songon pat ni manuk" , ninna .
ᯑᯮᯰᯤ ᯑᯪᯑᯄ᯦ᯬ᯲ ᯀᯉᯄ᯦᯲ᯉ ᯤ ᯔ ᯔᯝᯞᯮᯘᯪ," ᯑᯰᯩᯎᯉ᯲ ᯔ ᯤ, ᯀᯞᯩ ᯤᯉᯰ ᯀᯞᯤ ᯔᯬᯞᯬ ᯅᯒᯬ᯲ᯂᯖ᯲ ᯔ ᯀᯂᯮ, ᯐᯬᯥ ᯔ ᯐᯬᯞᯬ ᯤᯅᯬᯖᯬᯰᯄ᯦ᯪ ᯀᯘ ᯐᯬᯞᯬ ᯂᯮᯇᯘᯔᯬ᯲ᯅᯮ ᯘᯪᯂᯞᯬ᯲ᯂᯮ, ᯀᯤ ᯇᯑᯮᯀᯑᯮᯀ ᯑᯬ ᯂᯔᯪ ᯘᯬᯝᯉᯬ᯲ ᯇᯖ᯲ ᯉᯪ ᯔᯉᯄ᯦ᯮ᯲", ᯉᯉᯪ᯲ᯉ.
"Unang songon i da, amang!" ninna Si Boru Jongjong Anian mangalusi, "ai apala ibotom do i, indada siporgere-gereonmu , tongka songon i."
"ᯥᯉᯰ ᯘᯬᯝᯉᯬ᯲ ᯤ ᯑ, ᯀᯔᯰ! "ᯉᯉᯪ᯲ᯉ ᯘᯪᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯔᯝᯞᯮᯘᯪ," ᯀᯤ ᯀᯇᯞ ᯤᯅᯬᯖᯔᯬ᯲ ᯑᯬ ᯤ, ᯀᯉᯪ᯲ᯑᯑ ᯘᯪᯇᯒᯬ᯲ᯎᯩᯒᯩᯎᯩᯒᯩᯀᯉᯬ᯲ᯔᯮ, ᯖᯬᯰᯄ᯦ ᯘᯬᯝᯉᯬ᯲ ᯤ."
Dung songon i, ro ma antong ibotona Si Boru Sopak Panaluan i, ai rohana pe tong do songon roha ni ibotona. Ia dung sombu roha ni nasida na dua, borhat ma ibana na mangguru hadatuon i, tu habinsaran ni mata ni ari, tu Tuan Sumomba Purba Datu Pohom na Bolon, datu tumonggo aji, ibebere ni Tuan ·di Buhit, na patiop-tiop hurumna, aji na mangusande di hariara sundung di langit, na manggongga bintang sipariama, i ma mula ni desa na ulu; diguruhon ma sian i surat hadatuon.
ᯑᯮᯰ ᯘᯬᯝᯉᯬ᯲ ᯤ, ᯒᯬ ᯔ ᯀᯉ᯲ᯖᯬᯰ ᯤᯅᯬᯖᯬᯉ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲ ᯤ, ᯀᯤ ᯒᯬᯂᯉ ᯇᯩ ᯖᯬᯰ ᯑᯬ ᯘᯬᯝᯉᯬ᯲ ᯒᯬᯂ ᯉᯪ ᯤᯅᯬᯖᯬᯉ. ᯤᯀ ᯑᯮᯰ ᯘᯔᯬ᯲ᯅᯮ ᯒᯬᯂ ᯉᯪ ᯉᯘᯪᯑ ᯉᯑᯮᯀ, ᯅᯒᯬ᯲ᯂᯖ᯲ ᯔ ᯤᯅᯉ ᯉ ᯔᯰᯎᯮᯒᯮ ᯂᯑᯖᯮᯀᯉᯬ᯲ ᯤ, ᯖᯮ ᯂᯅᯉᯪ᯲ᯘᯒᯉ᯲ ᯉᯪ ᯔᯖ ᯉᯪ ᯀᯒᯪ, ᯖᯮ ᯖᯮᯀᯉ᯲ ᯘᯮᯔᯔᯬ᯲ᯅ ᯇᯒᯮ᯲ᯅ ᯑᯖᯮ ᯇᯬᯂᯔᯬ᯲ ᯉ ᯅᯬᯞᯉᯬ᯲, ᯑᯖᯮ ᯖᯮᯔᯬᯰᯎᯬ ᯀᯐᯪ, ᯤᯅᯩᯅᯩᯒᯩ ᯉᯪ ᯖᯮᯀᯉ᯲·ᯑᯪ ᯅᯮᯂᯖᯪ᯲, ᯉ ᯇᯖᯪᯀᯇᯬ᯲ᯖᯪᯀᯇᯬ᯲ ᯂᯮᯒᯔᯮ᯲ᯉ, ᯀᯐᯪ ᯉ ᯔᯝᯮᯘᯉ᯲ᯑᯩ ᯑᯪ ᯂᯒᯪᯀᯒ ᯘᯉᯮ᯲ᯑᯮᯰ ᯑᯪ ᯞᯝᯖᯪ᯲, ᯉ ᯔᯰᯎᯬᯰᯎ ᯅᯉᯪ᯲ᯖᯰ ᯘᯪᯇᯒᯪᯀᯔ, ᯤ ᯔ ᯔᯮᯞ ᯉᯪ ᯑᯩᯘ ᯉ ᯥᯞᯮ; ᯑᯪᯎᯮᯒᯮᯂᯉᯬ᯲ ᯔ ᯘᯪᯀᯉ᯲ ᯤ ᯘᯮᯒᯖ᯲ ᯂᯑᯖᯮᯀᯉᯬ᯲.
Ia dung diguruhon i mulak ma ibana tu huta ni inana , ai indada tartaonsa be siholna di ibotona i, morningot hajahaton naung somal niulahonnasida.
ᯤᯀ ᯑᯮᯰ ᯑᯪᯎᯮᯒᯮᯂᯉᯬ᯲ ᯤ ᯔᯮᯞᯄ᯦᯲ ᯔ ᯤᯅᯉ ᯖᯮ ᯂᯮᯖ ᯉᯪ ᯤᯉᯉ, ᯀᯤ ᯀᯉᯪ᯲ᯑᯑ ᯖᯒ᯲ᯖᯀᯉᯬ᯲ᯘ ᯅᯩ ᯘᯪᯂᯞᯬ᯲ᯉ ᯑᯪ ᯤᯅᯬᯖᯬᯉ ᯤ, ᯔᯒᯬ᯲ᯉᯪᯝᯖᯬ᯲ ᯂᯐᯂᯖᯉᯬ᯲ ᯉᯀᯮᯰ ᯘᯬᯔᯞ᯲ ᯉᯪᯥᯞᯂᯉᯬ᯲ ᯉᯘᯪᯑ.
Ia dung dipamahap rohana, dipasombu lungunna tu ibotona i, borhat ma ibana muse morguru tu hopoltahan ni mata ni bulan,· tu porindahan tuba joling, porlompan tuba hoda, porlage-lagehon ardom, mula ni bulan na 12, ari na 30, panggaroda na 8, lamadu na 6, pormamis na 5.
ᯤᯀ ᯑᯮᯰ ᯑᯪᯇᯔᯂᯇ᯲ ᯒᯬᯂᯉ, ᯑᯪᯇᯘᯔᯬ᯲ᯅᯮ ᯞᯮᯝᯉᯮ᯲ᯉ ᯖᯮ ᯤᯅᯬᯖᯬᯉ ᯤ, ᯅᯒᯬ᯲ᯂᯖ᯲ ᯔ ᯤᯅᯉ ᯔᯮᯘᯩ ᯔᯒᯬ᯲ᯎᯮᯒᯮ ᯖᯮ ᯂᯬᯇᯞᯬ᯲ ᯖᯂᯉ᯲ ᯉᯪ ᯔᯖ ᯉᯪ ᯅᯮᯞᯉ᯲,· ᯖᯮ ᯇᯬᯒᯉᯪ᯲ᯑᯂᯉ᯲ ᯖᯮᯅ ᯐᯬᯞᯪᯰ, ᯇᯒᯬ᯲ᯞᯔᯬ᯲ᯇᯉ᯲ ᯖᯮᯅ ᯂᯬᯑ, ᯇᯒᯬ᯲ᯞᯎᯩᯞᯎᯩᯂᯉᯬ᯲ ᯀᯒ᯲ᯑᯔᯬ᯲, ᯔᯮᯞ ᯉᯪ ᯅᯮᯞᯉ᯲ ᯉ12, ᯀᯒᯪ ᯉ30, ᯇᯰᯎᯒᯬᯑ ᯉ8, ᯞᯔᯑᯮ ᯉ6, ᯇᯒᯬ᯲ᯔᯔᯘᯪ ᯉ5.
Dung diboto i, mulak ma ibana muse pasombu rohana tu ibotona i.
ᯑᯮᯰ ᯑᯪᯅᯬᯖᯬ ᯤ, ᯔᯮᯞᯄ᯦᯲ ᯔ ᯤᯅᯉ ᯔᯮᯘᯩ ᯇᯘᯔᯬ᯲ᯅᯮ ᯒᯬᯂᯉ ᯖᯮ ᯤᯅᯬᯖᯬᯉ ᯤ.
Dung i laho ma ibana muse morguru tu Datu Gumbot na Bolon, na sanjongkal do ginjangna, pitu dopa liliton ia bolonna, na mian di dangsina, na samaung-maung matana, na sahinambor ni na mate ia igungna, na sabolak ni anduri pinggolna; i ma siraja intir-intir, siraja intir-intir di tapongan, na ripe di uli, na so dohot di haorohan, na tindang nasa sanihe, hundul na saramboan, sibondut ranggas na gaung-gaung, na so olo amporotan.
ᯑᯮᯰ ᯤ ᯞᯂᯬ ᯔ ᯤᯅᯉ ᯔᯮᯘᯩ ᯔᯒᯬ᯲ᯎᯮᯒᯮ ᯖᯮ ᯑᯖᯮ ᯎᯔᯮ᯲ᯅᯖᯬ᯲ ᯉ ᯅᯬᯞᯉᯬ᯲, ᯉ ᯘᯉ᯲ᯐᯬᯰᯄ᯦ᯞ᯲ ᯑᯬ ᯎᯉᯪ᯲ᯐᯰᯉ, ᯇᯪᯖᯮ ᯑᯬᯇ ᯞᯪᯞᯪᯖᯉᯬ᯲ ᯤᯀ ᯅᯬᯞᯉᯬ᯲ᯉ, ᯉ ᯔᯪᯀᯉ᯲ ᯑᯪ ᯑᯰᯘᯪᯉ, ᯉ ᯘᯔᯀᯮᯰᯔᯀᯮᯰ ᯔᯖᯉ, ᯉ ᯘᯂᯪᯉᯔ᯲ᯅᯒᯬ᯲ ᯉᯪ ᯉᯔᯖᯩ ᯤᯀ ᯤᯎᯮᯰᯉ, ᯉᯘ ᯅᯬᯞᯄ᯦᯲ ᯉᯪ ᯀᯉ᯲ᯑᯮᯒᯪ ᯇᯪᯰᯎᯞᯬ᯲ᯉ; ᯤ ᯔ ᯘᯪ ᯒᯐ ᯀᯉᯪ᯲ᯖᯒᯬ᯲ᯀᯉᯪ᯲ᯖᯒᯬ᯲, ᯘᯪ ᯒᯐ ᯀᯉᯪ᯲ᯖᯒᯪ᯲ᯀᯉᯪ᯲ᯖᯒᯪ᯲ ᯑᯪ ᯖᯇᯬᯝᯉ᯲, ᯉ ᯒᯪᯇᯩ ᯑᯪ ᯥᯞᯪ, ᯉ ᯘᯬᯑᯬᯂᯖᯬ᯲ ᯑᯪ ᯂᯀᯬᯒᯬᯂᯉ᯲, ᯉ ᯖᯉᯪ᯲ᯑᯰ ᯉᯘ ᯘᯉᯪᯂᯩ, ᯂᯉᯮ᯲ᯑᯞᯮ᯲ ᯉᯘ ᯒᯔ᯲ᯅᯬᯀᯉ᯲, ᯘᯪᯅᯉᯬ᯲ᯑᯖᯮ᯲ ᯒᯰᯎᯘ᯲ ᯉ ᯎᯀᯮᯰᯎᯀᯮᯰ, ᯉ ᯘᯬ ᯀᯬᯞᯬ ᯀᯔ᯲ᯇᯬᯒᯬᯖᯉ᯲.
Ia dung diguruhon ibana hadatuon sian i, mulak ma ibana muse pasombu siholna tu ibotona i.
ᯤᯀ ᯑᯮᯰ ᯑᯪᯎᯮᯒᯮᯂᯉᯬ᯲ ᯤᯅᯉ ᯂᯑᯖᯮᯀᯉᯬ᯲ ᯘᯪᯀᯉ᯲ ᯤ, ᯔᯮᯞᯄ᯦᯲ ᯔ ᯤᯅᯉ ᯔᯮᯘᯩ ᯇᯘᯔᯬ᯲ᯅᯮ ᯘᯪᯂᯞᯬ᯲ᯉ ᯖᯮ ᯤᯅᯬᯖᯬᯉ ᯤ.
Dung i laho ma ibana muse morguru tu porhotang sibintang morjombut, porbunga-bunga na satutup ni odap, gantang panuluhan, hatian pandosdosi, sitotari na rundut, siangkat na polin.
ᯑᯮᯰ ᯤ ᯞᯂᯬ ᯔ ᯤᯅᯉ ᯔᯮᯘᯩ ᯔᯒᯬ᯲ᯎᯮᯒᯮ ᯖᯮ ᯇᯒᯬ᯲ᯂᯬᯖᯰ ᯘᯪᯅᯉᯪ᯲ᯖᯰ ᯔᯒᯬ᯲ᯐᯔᯬ᯲ᯅᯖᯮ᯲, ᯇᯒᯬ᯲ᯅᯮᯝᯅᯮᯝ ᯉᯘ ᯖᯮᯖᯇᯮ᯲ ᯉᯪ ᯀᯬᯑᯇ᯲, ᯎᯉ᯲ᯖᯰ ᯇᯉᯮᯞᯮᯂᯉ᯲, ᯂᯖᯪᯀᯉ᯲ ᯇᯉ᯲ᯑᯘᯬ᯲ᯑᯬᯘᯪ, ᯘᯪᯖᯬᯖᯒᯪ ᯉ ᯒᯉᯮ᯲ᯑᯖᯮ᯲, ᯘᯪᯀᯰᯄ᯦ᯖ᯲ ᯉ ᯇᯬᯞᯉᯪ᯲.
Ia dung diboto hadatuon sian i laho ma ibana mulak pasombu siholna tu ibotona i.
ᯤᯀ ᯑᯮᯰ ᯑᯪᯅᯬᯖᯬ ᯂᯑᯖᯮᯀᯉᯬ᯲ ᯘᯪᯀᯉ᯲ ᯤ ᯞᯂᯬ ᯔ ᯤᯅᯉ ᯔᯮᯞᯄ᯦᯲ ᯇᯘᯔᯬ᯲ᯅᯮ ᯘᯪᯂᯞᯬ᯲ᯉ ᯖᯮ ᯤᯅᯬᯖᯬᯉ ᯤ
Ia dung sai songon i pangalahona 'dohot ibotona, didok Si Boru Jongjong Anian ma tu anakna i, "Ua mangoli ma damang, ale Aji Donda Hatahutan, ai nunga tuk porbinotoanmu!" ninna.
ᯤᯀ ᯑᯮᯰ ᯘᯤ ᯘᯬᯝᯉ᯲ᯬ᯲ ᯤ ᯇᯝᯞᯂᯬᯉ ᯑᯬᯂᯖᯬ᯲ ᯤᯅᯬᯖᯬᯉ, ᯑᯪᯑᯄ᯦ᯬ᯲ ᯘᯪᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯔ ᯖᯮ ᯀᯉᯄ᯦᯲ᯉ ᯤ," ᯥᯀ ᯔᯝᯬᯞᯪ ᯔ ᯑᯔᯰ, ᯀᯞᯩ ᯀᯐᯪ ᯑᯉᯬ᯲ᯑ ᯂᯖᯂᯮᯖᯉ᯲, ᯀᯤ ᯉᯮᯝ ᯖᯄ᯦ᯮ᯲ ᯇᯒᯬ᯲ᯅᯪᯉᯬᯖᯬᯀᯉ᯲ᯔᯮ! "ᯉᯉᯪ᯲ᯉ.
"Molo songon i, ale inang, jou ma jolo ibotongki, asa jolo hupasombu siholhu, dung pe i asa borhat ahu", ninna mangalusi hata ni inana i.
"ᯔᯬᯞᯬ ᯘᯬᯝᯉᯬ᯲ ᯤ, ᯀᯞᯩ ᯤᯉᯰ, ᯐᯬᯥ ᯔ ᯐᯬᯞᯬ ᯤᯅᯬᯖᯬᯰᯄ᯦ᯪ, ᯀᯘ ᯐᯬᯞᯬ ᯂᯮᯇᯘᯔᯬ᯲ᯅᯮ ᯘᯪᯂᯞᯬ᯲ᯂᯮ, ᯑᯮᯰ ᯇᯩ ᯤ ᯀᯘ ᯅᯒᯬ᯲ᯂᯖ᯲ ᯀᯂᯮ", ᯉᯉᯪ᯲ᯉ ᯔᯝᯞᯮᯘᯪ ᯂᯖ ᯉᯪ ᯤᯉᯉ ᯤ.
Alai nang pe sai dipaingot inana i ibana, na so jadi bahenonna •
na so uhum tu ibotona, indada dioloi, ai dos do rohana dohot ibotona i.
ᯀᯞᯤ ᯉᯰ ᯇᯩ ᯘᯤ ᯑᯪ ᯇᯤᯝᯖᯬ᯲ ᯤᯉᯉ ᯤ ᯤᯅᯉ, ᯉ ᯘᯬ ᯐᯑᯪ ᯅᯂᯩᯉᯉᯬ᯲ᯉ ᯉ ᯘᯬ ᯥᯂᯔᯮ᯲ ᯖᯮ ᯤᯅᯬᯖᯬᯉ, ᯀᯉᯪ᯲ᯑᯑ ᯑᯪᯀᯬᯞᯬᯤ, ᯀᯤ ᯑᯘᯬ᯲ ᯑᯬ ᯒᯬᯂᯉ ᯑᯬᯂᯖᯬ᯲ ᯤᯅᯬᯖᯬᯉ ᯤ.
Dung i didok inana i ma muse tu ibana: "Laho ma damang mangaririt, 3 manang 8 halak pe oli damang, indang mahua i, ai so sinamot na hurang di hita" , ninna.
ᯑᯮᯰ ᯤ ᯑᯪᯑᯄ᯦ᯬ᯲ ᯤᯉᯉ ᯤ ᯔ ᯔᯮᯘᯩ ᯖᯮ ᯤᯅᯉ: "ᯞᯂᯬ ᯔ ᯑᯔᯰ ᯔᯝᯒᯪᯒᯖᯪ᯲, ᯖᯬᯞᯮ ᯔᯉᯰ ᯥᯀᯞᯮ ᯂᯞᯄ᯦᯲ ᯇᯩ ᯀᯬᯞᯪ ᯑᯔᯰ, ᯀᯉᯪ᯲ᯑᯰ ᯔᯂᯮᯀ ᯤ, ᯀᯤ ᯘᯬ ᯘᯪᯉᯔᯖᯬ᯲ ᯉ ᯂᯮᯒᯰ ᯑᯪ ᯂᯪᯖ", ᯉᯉᯪ᯲ᯉ.
Borhat ma ibana antong mangaririt, jumpangsa ma si Boru Pinatinjang, di pantangan andang-andang, di pantangan undung undung, di tarisopo portonunan, boru ni Datu Rondang Sabungan, di hapoltahan ni mata ni bulan, morundang-undang ma nasida; didok ma mandok Si Aji Donda Hatahutan, "Molo na tutu ma ho Si Aji Donda Hatahutan, di dia ma diboto ho huta,.. ni sibarbar losung, huta ni sibau anduri, sibolongkon na niomona, sigadis anakna, silului na soada, sibolongkon na adong; ia soada, dilului, ia dung adong, diambolongkon?" ninna.
ᯅᯒᯬ᯲ᯂᯖ᯲ ᯔ ᯤᯅᯉ ᯀᯉ᯲ᯖᯬᯰ ᯔᯝᯒᯪᯒᯖᯪ᯲, ᯐᯔᯮ᯲ᯇᯰᯘ ᯔ ᯘᯪᯅᯬᯒᯮ ᯇᯪᯉᯖᯉᯪ᯲ᯐᯰ, ᯑᯪ ᯇᯉ᯲ᯖᯝᯉ᯲ ᯀᯉ᯲ᯑᯰᯀᯉ᯲ᯑᯰ, ᯑᯪ ᯇᯉ᯲ᯖᯝᯉ᯲ ᯀᯉᯮ᯲ᯑᯮᯰᯀᯉᯮ᯲ᯑᯮᯰ, ᯑᯪ ᯖᯒᯪᯘᯬᯇᯬ ᯇᯒᯬ᯲ᯖᯬᯉᯮᯉᯉ᯲, ᯅᯬᯒᯮ ᯉᯪ ᯑᯖᯮ ᯒᯉᯬ᯲ᯑᯰ ᯘᯅᯮᯝᯉ᯲, ᯑᯪ ᯂᯇᯞᯬ᯲ᯖᯂᯉ᯲ ᯉᯪ ᯔᯖ ᯉᯪ ᯅᯮᯞᯉ᯲, ᯔᯬᯒᯉᯮ᯲ᯑᯰᯀᯉᯮ᯲ᯑᯰ ᯔ ᯉᯘᯪᯑ; ᯑᯪᯑᯄ᯦ᯬ᯲ ᯔ ᯔᯉ᯲ᯑᯄ᯦ᯬ᯲ ᯘᯪ ᯀᯐᯪ ᯑᯉᯬ᯲ᯑ ᯂᯖᯂᯮᯖᯉ᯲, "ᯔᯬᯞᯬ ᯉ ᯖᯮᯖᯮ ᯔ ᯂᯬ ᯘᯪ ᯀᯐᯪ ᯑᯉᯬ᯲ᯑ ᯂᯖᯂᯮᯖᯉ᯲, ᯑᯪ ᯑᯪᯀ ᯔ ᯑᯪᯅᯬᯖᯬ ᯂᯬ ᯂᯮᯖ,..ᯉᯪ ᯘᯪ ᯅᯒ᯲ᯅᯒ᯲ ᯞᯬᯘᯮᯰ, ᯂᯮᯖ ᯉᯪ ᯘᯪ ᯅᯥ ᯀᯉ᯲ᯑᯮᯒᯪ, ᯘᯪᯅᯬᯞᯬᯰᯄ᯦ᯉᯬ᯲ ᯉ ᯉᯪᯀᯬᯔᯬᯉ, ᯘᯪᯎᯑᯘᯪ᯲ ᯀᯉᯄ᯦᯲ᯉ, ᯘᯪᯞᯮᯞᯮᯤ ᯉ ᯘᯬᯀᯑ, ᯘᯪᯅᯬᯞᯬᯰᯄ᯦ᯉᯬ᯲ ᯉ ᯀᯑᯬᯰ; ᯤᯀ ᯘᯬᯀᯑ, ᯑᯪᯞᯮᯞᯮᯤ, ᯤᯀ ᯑᯮᯰ ᯀᯑᯬᯰ, ᯑᯪᯀᯔ᯲ᯅᯬᯞᯬᯰᯄ᯦ᯉᯬ᯲? "ᯉᯉᯪ᯲ᯉ.
Dung i didok Si Aji Donda Hatahutan ma mangalusi, "Molo songon i, ale boru ni raja bolon! Dia ma adong diboto ho: sanjomput do uluna, saasta do babana, na hurangan di bibir, na lobian di bibir; margondang Ompun Tolu, suda painonduma diallangi." Alai indang biboto boru-boru i lapatan ni na nidokna i.
ᯑᯮᯰ ᯤ ᯑᯪᯑᯄ᯦ᯬ᯲ ᯘᯪ ᯀᯐᯪ ᯑᯉᯬ᯲ᯑ ᯂᯖᯂᯮᯖᯉ᯲ ᯔ ᯔᯝᯞᯮᯘᯪ, "ᯔᯬᯞᯬ ᯘᯬᯝᯉᯬ᯲ ᯤ ,ᯀᯞᯩ ᯅᯬᯒᯮ ᯉᯪ ᯒᯐ ᯅᯬᯞᯉᯬ᯲! ᯑᯪᯀ ᯔ ᯀᯑᯬᯰ ᯑᯪᯅᯬᯖᯬ ᯂᯬ: ᯘᯉ᯲ᯐᯔᯬ᯲ᯇᯖᯮ᯲ ᯑᯬ ᯥᯞᯮᯉ, ᯘᯀᯘ᯲ᯖ ᯑᯬ ᯅᯅᯉ, ᯉᯂᯮᯒᯝᯉ᯲ ᯑᯪ ᯅᯪᯅᯒᯪ᯲, ᯉ ᯞᯬᯅᯪᯀᯉ᯲ ᯑᯪ ᯅᯪᯅᯒᯪ᯲; ᯔᯒ᯲ᯎᯉᯬ᯲ᯑᯰ ᯀᯔᯬ᯲ᯇᯉᯮ᯲ ᯖᯬᯞᯮ, ᯘᯮᯑ ᯇᯤᯉᯉᯬ᯲ᯑᯮ ᯔ ᯑᯪᯀᯞ᯲ᯞᯝᯪ."ᯀᯞᯤ ᯀᯉᯪ᯲ᯑᯰ ᯑᯪᯅᯬᯖᯬ ᯅᯬᯒᯮᯅᯬᯒᯮ ᯤ ᯞᯇᯖᯉ᯲ ᯉᯪ ᯉ ᯉᯪᯑᯄ᯦᯲ᯉ ᯤ.
Dung i mulak ma ibana tu hutanasida, didok ma tu inana, "Na uli do nian rupa ni na huririt i, alai inda tung adong tarpasuman ianggo tung tu rupa ni ibotongkon", ninna, ai sai holan dompak ibotona i do rohana, sai i do dipaingot-ingot nang di na mangaririt i ibana.
ᯑᯮᯰ ᯤ ᯔᯮᯞᯄ᯦᯲ ᯔ ᯤᯅᯉ ᯖᯮ ᯂᯮᯖ ᯉᯘᯪᯑ, ᯑᯪᯑᯄ᯦ᯬ᯲ ᯔ ᯖᯮ ᯤᯉᯉ, "ᯉ ᯥᯞᯪ ᯑᯬ ᯉᯪᯀᯉ᯲ ᯒᯮᯇ ᯉᯪ ᯉ ᯂᯮᯒᯪᯒᯖᯪ᯲ ᯤ, ᯀᯞᯤ ᯀᯉᯪ᯲ᯑ ᯖᯮᯰ ᯀᯑᯬᯰ ᯖᯒ᯲ᯇᯘᯮᯔᯉ᯲ ᯤᯀᯰᯎᯬ ᯖᯮᯰ ᯖᯮ ᯒᯮᯇ ᯉᯪ ᯤᯅᯬᯖᯬᯰᯂᯉᯬ᯲", ᯉᯉᯪ᯲ᯉ, ᯀᯤ ᯘᯤ ᯂᯬᯞᯉ᯲ ᯑᯔᯬ᯲ᯇᯄ᯦᯲ ᯤᯅᯬᯖᯬᯉ ᯤ ᯑᯬ ᯒᯬᯂᯉ, ᯘᯤ ᯤ ᯑᯬ ᯑᯪᯇᯤᯝᯖᯬ᯲ᯤᯝᯖᯬ᯲ ᯉᯰ ᯑᯪ ᯉ ᯔᯝᯒᯪᯒᯖᯪ᯲ ᯤ ᯤᯅᯉ.
Dung i dirambus inana i ma obukna, ditompuk lambiakna, huhut ma didok, ''Sapot ni nipingki, soro ni aringkon, tubu ma hape jea bolon bahenon ni anakkon!" ninna.
ᯑᯮᯰ ᯤ ᯑᯪᯒᯔ᯲ᯅᯘᯮ᯲ ᯤᯉᯉ ᯤ ᯔ ᯀᯬᯅᯄ᯦ᯮ᯲ᯉ, ᯑᯪᯖᯔᯬ᯲ᯇᯄ᯦ᯮ᯲ ᯞᯔ᯲ᯅᯪᯀᯄ᯦᯲ᯉ, ᯂᯮᯂᯖᯮ᯲ ᯔ ᯑᯪᯑᯄ᯦ᯬ᯲, ''ᯘᯇᯖᯬ᯲ ᯉᯪ ᯉᯪᯇᯪᯰᯄ᯦ᯪ, ᯘᯬᯒᯬ ᯉᯪ ᯀᯒᯪᯰᯄ᯦ᯉᯬ᯲, ᯖᯮᯅᯮ ᯔ ᯂᯇᯩ ᯐᯩᯀ ᯅᯬᯞᯉᯬ᯲ ᯅᯂᯩᯉᯉᯬ᯲ ᯉᯪ ᯀᯉᯄ᯦᯲ᯄ᯦ᯉᯬ᯲! "ᯉᯉᯪ᯲ᯉ.
Ia dung sombu roha ni Si Aji Donda Hatahutan tu ibotona i, borhat ma ibana muse mangaririt, gabe jumpangsa ma Si Boru Haen Humiap, pitu di pudina, ulu di jolona, na sinondang ni bohina, lehet bahenonna. Alai denggan pe panailina, indang tudos ianggo pangembalna; tudos pe pangembalna, inda tung tudos porsimangarudokna ianggo tung tu rupa dohot pordagingon ni ibotona Si Boru Sopak Panaluan, na sinonom ni rohana i tong tong.
ᯤᯀ ᯑᯮᯰ ᯘᯔᯬ᯲ᯅᯮ ᯒᯬᯂ ᯉᯪ ᯘᯪ ᯀᯐᯪ ᯑᯉᯬ᯲ᯑ ᯂᯖᯂᯮᯖᯉ᯲ ᯖᯮ ᯤᯅᯬᯖᯬᯉ ᯤ, ᯅᯒᯬ᯲ᯂᯖ᯲ ᯔ ᯤᯅᯉ ᯔᯮᯘᯩ ᯔᯝᯒᯪᯒᯖᯪ᯲, ᯎᯅᯩ ᯐᯔᯮ᯲ᯇᯰᯘ ᯔ ᯘᯪᯅᯬᯒᯮ ᯂᯀᯉᯩ᯲ ᯂᯮᯔᯪᯀᯇ᯲, ᯇᯪᯖᯮ ᯑᯪ ᯇᯮᯑᯪᯉ, ᯥᯞᯮ ᯑᯪ ᯐᯬᯞᯬᯉ, ᯉ ᯘᯪᯉᯉᯬ᯲ᯑᯰ ᯉᯪ ᯅᯬᯂᯪᯉ, ᯞᯩᯂᯖᯩ᯲ ᯅᯂᯩᯉᯉᯬ᯲ᯉ .ᯀᯞᯤ ᯑᯰᯩᯎᯉ᯲ ᯇᯩ ᯇᯉᯤᯞᯪᯉ, ᯀᯉᯪ᯲ᯑᯰ ᯖᯮᯑᯘᯬ᯲ ᯤ ᯀᯰᯎᯬ ᯇᯝᯔᯩ᯲ᯅᯞ᯲ᯉ; ᯖᯮᯑᯘᯬ᯲ ᯇᯩ ᯇᯝᯔᯩ᯲ᯅᯞ᯲ᯉ, ᯀᯉᯪ᯲ᯑ ᯖᯮᯰ ᯖᯮᯑᯘᯬ᯲ ᯇᯒᯬ᯲ᯘᯪᯔᯝᯒᯮᯑᯄ᯦ᯬ᯲ᯉ ᯤ ᯀᯰᯎᯬ ᯖᯮᯰ ᯖᯮᯒᯮᯇ ᯑᯬᯂᯖᯬ᯲ ᯇᯒᯬ᯲ᯑᯎᯪᯝᯉᯬ᯲ ᯉᯪ ᯤᯅᯬᯖᯬᯉ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲, ᯉ ᯘᯪᯉᯬᯉᯔᯬ᯲ ᯉᯪ ᯒᯬᯂᯉ ᯤ ᯖᯬᯰᯖᯬᯰ.
Dung i mulak ma ibana, didok ma tu inana i, "Beha !Tia i, ale inang? Ia jumpang ahu na denggan pangembalna, indang toho tu rohangku ianggo porsimangarudokna, ai tung sai daul do sian rupa ni ibotongku Si Boru Sopak Panaluan i. Beha ma i, inang, sai dompak ibotongki do rohangku tongtong" , ninna.
ᯑᯮᯰ ᯤ ᯔᯮᯞᯄ᯦᯲ ᯔ ᯤᯅᯉ, ᯑᯪᯑᯄ᯦ᯬ᯲ ᯔ ᯖᯮ ᯤᯉᯉ ᯤ," ᯅᯩᯂ! ᯖᯪᯀ ᯤ, ᯀᯞᯩ ᯤᯉᯰ? ᯤᯀ ᯐᯔᯮ᯲ᯇᯰ ᯀᯂᯮ ᯉ ᯑᯰᯩᯎᯉ᯲ ᯇᯝᯔᯩ᯲ᯅᯞ᯲ᯉ, ᯀᯉᯪ᯲ᯑᯰ ᯖᯬᯂᯬ ᯖᯮ ᯒᯬᯂᯰᯄ᯦ᯮ ᯤᯀᯰᯎᯬ ᯇᯒᯬ᯲ᯘᯪᯔᯝᯒᯮᯑᯄ᯦᯲ᯉ, ᯀᯤ ᯖᯮᯰ ᯘᯤ ᯑᯀᯞᯮ᯲ ᯑᯬ ᯘᯪᯀᯉ᯲ ᯒᯮᯇ ᯉᯪ ᯤᯅᯬᯖᯬᯰᯄ᯦ᯮ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲ ᯤ .ᯅᯩᯂ ᯔ ᯤ, ᯤᯉᯰ, ᯘᯤ ᯑᯔᯬ᯲ᯇᯄ᯦᯲ ᯤᯅᯬᯖᯬᯰᯄ᯦ᯪ ᯑᯬ ᯒᯬᯂᯰᯄᯮ ᯖᯬᯰᯖᯬᯰ", ᯉᯉᯪ᯲ᯉ.
Dung i marsak ma natorasna i duansa mornida pangalaho ni anak dohot borunasida i. Dibahen nasida ma Si Boru Sopak Panaluan tu huta ni tulangna Portigatiga Torus, unang sai dipaidaida ibotona baoa.
ᯑᯮᯰ ᯤ ᯔᯒ᯲ᯘᯄ᯦᯲ ᯔ ᯉᯖᯬᯒᯘ᯲ᯉ ᯤ ᯑᯮᯀᯉ᯲ᯘ ᯔᯒᯬ᯲ᯉᯪᯑ ᯇᯝᯞᯂᯬ ᯉᯪ ᯀᯉᯄ᯦᯲ ᯑᯬᯂᯖᯬ᯲ ᯅᯬᯒᯮᯉᯘᯪᯑ ᯤ. ᯑᯪᯅᯂᯉᯩ᯲ ᯉᯘᯪᯑ ᯔ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲ ᯖᯮ ᯂᯮᯖ ᯉᯪ ᯖᯮᯞᯰᯉ ᯇᯒᯬ᯲ᯖᯪᯎᯖᯪᯎ ᯖᯬᯒᯘᯮ᯲, ᯥᯉᯰ ᯘᯤ ᯑᯪᯇᯤᯑᯤᯑ ᯤᯅᯬᯖᯬᯉ ᯅᯀᯬᯀ.
Alai dung so diida Si Aji Donda Hatahutan be ibotona i,, didok ma mandok inana i, "Nunga tu dia ibotongki, ale inang?" ninna. "Laho dope tu balian" , ninna inana i mangalusi.
ᯀᯞᯤ ᯑᯮᯰ ᯘᯬ ᯑᯪᯤᯑ ᯘᯪ ᯀᯐᯪ ᯑᯉᯬ᯲ᯑ ᯂᯖᯂᯮᯖᯉ᯲ ᯅᯩ ᯤᯅᯬᯖᯬᯉ ᯤ,,ᯑᯪᯑᯄ᯦᯲ᯔ ᯔᯉ᯲ᯑᯄ᯦ᯬ᯲ ᯤᯉᯉ ᯤ," ᯉᯮᯝ ᯖᯮᯑᯪᯀ ᯤᯅᯬᯖᯬᯰᯄᯪ, ᯀᯞᯩ ᯤᯉᯰ? "ᯉᯉᯪ᯲ᯉ. "ᯞᯂᯬ ᯑᯬ ᯇᯩ ᯖᯮ ᯅᯞᯪᯀᯉ᯲", ᯉᯉᯪ᯲ᯉ ᯤᯉᯉ ᯤ ᯔᯝᯞᯮᯘᯪ.
"Boasa ma paoto-otoonmu ahu, ale inang, ai huboto do manang tu dia ibotongki dipalumehon ho. Naung dipaguruhon ho do ahu, ale inang; dirimpu ho ma na so huguruhon dohot poralomaton? Ida ma ale inang: hundul pe ahu di son, boi do jouonku ibotongki sian huta ni datulang" , ninna.
"ᯅᯬᯀᯘ ᯔ ᯇᯀᯬᯖᯬᯀᯬᯖᯬᯀᯉᯬ᯲ᯔᯮ ᯀᯂᯮ, ᯀᯞᯩ ᯤᯉᯰ, ᯀᯤ ᯂᯮᯅᯬᯖᯬ ᯑᯬ ᯔᯉᯰ ᯖᯮᯑᯪᯀ ᯤᯅᯬᯖᯬᯰᯄ᯦ᯪ ᯑᯪᯇᯞᯮᯔᯩᯂᯉᯬ᯲ ᯂᯬ. ᯉᯀᯮᯰ ᯑᯪᯇᯎᯮᯒᯮᯂᯉᯬ᯲ ᯂᯬ ᯑᯬ ᯀᯂᯮ, ᯀᯞᯩ ᯤᯉᯰ; ᯑᯪᯒᯔᯪ᯲ᯇᯮ ᯂᯬ ᯔ ᯉ ᯘᯬ ᯂᯮᯎᯮᯒᯮᯂᯉᯬ᯲ ᯑᯬᯂᯖᯬ᯲ ᯇᯒᯬ᯲ᯀᯞᯬᯔᯖᯉᯬ᯲? ᯤᯑ ᯔ ᯀᯞᯩ ᯤᯉᯰ: ᯂᯉᯮ᯲ᯑᯞᯮ᯲ ᯇᯩ ᯀᯂᯮ ᯑᯪᯘᯉᯬ᯲, ᯅᯬᯤ ᯑᯬ ᯐᯬᯥᯀᯉᯬ᯲ᯄ᯦ᯮ ᯤᯅᯬᯖᯬᯰᯄ᯦ᯪ ᯘᯪᯀᯉ᯲ ᯂᯮᯖ ᯉᯪ ᯑᯖᯮᯞᯰ , ᯉᯉᯪ᯲ᯉ.
Dung i dipasang ma ula-ulana i, ditabashon ma tabas ni dorma, didok ma songon on, "Baungku, na bau albang, na bau pandan sairi, na bau bane siholing, na bau garang-garang ni lautan. Ale alogo situmalatap, tu alago situmulutup, alogo situmonding, na habang sahat tu ibotongku, sai hiaphon ma ate-atena, beta-beta ma rohana, hida-hida ma ibana, asa moringkat ro tu jolongku!" ninna.
ᯑᯮᯰ ᯤ ᯑᯪᯇᯘᯰ ᯔ ᯥᯞᯥᯞᯉ ᯤ, ᯑᯪᯖᯅᯘ᯲ᯂᯉᯬ᯲ ᯔ ᯖᯅᯘ᯲ ᯉᯪ ᯑᯒᯬ᯲ᯔ, ᯑᯪᯑᯄ᯦ᯬ᯲ ᯔ ᯘᯬᯝᯉᯬ᯲ ᯀᯉᯬ᯲, "ᯅᯀᯮᯰᯄ᯦ᯮ, ᯉ ᯅᯥ ᯀᯞ᯲ᯅᯰ, ᯉ ᯅᯥ ᯇᯉ᯲ᯑᯉ᯲ ᯘᯤ ᯒᯪ, ᯉ ᯅᯥ ᯅᯉᯩ ᯘᯪᯂᯬᯞᯪᯰ, ᯉ ᯅᯥ ᯎᯒᯰᯎᯒᯰ ᯉᯪ ᯞᯥᯖᯉ᯲. ᯀᯞᯩ ᯀᯞᯬᯎᯬ ᯘᯪᯖᯮᯔᯞᯖᯇ᯲, ᯖᯮ ᯀᯞᯎᯬ ᯘᯪᯖᯮᯔᯮᯞᯮᯖᯇᯮ᯲, ᯀᯞᯬᯎᯬ ᯘᯪᯖᯮᯔᯉᯬ᯲ᯑᯪᯰ, ᯉ ᯂᯅᯰ ᯘᯂᯖ᯲ ᯖᯮ ᯤᯅᯬᯖᯬᯰᯄ᯦ᯮ, ᯘᯤ ᯂᯪᯀᯇ᯲ᯂᯉᯬ᯲ ᯔ ᯀᯖᯩᯀᯖᯩᯉ, ᯅᯩᯖᯅᯩᯖ ᯔ ᯒᯬᯂᯉ, ᯂᯪᯑᯂᯪᯑ ᯔ ᯤᯅᯉ, ᯀᯘ ᯔᯬᯒᯪᯰᯄ᯦ᯖ᯲ ᯒᯬ ᯖᯮ ᯐᯬᯞᯬᯰᯄ᯦ᯮ! "ᯉᯉᯪ᯲ᯉ.
Dung dipasang ula-ulana i antong, indang pola sadia leleng, ro ma ibotona i. Dung i mengkel ma ibana mandok tu inana i, "Beha do, ale inang, inda nunga' ro ibotongki?!" ninna.
ᯑᯮᯰ ᯑᯪᯇᯘᯰ ᯥᯞᯀᯥᯞᯉ ᯤ ᯀᯉ᯲ᯖᯬᯰ, ᯀᯉᯪ᯲ᯑᯰ ᯇᯬᯞ ᯘᯑᯪᯀ ᯞᯩᯞᯰᯩ, ᯒᯬ ᯔ ᯤᯅᯬᯖᯬᯉ ᯤ. ᯑᯮᯰ ᯤ ᯔᯰᯩᯄ᯦ᯞᯩ᯲ ᯔ ᯤᯅᯉ ᯔᯉ᯲ᯑᯄ᯦ᯬ᯲ ᯖᯮ ᯤᯉᯉ ᯤ, "ᯅᯩᯂ ᯑᯬ, ᯀᯞᯩ ᯤᯉᯰ, ᯀᯉᯪ᯲ᯑ ᯉᯮᯝ ᯒᯬ ᯤᯅᯬᯖᯬᯰᯄ᯦ᯪ?! "ᯉᯉᯪ᯲ᯉ.
"inang da ba, inang, mataut hupaguruhon ma anakki! Sapot ni nipingki, soro ni aringkon!" ninna roha ni inana.
"ᯤᯉᯰ ᯑ ᯅ, ᯤᯉᯰ, ᯔᯖᯀᯖᯮ᯲ ᯂᯮᯇᯎᯮᯒᯮᯂᯉᯬ᯲ ᯔ ᯀᯉᯄ᯦᯲ᯄ᯦ᯪ! ᯘᯇᯖᯬ᯲ ᯉᯪ ᯉᯪᯇᯪᯰᯄ᯦ᯪ, ᯘᯬᯒᯬ ᯉᯪ ᯀᯒᯪᯰᯄ᯦ᯉᯬ᯲! "ᯉᯉᯪ᯲ᯉ ᯒᯬᯂ ᯉᯪ ᯤᯉᯉ.
Dung sahat ro Si Boru Sopak-Panaluan, hinida-hida ni dorma ni ibotona, mengkel be ma nasida, dipasombu ma lungunna, dipamahap ma rohana.
ᯑᯮᯰ ᯘᯂᯖ᯲ ᯒᯬ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲, ᯂᯪᯉᯪᯑᯂᯪᯑ ᯉᯪ ᯑᯒᯬ᯲ᯔ ᯉᯪ ᯤᯅᯬᯖᯬᯉ, ᯔᯰᯩᯄ᯦ᯞᯩ᯲ ᯅᯩ ᯔ ᯉᯘᯪᯑ, ᯑᯪᯇᯘᯔᯬ᯲ᯅᯮ ᯔ ᯞᯮᯝᯉᯮ᯲ᯉ, ᯑᯪᯇᯔᯂᯇ᯲ ᯔ ᯒᯬᯂᯉ
Morpadan ma nasida, songon on, "Na so tupa do ahu mangoli, ale ito, ianggo so jolo muli dope ho", ninna si Aji Donda Hatahutan tu ibotona i. "Ba, ahu pe, ale ito, tung na so muli do ahu, anggo so jolo mangoli dope ho", ninna Si Boru Sopak Panaluan mangalusi hata ni ibotona i.
ᯔᯒᯬ᯲ᯇᯑᯉ᯲ ᯔ ᯉᯘᯪᯑ, ᯘᯬᯝᯉᯬ᯲ ᯀᯉᯬ᯲, "ᯉ ᯘᯬ ᯖᯮᯇ ᯑᯬ ᯀᯂᯮ ᯔᯝᯬᯞᯪ, ᯀᯞᯩ ᯤᯖᯬ, ᯤᯀᯰᯎᯬ ᯘᯬ ᯐᯬᯞᯬ ᯔᯮᯞᯪ ᯑᯬᯇᯩ ᯂᯬ", ᯉᯉᯪ᯲ᯉ ᯘᯪ ᯀᯐᯪ ᯑᯉᯬ᯲ᯑ ᯂᯖᯂᯮᯖᯉ᯲ ᯖᯮ ᯤᯅᯬᯖᯬᯉ ᯤ. "ᯅ, ᯀᯂᯮ ᯇᯩ, ᯀᯞᯩ ᯤᯖᯬ, ᯖᯮᯰ ᯉ ᯘᯬ ᯔᯮᯞᯪ ᯑᯬ ᯀᯂᯮ, ᯀᯰᯎᯬ ᯘᯬ ᯐᯬᯞᯬ ᯔᯝᯬᯞᯪ ᯑᯬᯇᯩ ᯂᯬ", ᯉᯉᯪ᯲ᯉ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲ ᯔᯝᯞᯮᯘᯪ ᯂᯖ ᯉᯪ ᯤᯅᯬᯖᯬᯉ ᯤ.
Ia leleng ma di parlelengan, lalap ma di porlalapan, dung sai songon i roa ni pangalahonasida na moriboto i, borhat ma Si Aji Donda Hatahutan tu harangan na lungunan, tu tombak na..ngolngolan, tu hau piut-piut tanggule, manjangkit ma ibana tu ginjang, gabe diihuthon ibotona ma tu si pasombu sihol ni dagingna, hape lohot ma nasida dipulut gota ni hau piut-piut tanggule i, laos so boi be mijur; ia dung songon i mangangguhi ma nasida.
ᯤᯀ ᯞᯩᯞᯰᯩ ᯔ ᯑᯪ ᯇᯒ᯲ᯞᯩᯞᯩᯝᯉ᯲, ᯞᯞᯇ᯲ ᯔ ᯑᯪᯇᯒᯬ᯲ᯞᯞᯇᯉ᯲, ᯑᯮᯰ ᯘᯤ ᯘᯬᯝᯉᯬ᯲ ᯤ ᯒᯬᯀ ᯉᯪ ᯇᯝᯞᯂᯬ ᯉᯘᯪᯑ ᯉ ᯔᯬᯒᯪᯅᯬᯖᯬ ᯤ, ᯅᯒᯬ᯲ᯂᯖ᯲ ᯔ ᯘᯪ ᯀᯐᯪ ᯑᯉᯬ᯲ᯑ ᯂᯖᯂᯮᯖᯉ᯲ ᯖᯮ ᯂᯒᯝᯉ᯲ ᯉ ᯞᯮᯝᯮᯉᯉ᯲, ᯖᯮ ᯖᯔᯬ᯲ᯅᯄ᯦᯲ ᯉᯝᯞᯬ᯲ᯝᯬᯞᯉ᯲, ᯖᯮ ᯂᯥ ᯇᯪᯀᯖᯮ᯲ᯇᯪᯀᯖᯮ᯲ ᯖᯰᯎᯮᯞᯩ, ᯔᯉ᯲ᯐᯰᯄ᯦ᯖᯪ᯲ ᯔ ᯤᯅᯉ ᯖᯮ ᯎᯉᯪ᯲ᯐᯰ, ᯎᯅᯩ ᯑᯪᯤᯂᯖᯮ᯲ᯂᯉᯬ᯲ ᯤᯅᯬᯖᯬᯉ ᯔ ᯖᯮᯘᯪ ᯇᯘᯔᯬ᯲ᯅᯮ ᯘᯪᯂᯞᯬ᯲ ᯉᯪ ᯑᯎᯪᯰᯉ, ᯂᯇᯩ ᯞᯬᯂᯖᯬ᯲ ᯔ ᯉᯘᯪᯑ ᯑᯪ ᯇᯮᯞᯖᯮ᯲ ᯎᯬᯖ ᯉᯪ ᯂᯥ ᯇᯪᯀᯖᯮ᯲ᯇᯪᯀᯖᯮ᯲ ᯖᯰᯎᯮᯞᯩ ᯤ, ᯞᯀᯘᯬ᯲ ᯘᯬ ᯅᯬᯤ ᯅᯩ ᯔᯪᯐᯒᯮ᯲; ᯤᯀ ᯑᯮᯰ ᯘᯬᯝᯉᯬ᯲ ᯤ ᯔᯝᯰᯎᯮᯂᯪ ᯔ ᯉᯘᯪᯑ.
Alai adong ma halak na umbege i, gabe diida ma nasida di atas ni hau i; jadi laho ma nasida paboahon tu amana Guru Satia Bulan dohot tu inana Si Boru Jongjong Anian.
ᯀᯞᯤ ᯀᯑᯬᯰ ᯔ ᯂᯞᯄ᯦᯲ ᯉ ᯀᯔᯮ᯲ᯅᯩᯎᯩ ᯤ, ᯎᯅᯩ ᯑᯪᯤᯑ ᯔ ᯉᯘᯪᯑ ᯑᯪ ᯀᯖᯘ᯲ ᯉᯪ ᯂᯥ ᯤ; ᯐᯑᯪ ᯞᯂᯬ ᯔ ᯉᯘᯪᯑ ᯇᯅᯬᯀᯂᯉᯬ᯲ ᯖᯮ ᯀᯔᯉ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯑᯬᯂᯖᯬ᯲ ᯖᯮ ᯤᯉᯉ ᯘᯪ ᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲.
Dung sahat tu nasida barita i, humalaput ma nasida laho mornida, dibereng ma tutu, nunga lohot nasida di ginjang ni hau i.
ᯑᯮᯰ ᯘᯂᯖ᯲ ᯖᯮ ᯉᯘᯪᯑ ᯅᯒᯪᯖ ᯤ, ᯂᯮᯔᯞᯇᯖᯮ᯲ ᯔ ᯉᯘᯪᯑ ᯞᯂᯬ ᯔᯒᯬ᯲ᯉᯪᯑ, ᯑᯪᯅᯩᯒᯰᯩ ᯔ ᯖᯮᯖᯮ, ᯉᯮᯝ ᯞᯬᯂᯖᯬ᯲ ᯉᯘᯪᯑ ᯑᯪ ᯎᯉᯪ᯲ᯐᯰ ᯉᯪ ᯂᯥ ᯤ.
Masipansorohon hatana ma na torop, didok be ma, "Naso uhum do on ; indang hea hamamago ni halak songon on; ibotona donganna sarurut do i, so na dangka tutur, tung barani mambahen songon i! Patut do antong songon i", angka ninna be.
ᯔᯘᯪᯇᯉ᯲ᯘᯬᯒᯬᯂᯉᯬ᯲ ᯂᯖᯉ ᯔ ᯉᯖᯬᯒᯇᯬ᯲, ᯑᯪᯑᯄ᯦ᯬ᯲ ᯅᯩ ᯔ, "ᯉ ᯘᯬ ᯥᯂᯔᯮ᯲ ᯑᯬ ᯀᯉᯬ᯲; ᯀᯉᯪ᯲ᯑᯰ ᯂᯩᯀ ᯂᯔᯔᯎᯬ ᯉᯪ ᯂᯞᯄ᯦᯲ ᯘᯬᯝᯉᯬ᯲ ᯀᯉᯬ᯲; ᯤᯅᯬᯖᯬ ᯉ ᯑᯬᯝᯉ᯲ᯉ ᯘᯒᯮᯒᯖᯮ᯲ ᯑᯬ ᯤ, ᯘᯬ ᯉ ᯑᯰᯄ᯦ ᯖᯮᯖᯒᯮ᯲, ᯖᯮᯰ ᯅᯒᯉᯪ ᯔᯔ᯲ᯅᯂᯉᯩ᯲ ᯘᯬᯝᯉᯬ᯲ ᯤ!ᯇᯖᯖᯮ᯲ ᯑᯬ ᯀᯉ᯲ᯖᯬᯰ ᯘᯬᯝᯉᯬ᯲ ᯤ", ᯀᯰᯄ᯦ ᯉᯉᯪ᯲ᯉ ᯅᯩ.
Adong ma jolma i na mengkel, adong na mamursik, dung diida nasida naung lohot di hau i.
ᯀᯑᯬᯰ ᯔ ᯐᯞᯬ᯲ᯔ ᯤ ᯉ ᯔᯰᯩᯄ᯦ᯞᯩ᯲, ᯀᯑᯬᯰ ᯉ ᯔᯔᯒᯮ᯲ᯘᯄ᯦ᯪ᯲, ᯑᯮᯰ ᯑᯪᯤᯑ ᯉᯘᯪᯑ ᯉᯀᯮᯰ ᯞᯬᯂᯖᯬ᯲ ᯑᯪ ᯂᯥ ᯤ.
Dung i morpingkir ma natorasnasida i dohot angka jolma na di sini, didokkon ma na manjou Boru Sibaso Paet, anggiat boi tanggalan ni hadatuonna nasida sian hau i.
ᯑᯮᯰ ᯤ ᯔᯒᯬ᯲ᯇᯪᯰᯄᯒᯪ᯲ ᯔ ᯉᯖᯬᯒᯘ᯲ ᯉᯘᯪᯑ ᯤ ᯑᯬᯂᯖᯬ᯲ ᯀᯰᯄ᯦ ᯐᯞᯬ᯲ᯔ ᯉ ᯑᯪᯘᯪ ᯉᯪ, ᯑᯪᯑᯬᯄ᯦᯲ᯄ᯦ᯉᯬ᯲ ᯔ ᯉ ᯔᯉ᯲ᯐᯬᯥ ᯅᯬᯒᯮ ᯘᯪᯅᯘᯬ ᯇᯀᯖᯩ᯲, ᯀᯰᯎᯪᯀᯖ᯲ ᯅᯬᯤ ᯖᯰᯎᯞᯉ᯲ ᯉᯪ ᯂᯑᯖᯮᯀᯉᯬ᯲ᯉ ᯉᯘᯪᯑ ᯘᯪᯀᯉ᯲ ᯂᯥ ᯤ
Alai dung ro Boru Sibaso Paet i, dipasingkop ma ambu ambuan, dipangke ma nasa boto-botoanna; dung i ninna ma, "Pola ma dia maol ni i longkanganku?! Dohot na sai mura" Dung i manjangkit ma ibana tu ginjang ni hau i laho mananggali si Aji Donda Hatahutan dohot ibotona i nian, hape laos dohot ma ibana lohot disi.
ᯀᯞᯤ ᯑᯮᯰ ᯒᯬ ᯅᯬᯒᯮ ᯘᯪᯅᯘᯬ ᯇᯀᯖᯩ᯲ ᯤ, ᯑᯪ ᯇᯘᯪᯰᯄ᯦ᯇᯬ᯲ ᯔ ᯀᯔ᯲ᯅᯮᯀᯔ᯲ᯅᯮᯀᯉ᯲, ᯑᯪᯇᯰᯄᯩ᯦ ᯔ ᯉᯘ ᯅᯬᯖᯬᯅᯬᯖᯬᯀᯉ᯲ᯉ; ᯑᯮᯰ ᯤ ᯉᯉᯪ᯲ᯉ ᯔ, "ᯇᯬᯞ ᯔ ᯑᯪᯀ ᯔᯀᯞᯬ᯲ ᯉᯪ ᯤ ᯞᯬᯰᯄ᯦ᯝᯉ᯲ᯄ᯦ᯮ?! ᯑᯬᯂᯖᯬ᯲ ᯉ ᯘᯤ ᯔᯮᯒ" ᯑᯮᯰ ᯤ ᯔᯉ᯲ᯐᯰᯄ᯦ᯖᯪ᯲ ᯔ ᯤᯅᯉ ᯖᯮ ᯎᯉᯪ᯲ᯐᯰ ᯉᯪ ᯂᯥ ᯤ ᯞᯂᯬ ᯔᯉᯰᯎᯞᯪ ᯘᯪ ᯀᯐᯪ ᯑᯉᯬ᯲ᯑ ᯂᯖᯂᯮᯖᯉ᯲ ᯑᯬᯂᯖᯬ᯲ ᯤᯅᯬᯖᯬᯉ ᯤ ᯉᯪᯀᯉ᯲, ᯂᯇᯩ ᯞᯀᯘᯬ᯲ ᯑᯬᯂᯖᯬ᯲ ᯔ ᯤᯅᯉ ᯞᯬᯂᯖᯬ᯲ ᯑᯪᯘᯪ.
Dung i dialapi muse ma Guru .so Adangon; dipalolo i muse ambuambuan, dipasang nasa boto-botoanna; manaek ma ibana tu ginjang ni hau i mananggali naung lohot i disi, hape laos dohot ma ibana lohot muse.
ᯑᯮᯰ ᯤ ᯑᯪᯀᯞᯇᯪ ᯔᯮᯘᯩ ᯔ ᯎᯮᯒᯮ ᯘᯬ ᯀᯑᯝᯉᯬ᯲; ᯑᯪᯇᯞᯬᯞᯬᯤ ᯔᯮᯘᯩ ᯀᯔ᯲ᯅᯮᯀᯔ᯲ᯅᯮᯀᯉ᯲, ᯑᯪᯇᯘᯰ ᯉᯘ ᯅᯬᯖᯬᯅᯬᯖᯬᯀᯉ᯲ᯉ; ᯔᯉᯀᯄᯩ᯦᯲ ᯔ ᯤᯅᯉ ᯖᯮ ᯎᯉᯪ᯲ᯐᯰ ᯉᯪ ᯂᯥ ᯤ ᯔᯉᯰᯎᯞᯪ ᯉᯀᯮᯰ ᯞᯬᯂᯖᯬ᯲ ᯤ ᯑᯪᯘᯪ, ᯂᯇᯩ ᯞᯀᯘᯬ᯲ ᯑᯬᯂᯖᯬ᯲ ᯔ ᯤᯅᯉ ᯞᯬᯂᯖᯬ᯲ ᯔᯮᯘᯩ.
Dialapi muse Sipatundal ni begu, dipangke i nasa boto-botoanna, dung i manaek ma ibana tu hau i laos dohot ibana lohot.
ᯑᯪᯀᯞᯇᯪ ᯔᯮᯘᯩ ᯘᯪᯇᯖᯉᯮ᯲ᯑᯞ᯲ ᯉᯪ ᯅᯩᯎᯮ, ᯑᯪᯇᯰᯄᯩ᯦ ᯤ ᯉᯘ ᯅᯬᯖᯬᯅᯬᯖᯬᯀᯉ᯲ᯉ, ᯑᯮᯰ ᯤ ᯔᯉᯀᯄᯩ᯦᯲ ᯔ ᯤᯅᯉ ᯖᯮ ᯂᯥ ᯤ ᯞᯀᯘᯬ᯲ ᯑᯬᯂᯖᯬ᯲ ᯤᯅᯉ ᯞᯬᯂᯖᯬ᯲.
Ditogu ma muse horbo sisapang na ualu, asa ugeanna bona ni hau i, anggiat marumpak, hape laos dohot ma i lohot tu hau i.
ᯑᯪᯖᯬᯎᯮ ᯔ ᯔᯮᯘᯩ ᯂᯒᯬ᯲ᯅᯬ ᯘᯪᯘᯇᯰ ᯉ ᯥᯀᯞᯮ, ᯀᯘ ᯥᯎᯩᯀᯉ᯲ᯉ ᯅᯬᯉ ᯉᯪ ᯂᯥ ᯤ, ᯀᯰᯎᯪᯀᯖ᯲ ᯔᯒᯔᯮ᯲ᯇᯄ᯦᯲, ᯂᯇᯩ ᯞᯀᯘᯬ᯲ ᯑᯬᯂᯖᯬ᯲ ᯔ ᯤ ᯞᯬᯂᯖᯬ᯲ ᯖᯮ ᯂᯥ ᯤ.
Dijou muse dohot ulok mahin-mahinan , hape laos dohot do i lohot.
ᯑᯪᯐᯬᯥ ᯔᯮᯘᯩ ᯑᯬᯂᯖᯬ᯲ ᯥᯞᯄ᯦ᯬ᯲ ᯔᯂᯉᯪ᯲ᯔᯂᯪᯉᯉ᯲, ᯂᯇᯩ ᯞᯀᯘᯬ᯲ ᯑᯬᯂᯖᯬ᯲ ᯑᯬ ᯤ ᯞᯬᯂᯖᯬ᯲
Diarahon muse dohot asu sangsing, asa haratanna hau i, hape, nang i, laos dohot do lohot tu si.
ᯑᯪᯀᯒᯂᯉᯬ᯲ ᯔᯮᯘᯩ ᯑᯬᯂᯖᯬ᯲ ᯀᯘᯮ ᯘᯰᯘᯪᯰ, ᯀᯘ ᯂᯒᯖᯉ᯲ᯉ ᯂᯥ ᯤ, ᯂᯇᯩ, ᯉᯰ ᯤ, ᯞᯀᯘᯬ᯲ ᯑᯬᯂᯖ ᯑᯬ ᯞᯬᯂᯖᯬ᯲ ᯖᯮᯘᯪ.
Asa ia dung lohot sude na manjangkit tu ginjang i, laos so boi mijur dibahen pamulut ni gota ni hau piutpiut tanggule i, laos gabe hau ma nasida sude disi.
ᯀᯘ ᯤᯀ ᯑᯮᯰ ᯞᯬᯂᯖᯬ᯲ ᯘᯮᯑᯩ ᯉᯔᯉ᯲ᯐᯰᯄ᯦ᯖᯪ᯲ ᯖᯮ ᯎᯉᯪ᯲ᯐᯰ ᯤ, ᯞᯀᯘᯬ᯲ ᯘᯬ ᯅᯬᯤ ᯔᯪᯐᯒᯮ᯲ ᯑᯪᯅᯂᯉᯩ᯲ ᯇᯔᯮᯞᯖᯮ᯲ ᯉᯪ ᯎᯬᯖ ᯉᯪ ᯂᯥ ᯇᯪᯀᯖᯮ᯲ᯇᯪᯀᯖᯮ᯲ ᯖᯰᯎᯮᯞᯩ ᯤ, ᯞᯀᯘᯬ᯲ ᯎᯅᯩ ᯂᯥ ᯔ ᯉᯘᯪᯑ ᯘᯮᯑᯩ ᯑᯪᯘᯪ.
Ianggo Guru Satia Bulan dohot jolmana Si Boru Jongjong Anian Si Boru Tibal tudosan, hau jadi jadian, jolma na so mar tudosan, nunga tung mansai marsak rohanasida, malampot ate atena pasarisari ianakkonnasida naung gabe hau i.
ᯤᯀᯰᯎᯬ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯑᯬᯂᯬᯖ᯲ ᯐᯞo\ᯔᯉ ᯘᯪᯅᯬᯒᯮ ᯐᯬᯰᯐᯬᯰ ᯀᯉᯪᯀᯉ᯲ ᯘᯪᯅᯬᯒᯮ ᯖᯪᯅᯞ᯲ ᯖᯮᯑᯬᯘᯉ᯲, ᯂᯥ ᯐᯑᯪᯐᯑᯪᯀᯉ᯲, ᯐᯞᯬ᯲ᯔ ᯉ ᯘᯬᯔᯒ᯲ᯖᯮᯑᯬᯘᯉ᯲, ᯉᯮᯝ ᯖᯮᯰ ᯔᯉ᯲ᯘᯤ ᯔᯒ᯲ᯘᯄ᯦᯲ ᯒᯬᯂ ᯉᯘᯪᯑ, ᯔᯞᯔ᯲ᯇᯖᯬ᯲ ᯀᯖᯩᯀᯖᯩᯉ ᯇᯘᯒᯪᯘᯒᯪ ᯤᯀᯉᯄ᯦᯲ᯄ᯦ᯉᯬ᯲ᯉᯘᯪᯑ ᯉᯀᯮᯰ ᯎᯅᯩ ᯂᯥ ᯤ.
Digalmiti nasida ma hurumna, digotili lambiakna ; angkadekdek ma ilunasida ditangkupi hambirangna; indang laho be sipanganon dipangan nasida, mansai morniang ma nang dagingnasida.
ᯑᯪᯎᯞ᯲ᯔᯪᯖᯪ ᯉᯘᯪᯑ ᯔ ᯂᯮᯒᯔᯮ᯲ᯉ, ᯑᯪᯎᯬᯖᯪᯞᯪ ᯞᯔ᯲ᯅᯪᯀᯄ᯦᯲ᯉ; ᯀᯰᯄ᯦ ᯑᯄᯩ᯦᯲ᯑᯄᯩ᯦᯲ ᯔ ᯤᯞᯮ ᯉᯘᯪᯑ ᯑᯪᯖᯰᯄ᯦ᯮᯇᯪ ᯂᯔ᯲ᯅᯪᯒᯰᯉ; ᯀᯉᯪ᯲ᯑᯰ ᯞᯂᯬ ᯅᯩ ᯘᯪᯇᯝᯉᯉᯬ᯲ ᯑᯪᯇᯝᯉ᯲ ᯉᯘᯪᯑ, ᯔᯉ᯲ᯘᯤ ᯔᯒᯬ᯲ᯉᯪᯀᯰ ᯔ ᯉᯰ ᯑᯎᯪᯰ ᯉᯘᯪᯑ.
Ia dung sai songon i, laos so sonang do rohanasida, gabe dialapi ma Datu Tala di Babana. Dipalolo i ma antong hasea na pitu, dipatungkap ma ampang, mangulpuk ma ibana, didok ma, "Ingkon tabaon do hau on, asa ganaonku!" ninna.
ᯤᯀᯑᯮᯰᯘᯤᯘᯬᯝᯬᯉ᯲ᯤ,ᯞᯀᯬᯘ᯲ᯘᯬᯘᯬᯉᯰᯑᯬᯒᯬᯂᯉᯘᯪᯑ,ᯎᯅᯩᯑᯪᯀᯞᯇᯪᯔᯑᯖᯮᯖᯞᯑᯪᯅᯅᯉ.ᯑᯪᯇᯞᯬᯞᯬᯤᯔᯀᯉ᯲ᯖᯬᯰᯂᯘᯩᯀᯉᯇᯪᯖᯮ,ᯑᯪᯇᯎᯮᯰᯂᯇ᯲ᯔᯀᯔ᯲ᯇᯰ,ᯔᯝᯮᯞ᯲ᯇᯮᯂ᯲ᯔᯤᯅᯉ,ᯑᯪᯑᯬᯂ᯲ᯔ,"ᯀᯪᯰᯂᯬᯉ᯲ᯖᯅᯀᯬᯉ᯲ᯑᯬᯂᯥᯀᯬᯉ᯲,ᯀᯘᯎᯉᯀᯬᯉ᯲ᯂᯮ!"ᯉᯪᯉ᯲ᯉ.
Dung i ditaba ma hau i, alai indadong olo bil; angkatolpang tangke, angkaropang jarbang, angkaleu dohot baliung, matua so olo do maluhit hau i dibahen.
ᯑᯮᯰ ᯤ ᯑᯪᯖᯅ ᯔ ᯂᯥ ᯤ, ᯀᯞᯤ ᯀᯉᯪ᯲ᯑᯑᯬᯰ ᯀᯬᯞᯬ ᯅᯞᯪ᯲; ᯀᯰᯄ᯦ ᯖᯞᯬ᯲ᯇᯰ ᯖᯰᯄᯩ᯦, ᯀᯰᯄ᯦ ᯒᯬᯇᯰ ᯐᯒ᯲ᯅᯰ, ᯀᯰᯄ᯦ ᯞᯩᯥ ᯑᯬᯂᯖᯬ᯲ ᯅᯞᯪᯀᯮᯰ, ᯔᯖᯮᯀ ᯘᯬ ᯀᯬᯞᯬ ᯑᯬ ᯔᯞᯮᯂᯖᯪ᯲ ᯂᯥ ᯤ ᯑᯪᯅᯂᯉᯩ᯲.
Dung i sian na so panagaman, mangkuling ma Si Boru Sopak Panaluan, na lohot di hau i, didok ma, "Molo naeng marumpak hami bahenonmuna, ingkon jolo bahenonmuna do peleanku, i ma: ihan na niura, tuak tangkasan dohot sirapege.".
ᯑᯮᯰ ᯤ ᯘᯪᯀᯉ᯲ ᯉ ᯘᯬ ᯇᯉᯎᯔᯉ᯲, ᯔᯰᯄ᯦ᯮᯞᯪᯰ ᯔ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲, ᯉ ᯞᯬᯂᯖᯬ᯲ ᯑᯪ ᯂᯥ ᯤ, ᯑᯪᯑᯄ᯦ᯬ᯲ ᯔ, "ᯔᯬᯞᯬ ᯉᯀᯰᯩ ᯔᯒᯔᯮ᯲ᯇᯄ᯦᯲ ᯂᯔᯪ ᯅᯂᯩᯉᯉᯬ᯲ᯔᯮᯉ, ᯀᯪᯰᯄ᯦ᯉᯬ᯲ ᯐᯬᯞᯬ ᯅᯂᯩᯉᯉᯬ᯲ᯔᯮᯉ ᯑᯬ ᯇᯩᯞᯩᯀᯉ᯲ᯄ᯦ᯮ, ᯤ ᯔ: ᯤᯂᯉ᯲ ᯉ ᯉᯪᯥᯒ, ᯖᯮᯀᯄ᯦᯲ ᯖᯰᯄ᯦ᯘᯉ᯲ ᯑᯬᯂᯖᯬ᯲ ᯘᯪᯒ ᯇᯩᯎᯩ.".
Alai dibahen nasida pe songon na ni dokna i, tong do so olo bil hau i ditaba.
ᯀᯞᯤ ᯑᯪᯅᯂᯉᯩ᯲ ᯉᯘᯪᯑ ᯇᯩ ᯘᯬᯝᯉᯬ᯲ ᯉ ᯉᯪᯑᯄ᯦ᯬ᯲ᯉ ᯤ, ᯖᯬᯰ ᯑᯬ ᯘᯬ ᯀᯬᯞᯬ ᯅᯞᯪ᯲ ᯂᯥ ᯤ ᯑᯪᯖᯅ.
Dung i mangandungi ma Si Boru Sopak Panaluan, laos didok ma tu datu i, "Hansitna i, ale : amang, na hutaonhami on! Tu ho do ahu, ale amang datu, morbilang-bilang; tu ho do ahu morsapata arian morsapata borngin, ai ala ni bahen-bahenanmu do umbahen songon on hansitna hutaon."
ᯑᯮᯰ ᯤ ᯔᯝᯉ᯲ᯑᯮᯝᯪ ᯔ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲, ᯞᯀᯘᯬ᯲ ᯑᯪᯑᯄ᯦ᯬ᯲ ᯔ ᯖᯮ ᯑᯖᯮ ᯤ," ᯂᯉ᯲ᯘᯖᯪ᯲ ᯉ ᯤ, ᯀᯞᯩ: ᯀᯔᯰ, ᯉ ᯂᯮᯖᯀᯉᯬ᯲ ᯂᯔᯪ ᯀᯉᯬ᯲! ᯖᯮ ᯂᯬ ᯑᯬ ᯀᯂᯮ, ᯀᯞᯩ ᯀᯔᯰ ᯑᯖᯮ, ᯔᯒᯬ᯲ᯅᯪᯞᯰᯅᯪᯞᯰ; ᯖᯮ ᯂᯬ ᯑᯬ ᯀᯂᯮ ᯔᯒᯬ᯲ᯘᯇᯖ ᯀᯒᯪᯀᯉ᯲ ᯔᯒᯬ᯲ᯘᯇᯖ ᯅᯒᯬ᯲ᯝᯉᯪ᯲, ᯀᯤ ᯀᯞ ᯉᯪ ᯅᯂᯉᯩ᯲ᯅᯂᯩᯉᯉ᯲ᯔᯮ ᯑᯬ ᯀᯔᯮ᯲ᯅᯂᯉᯩ᯲ ᯘᯬᯝᯉᯬ᯲ ᯀᯉᯬ᯲ ᯂᯉ᯲ᯘᯖᯪ᯲ ᯉ ᯂᯮᯖᯀᯉᯬ᯲."
Dung i dialusi datu i ma hatana i, didok ma, "Palias i, ale Boru Sopak Panaluan , ai luhutna do halak masiulahon ula-ulana dohot na binotona. Alai luhutna i, tu datu panggorga, tu datu panggana ma ho marsapata, tu si ma ho morbilang-bilang, indada tu ahu, ai ibana do sibahen na hansit portinaonanmu."
ᯑᯮᯰ ᯤ ᯑᯪᯀᯞᯮᯘᯪ ᯑᯖᯮ ᯤ ᯔ ᯂᯖᯉ ᯤ, ᯑᯪᯑᯄ᯦ᯬ᯲ ᯔ, "ᯇᯞᯪᯀᯘ᯲ ᯤ, ᯀᯞᯩ ᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲, ᯀᯤ ᯞᯮᯂᯖᯮ᯲ᯉ ᯑᯬ ᯂᯞᯄ᯦᯲ ᯔᯘᯪᯥᯞᯂᯉᯬ᯲ ᯥᯞᯥᯞᯉ ᯑᯬᯂᯖᯬ᯲ ᯉᯅᯪᯉᯬᯖᯬᯉ. ᯀᯞᯤ ᯞᯮᯂᯖᯮ᯲ᯉ ᯤ, ᯖᯮ ᯑᯖᯮ ᯇᯰᯎᯒᯬ᯲ᯎ, ᯖᯮ ᯑᯖᯮ ᯇᯰᯎᯉ ᯔ ᯂᯬ ᯔᯒ᯲ᯘᯇᯖ, ᯖᯮᯘᯪ ᯔ ᯂᯬ ᯔᯒ᯲ᯅᯪᯞᯰᯅᯪᯞᯰ, ᯀᯉᯪ᯲ᯑᯑ ᯖᯮ ᯀᯂᯮ, ᯀᯤ ᯤᯅᯉ ᯑᯬ ᯘᯪᯅᯂᯉᯩ᯲ ᯉ ᯂᯉ᯲ᯘᯖᯪ᯲ ᯇᯒᯬ᯲ᯖᯪᯉᯀᯬᯉᯉ᯲ᯔᯮ."
Dung i didok Si Boru Sopak Panaluan ma tu datu panggorga i, "Sai morsapata arian do ahu tu ho, morsapata borngin, ai bahen bahenanmu do hape , umbahen na songon on mago ahu."
ᯑᯮᯰ ᯤ ᯑᯪᯑᯄ᯦ᯬ᯲ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲ ᯔ ᯖᯮ ᯑᯖᯮ ᯇᯰᯎᯒᯬ᯲ᯎ ᯤ, "ᯘᯤ ᯔᯒᯬ᯲ᯘᯇᯖ ᯀᯒᯪᯀᯉ᯲ ᯑᯬ ᯀᯂᯮ ᯖᯮ ᯂᯬ, ᯔᯒᯬ᯲ᯘᯇᯖ ᯅᯒᯬ᯲ᯝᯉᯪ᯲, ᯀᯤ ᯅᯂᯉᯩ᯲ᯅᯂᯩᯉᯉ᯲ᯔᯮ ᯑᯬ ᯂᯇᯩ, ᯀᯔᯮ᯲ᯅᯂᯉᯩ᯲ ᯉ ᯘᯬᯝᯉᯬ᯲ ᯀᯉᯬ᯲ ᯔᯎᯬ ᯀᯂᯮ."
Alai didok datu panggorga i ma mangalusi: "indada tu ahu i dohononmu, tu panopa i ma sudolhon; aik unang ula-ula angka na tinopaanna i, indang mahua songon i taononmu."
ᯀᯞᯤ ᯑᯪᯑᯄ᯦ᯬ᯲ ᯑᯖᯮ ᯇᯰᯎᯒᯬ᯲ᯎ ᯤ ᯔ ᯔᯝᯞᯮᯘᯪ: "ᯀᯉᯪ᯲ᯑᯑ ᯖᯮ ᯀᯂᯮ ᯤ ᯑᯬᯂᯬᯉᯉᯬ᯲ᯔᯮ, ᯖᯮ ᯇᯉᯬᯇ ᯤ ᯔ ᯘᯮᯑᯞᯬ᯲ᯂᯉᯬ᯲; ᯀᯀᯄ᯦ᯪ᯲ ᯥᯉᯰ ᯥᯞᯥᯞ ᯀᯰᯄ᯦ ᯉ ᯖᯪᯉᯬᯇᯀᯉ᯲ᯉ ᯤ, ᯀᯉᯪ᯲ᯑᯰ ᯔᯂᯮᯀ ᯘᯬᯝᯉᯬ᯲ ᯤ ᯖᯀᯬᯉᯉᯬ᯲ᯔᯮ."
Dung i didok Si Boru Sopak Panaluan ma tu panopa i, "Sai ombushon ma i, ale alogo simorangin-angin, ai panopa i do hape mambahen ahu songon on!"
ᯑᯮᯰ ᯤ ᯑᯪᯑᯄ᯦ᯬ᯲ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲ ᯔ ᯖᯮᯇᯉᯬᯇ ᯤ, "ᯘᯤ ᯀᯔᯬ᯲ᯅᯘᯮ᯲ᯂᯉᯬ᯲ᯔ ᯤ, ᯀᯞᯩ ᯀᯞᯬᯎᯬ ᯘᯪᯔᯬᯒᯝᯉᯪ᯲ᯀᯝᯉᯪ᯲, ᯀᯤ ᯇᯉᯬᯇ ᯤ ᯑᯬ ᯂᯇᯩ ᯔᯔ᯲ᯅᯂᯉᯩ᯲ ᯀᯂᯮ ᯘᯬᯝᯉᯬ᯲ ᯀᯉᯬ᯲!"
Alai didok panopil i ma alusna, "Tu pangumbak i ma i dok, indada tu ahu ; aik unang na diumbak ibana, indada manjadi ula ula i topaonku".
ᯀᯞᯤ ᯑᯪᯑᯄ᯦ᯬ᯲ ᯇᯉᯬᯇᯞᯪ᯲ ᯤ ᯔ ᯀᯞᯘᯮ᯲ᯉ, "ᯖᯮ ᯇᯝᯔᯮ᯲ᯅᯄ᯦᯲ ᯤ ᯔ ᯤ ᯑᯄ᯦ᯬ᯲, ᯀᯉᯪ᯲ᯑᯑ ᯖᯮ ᯀᯂᯮ; ᯀᯄ᯦ᯪ᯲ ᯥᯉᯰ ᯉ ᯑᯪᯀᯔᯮ᯲ᯅᯄ᯦᯲ ᯤᯅᯉ, ᯀᯉᯪ᯲ᯑᯑ ᯔᯉ᯲ᯐᯑᯪ ᯥᯞᯥᯞ ᯤ ᯖᯬᯇᯀᯉᯬ᯲ᯄ᯦ᯮ".
Dung i didok Si Boru Sopak Panaluan ma tu pangumbak i, "Ho, ale pangumbak! Sai morsapata arian do ahu tu ho, mor bilang-bilang borngin , ai porulaanmu ma hape, sibahen ahu tu hamagoan."
ᯑᯮᯰ ᯤ ᯑᯪᯑᯄ᯦ᯬ᯲ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲ ᯔ ᯖᯮ ᯇᯝᯔᯮ᯲ᯅᯄ᯦᯲ ᯤ, "ᯂᯬ ᯀᯞᯩ ᯇᯝᯔᯮ᯲ᯅᯄ᯦᯲! ᯘᯤ ᯔᯒᯬ᯲ᯘᯇᯖ ᯀᯒᯪᯀᯉ᯲ ᯑᯬ ᯀᯂᯮ ᯖᯮ ᯂᯬ, ᯔᯒᯬ᯲ᯅᯪᯞᯰᯅᯪᯞᯰ ᯅᯒᯬ᯲ᯝᯉᯪ᯲, ᯀᯤ ᯇᯬᯒᯮᯞᯀᯉ᯲ᯔᯮ ᯔ ᯂᯇᯩ, ᯘᯪᯅᯂᯉᯩ᯲ ᯀᯂᯮ ᯖᯮ ᯂᯔᯎᯬᯀᯉ᯲."
Didok pangumbak i mangalusi: "Tu arang i ma i dok, indada tu ahu ; aik unang na olo i galak umbahonku, indada morhua saut bosi i gabe ula-ula."
ᯑᯪᯑᯄ᯦ᯬ᯲ ᯇᯝᯔᯮ᯲ᯅᯄ᯦᯲ ᯤ ᯔᯝᯞᯮᯘᯪ: "ᯖᯮ ᯀᯒᯰ ᯤ ᯔ ᯤ ᯑᯄ᯦ᯬ᯲, ᯀᯉᯪ᯲ᯑᯑ ᯖᯮ ᯀᯂᯮ; ᯀᯄ᯦ᯪ᯲ ᯥᯉᯰ ᯉ ᯀᯬᯞᯬ ᯤ ᯎᯞᯄ᯦᯲ ᯀᯔᯮ᯲ᯅᯂᯉᯬ᯲ᯄ᯦ᯮ, ᯀᯉᯪ᯲ᯑᯑ ᯔᯒᯬ᯲ᯂᯮᯀ ᯘᯀᯖᯮ᯲ ᯅᯬᯘᯪ ᯤ ᯎᯅᯩ ᯥᯞᯥᯞ."
Dung i didok Si Boru Sopak Panaluan tu arang i; "Ho do hape , ale arang, sibahen ahu songon on! Asa tu ho do ahu morsapata." ,
ᯑᯮᯰ ᯤ ᯑᯪᯑᯄ᯦ᯬ᯲ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲ ᯖᯮ ᯀᯒᯰ ᯤ; "ᯂᯬ ᯑᯬ ᯂᯇᯩ, ᯀᯞᯩ ᯀᯒᯰ, ᯘᯪᯅᯂᯉᯩ᯲ ᯀᯂᯮ ᯘᯬᯝᯉᯬ᯲ ᯀᯉᯬ᯲! ᯀᯘ ᯖᯮ ᯂᯬ ᯑᯬ ᯀᯂᯮ ᯔᯒᯬ᯲ᯘᯇᯖ."
Alai didok arang i ma alusna , "Palias ma hatami, tu api i ma dok, ibana do sibahen i."
ᯀᯞᯤ ᯑᯪᯑᯄ᯦ᯬ᯲ ᯀᯒᯰ ᯤ ᯔ ᯀᯞᯘᯮ᯲ᯉ, "ᯇᯞᯪᯀᯘ᯲ ᯔ ᯂᯖᯔᯪ, ᯖᯮ ᯀᯇᯪ ᯤ ᯔ ᯑᯄ᯦ᯬ᯲, ᯤᯅᯉ ᯑᯬ ᯘᯪᯅᯂᯉᯩ᯲ ᯤ."
Dung i didok Si Boru Sopak Panaluan ma tu api i, "Tu ho do ahu hape morbilang-bilang, ale api, ai pambahenmu do hape, umbahen mago ahu."
ᯑᯮᯰ ᯤ ᯑᯪᯑᯄ᯦ᯬ᯲ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲ ᯔ ᯖᯮ ᯀᯇᯪ ᯤ," ᯖᯮ ᯂᯬ ᯑᯬ ᯀᯂᯮ ᯂᯇᯩ ᯔᯒᯬ᯲ᯅᯪᯞᯰᯅᯪᯞᯰ, ᯀᯞᯩ ᯀᯇᯪ, ᯀᯤ ᯇᯔ᯲ᯅᯂᯉᯩ᯲ᯔᯮ ᯑᯬ ᯂᯇᯩ, ᯀᯔᯮ᯲ᯅᯂᯉᯩ᯲ ᯔᯎᯬ ᯀᯂᯮ."
"indang tu ahu i dohononmu, tu loting do, ai ibana do manjadihon ahu umbahen na adong; tu ibana ma ho morbilang-bilang", ninna api i mangalusi.
"ᯀᯉᯪ᯲ᯑᯰ ᯖᯮ ᯀᯂᯮ ᯤ ᯑᯬᯂᯬᯉᯉᯬ᯲ᯔᯮ, ᯖᯮ ᯞᯬᯖᯪᯰ ᯑᯬ, ᯀᯤ ᯤᯅᯉ ᯑᯬ ᯔᯉ᯲ᯐᯑᯪᯂᯉᯬ᯲ ᯀᯂᯮ ᯀᯔᯮ᯲ᯅᯂᯉᯩ᯲ ᯉ ᯀᯑᯬᯰ; ᯖᯮ ᯤᯅᯉ ᯔ ᯂᯬ ᯔᯒᯬ᯲ᯅᯪᯞᯰᯅᯪᯞᯰ", ᯉᯉᯪ᯲ᯉ ᯀᯇᯪ ᯤ ᯔᯝᯞᯮᯘᯪ.
"Ho do hape, ale loting, sibahen hamamagongkon; asa tu ho ma ahu morsapata" , ninna Si Boru Sopak Panaluan tu loting i.
"ᯂᯬ ᯑᯬ ᯂᯇᯩ, ᯀᯞᯩ ᯞᯬᯖᯪᯰ, ᯘᯪᯅᯂᯉᯩ᯲ ᯂᯔᯔᯎᯬᯰᯄ᯦ᯉᯬ᯲; ᯀᯘ ᯖᯮ ᯂᯬ ᯔ ᯀᯂᯮ ᯔᯒᯬ᯲ᯘᯇᯖ", ᯉᯉᯪ᯲ᯉ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲ ᯖᯮ ᯞᯬᯖᯪᯰ ᯤ.
Dung i didok loting i ma mangalusi, "indada tu ahu i dohononmu, tu panopa do, ai ibana do manopa ahu umbahen na adong."
ᯑᯮᯰ ᯤ ᯑᯪᯑᯄ᯦ᯬ᯲ ᯞᯬᯖᯪᯰ ᯤ ᯔ ᯔᯝᯞᯮᯘᯪ, "ᯀᯉᯪ᯲ᯑᯑ ᯖᯮ ᯀᯂᯮ ᯤ ᯑᯬᯂᯬᯉᯉᯬ᯲ᯔᯮ, ᯖᯮ ᯇᯉᯬᯇ ᯑᯬ, ᯀᯤ ᯤᯅᯉ ᯑᯬ ᯔᯉᯬᯇ ᯀᯂᯮ ᯀᯔᯮ᯲ᯅᯂᯉᯩ᯲ ᯉ ᯀᯑᯬᯰ."
Didok Si Boru Sopak Panaluan muse hatana tu panopa i. Dipabali panopa i muse tu panggorga. Sai songon i ma nasida masipabali-balian, laho pasidingkon sapata ni Si Boru Sopak Panaluan.
ᯑᯪᯑᯄ᯦ᯬ᯲ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲ ᯔᯮᯘᯩ ᯂᯖᯉ ᯖᯮ ᯇᯉᯬᯇ ᯤ. ᯑᯪᯇᯅᯞᯪ ᯇᯉᯬᯇ ᯤ ᯔᯮᯘᯩ ᯖᯮ ᯇᯰᯎᯒᯬ᯲ᯎ. ᯘᯤ ᯘᯬᯝᯉᯬ᯲ ᯤ ᯔ ᯉᯘᯪᯑ ᯔᯘᯪᯇᯅᯞᯪᯅᯞᯪᯀᯉ᯲, ᯞᯂᯬ ᯇᯘᯪᯑᯪᯰᯄ᯦ᯉᯬ᯲ ᯘᯇᯖ ᯉᯪ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲.
Dung i mangkuling ma muse Si Boru Sopak Panaluan i, didok ma hatana tu amana Guru Satia Bulan, "Nunga songon on portinaonanku dibahen ho, ale amang, hahuaon!
ᯑᯮᯰ ᯤ ᯔᯰᯄ᯦ᯮᯞᯪᯰ ᯔ ᯔᯮᯘᯩ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲ ᯤ, ᯑᯪᯑᯄ᯦ᯬ᯲ ᯔ ᯂᯖᯉ ᯖᯮ ᯀᯔᯉ ᯎᯮᯒᯮ ᯘᯖᯪᯀ ᯅᯮᯞᯉ᯲, "ᯉᯮᯝ ᯘᯬᯝᯉᯬ᯲ ᯀᯉᯬ᯲ ᯇᯒᯬ᯲ᯖᯪᯉᯀᯬᯉᯉ᯲ᯄ᯦ᯮ ᯑᯪᯅᯂᯉᯩ᯲ ᯂᯬ, ᯀᯞᯩ ᯀᯔᯰ, ᯂᯂᯮᯀ ᯀᯉᯬ᯲!
Alai anggo on, siingotonmu : Sai bahen ma ahu tungkotmu di ari porudan, di dalan na landit, sulu sulum di ari golap. Antarhon ma ahu di pogu ni alaman uju mamele sumangot ni ompu, songon i nang uju laho borhat mormusu, nang di na laho mangalului ugasan mago ;
pagohon ahu di pogu ni alaman di hamamasa ni haba-haba , asa menak alogo, so halisungsung.
ᯀᯞᯤ ᯀᯰᯎᯬ ᯀᯉᯬ᯲, ᯘᯪᯤᯝᯬᯖᯉᯬ᯲ᯔᯮ: ᯘᯤ ᯅᯂᯉᯩ᯲ ᯔ ᯀᯂᯮ ᯖᯮᯰᯄ᯦ᯖᯬ᯲ᯔᯮ ᯑᯪ ᯀᯒᯪ ᯇᯬᯒᯮᯑᯉ᯲, ᯑᯪ ᯑᯞᯉ᯲ ᯉ ᯞᯉ᯲ᯑᯖᯪ᯲, ᯘᯮᯞᯮᯘᯮᯞᯔᯮ᯲ ᯑᯪ ᯀᯒᯪ ᯎᯬᯞᯇ᯲. ᯀᯉ᯲ᯖᯒ᯲ᯂᯉᯬ᯲ ᯔ ᯀᯂᯮ ᯑᯪ ᯇᯬᯎᯮ ᯉᯪ ᯀᯞᯔᯉ᯲ ᯥᯐᯮ ᯔᯔᯩᯞᯩ ᯘᯮᯔᯝᯖᯬ᯲ ᯉᯪ ᯀᯔᯬ᯲ᯇᯮ, ᯘᯬᯝᯉᯬ᯲ ᯤ ᯉᯰ ᯥᯐᯮ ᯞᯂᯬ ᯅᯒᯬ᯲ᯂᯖ᯲ ᯔᯒᯬ᯲ᯔᯮᯘᯮ, ᯉᯰ ᯑᯪ ᯉ ᯞᯂᯬ ᯔᯝᯞᯮᯞᯮᯤ ᯥᯎᯘᯉ᯲ ᯔᯎᯬ; ᯇᯎᯬᯂᯉᯬ᯲ ᯀᯂᯮ ᯑᯪ ᯇᯬᯎᯮ ᯉᯪ ᯀᯞᯔᯉ᯲ ᯑᯪ ᯂᯔᯔᯘ ᯉᯪ ᯂᯅᯂᯅ, ᯀᯘ ᯔᯩᯉᯄ᯦᯲ ᯀᯞᯬᯎᯬ, ᯘᯬ ᯂᯞᯪᯘᯮᯰᯘᯮᯰ.
Ia dioloi ho na hudok i, horas ma ho, paida-idaon ni halak ma ahu huhut. Songon i ma bahen nang di angka siulaon na asing pe, ro di na mamele pangulubalang, asa targoar ahu huhut tungkot ni pangulubalang. Dung i ingkon tortorhononmu do ahu di pogu ni alaman, asa gabe ho. Asa i ma pusaha di ho, sipeoponmu.
ᯤᯀ ᯑᯪᯀᯬᯞᯬᯤ ᯂᯬ ᯉ ᯂᯮᯑᯄ᯦ᯬ᯲ ᯤ, ᯂᯬᯒᯘ᯲ ᯔ ᯂᯬ, ᯇᯤᯑᯤᯑᯀᯉᯬ᯲ ᯉᯪ ᯂᯞᯄ᯦᯲ ᯔ ᯀᯂᯮ ᯂᯮᯂᯖᯮ᯲. ᯘᯬᯝᯉᯬ᯲ ᯤ ᯔ ᯅᯂᯉᯩ᯲ ᯉᯰ ᯑᯪ ᯀᯰᯄ᯦᯲ ᯘᯪᯥᯞᯀᯉᯬ᯲ ᯉ ᯀᯘᯪᯰ ᯇᯩ, ᯒᯬ ᯑᯪ ᯉ ᯔᯔᯩᯞᯩ ᯇᯝᯮᯞᯮᯅᯞᯰ, ᯀᯘ ᯖᯒ᯲ᯎᯬᯀᯒ᯲ ᯀᯂᯮ ᯂᯮᯂᯖᯮ᯲ ᯖᯮᯰ ᯂᯖᯬ᯲ ᯉᯪ ᯇᯝᯮᯞᯮᯅᯞᯰ. ᯑᯮᯰ ᯤ ᯀᯪᯰᯄ᯦ᯉᯬ᯲ ᯖᯒᯬ᯲ᯖᯒᯬ᯲ᯂᯬᯉᯉᯬ᯲ᯔᯮ ᯑᯬ ᯀᯂᯮ ᯑᯪ ᯇᯬᯎᯮ ᯉᯪ ᯀᯞᯔᯉ᯲, ᯀᯘ ᯎᯅᯩ ᯂᯬ. ᯀᯘ ᯤ ᯔ ᯇᯮᯘᯂ ᯑᯪ ᯂᯬ, ᯘᯪᯇᯩᯀᯬᯇᯉᯬ᯲ᯔᯮ
" Dung i dioloi Guru Satia Bulan ma pangidoan ni boruna i, Si Boru Sopak Panaluan, iboto ni Si Aji Donda Hatahutan, na marporhas tubu, sibahen haurahon di natorasna.
"ᯑᯮᯰ ᯤ ᯑᯪᯀᯬᯞᯬᯤ ᯎᯮᯒᯮ ᯘᯖᯪᯀ ᯅᯮᯞᯉ᯲ ᯔ ᯇᯝᯪᯑᯬᯀᯉ᯲ ᯉᯪ ᯅᯬᯒᯮᯉ ᯤ, ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲, ᯤᯅᯬᯖᯬ ᯉᯪ ᯘᯪ ᯀᯐᯪ ᯑᯉᯬ᯲ᯑ ᯂᯖᯂᯮᯖᯉ᯲, ᯉ ᯔᯒ᯲ᯇᯒᯬ᯲ᯂᯘ᯲ ᯖᯮᯅᯮ, ᯘᯪᯅᯂᯉᯩ᯲ ᯂᯥᯒᯂᯉᯬ᯲ ᯑᯪ ᯉᯖᯬᯒᯘ᯲ᯉ.
Asa molo adong na morporhas tubu, sada baoa sada boru-boru sahali manubuhon dibahen inana, · ingkon jamot do natorasna mangaramoti i, unang tubu haurahon di nasida na dua, songon
Si Aji Donda Hatahutan, na morroha mago tu ibotona gabe lohot nasida di hau piut-piut tanggule , i ma hau tada tada.
ᯀᯘ ᯔᯬᯞᯬ ᯀᯑᯬᯰ ᯉ ᯔᯒᯬ᯲ᯇᯒᯬ᯲ᯂᯘ᯲ ᯖᯮᯅᯮ, ᯘᯑ ᯅᯀᯬᯀ ᯘᯑ ᯅᯬᯒᯮᯅᯬᯒᯮ ᯘᯂᯞᯪ ᯔᯉᯮᯅᯮᯂᯉᯬ᯲ ᯑᯪᯅᯂᯉᯩ᯲ ᯤᯉᯉ,· ᯀᯪᯰᯄ᯦ᯉᯬ᯲ ᯐᯔᯖᯬ᯲ ᯑᯬ ᯉᯖᯬᯒᯘ᯲ᯉ ᯔᯝᯒᯔᯬᯖᯪ ᯤ, ᯥᯉᯰ ᯖᯮᯅᯮ ᯂᯥᯒᯂᯉᯬ᯲ ᯑᯪ ᯉᯘᯪᯑ ᯉᯑᯮᯀ, ᯘᯬᯝᯉᯬ᯲
ᯘᯪ ᯀᯐᯪ ᯑᯉᯬ᯲ᯑ ᯂᯖᯂᯮᯖᯉ᯲, ᯉ ᯔᯒᯬ᯲ᯒᯬᯂ ᯔᯎᯬ ᯖᯮ ᯤᯅᯬᯖᯬᯉ ᯎᯅᯩ ᯞᯬᯂᯖᯬ᯲ ᯉᯘᯪᯑ ᯑᯪ ᯂᯥ ᯇᯪᯀᯖᯮ᯲ᯇᯪᯘᯖᯮ᯲ ᯖᯰᯎᯮᯞᯩ, ᯤ ᯔ ᯂᯥ ᯖᯑᯖᯑ.
ingkon jaga do natoras ni dakdanak na morporhas tubu i manjaga anakkonna i unang tubu hasusaan dohot hailaon; ingkon pulik panaguhan do i bahenonna, pulik pormemean, pulik pormeaman dohot pulik podoman.
ᯀᯪᯰᯄ᯦ᯉᯬ᯲ ᯐᯎ ᯑᯬ ᯉᯖᯬᯒᯘ᯲ ᯉᯪ ᯑᯄ᯦᯲ᯑᯉᯄ᯦᯲ ᯉ ᯔᯒᯬ᯲ᯇᯒᯬ᯲ᯂᯘ᯲ ᯖᯮᯅᯮ ᯤ ᯔᯉ᯲ᯐᯎ ᯀᯉᯄ᯦᯲ᯄ᯦ᯉᯬ᯲ᯉ ᯤ ᯥᯉᯰ ᯖᯮᯅᯮ ᯂᯘᯮᯘᯀᯉ᯲ ᯑᯬᯂᯖᯬ᯲ ᯂᯤᯞᯀᯉᯬ᯲; ᯀᯪᯰᯄ᯦ᯉᯬ᯲ ᯇᯮᯞᯄ᯦ᯪ᯲ ᯇᯉᯎᯮᯂᯉ᯲ ᯑᯬ ᯤ ᯅᯂᯩᯉᯉᯬ᯲ᯉ, ᯇᯮᯞᯄ᯦ᯪ᯲ ᯇᯒᯬ᯲ᯔᯩᯔᯩᯀᯉ᯲, ᯇᯮᯞᯄ᯦ᯪ᯲ ᯇᯒᯬ᯲ᯔᯩᯀᯔᯉ᯲ ᯑᯬᯂᯖᯬ᯲ ᯇᯮᯞᯄ᯦ᯪ᯲ ᯇᯬᯑᯬᯔᯉ᯲
Ia dung sun didok Si Boru Sopak Panaluan tonana i tu amana Guru Satia Bulan, bot ma ari, gabe mulak ma nasida dohot angka donganna tu huta.
ᯤᯀ ᯑᯮᯰ ᯘᯉᯮ᯲ ᯑᯪᯑᯄ᯦ᯬ᯲ ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲ ᯖᯬᯉᯉ ᯤ ᯖᯮ ᯀᯔᯉ ᯎᯮᯒᯮ ᯘᯖᯪᯀ ᯅᯮᯞᯉ᯲, ᯅᯖᯬ᯲ ᯔ ᯀᯒᯪ, ᯎᯅᯩ ᯔᯮᯞᯄ᯦᯲ ᯔ ᯉᯘᯪᯑ ᯑᯬᯂᯖᯬ᯲ ᯀᯰᯄ᯦ ᯑᯬᯝᯉ᯲ᯉ ᯖᯮ ᯂᯮᯖ.
Dung i morsogotna i, ro ma haba-haba siampalautus, halisungsung morpiu-piu, dibutbut ma hau piut-piut tanggule i, halohotan nasida i. ro di angka dongannasida na lohot tu si, diboan alogo i ma i laos dipeakkon tu alaman ni Guru Satia Bulan.
ᯑᯮᯰ ᯤ ᯔᯒᯬ᯲ᯘᯬᯎᯖᯬ᯲ᯉ ᯤ, ᯒᯬ ᯔ ᯂᯅᯂᯅ ᯘᯪᯀᯔ᯲ᯇᯞᯥᯖᯘᯮ᯲, ᯂᯞᯪᯘᯮᯰᯘᯮᯰ ᯔᯒᯬ᯲ᯇᯪᯥᯇᯪᯥ, ᯑᯪᯅᯖᯮ᯲ᯅᯖᯮ᯲ ᯔ ᯂᯥ ᯇᯪᯀᯖᯮ᯲ᯇᯪᯀᯖᯮ᯲ ᯖᯰᯎᯮᯞᯩ ᯤ, ᯂᯞᯬᯂᯬᯖᯉ᯲ ᯉᯘᯪᯑ ᯤ. ᯒᯬ ᯑᯪ ᯀᯰᯄ᯦ ᯑᯬᯝᯉ᯲ᯉᯘᯪᯑ ᯉ ᯞᯬᯂᯖᯬ᯲ ᯖᯮ ᯘᯪ, ᯑᯪᯅᯬᯀᯉ᯲ ᯀᯞᯬᯎᯬ ᯤ ᯔ ᯤ ᯞᯀᯘᯬ᯲ ᯑᯪᯇᯩᯀᯄ᯦᯲ᯄ᯦ᯉᯬ᯲ ᯖᯮ ᯀᯞᯔᯉ᯲ ᯉᯪ ᯎᯮᯒᯮ ᯘᯖᯪᯀ ᯅᯮᯞᯉ᯲.
Dung i ro ma datu panggana, datu panggorga, dibolai ma hau i, digana ma i tudos tu rupa ni sude na mate di hau i, dung i dipambagihon ma hau na ginana i ris morompu-ompu.
ᯑᯮᯰ ᯤ ᯒᯬ ᯔ ᯑᯖᯮ ᯇᯰᯎᯉ, ᯑᯖᯮ ᯇᯰᯎᯒᯬ᯲ᯎ, ᯑᯪᯅᯬᯞᯤ ᯔ ᯂᯥ ᯤ, ᯑᯪᯎᯉ ᯔ ᯤ ᯖᯮᯑᯘᯬ᯲ ᯖᯮ ᯒᯮᯇ ᯉᯪ ᯘᯮᯑᯩ ᯉ ᯔᯖᯩ ᯑᯪ ᯂᯥ ᯤ, ᯑᯮᯰ ᯤ ᯑᯪᯇᯔ᯲ᯅᯎᯪᯂᯉᯬ᯲ ᯔ ᯂᯥ ᯉᯎᯪᯉᯉ ᯤ ᯒᯘᯪ᯲ ᯔᯬᯒᯔᯬ᯲ᯇᯮᯀᯔᯬ᯲ᯇᯮ.
Asa i ma mula ni tunggal panaluan, na pinamasa ni angka datu Batak di lan ulaon ni halak ·sipelebegu.
ᯀᯘ ᯤ ᯔ ᯔᯮᯞ ᯉᯪ ᯖᯮᯰᯎᯞ᯲ ᯇᯉᯞᯮᯀᯉ᯲, ᯉ ᯇᯪᯉᯔᯘ ᯉᯪ ᯀᯰᯄ᯦ ᯑᯖᯮ ᯅᯖᯄ᯦᯲ ᯑᯪ ᯞᯉ᯲ ᯥᯞᯀᯉᯬ᯲ ᯉᯪ ᯂᯞᯄ᯦᯲ ᯘᯪᯇᯩᯞᯩ ᯅᯩᯎᯮ.
Gana porginjang i ma suman-suman ni Si Aji Donda Hatahutan angka na di toruna i ma suman-suman ni sude datu na naeng paluahon nasida, na laos lohot tu si dohot nasa na manaek tu si.
ᯎᯉ ᯇᯒᯬ᯲ᯎᯉᯪ᯲ᯐᯰ ᯤ ᯔ ᯘᯮᯔᯉ᯲ᯘᯮᯔᯉ᯲ ᯉᯪ ᯘᯪ ᯀᯐᯪ ᯑᯉᯬ᯲ᯑ ᯂᯖᯂᯮᯖᯉ᯲ ᯀᯰᯄ᯦ ᯉ ᯑᯪ ᯖᯬᯒᯮᯉ ᯤ ᯔ ᯘᯮᯔᯉ᯲ᯘᯮᯔᯉ᯲ ᯉᯪ ᯘᯮᯑᯩ ᯑᯖᯮ ᯉ ᯉᯀᯰᯩ ᯇᯞᯮᯀᯂᯉᯬ᯲ ᯉᯘᯪᯑ, ᯉ ᯞᯀᯘᯬ᯲ ᯞᯬᯂᯖᯬ᯲ ᯖᯮᯘᯪ ᯑᯬᯂᯖᯬ᯲ ᯉᯘ ᯉ ᯔᯉᯀᯄᯩ᯦᯲ ᯖᯮᯘᯪ.
Ia pauli tunggal panaluan datu, ingkon hau piutpiut tanggule do bahenona i ma hau tada-tada. Tunggal panaluan i ma ninna situlak aji ni halak, sitampar aji ni begu.
ᯤᯀ ᯇᯥᯞᯪ ᯖᯮᯰᯎᯞ᯲ ᯇᯉᯞᯮᯀᯉ᯲ ᯑᯖᯮ, ᯀᯪᯰᯄ᯦ᯉᯬ᯲ ᯂᯥ ᯇᯪᯀᯖᯮ᯲ᯇᯪᯀᯖᯮ᯲ ᯖᯰᯎᯮᯞᯩ ᯑᯬ ᯅᯂᯩᯉᯉᯬ᯲ ᯤ ᯔ ᯂᯥ ᯖᯑᯖᯑ ᯖᯮᯰᯎᯞ᯲ ᯇᯉᯞᯮᯀᯉ᯲ ᯤ ᯔ ᯉᯪᯉ᯲ᯉ ᯘᯪᯖᯮᯞᯄ᯦᯲ ᯀᯐᯪ ᯉᯪ ᯂᯞᯄ᯦᯲, ᯘᯪᯖᯔ᯲ᯇᯒ᯲ ᯀᯐᯪ ᯉᯪ ᯅᯩᯎᯮ.
Songon on ma dibahen pangulahonna di deba ulaon ni sipelebegu.
ᯘᯬᯝᯉᯬ᯲ ᯀᯉᯬ᯲ ᯔ ᯑᯪᯅᯂᯉᯩ᯲ ᯇᯝᯮᯞᯂᯉᯬ᯲ᯉ ᯑᯪ ᯑᯩᯅ ᯥᯞᯀᯉᯬ᯲ ᯉᯪ ᯘᯪ ᯇᯩᯞᯩ ᯅᯩᯎᯮ.
1. Uju mamantom horbo, laho mamele simangot ni ompu.' Molo tole halak morhobas laho mamele simangot ni ompu, ingkon rim ma ria sabius i manggugu hepeng pasihorbo pelean sitonggohonon ni datu tu simangot ni ompunasida, laho, mangido panggabean, porhorasan, hasangapon, gabe ni na niula, sinur ni na pinahan.
ᯥᯐᯮ ᯔᯔᯉ᯲ᯖᯔᯬ᯲ ᯂᯒᯬ᯲ᯅᯬ, ᯞᯂᯬ ᯔᯔᯩᯞᯩ ᯘᯪᯔᯝᯖᯬ᯲ ᯉᯪ ᯀᯔᯬ᯲ᯇᯮ. ᯔᯬᯞᯬ ᯖᯬᯞᯩ ᯂᯞᯄ᯦᯲ ᯔᯒᯬ᯲ᯂᯬᯅᯘ᯲ ᯞᯂᯬ ᯔᯔᯩᯞᯩ ᯘᯪᯔᯝᯖᯬ᯲ ᯉᯪ ᯀᯔᯬ᯲ᯇᯮ, ᯀᯪᯰᯄ᯦ᯉᯬ᯲ ᯒᯔᯪ᯲ ᯔ ᯒᯪᯀ ᯘᯅᯪᯀᯘᯮ᯲ ᯤ ᯔᯰᯎᯮᯎᯮ ᯂᯩᯇᯰᯩ ᯇᯘᯪᯂᯒᯬ᯲ᯅᯬ ᯇᯩᯞᯩᯀᯉ᯲ ᯘᯪᯖᯬᯰᯎᯬᯂᯬᯉᯉᯬ᯲ ᯉᯪ ᯑᯖᯮ ᯖᯮ ᯘᯪᯔᯝᯖᯬ᯲ ᯉᯪ ᯀᯔᯬ᯲ᯇᯮ ᯉᯘᯪᯑ, ᯞᯂᯬ, ᯔᯝᯪᯑᯬ ᯇᯰᯎᯅᯩᯀᯉ᯲, ᯇᯒᯬ᯲ᯂᯬᯒᯘᯉ᯲, ᯂᯘᯝᯇᯉᯬ᯲, ᯎᯅᯩ ᯉᯪ ᯉ ᯉᯪᯥᯞ, ᯘᯪᯉᯒᯮ᯲ ᯉᯪ ᯉ ᯇᯪᯉᯂᯉ᯲
Paluonna ma disi gondang laho mangelek-elek simangot ni ompunasida i, asa siar tu hasandaranna, asa pasahatonnasida peleanna i.
ᯇᯞᯮᯀᯉᯬ᯲ᯉ ᯔ ᯑᯪᯘᯪ ᯎᯉᯬ᯲ᯑᯰ ᯞᯂᯬ ᯔᯝᯩᯞᯄᯩ᯦᯲ᯀᯩᯞᯄᯩ᯦᯲ ᯘᯪᯔᯝᯖᯬ᯲ ᯉᯪ ᯀᯔᯬ᯲ᯇᯮ ᯉᯘᯪᯑ ᯤ, ᯀᯘ ᯘᯪᯀᯒ᯲ ᯖᯮ ᯂᯘᯉ᯲ᯑᯒᯉ᯲ᯉ, ᯀᯘ ᯇᯘᯂᯖᯉᯬ᯲ ᯉᯘᯪᯑ ᯇᯩᯞᯩᯀᯉ᯲ᯉ ᯤ.
Sipata antong pitu gondang dipalu jala ditortori angka na torop morsorin-sorin, i pe asa olo siar porsimangotan i.
ᯘᯪᯇᯖ ᯀᯉ᯲ᯖᯬᯰ ᯇᯪᯖᯮ ᯎᯉᯬ᯲ᯑᯰ ᯑᯪᯇᯞᯮ ᯐᯞ ᯑᯪᯖᯒᯬ᯲ᯖᯬᯒᯪ ᯀᯰᯄ᯦ ᯉᯖᯬᯒᯇᯬ᯲ ᯔᯒᯬ᯲ᯘᯬᯒᯉᯪ᯲ᯘᯬᯒᯉᯪ᯲, ᯤ ᯇᯩ ᯀᯘ ᯀᯬᯞᯬ ᯘᯪᯀᯒ᯲ ᯇᯒᯬ᯲ᯘᯪᯔᯝᯬᯖᯉ᯲ ᯤ.
Ia naeng datu i manortor, dipeakkon ma bindu matoga di alaman i, ditiop ma tunggal panaluan i, ditali-tali ma i denggan.
ᯤᯀ ᯉᯀᯰᯩ ᯑᯖᯮ ᯤ ᯔᯉᯒᯬ᯲ᯖᯒᯬ᯲, ᯑᯪ ᯇᯩᯀᯄ᯦᯲ᯄ᯦ᯉᯬ᯲ ᯔ ᯅᯉᯪ᯲ᯑᯮ ᯔᯖᯬᯎ ᯑᯪ ᯀᯞᯔᯉ᯲ ᯤ, ᯑᯪᯖᯪᯀᯇᯬ᯲ ᯔ ᯖᯮᯰᯎᯞ᯲ ᯇᯉᯞᯮᯀᯉ᯲ ᯤ, ᯑᯪᯖᯞᯪᯖᯞᯪ ᯔ ᯤ ᯑᯰᯩᯎᯉ᯲.
Dung hobas datu i, dipangido ma paluon gondang tu sijama porhinaloan i, ia dung mangkuling gondang i, ditortorhon datu i ma tunggal panaluan i huhut ma dihaliang-kaliangi horbo naung binorothon di tonga-tonga ni na torop i, pitu hali dihaliangi.
ᯑᯮᯰ ᯂᯬᯅᯘ᯲ ᯑᯖᯮ ᯤ, ᯑᯪᯇᯝᯪᯑᯬ ᯔ ᯇᯞᯮᯀᯉᯬ᯲ ᯎᯉᯬ᯲ᯑᯰ ᯖᯮ ᯘᯪᯐᯔ ᯇᯒᯬ᯲ᯂᯪᯉᯞᯬᯀᯉ᯲ ᯤ, ᯤᯀ ᯑᯮᯰ ᯔᯰᯄ᯦ᯮᯞᯪᯰ ᯎᯉᯬ᯲ᯑᯰ ᯤ, ᯑᯪᯖᯒᯬ᯲ᯖᯒᯬ᯲ᯂᯉᯬ᯲ ᯑᯖᯮ ᯤ ᯔ ᯖᯮᯰᯎᯞ᯲ ᯇᯉᯞᯮᯀᯉ᯲ ᯤ ᯂᯮᯂᯖᯮ᯲ ᯔ ᯑᯪᯂᯞᯪᯀᯰᯂᯞᯪᯀᯝᯪ ᯂᯒᯬ᯲ᯅᯬ ᯉᯀᯮᯰ ᯅᯪᯉᯬᯒᯖᯬ᯲ᯂᯉᯬ᯲ ᯑᯪ ᯖᯬᯝᯖᯬᯝ ᯉᯪ ᯉ ᯖᯬᯒᯇᯬ᯲ ᯤ, ᯇᯪᯖᯮᯂᯞᯪ ᯑᯪ ᯂᯞᯪᯀᯝᯪ
Ia dung sidung manortor angka panortor, sidung nang datu i, tole ma na mamantom horbo i. Ia dung dipantom horbo i, so haru peak dope , masionjaran ma na torop i disi asa unang dompak nasida marobo horbo i, alai asa dompak donganna.
ᯤᯀ ᯑᯮᯰ ᯘᯪᯑᯮᯰ ᯔᯉᯒᯬ᯲ᯖᯒᯬ᯲ ᯀᯰᯄ᯦ ᯇᯉᯒᯬ᯲ᯖᯒᯬ᯲, ᯘᯪᯑᯮᯰ ᯉᯰ ᯑᯖᯮ ᯤ, ᯖᯬᯞᯩ ᯔ ᯉ ᯔᯔᯉ᯲ᯖᯔᯬ᯲ ᯂᯒᯬ᯲ᯅᯬ ᯤ. ᯤᯀ ᯑᯮᯰ ᯑᯪᯇᯉ᯲ᯖᯔᯬ᯲ ᯂᯒᯬ᯲ᯅᯬ ᯤ, ᯘᯬ ᯂᯒᯮ ᯇᯩᯀᯄ᯦᯲ ᯑᯬᯇᯩ, ᯔᯘᯪᯀᯉᯬ᯲ᯐᯒᯉ᯲ ᯔ ᯉᯖᯬᯒᯇᯬ᯲ ᯤ ᯑᯪᯘᯪ ᯀᯘ ᯥᯉᯰ ᯑᯔᯬ᯲ᯇᯄ᯦᯲ ᯉᯘᯪᯑ ᯔᯒᯬᯅᯬ ᯂᯒᯬ᯲ᯅᯬ ᯤ, ᯀᯞᯤ ᯀᯘ ᯑᯔᯬ᯲ᯇᯄ᯦᯲ ᯑᯬᯝᯉ᯲ᯉ.
Tardok 'do dua bagian na mangadopi horbo i, pulik be morsasaompu. Ia dompak na saompu marobo i dung dipantom, i ma na talu. I ma umbahen na mangasa gogo be nasida mangonjar horbo i, asa runggang dompak alona.
ᯖᯒ᯲ᯑᯄ᯦ᯬ᯲ ᯑᯬ ᯑᯮᯀ ᯅᯎᯪᯀᯉ᯲ ᯉ ᯔᯝᯑᯬᯇᯪ ᯂᯒᯬ᯲ᯅᯬ ᯤ, ᯇᯮᯞᯄ᯦ᯪ᯲ ᯅᯩ ᯔᯒᯬ᯲ᯘᯘᯀᯔᯬ᯲ᯇᯮ ᯤᯀ ᯑᯔᯬ᯲ᯇᯄ᯦᯲ ᯉᯘ ᯀᯔᯬ᯲ᯇᯮ ᯔ ᯒᯬᯅᯬ ᯤ ᯑᯮᯰ ᯑᯪᯇᯉ᯲ᯖᯔᯬ᯲, ᯤ ᯔ ᯉ ᯖᯞᯮ. ᯤ ᯔ ᯀᯔᯮ᯲ᯅᯂᯉᯩ᯲ ᯉ ᯔᯝᯘ ᯎᯬᯎᯬ ᯅᯩ ᯉᯘᯪᯑ ᯔᯝᯉᯬ᯲ᯐᯒ᯲ ᯂᯒᯬ᯲ᯅᯬ ᯤ, ᯀᯘ ᯒᯮᯰᯎᯰ ᯑᯔᯬ᯲ᯇᯄ᯦᯲ ᯀᯞᯬᯉ.
Ia dung saut marobo horbo i, dilapa ma. Dipapulik ma anggo juhutna i, dipormasak ma i panganon ni na torop ; dipapulik ma angka na morgoarna , i ma sipelehononna tu porsimangotan sipeleonnasida i.
ᯤᯀ ᯑᯮᯰ ᯘᯀᯖᯮ᯲ ᯔᯒᯬᯅᯬ ᯂᯒᯬ᯲ᯅᯬ ᯤ, ᯑᯪᯞᯇ ᯔ ᯑᯪᯇᯇᯮᯞᯄ᯦ᯪ᯲ ᯔ ᯀᯰᯎᯬ ᯐᯮᯂᯖᯮ᯲ᯉ ᯤ, ᯑᯪᯇᯒᯬ᯲ᯔᯘᯄ᯦᯲ ᯔ ᯤ ᯇᯝᯉᯉᯬ᯲ ᯉᯪ ᯉᯖᯬᯒᯇᯬ᯲; ᯑᯪᯇᯇᯮᯞᯄ᯦ᯪ᯲ ᯔ ᯀᯰᯄ᯦ ᯉ ᯔᯒᯬ᯲ᯎᯬᯀᯒ᯲ᯉ, ᯤ ᯔ ᯘᯪᯇᯩᯞᯩᯂᯬᯉᯉᯬ᯲ᯉ ᯖᯮ ᯇᯒᯬ᯲ᯘᯪᯔᯝᯬᯖᯉ᯲ ᯘᯪᯇᯩᯞᯩᯀᯉᯬ᯲ᯉᯘᯪᯑ ᯤ.
Dung i mortonggo ma datu jinounasida i, songon on ma didok, "Simangot ni ompunami, simangot ni ompudoli, simangot ni ompuboru, ompu porsadaan, paisada, paidua, paitolu, paiopat, pailima, paionom paipitu na umpompar hami on.
ᯑᯮᯰ ᯤ ᯔᯒᯬ᯲ᯖᯬᯰᯎᯬ ᯔ ᯑᯖᯮ ᯐᯪᯉᯬᯥᯉᯘᯪᯑ ᯤ, ᯘᯬᯝᯉᯬ᯲ ᯀᯉᯬ᯲ ᯔ ᯑᯪᯑᯄ᯦ᯬ᯲, "ᯘᯪᯔᯝᯖᯬ᯲ ᯉᯪ ᯀᯔᯬ᯲ᯇᯮᯉᯔᯪ, ᯘᯪᯔᯝᯖᯬ᯲ ᯉᯪ ᯀᯔᯬ᯲ᯇᯮ ᯑᯬᯞᯪ, ᯘᯪᯔᯝᯖᯬ᯲ ᯉᯪ ᯀᯔᯬ᯲ᯇᯮ ᯅᯬᯒᯮ, ᯀᯔᯬ᯲ᯇᯮ ᯇᯒᯬ᯲ᯘᯑᯀᯉ᯲, ᯇᯤᯘᯑ, ᯇᯤᯑᯮᯀ, ᯇᯤᯖᯬᯞᯮ, ᯇᯤᯀᯬᯇᯖ᯲, ᯇᯤᯞᯪᯔ, ᯇᯤᯀᯬᯉᯔᯬ᯲ ᯇᯤᯇᯪᯖᯮ ᯉ ᯀᯔᯮ᯲ᯇᯔᯬ᯲ᯇᯒ᯲ ᯂᯔᯪ ᯀᯉᯬ᯲
Pitu sundut haoloan, haturutan; sigostong di portibi, angka na gabe porsimangotan, debata jujungan ro di sihomban ni uma , pangulubalang suan-suanan, homban sitio-tio ro di angka simangot ni ompu bao! Toga, manumpak hamu di pudi, mangambili hamu di jolo!"
ᯇᯪᯖᯮ ᯘᯉᯮ᯲ᯑᯖᯮ᯲ ᯂᯀᯬᯞᯬᯀᯉ᯲, ᯂᯖᯮᯒᯮᯖᯉ᯲; ᯘᯪᯎᯘᯬ᯲ᯖᯬᯰ ᯑᯪ ᯇᯒᯬ᯲ᯖᯪᯅᯪ, ᯀᯰᯄ᯦ ᯉ ᯎᯅᯩ ᯇᯒᯬ᯲ᯘᯪᯔᯝᯬᯖᯉ᯲, ᯑᯩᯅᯖ ᯐᯮᯐᯮᯝᯉ᯲ ᯒᯬ ᯑᯪ ᯘᯪᯂᯔᯬ᯲ᯅᯉ᯲ ᯉᯪ ᯥᯔ, ᯇᯝᯮᯞᯮ ᯅᯞᯰ ᯘᯮᯀᯉ᯲ᯘᯮᯀᯉᯉ᯲, ᯂᯔᯬ᯲ᯅᯉ᯲ ᯘᯪᯖᯪᯀᯬᯖᯪᯀᯬ ᯒᯬ ᯑᯪ ᯀᯰᯄ᯦ ᯘᯪᯔᯝᯖᯬ᯲ ᯉᯪ ᯀᯔᯬ᯲ᯇᯮ ᯅᯀᯬ!ᯖᯬᯎ,ᯔᯉᯮᯔ᯲ᯇᯂ᯲ᯂᯔᯮᯑᯪᯇᯮᯑᯪ,ᯔᯝᯔ᯲ᯅᯪᯞᯪᯂᯔᯮᯑᯪᯐᯬᯞᯬ!"
"Ahu na tumonggo debata dohot sombaon, dison do santi madingin santi matogu, pangidoan sangap pangidoan badia, di son do dohot pelean, horbo sitingko tanduk.
"ᯀᯂᯮ ᯉ ᯖᯮᯔᯬᯰᯎᯬ ᯑᯩᯅᯖ ᯑᯬᯂᯖᯬ᯲ ᯘᯔᯬ᯲ᯅᯀᯉᯬ᯲, ᯑᯪᯘᯉᯬ᯲ ᯑᯬ ᯘᯉ᯲ᯖᯪ ᯔᯑᯪᯝᯉᯪ᯲ ᯘᯉ᯲ᯖᯪ ᯔᯖᯬᯎᯮ, ᯇᯝᯪᯑᯬᯀᯉ᯲ ᯘᯝᯇ᯲ ᯇᯝᯪᯑᯬᯀᯉ᯲ ᯅᯑᯪᯀ, ᯑᯪᯘᯉᯬ᯲ ᯑᯬ ᯑᯬᯂᯖᯬ᯲ ᯇᯩᯞᯩᯀᯉ᯲, ᯂᯒᯬ᯲ᯅᯬ ᯘᯪᯖᯪᯰᯄ᯦ᯬ ᯖᯉ᯲ᯑᯄ᯦ᯮ᯲.
Ba, nunga ho ompung porsimangotan, badia muse daompung boraspati ni tano, tano hinaojahan, tano hinaondolan, dohot daompung bauta ni huta, na tumitipi tungko-tungko, na rumotap dalan, na mangungkit bungki, na mangkunti galogat, na jumadihon balikkuhu, na jumolo mangiup api, na humaliang na humaloho, na liat-liat portibi.
ᯅ ᯉᯮᯝ ᯂᯬ ᯀᯔᯬ᯲ᯇᯮᯰ ᯇᯒᯬ᯲ᯘᯪᯔᯝᯬᯖᯉ᯲, ᯅᯑᯪᯀ ᯔᯮᯘᯩ ᯑᯀᯔᯬ᯲ᯇᯮᯰ ᯅᯬᯒᯘ᯲ᯇᯖᯪ ᯉᯪ ᯖᯉᯬ, ᯖᯉᯬ ᯂᯪᯉᯀᯬᯐᯂᯉ᯲, ᯖᯉᯬ ᯂᯪᯉᯀᯉᯬ᯲ᯑᯬᯞᯉ᯲, ᯑᯬᯂᯖᯬ᯲ ᯑᯀᯔᯬ᯲ᯇᯮᯰ ᯅᯥᯖ ᯉᯪ ᯂᯮᯖ, ᯉ ᯖᯮᯔᯪᯖᯪᯇᯪ ᯖᯮᯰᯄ᯦ᯬᯖᯮᯰᯄ᯦ᯬ, ᯉ ᯒᯮᯔᯬᯖᯇ᯲ ᯑᯞᯉ᯲, ᯉ ᯔᯝᯮᯰᯄ᯦ᯖᯪ᯲ ᯅᯮᯰᯄ᯦ᯪ, ᯉ ᯔᯰᯄ᯦ᯉᯮ᯲ᯖᯪ ᯎᯞᯬᯎᯖ᯲, ᯉ ᯐᯮᯔᯑᯪᯂᯉᯬ᯲ ᯅᯞᯪᯰᯄ᯦ᯮᯂᯮ, ᯉ ᯐᯮᯔᯬᯞᯬ ᯔᯝᯪᯀᯇᯮ᯲ ᯀᯇᯪ, ᯉ ᯂᯮᯔᯞᯪᯀᯰ ᯉ ᯂᯮᯔᯞᯬᯂᯬ, ᯉ ᯞᯪᯀᯖ᯲ᯞᯪᯀᯖ᯲ ᯇᯒᯬ᯲ᯖᯪᯅᯪ.
Dison do santi madingin, di son do santi matogu, sitompion na godang, itak gurgur, juhut pinadar, dengke niura, manuk lahibini, babi lumok-lumok, pangidoan sangap, pangidoan badia; porsangapi hami, porbadiai, pagabe hami, pahoras., hami pomparanmon ; pagabe na niula, pasinur nang na pinahan.
ᯑᯪᯘᯉᯬ᯲ ᯑᯬ ᯘᯉ᯲ᯖᯪ ᯔᯑᯪᯝᯉᯪ᯲ ᯑᯪᯘᯉᯬ᯲ ᯑᯬ ᯘᯉ᯲ᯖᯪ ᯔᯖᯬᯎᯮ, ᯘᯪᯖᯔᯬ᯲ᯇᯪᯀᯉᯬ᯲ ᯉ ᯎᯬᯑᯰ, ᯤᯖᯄ᯦᯲ ᯎᯒᯮ᯲ᯎᯒᯮ᯲, ᯐᯮᯂᯖᯮ᯲ ᯇᯪᯉᯑᯒ᯲, ᯑᯰᯩᯄᯩ᯦ ᯉᯪ ᯥᯒ, ᯔᯉᯄ᯦ᯮ᯲ ᯞᯂᯪᯅᯪᯉᯪ, ᯅᯅᯪ ᯞᯮᯔᯄ᯦ᯬ᯲ᯞᯮᯔᯄ᯦ᯬ᯲, ᯇᯝᯪᯑᯬᯀᯉ᯲ ᯘᯝᯇ᯲, ᯇᯝᯪᯑᯬᯀᯉ᯲ ᯅᯑᯪᯀ; ᯇᯒᯬ᯲ᯘᯝᯇᯪ ᯂᯔᯪ, ᯇᯒᯬ᯲ᯅᯑᯪᯀᯤ, ᯇᯎᯅᯩ ᯂᯔᯪ, ᯇᯂᯬᯒᯘ᯲ ᯂᯔᯪ ᯇᯔᯬ᯲ᯇᯒᯉ᯲ᯔᯉᯬ᯲; ᯇᯎᯅᯩ ᯉ ᯉᯪᯥᯞ, ᯇᯘᯪᯉᯒᯮ᯲ ᯉᯰ ᯉᯇᯪᯉᯂᯉ᯲.
Hami na mortonggo debata dohot porsimangotan, na mortonggo huasi! Somba ujung, somba huasi!"
ᯂᯔᯪ ᯉ ᯔᯒᯬ᯲ᯖᯬᯰᯎᯬ ᯑᯩᯅᯖ ᯑᯬᯂᯖᯬ᯲ ᯇᯒᯬ᯲ᯘᯪᯔᯝᯬᯖᯉ᯲, ᯉ ᯔᯒᯬ᯲ᯖᯬᯰᯎᯬ ᯂᯮᯀᯘᯪ! ᯘᯔᯬ᯲ᯅ ᯥᯐᯮᯰ, ᯘᯔᯬ᯲ᯅ ᯂᯮᯀᯘᯪ!"
II. Uju laho borhat mormusu. Morpungu ma sude na sada hasuhuton i di alaman, diboan ma tusi sada manuk, i ma sigantungon i.
ᯥᯐᯮ ᯞᯂᯬ ᯅᯒᯬ᯲ᯂᯖ᯲ ᯔᯒᯬ᯲ᯔᯮᯘᯮ ᯔᯒᯬ᯲ᯇᯮᯝᯮ ᯔ ᯘᯮᯑᯩ ᯉ ᯘᯑ ᯂᯘᯮᯂᯮᯖᯉᯬ᯲ ᯤ ᯑᯪ ᯀᯞᯔᯉ᯲, ᯑᯪᯅᯬᯀᯉ᯲ ᯔ ᯖᯮᯘᯪ ᯘᯑ ᯔᯉᯄ᯦ᯮ᯲, ᯤ ᯔ ᯘᯪᯎᯉ᯲ᯖᯮᯝᯉᯬ᯲ ᯤ.
Diboan datu ma tusi tunggal panaluan , dililiti ma i sian ginjang torus tu toru, tigabolit dibahen lili-lilitna.
ᯑᯪᯅᯬᯀᯉ᯲ ᯑᯖᯮ ᯔ ᯖᯮᯘᯪ ᯖᯮᯰᯎᯞ᯲ ᯇᯉᯞᯮᯀᯉ᯲, ᯑᯪᯞᯪᯞᯪᯖᯪ ᯔ ᯤ ᯘᯪᯀᯉ᯲ ᯎᯉᯪ᯲ᯐᯰ ᯖᯬᯒᯘᯮ᯲ ᯖᯮ ᯖᯬᯒᯮ, ᯖᯪᯎᯅᯬᯞᯖᯪ᯲ ᯑᯪᯅᯂᯉᯩ᯲ ᯞᯪᯞᯪᯞᯪᯞᯖᯪ᯲ᯉ.
Dung i disulangi ginjang torus tu toru, tigabolit dibahen lili-lilitna.
ᯑᯮᯰ ᯤ ᯑᯪᯘᯮᯞᯝᯪ ᯎᯉᯪ᯲ᯐᯰ ᯖᯬᯒᯘᯮ᯲ ᯖᯮ ᯖᯬᯒᯮ, ᯖᯪᯎᯅᯬᯞᯖᯪ᯲ ᯑᯪᯅᯂᯉᯩ᯲ ᯞᯪᯞᯪᯞᯪᯞᯖᯪ᯲ᯉ
Dung i disulangi ma tunggal panaluan i, dibahen ma sirapege, tuak tangkasan dohot pinadar sulang sulangna. ba dung sidung i, dipagohon datu i ma di jolona.
ᯑᯮᯰ ᯤ ᯑᯪᯘᯮᯞᯝᯪ ᯔ ᯖᯮᯰᯎᯞ᯲ ᯇᯉᯞᯮᯀᯉ᯲ ᯤ, ᯑᯪᯅᯂᯉᯩ᯲ ᯔ ᯘᯪᯒᯇᯩᯎᯩ, ᯖᯮᯀᯄ᯦᯲ ᯖᯰᯄ᯦ᯘᯉ᯲ ᯑᯬᯂᯖᯬ᯲ ᯇᯪᯉᯑᯒ᯲ ᯘᯮᯞᯰᯘᯮᯞᯰ ᯉ ᯅ ᯑᯮᯰ ᯘᯪᯑᯮᯰ ᯤ, ᯑᯪᯇᯎᯬᯂᯉᯬ᯲ ᯑᯖᯮ ᯤ ᯔ ᯑᯪ ᯐᯬᯞᯬᯉ.
Dung i ditiop datu i ma manuk i, ditonggohon ma songon on di jolo ni na torop i,
ᯑᯮᯰ ᯤ ᯑᯪᯖᯪᯀᯇᯬ᯲ ᯑᯖᯮ ᯤ ᯔ ᯔᯉᯄ᯦ᯮ᯲ ᯤ, ᯑᯪᯖᯬᯰᯎᯬᯂᯉᯬ᯲ ᯔ ᯘᯬᯝᯉᯬ᯲ ᯀᯉᯬ᯲ ᯑᯪ ᯐᯬᯞᯬ ᯉᯪ ᯉ ᯖᯬᯒᯇᯬ᯲ ᯤ
"Turun ma hamu debata di atas, manaek manjujung ma hamu debata di toru, hundul mangunsimpu ma hamu debata di tonga on.
"ᯖᯮᯒᯉᯮ᯲ ᯔ ᯂᯔᯮ ᯑᯩᯅᯖ ᯑᯪ ᯀᯖᯘ᯲, ᯔᯉᯀᯄᯩ᯦᯲ ᯔᯉ᯲ᯐᯮᯐᯮᯰ ᯔ ᯂᯔᯮ ᯑᯩᯅᯖ ᯑᯪ ᯖᯬᯒᯮ, ᯂᯉᯮ᯲ᯑᯞᯮ᯲ ᯔᯝᯉᯮ᯲ᯘᯔᯪ᯲ᯇᯮ ᯔ ᯂᯔᯮ ᯑᯩᯅᯖ ᯑᯪ ᯖᯬᯝ ᯀᯉᯬ᯲.
Turun ma hamuna guru songta, na guru songti, asa songta, songti ahu, na moruhum, na morsantabi, di daompung boraspati ni tano, daompung Mulajadi na Bolon.
ᯖᯮᯒᯉᯮ᯲ ᯔ ᯂᯔᯮᯉ ᯎᯮᯒᯮ ᯘᯬᯰᯖ, ᯉ ᯎᯮᯒᯮ ᯘᯬᯰᯖᯪ, ᯀᯘ ᯘᯬᯰᯖ, ᯘᯬᯰᯖᯪ ᯀᯂᯮ, ᯉ ᯔᯬᯒᯮᯂᯔᯮ᯲, ᯉ ᯔᯒᯬ᯲ᯘᯉ᯲ᯖᯅᯪ, ᯑᯪ ᯑᯀᯔᯬ᯲ᯇᯮᯰ ᯅᯬᯒᯘ᯲ᯇᯖᯪ ᯉᯪ ᯖᯉᯬ, ᯑᯀᯔᯬ᯲ᯇᯮᯰ ᯔᯮᯞᯐᯑᯪ ᯉ ᯅᯬᯞᯉᯬ᯲.
Tinongosmu do hami tu toding banua tonga on, asa dapotan pangomoan hami sian harajaon.
ᯖᯪᯉᯬᯝᯘᯬ᯲ᯔᯮ ᯑᯬ ᯂᯔᯪ ᯖᯮ ᯖᯬᯑᯪᯰ ᯅᯉᯮᯀ ᯖᯬᯝ ᯀᯉᯬ᯲, ᯀᯘ ᯑᯇᯬᯖᯉ᯲ ᯇᯝᯬᯔᯬᯀᯉ᯲ ᯂᯔᯪ ᯘᯪᯀᯉ᯲ ᯂᯒᯐᯀᯉᯬ᯲.
Tinongosmu do hami sahala puroma, asa dapotan uli hami sian porumaon.
ᯖᯪᯉᯬᯝᯘᯬ᯲ᯔᯮ ᯑᯬ ᯂᯔᯪ ᯘᯂᯞ ᯇᯮᯒᯬᯔ, ᯀᯘ ᯑᯇᯬᯖᯉ᯲ ᯥᯞᯪ ᯂᯔᯪ ᯘᯪᯀᯉ᯲ ᯇᯬᯒᯮᯔᯀᯉᯬ᯲
Tinongosmu do hami sahala na begu, asa dapotan porulian hami sian habeguon.
ᯖᯪᯉᯬᯝᯘᯬ᯲ᯔᯮ ᯑᯬ ᯂᯔᯪ ᯘᯂᯞ ᯉ ᯅᯩᯎᯮ, ᯀᯘ ᯑᯇᯬᯖᯉ᯲ ᯇᯬᯒᯮᯞᯪᯀᯉ᯲ ᯂᯔᯪ ᯘᯪᯀᯉ᯲ ᯂᯅᯩᯎᯮᯀᯉᯬ᯲.
Tinongosmu do hami sahala" datu, asa dapotan pangomoan hami
sian hadatuon".
ᯖᯪᯉᯬᯝᯘᯬ᯲ᯔᯮ ᯑᯬ ᯂᯔᯪ ᯘᯂᯞ" ᯑᯖᯮ ᯀᯘ ᯑᯇᯬᯖᯉ᯲ ᯇᯝᯬᯔᯬᯀᯉ᯲ ᯂᯔᯪ ᯘᯪᯀᯉ᯲ ᯂᯑᯖᯮᯀᯉᯬ᯲"
"Lidang do ahu, inang boru jau, inang boru Toba. Aha do margamu, inang na sada huta on?
"ᯞᯪᯑᯰ ᯑᯬ ᯀᯂᯮ, ᯤᯉᯰ ᯅᯬᯒᯮ ᯐᯥ, ᯤᯉᯰ ᯅᯬᯒᯮ ᯖᯬᯅ. ᯀᯂ ᯑᯬ ᯔᯒ᯲ᯎᯔᯮ, ᯤᯉᯰ ᯉ ᯘᯑ ᯂᯮᯖ ᯀᯉᯬ᯲?
Ianggo marganami tahe inang, Tambaujung saribu, sisataon hami di bortian, sataon hami tundun api, laos so ditanda do hami boru-boru, laos so diboto do hami manang lahi-lahi."
ᯤᯀᯰᯎᯬ ᯔᯒ᯲ᯎᯉᯔᯪ ᯖᯂᯩ ᯤᯉᯰ, ᯖᯔ᯲ᯅᯥᯐᯮᯰ ᯘᯒᯪᯅᯮ, ᯘᯪᯘᯖᯀᯉᯬ᯲ ᯂᯔᯪ ᯑᯪ ᯅᯒᯬ᯲ᯖᯪᯀᯉ᯲, ᯘᯖᯀᯉᯬ᯲ ᯂᯔᯪ ᯖᯉᯮ᯲ᯑᯉᯮ᯲ ᯀᯇᯪ, ᯞᯀᯘᯬ᯲ ᯘᯬ ᯑᯪᯖᯉ᯲ᯑ ᯑᯬ ᯂᯔᯪ ᯅᯬᯒᯮᯅᯬᯒᯮ, ᯞᯀᯘᯬ᯲ ᯘᯬ ᯑᯪᯅᯬᯖᯬ ᯑᯬ ᯂᯔᯪ ᯔᯉᯰ ᯞᯂᯪᯞᯂᯪ."
"Dia ma tahe inang, jaha-jaha ni pormanuhonmuna i?
"ᯑᯪᯀ ᯔ ᯖᯂᯩ ᯤᯉᯰ, ᯐᯂᯐᯂ ᯉᯪ ᯇᯒᯬ᯲ᯔᯉᯮᯂᯉᯬ᯲ᯔᯮᯉ ᯤ?
Siaji Nangkapiring, Nai Guru Sinomba, na sinomba ni aji, na sinomba ni poda, laba-laba ni ompunta Tuan Batara Guru Doli.
ᯘᯪᯀᯐᯪ ᯉᯰᯄ᯦ᯇᯪᯒᯪᯰ, ᯉᯤ ᯎᯮᯒᯮ ᯘᯪᯉᯔᯬ᯲ᯅ, ᯉ ᯘᯪᯉᯔᯬ᯲ᯅ ᯉᯪ ᯀᯐᯪ, ᯉ ᯘᯪᯉᯔᯬ᯲ᯅ ᯉᯪ ᯇᯬᯑ, ᯞᯅᯞᯅ ᯉᯪ ᯀᯔᯬ᯲ᯇᯉᯮ᯲ᯖ ᯖᯮᯀᯉ᯲ ᯅᯖᯒ ᯎᯮᯒᯮ ᯑᯬᯞᯪ.
Na morlahi lahihon ompunta, manuk silali piuan, silali manoro, sianting-tanting ni manuk sabungan, na so dung talu, na matua monang, ninna gurunta Si Naboru Pandan, na taripar di lautan on."
ᯉ ᯔᯒᯬ᯲ᯞᯂᯪᯞᯂᯪᯂᯉᯬ᯲ ᯀᯔᯬ᯲ᯇᯉᯮ᯲ᯖ, ᯔᯉᯄ᯦ᯮ᯲ ᯘᯪᯞᯞᯪ ᯇᯪᯥᯀᯉ᯲, ᯘᯪᯞᯞᯪ ᯔᯉᯬᯒᯬ, ᯘᯪᯀᯉ᯲ᯖᯪᯰᯖᯉ᯲ᯖᯪᯰ ᯉᯪ ᯔᯉᯄ᯦ᯮ᯲ ᯘᯅᯮᯝᯉ᯲, ᯉ ᯘᯬ ᯑᯮᯰ ᯖᯞᯮ, ᯉ ᯔᯖᯮᯀ ᯔᯬᯉᯰ, ᯉᯉᯪ᯲ᯉ ᯎᯮᯒᯉᯮ᯲ᯖ ᯘᯪ ᯉᯅᯬᯒᯮ ᯇᯉ᯲ᯑᯉ᯲, ᯉ ᯖᯒᯪᯇᯒ᯲ ᯑᯪ ᯞᯥᯖᯉ᯲ ᯀᯉᯬ᯲."
"Asa ung ma di horja hullo, horja hulongko uas sombayangku, hae hati, hae hatan.
"ᯀᯘ ᯀᯮᯰ ᯔ ᯑᯪ ᯂᯒᯬ᯲ᯐ ᯂᯞᯮ᯲ᯞᯬ, ᯂᯒᯬ᯲ᯐ ᯂᯮᯞᯬᯰᯄ᯦ᯬ ᯥᯀᯘ᯲ ᯘᯔᯬ᯲ᯅᯛᯰᯄ᯦ᯮ, ᯂᯀᯩ ᯂᯖᯪ, ᯂᯀᯩ ᯂᯖᯉ᯲.
Asa na pininta sian manuk gantungta on: Ingkon hot batu ni ruma, jojak batu ni sopo, ingkon gompang uluna, morbabiat ibana, unang ro uju mangunduk, unang ro munsung mangubit.
ᯀᯘ ᯉ ᯇᯪᯉᯉ᯲ᯖᯘᯪᯀᯉ᯲ᯔᯉᯮᯂ᯲ᯎᯉ᯲ᯖᯮᯰᯖᯀᯬᯉ᯲:ᯀᯪᯰᯂᯬᯉ᯲ᯂᯬᯖ᯲ᯅᯖᯮᯉᯪᯒᯮᯔ,ᯐᯬᯐᯂ᯲ᯅᯖᯮᯉᯪᯘᯬᯇᯬ,ᯀᯪᯰᯂᯬᯉ᯲ᯎᯬᯔ᯲ᯇᯰᯥᯞᯮᯉ,ᯔᯬᯒ᯲ᯅᯅᯪᯀᯖ᯲ᯤᯅᯉ,ᯥᯉᯰᯒᯬᯥᯐᯮᯔᯝᯮᯉ᯲ᯑᯮᯂ᯲,ᯥᯉᯰᯒᯬᯔᯮᯉ᯲ᯘᯮᯰᯔᯝᯮᯅᯪᯖ᯲.
Songon na hurang denggan do ale manuk gantungta i. Pasak porgumbangan, unang adong hita laho mormusu.
ᯘᯬᯝᯉᯬ᯲ ᯉ ᯑᯰᯩᯎᯉ᯲ ᯑᯬ ᯀᯞᯩ ᯔᯉᯄ᯦ᯮ᯲. ᯎᯉ᯲ᯖᯮᯰᯖ ᯤ. ᯇᯘᯄ᯦᯲ ᯇᯒᯬ᯲ᯎᯔᯮ᯲ᯅᯝᯉ᯲ ᯥᯉᯰ ᯀᯑᯬᯰ ᯂᯪᯖ ᯞᯂᯬ ᯔᯬᯒ᯲ᯔᯮᯘᯮ.
Unang monar matana, asa unang maporus paranganta i. Sai unang manindang imbuluna, asa unang mabiar paranganta i.
ᯥᯉᯰ ᯔᯬᯉᯒ᯲ ᯔᯖᯉ, ᯀᯘ ᯥᯉᯰ ᯔᯇᯬᯒᯘᯮ᯲ ᯇᯒᯝᯉ᯲ᯖ ᯤ. ᯘᯤ ᯥᯉᯰ ᯔᯉᯉᯪ᯲ᯑᯰ ᯀᯔᯪ᯲ᯅᯮᯞᯮᯉ, ᯀᯘ ᯥᯉᯰ ᯔᯅᯪᯀᯒ᯲ ᯇᯒᯝᯉ᯲ᯖ ᯤ.
Ingkon manindi debata panaluan, ingkon manggomak sigurampang bosi, manusur Batara Guru, mangalompas boru Saniangnaga, ingkon mangananggar siboru na riburon, manulluk jala mangkait."
ᯀᯪᯰᯄ᯦ᯉᯬ᯲ ᯔᯉᯉᯪ᯲ᯑᯪ ᯑᯩᯅᯖ ᯇᯉᯞᯮᯀᯉ᯲, ᯀᯪᯰᯄ᯦ᯉᯬ᯲ ᯔᯰᯎᯬᯔᯄ᯦᯲ ᯘᯪᯎᯮᯒᯔ᯲ᯇᯰ ᯅᯬᯘᯪ, ᯔᯉᯮᯘᯒᯮ᯲ ᯅᯖᯒ ᯎᯮᯒᯮ, ᯔᯝᯞᯔᯬ᯲ᯇᯘ᯲ ᯅᯬᯒᯮ ᯘᯉᯪᯀᯰᯉᯎ, ᯀᯪᯰᯄ᯦ᯉᯬ᯲ ᯔᯝᯉᯰᯎᯒ᯲ ᯘᯪᯅᯬᯒᯮ ᯉ ᯒᯪᯅᯮᯒᯉᯬ᯲ ᯔᯉᯞᯮ᯲ᯞᯄ᯦ᯮ ᯐᯞ ᯔᯰᯄ᯦ᯀᯖᯪ᯲."
"Asa tindang ma ompunta imbulu babiat, na songon urur pinatording, songon rogon ni bulu, songon sait ni dari, paboa na uli, paboa na jagar!"
"ᯀᯘ ᯖᯉᯪ᯲ᯑᯰ ᯔ ᯀᯔᯬ᯲ᯇᯉᯮ᯲ᯖ ᯀᯔᯪ᯲ᯅᯮᯞᯮ ᯅᯅᯪᯀᯖ᯲, ᯉ ᯘᯬᯝᯉᯬ᯲ ᯥᯒᯒᯮ᯲ ᯇᯪᯉᯖᯒᯬ᯲ᯑᯪᯰ, ᯘᯬᯝᯉᯬ᯲ ᯒᯬᯎᯉᯬ᯲ ᯉᯪ ᯅᯮᯞᯮ, ᯘᯬᯝᯉᯬ᯲ ᯘᯀᯖᯪ᯲ ᯉᯪ ᯑᯒᯪ, ᯇᯅᯬᯀ ᯉ ᯥᯞᯪ, ᯇᯅᯬᯀ ᯉ ᯐᯎᯒ᯲!"
Dung i diseat ma manuk i, morpanamboli do dibahen, ditiop datu i ma di uluna, digantung ma di tanganna, dung tompu ma i muse dipeakkon.
ᯑᯮᯰ ᯤ ᯑᯪᯘᯩᯀᯖ᯲ ᯔ ᯔᯉᯄ᯦ᯮ᯲ ᯤ, ᯔᯒᯬ᯲ᯇᯉᯔ᯲ᯅᯬᯞᯪ ᯑᯬ ᯑᯪᯅᯂᯉᯩ᯲, ᯑᯪᯖᯪᯀᯇᯬ᯲ ᯑᯖᯮ ᯤ ᯔ ᯑᯪ ᯥᯞᯮᯉ, ᯑᯪᯎᯉ᯲ᯖᯮᯰ ᯔ ᯑᯪ ᯖᯝᯉ᯲ᯉ, ᯑᯮᯰ ᯖᯔᯬ᯲ᯇᯮ ᯔ ᯤ ᯔᯮᯘᯩ ᯑᯪᯇᯩᯀᯄ᯦᯲ᯄ᯦ᯉᯬ᯲.
Dung i dialathon datu i ma, manang dia do boa boa ni manuk i, ai tarida do i ninna sian panggompang ni patna, sian porhehe ni imbuluna dohot sian pangalahona na asing dung diseat manuk i.
ᯑᯮᯰ ᯤ ᯑᯪᯀᯞᯖ᯲ᯂᯉᯬ᯲ ᯑᯖᯮ ᯤ ᯔ, ᯔᯉᯰ ᯑᯪᯀ ᯑᯬ ᯅᯬᯀᯅᯬᯀ ᯉᯪ ᯔᯉᯄ᯦ᯮ᯲ ᯤ, ᯀᯤ ᯖᯒᯪᯑ ᯑᯬ ᯤ ᯉᯉᯪ᯲ᯉ ᯘᯪᯀᯉ᯲ ᯇᯰᯎᯔᯬ᯲ᯇᯰ ᯉᯪ ᯇᯖ᯲ᯉ, ᯘᯪᯀᯉ᯲ ᯇᯒᯬ᯲ᯂᯩᯂᯩ ᯉᯪ ᯀᯔᯪ᯲ᯅᯮᯞᯮᯉ ᯑᯬᯂᯖᯬ᯲ ᯘᯪᯀᯉ᯲ ᯇᯝᯞᯂᯬᯉ ᯉ ᯀᯘᯪᯰ ᯑᯮᯰ ᯑᯪᯘᯩᯀᯖ᯲ ᯔᯉᯄ᯦ᯮ᯲ ᯤ.
Morhite sian i ma diboto datu · hataluan manang hamonangan na ro, ia saut mormusu.
ᯔᯒᯬ᯲ᯂᯪᯖᯩ ᯘᯪᯀᯉ᯲ ᯤ ᯔ ᯑᯪᯅᯬᯖᯬ ᯑᯖᯮ ᯂᯖᯞᯮᯀᯉ᯲ ᯔᯉᯰ ᯂᯔᯬᯉᯝᯉ᯲ ᯉ ᯒᯬ, ᯤᯀ ᯘᯀᯖᯮ᯲ ᯔᯒᯬ᯲ᯔᯮᯘᯮ
Ia leak hataluan do, ba indang be saut nasida borhat, dijujur nasida ma jolo ari na denggan, porlangkaon na uli asa na ripe monang moralohon musuna.
ᯤᯀ ᯞᯩᯀᯄ᯦᯲ ᯂᯖᯞᯮᯀᯉ᯲ ᯑᯬ, ᯅ ᯀᯉᯪ᯲ᯑᯰ ᯅᯩ ᯘᯀᯖᯮ᯲ ᯉᯘᯪᯑ ᯅᯒᯬ᯲ᯂᯖ᯲, ᯑᯪᯐᯮᯐᯒᯮ᯲ ᯉᯘᯪᯑ ᯔ ᯐᯬᯞᯬ ᯀᯒᯪ ᯉ ᯑᯰᯩᯎᯉ᯲, ᯇᯒᯬ᯲ᯞᯰᯄ᯦ᯀᯉᯬ᯲ ᯉ ᯥᯞᯪ ᯀᯘ ᯉ ᯒᯪᯇᯩ ᯔᯬᯉᯰ ᯔᯒᯞᯬᯂᯉᯬ᯲ ᯔᯮᯘᯮᯉ.
III. Uju di ugasan mago. Dipangke halak do tunggal panaluan i bahen gana panolonan ni na tinuhas ni roha, ia jumpa adong ugasan mago.
ᯥᯐᯮ ᯑᯪ ᯥᯎᯘᯉ᯲ ᯔᯎᯬ. ᯑᯪᯇᯰᯄᯩ᯦ ᯂᯞᯄ᯦᯲ ᯑᯬ ᯖᯮᯰᯎᯞ᯲ ᯇᯉᯞᯮᯀᯉ᯲ ᯤ ᯅᯂᯉᯩ᯲ ᯎᯉ ᯇᯉᯬᯞᯬᯉᯉ᯲ ᯉᯪ ᯉ ᯖᯪᯉᯮᯂᯘ᯲ ᯉᯪ ᯒᯬᯂ, ᯤᯀ ᯐᯔᯮ᯲ᯇ ᯀᯑᯬᯰ ᯥᯎᯘᯉ᯲ ᯔᯎᯬ
Songon on ma dibahen. Diboan, ma i tu alaman, diloloi dongan sahuta. Disulangi ma i jolo, dibahen ma sulang sulangna: sirapege, tuak tangkasan, juhut pinadar manang dengke niura.
ᯘᯬᯝᯉᯬ᯲ ᯀᯉᯬ᯲ ᯔ ᯑᯪᯅᯂᯉᯩ᯲ ᯑᯪᯅᯬᯀᯉ᯲, ᯔ ᯤ ᯖᯮ ᯀᯞᯔᯉ᯲, ᯑᯪᯞᯬᯞᯬᯤ ᯑᯬᯝᯉ᯲ ᯘᯂᯮᯖ. ᯑᯪᯘᯮᯞᯝᯪ ᯔ ᯤ ᯐᯬᯞᯬ, ᯑᯪᯅᯂᯉᯩ᯲ ᯔ ᯘᯮᯞᯰᯘᯮᯞᯰᯉ: ᯘᯪᯒᯇᯩᯎᯩ, ᯖᯮᯀᯄ᯦᯲ ᯖᯰᯄ᯦ᯘᯉ᯲, ᯐᯮᯂᯖᯮ᯲ ᯇᯪᯉᯑᯒ᯲ ᯔᯉᯰ ᯑᯰᯩᯄᯩ᯦ ᯉᯪᯥᯒ.
Dung i didok ma tonana sioloan ni panolom i, i ma na tartuhas sitangko ugasan na mago i.
ᯑᯮᯰ ᯤ ᯑᯪᯑᯄ᯦ᯬ᯲ ᯔ ᯖᯬᯉᯉ ᯘᯪᯀᯬᯞᯬᯀᯉ᯲ ᯉᯪ ᯇᯉᯬᯞᯔᯬ᯲ ᯤ, ᯤ ᯔ ᯉ ᯖᯒ᯲ᯖᯮᯂᯘ᯲ ᯘᯪᯖᯰᯄ᯦ᯬ ᯥᯎᯘᯉ᯲ ᯉ ᯔᯎᯬ ᯤ
Didok muse ma hatana tu tunggal panaluan i songon on, "Ompung tunggal panaluan, Aji Donda Hatahutan, Si Boru Sopak Panaluan, horbo paung, sibaso bolon, datu poranuk, ulok mahin-mahinan!
ᯑᯪᯑᯄ᯦ᯬ᯲ ᯔᯮᯘᯩ ᯔ ᯂᯖᯉ ᯖᯮ ᯖᯮᯰᯎᯞ᯲ ᯇᯉᯞᯮᯀᯉ᯲ ᯤ ᯘᯬᯝᯉᯬ᯲ ᯀᯉᯬ᯲, "ᯀᯔᯬ᯲ᯇᯮᯰ ᯖᯮᯰᯎᯞ᯲ ᯇᯉᯞᯮᯀᯉ᯲, ᯀᯐᯪ ᯑᯉᯬ᯲ᯑ ᯂᯖᯂᯮᯖᯉ᯲, ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲, ᯂᯒᯬ᯲ᯅᯬ ᯇᯀᯮᯰ ᯘᯪᯅᯘᯬ ᯅᯬᯞᯉᯬ᯲, ᯑᯖᯮ ᯇᯬᯒᯉᯄ᯦ᯮ᯲, ᯥᯞᯄ᯦ᯬ᯲ ᯔᯂᯉᯪ᯲ᯔᯂᯪᯉᯉ᯲!
Dibahen na binoan hamu tu alaman na mago do ugasanku i ma ............... .
ᯑᯪᯅᯂᯉᯩ᯲ ᯉ ᯅᯪᯉᯬᯀᯉ᯲ ᯂᯔᯮ ᯖᯮ ᯀᯞᯔᯉ᯲ ᯉ ᯔᯎᯬ ᯑᯬ ᯥᯎᯘᯉ᯲ᯄ᯦ᯮ ᯤ ᯔ
"Ba nunga dijalo hamu sirapege, sai tibu, ma tarbege pangonaim di sitangko ugasanki.
"ᯅ ᯉᯮᯝ ᯑᯪᯐᯞᯬ ᯂᯔᯮ ᯘᯪᯒᯇᯩᯎᯩ, ᯘᯤ ᯖᯪᯅᯮ, ᯔ ᯖᯒ᯲ᯅᯩᯎᯩ ᯇᯝᯬᯉᯀᯔᯪ᯲ ᯑᯪᯘᯪᯖᯰᯄ᯦ᯬ᯲ ᯥᯎᯘᯉ᯲ᯄ᯦ᯪ.
Pinainum hamu dohot tuak tangkasan, ba, sai tangkas ma ho maminsang, mangarobur di sitangko ugasanki.
ᯇᯪᯉᯤᯉᯔᯮ᯲ ᯂᯔᯮ ᯑᯬᯂᯖᯬ᯲ ᯖᯮᯀᯄ᯦᯲ ᯖᯰᯄ᯦ᯘᯉ᯲, ᯅ ᯘᯤ ᯖᯰᯄ᯦ᯘ᯲ ᯔ ᯂᯬ ᯔᯔᯉᯪ᯲ᯘᯰ, ᯔᯝᯒᯬᯅᯒᯮ᯲ ᯑᯪ ᯘᯪᯖᯰᯄ᯦ᯬ ᯥᯎᯘᯉ᯲ᯄ᯦ᯪ.
Na manunggul ma ahu di gogom, na mongoti ma ahu di saudaram."
ᯉ ᯔᯉᯮᯰᯎᯞᯮ᯲ ᯔ ᯀᯂᯮ ᯑᯪ ᯎᯬᯎᯔᯬ᯲, ᯉ ᯔᯬᯝᯬᯖᯪ ᯔ ᯀᯂᯮ ᯑᯪ ᯘᯥᯑᯒᯔ᯲
"Habang ma anduhur,
Songgop tu purba holing,
Anggo sitangko ugasanku,
Unang be dieak tonga borngin",
ninna na agoan ugasan i.
"ᯂᯅᯰ ᯔ ᯀᯉ᯲ᯑᯮᯂᯒᯮ᯲,
ᯘᯬᯰᯎᯇᯬ᯲ ᯖᯮ ᯇᯒᯮ᯲ᯅᯂᯬᯞᯪᯰ,
ᯀᯰᯎᯬ ᯘᯪᯖᯰᯄ᯦ᯬ ᯥᯎᯘᯉ᯲ᯄ᯦ᯮ,
ᯥᯉᯰ ᯅᯩ ᯑᯪᯀᯩᯀᯄ᯦᯲ ᯖᯬᯝ ᯅᯒᯬ᯲ᯝᯉᯪ",
ᯉᯉᯪ᯲ᯉ ᯉ ᯀᯎᯬᯀᯉ᯲ ᯥᯎᯘᯉ᯲ ᯤ.
Dung i so ma na pinatolonna i, dijama ma tunggal panaluan i, diapus ma i sian ginjang tu toru, didok ma huhut, "Ba sai songon na nidokmi ma tutu, molo ahu manangko ugasanmu na mago i:
ᯑᯮᯰ ᯤ ᯘᯬ ᯔ ᯉ ᯇᯪᯉᯖᯬᯞᯉᯬ᯲ᯉ ᯤ, ᯑᯪᯐᯔ ᯔ ᯖᯮᯰᯎᯞ᯲ ᯇᯉᯞᯮᯀᯉ᯲ ᯤ, ᯑᯪᯀᯇᯘᯮ᯲ ᯔ ᯤ ᯘᯪᯀᯉ᯲ ᯎᯉᯪ᯲ᯐᯰ ᯖᯮ ᯖᯬᯒᯮ, ᯑᯪᯑᯄ᯦ᯬ᯲ ᯔ ᯂᯮᯂᯖᯮ᯲, "ᯅ ᯘᯤ ᯘᯬᯝᯉᯬ᯲ ᯉ ᯉᯪᯑᯄ᯦ᯬ᯲ᯔᯪ ᯔ ᯖᯮᯖᯮ, ᯔᯬᯞᯬ ᯀᯂᯮ ᯔᯉᯰᯄ᯦ᯬ ᯥᯎᯘᯉ᯲ᯔᯮ ᯉ ᯔᯎᯬ ᯤ:
Alai anggo so ahu do mambuat, sai manumpak manggabei ma tunggal panaluan on di ahu", ninna.
ᯀᯞᯤ ᯀᯰᯎᯬ ᯘᯬ ᯀᯂᯮ ᯑᯬ ᯔᯔ᯲ᯅᯮᯀᯖ᯲, ᯘᯤ ᯔᯉᯔᯮ᯲ᯇᯄ᯦᯲ ᯔᯰᯎᯅᯩᯤ ᯔ ᯖᯮᯰᯎᯞ᯲ ᯇᯉᯞᯮᯀᯉ᯲ ᯀᯉᯬ᯲ ᯑᯪ ᯀᯂᯮ", ᯉᯉᯪ᯲ᯉ
Ia tongon na pinatolon i manangko, ugasan i, ba, ingkon adong ma aeonna, sahit manang mate:
ᯤᯀ ᯖᯬᯝᯉᯬ᯲ ᯉ ᯇᯪᯉᯖᯬᯞᯉᯬ᯲ ᯤ ᯔᯉᯰᯄ᯦ᯬ, ᯥᯎᯘᯉ᯲ ᯤ, ᯅ ᯀᯪᯰᯄ᯦ᯉᯬ᯲ ᯀᯑᯬᯰ ᯔ ᯀᯀᯩᯀᯉᯬ᯲ᯉ, ᯘᯂᯖᯪ᯲ ᯔᯉᯰ ᯔᯖᯩ:
Alai anggo lias do ibana, so tutu adong dibuat, horas do ibana, so adong agia na mago.
ᯀᯞᯤ ᯀᯰᯎᯬ ᯞᯪᯀᯘ᯲ ᯑᯬ ᯤᯅᯉ, ᯘᯬ ᯖᯮᯖᯮ ᯀᯑᯬᯰ ᯑᯪᯅᯮᯀᯖ᯲, ᯂᯬᯒᯘ᯲ ᯑᯬ ᯤᯅᯉ, ᯘᯬ ᯀᯑᯬᯰ ᯀᯎᯪᯀ ᯉ ᯔᯎᯬ.
Songon i ma pangulahonna ditunggal panaluan, ia adong ugasan mago, gana panolonan ma i dibahen.
ᯘᯬᯝᯉᯬ᯲ ᯤ ᯔ ᯇᯝᯮᯞᯂᯉᯬ᯲ᯉ ᯑᯪ ᯖᯮᯰᯎᯞ᯲ ᯇᯉᯞᯮᯀᯉ᯲, ᯤᯀ ᯀᯑᯬᯰ ᯥᯎᯘᯉ᯲ ᯔᯎᯬ, ᯎᯉ ᯇᯉᯬᯞᯬᯉᯉ᯲ ᯔ ᯤ ᯑᯪᯅᯂᯉᯩ᯲.
IV. Uju ro haba-haba. Molo' ro alogo na gogo, haba-haba siampalautus, halisungsung morpiu-piu, dipaijur halak ma tunggal panaluan i sian jabu, dipantikkon ma i di pogu ni alaman, dipadompak ma i tongon tu bona ni haba-haba i, asa motap, asa so.
ᯥᯐᯮ ᯒᯬ ᯂᯅᯂᯅ. ᯔᯬᯞᯬ ᯒᯬ ᯀᯞᯬᯎᯬ ᯉᯎᯬᯎᯬ, ᯂᯅᯂᯅ ᯘᯪᯀᯔ᯲ᯇᯞᯥᯖᯘᯮ᯲, ᯂᯞᯪᯘᯮᯰᯘᯮᯰ ᯔᯒᯬ᯲ᯇᯪᯥᯇᯪᯥ, ᯑᯪᯇᯤᯐᯒᯮ᯲ ᯂᯞᯄ᯦᯲ ᯔ ᯖᯮᯰᯎᯞ᯲ ᯇᯉᯞᯮᯀᯉ᯲ ᯤ ᯘᯪᯀᯉ᯲ ᯐᯅᯮ, ᯑᯪᯇᯉ᯲ᯖᯄ᯦ᯪ᯲ᯄ᯦ᯉᯬ᯲ ᯔ ᯤ ᯑᯪ ᯇᯬᯎᯮ ᯉᯪ ᯀᯞᯔᯉ᯲, ᯑᯪᯇᯑᯔᯬ᯲ᯇᯄ᯦᯲ ᯔ ᯤ ᯖᯬᯝᯉᯬ᯲ ᯖᯮ ᯅᯬᯉ ᯉᯪ ᯂᯅᯂᯅ ᯤ, ᯀᯘ ᯔᯬᯖᯇ᯲, ᯀᯘ ᯘᯬ.
Indada pola ditabasi i manang ditonggohon, holan songon on do didok na manonggohon i, "Tulak ale ompung, pasonang alogo ombak, alogo laut, naga sipitu tanduk, sssst! diam! diam! diam!"
ᯀᯉᯪ᯲ᯑᯑ ᯇᯬᯞ ᯑᯪᯖᯅᯘᯪ ᯤ ᯔᯉᯰ ᯑᯪ ᯖᯬᯰᯎᯬᯂᯉᯬ᯲, ᯂᯬᯞᯉ᯲ ᯘᯬᯝᯉᯬ᯲ ᯀᯉᯬ᯲ ᯑᯬ ᯑᯪᯑᯄ᯦ᯬ᯲ ᯉ ᯔᯉᯬᯰᯎᯬᯂᯉᯬ᯲ ᯤ, "ᯖᯮᯞᯄ᯦᯲ ᯀᯞᯩ ᯀᯔᯬ᯲ᯇᯮᯰ ᯇᯘᯬᯉᯰ ᯀᯞᯬᯎᯬ ᯀᯔᯬ᯲ᯅᯄ᯦᯲, ᯀᯞᯬᯎᯬ ᯞᯀᯖᯮ᯲, ᯉᯎ ᯘᯪᯇᯪᯖᯮ ᯖᯉ᯲ᯑᯄ᯦ᯮ᯲, ᯘ᯲ᯘ᯲ᯖ᯲! ᯑᯪᯀᯔ᯲! ᯑᯪᯀᯔ᯲! ᯑᯪᯀᯔ᯲!"
Ia dung dibahen i, ninna, menak ma alogo na gogo i, so habiaran be tu jabu manang sopo, so segaanna be nang suan-suanan.
ᯤᯀ ᯑᯮᯰ ᯑᯪᯅᯂᯉᯩ᯲ ᯤ, ᯉᯉᯪ᯲ᯉ, ᯔᯩᯉᯄ᯦᯲ ᯔ ᯀᯞᯬᯎᯬ ᯉᯎᯬᯎᯬ ᯤ, ᯘᯬ ᯂᯅᯪᯀᯒᯉ᯲ ᯅᯩ ᯖᯮ ᯐᯅᯮ ᯔᯉᯰ ᯘᯬᯇᯬ, ᯘᯬ ᯘᯩᯎᯀᯉ᯲ᯉ ᯅᯩ ᯉᯰ ᯘᯮᯀᯉ᯲ᯘᯮᯀᯉᯉ᯲.
Mansai godang do tabas ni tunggal panaluan i, ai na morasing asing do i huhut hombar tu na tinembak ni na mangulahonsa.
ᯔᯉ᯲ᯘᯤ ᯎᯬᯑᯰ ᯑᯬ ᯖᯅᯘ᯲ ᯉᯪ ᯖᯮᯰᯎᯞ᯲ ᯇᯉᯞᯮᯀᯉ᯲ ᯤ, ᯀᯤ ᯉ ᯔᯬᯒᯘᯪᯰᯀᯘᯪᯰ ᯑᯬ ᯤ ᯂᯮᯂᯖᯮ᯲ ᯂᯔᯬ᯲ᯅᯒ᯲ ᯖᯮ ᯉ ᯖᯪᯉᯔᯩ᯲ᯅᯄ᯦᯲ ᯉᯪ ᯉ ᯔᯝᯮᯞᯂᯉᯬ᯲ᯘ.
Asa on ma saragam tabasna, naung jotjot tinabashon ni angka datu.
"Asa turun ma hamu, ompung debata di atas; manaek manjujung ma hamu, ompung debata di toru; hundul mangunsimpu ma hamu, ompung debata di tonga.
ᯀᯘ ᯀᯉᯬ᯲ ᯔ ᯘᯒᯎᯔ᯲ ᯖᯅᯘ᯲ᯉ, ᯉᯀᯮᯰ ᯐᯖᯬ᯲ᯐᯖᯬ᯲ ᯖᯪᯉᯅᯘ᯲ᯂᯉᯬ᯲ ᯉᯪ ᯀᯰᯄ᯦ ᯑᯖᯮ.
"ᯀᯘ ᯖᯮᯒᯉᯮ᯲ ᯔ ᯂᯔᯮ, ᯀᯔᯬ᯲ᯇᯮᯰ ᯑᯩᯅᯖ ᯑᯪ ᯀᯖᯘ᯲; ᯔᯉᯀᯄᯩ᯦᯲ ᯔᯉ᯲ᯐᯮᯐᯮᯰ ᯔ ᯂᯔᯮ, ᯀᯔᯬ᯲ᯇᯮᯰ ᯑᯩᯅᯖ ᯑᯪ ᯖᯬᯒᯮ; ᯂᯉᯮ᯲ᯑᯞᯮ᯲ ᯔᯝᯉᯮ᯲ᯘᯔᯪ᯲ᯇᯮ ᯔ ᯂᯔᯮ, ᯀᯔᯬ᯲ᯇᯮᯰ
ᯑᯩᯅᯖ ᯑᯪ ᯖᯬᯝ.
Satonga turun ma hamu, ale inang, na guru songta, na guru songti, asa songta, songti ma hamu ompung, na sumunggul saudara ni ompunta, tunggal panaluan, Si Aji Donda Hatahutan, siupar mangalele, datu na sungkot di langit, datu ponjot di tano ; Si Boru Sopak Panaluan, Datu Gumbot na Bolon, horbo paung!
ᯘᯖᯬᯝ ᯖᯮᯒᯉᯮ᯲ ᯔ ᯂᯔᯮ, ᯀᯞᯩ ᯤᯉᯰ, ᯉ ᯎᯮᯒᯮ ᯘᯬᯰᯖ, ᯉ ᯎᯮᯒᯮ ᯘᯬᯰᯖᯪ, ᯀᯘ ᯘᯬᯰᯖ, ᯘᯬᯰᯖᯪ ᯔ ᯂᯔᯮ ᯀᯔᯬ᯲ᯇᯮᯰ, ᯉ ᯘᯮᯔᯮᯰᯎᯞᯮ᯲ ᯘᯥᯑᯒ ᯉᯪ ᯀᯔᯬ᯲ᯇᯉᯮ᯲ᯖ, ᯖᯮᯰᯎᯞ᯲ ᯇᯉᯞᯮᯀᯉ᯲, ᯘᯪ ᯀᯐᯪ ᯑᯉᯬ᯲ᯑ ᯂᯖᯂᯮᯖᯉ᯲, ᯘᯪᯥᯇᯒ᯲ ᯔᯝᯞᯩᯞᯩ, ᯑᯖᯮ ᯉ ᯘᯮᯰᯄ᯦ᯖ᯲ᯬ᯲ ᯑᯪ ᯞᯝᯪᯖ᯲, ᯑᯖᯮ ᯇᯉᯬ᯲ᯐᯖᯬ᯲ ᯑᯪ ᯖᯉᯬ; ᯘᯪᯅᯬᯒᯮ ᯘᯬᯇᯄ᯦᯲ ᯇᯉᯞᯮᯀᯉ᯲, ᯑᯖᯮ ᯎᯔᯮ᯲ᯅᯖᯬ᯲ ᯉ ᯅᯬᯞᯉᯬ᯲, ᯂᯒᯬ᯲ᯅᯬ ᯇᯀᯮᯰ!
Asa pasiarhon ma ibana, di toru ni saniangnaga langit, di atas ni saniangnaga langit, di atas ni tano, tano dangdang, tano dungdung, tano haojahan tano pulo pandan, tano ringgahora, tano ringgahoru, tano liat-liatan, tano guntur guntur na ridom, tano gumba lalaen, tano jadi-jadian, tano tumpan-tumpanan, tano tongosan ni om punta Tuan Batara Guru Doli, tinompa ni ompunta Si Boru Deak Parujar na sungkot di langit, sideak uti-utian, sideak ujar-ujaran, na manompa tano on.
ᯀᯘ ᯇᯘᯪᯀᯒ᯲ᯂᯉᯬ᯲ᯔ ᯤᯅᯉ, ᯑᯪ ᯖᯬᯒᯮ ᯉᯪ ᯘᯉᯪᯀᯰ ᯉᯎ ᯞᯝᯖᯪ᯲, ᯑᯪ ᯀᯖᯘ᯲ ᯉᯪ ᯘᯉᯪᯀᯰ ᯉᯎ ᯞᯝᯖᯪ᯲, ᯑᯪ ᯀᯖᯘ᯲ ᯉᯪ ᯖᯉᯬ, ᯖᯉᯬ ᯑᯰᯑᯰ, ᯖᯉᯬ ᯑᯮᯰᯑᯮᯰ, ᯖᯉᯬ ᯂᯀᯬᯐᯂᯉ᯲ ᯖᯉᯬ ᯇᯮᯞᯬ ᯇᯉ᯲ᯑᯉ᯲, ᯖᯉᯬ ᯒᯪᯰᯎᯂᯬᯒ, ᯖᯉᯬᯒᯪᯰᯎᯂᯬᯒᯮ, ᯖᯉᯬᯞᯪᯀᯖ᯲ᯞᯪᯀᯖᯉ᯲, ᯖᯉᯬ ᯎᯉᯮ᯲ᯖᯒᯮ᯲ᯎᯉᯮ᯲ᯖᯒᯮ᯲ ᯉ ᯒᯪᯑᯔᯬ᯲, ᯖᯉᯬ ᯎᯔᯮ᯲ᯅ ᯞᯞᯀᯉᯩ᯲, ᯖᯉᯬ ᯐᯑᯪᯐᯑᯪᯀᯉ᯲, ᯖᯉᯬᯖᯔᯮ᯲ᯇᯉ᯲ᯖᯔᯮ᯲ᯇᯉᯉ᯲, ᯖᯉᯬᯖᯬᯝᯬᯘᯉ᯲ ᯉᯪ ᯀᯔᯬ᯲ᯇᯉᯮ᯲ᯖ ᯖᯮᯀᯉ᯲ ᯅᯖᯒ ᯎᯮᯒᯮ ᯑᯬᯞᯪ, ᯖᯪᯉᯔᯬ᯲ᯇ ᯉᯪ ᯀᯔᯬ᯲ᯇᯉᯮ᯲ᯖ ᯘᯪᯅᯬᯒᯮ ᯑᯩᯀᯄ᯦᯲ ᯇᯒᯮᯐᯒ᯲ ᯉ ᯘᯮᯰᯄ᯦ᯖᯬ᯲ ᯑᯪ ᯞᯝᯖᯪ᯲, ᯘᯪᯑᯩᯀᯄ᯦᯲ ᯥᯖᯪᯀᯖᯪᯀᯉ᯲, ᯘᯪᯑᯩᯀᯄ᯦᯲ ᯥᯐᯒ᯲ᯥᯐᯒᯉ᯲, ᯉ ᯔᯉᯔᯬ᯲ᯇ ᯖᯉᯬ ᯀᯉᯬ᯲.
Asa na manunggul ma ahu di gogona, momgoti ahu di saudarana, saudara ni ompunta, tunggal panaluan, asa dipasiarhon ma ibana, na morpangubalangkon horbo paung, na morpangulubalangkon
Datu Gumbot na Bolon, na morpangulubalangkon Guru Tinan dangan, na morpangulubalangkon datu pormanuk holing.
ᯀᯘ ᯉ ᯔᯉᯮᯰᯎᯞᯮ᯲ ᯔ ᯀᯂᯮ ᯑᯪ ᯎᯬᯎᯬᯉ, ᯔᯔᯬ᯲ᯎᯬᯖᯪ ᯀᯂᯮ ᯑᯪ ᯘᯥᯑᯒᯉ, ᯘᯥᯑᯒ ᯉᯪ ᯀᯔᯬ᯲ᯇᯉᯮ᯲ᯖ, ᯖᯮᯰᯎᯞ᯲ ᯇᯉᯞᯮᯀᯉ᯲, ᯀᯘ ᯑᯪᯇᯘᯪᯀᯒ᯲ᯂᯉᯬ᯲ ᯔ ᯤᯅᯉ, ᯉ ᯔᯒᯬ᯲ᯇᯝᯮᯅᯞᯰᯄ᯦ᯉᯬ᯲ ᯂᯒᯬ᯲ᯅᯬ ᯇᯀᯮᯰ, ᯉ ᯔᯒᯬ᯲ᯇᯝᯮᯞᯮᯅᯞᯰᯄ᯦ᯉᯬ᯲ ᯑᯖᯮ ᯎᯔᯮ᯲ᯅᯖᯬ᯲ ᯉ ᯅᯬᯞᯉᯬ᯲, ᯉ ᯔᯒᯬ᯲ᯇᯝᯮᯞᯮᯅᯞᯰᯄ᯦ᯉᯬ᯲ ᯎᯮᯒᯮ ᯖᯪᯉᯉ᯲ᯑᯝᯉ᯲, ᯉ ᯔᯒᯬ᯲ᯇᯝᯮᯞᯮᯅᯞᯰᯄᯉᯬ᯲ ᯑᯖᯮ ᯇᯒᯬ᯲ᯔᯉᯄ᯦ᯮ᯲ ᯂᯬᯞᯪᯰ.
On pe ale,· Ompu Ledang · na bolon, Sinambela morhahap, ringkabor sibolang, sidari manarus, sidari mangambat na morpangulubalangkon ulok mahin-mahinan, aji porburu-buru sidari manoro, bosi tumbur-tumbur jati, sai pasiarhon ma ibana ompung, moregas-egas."
ᯀᯉᯬ᯲ ᯇᯩ ᯀᯞᯩ,· ᯀᯔᯬ᯲ᯇᯮ ᯞᯩᯑᯰ· ᯉ ᯅᯬᯞᯉᯬ᯲, ᯘᯪᯉᯔ᯲ᯅᯩᯞ ᯔᯒᯬ᯲ᯂᯂᯇ᯲, ᯒᯪᯰᯄ᯦ᯅᯒᯬ᯲ ᯘᯪᯅᯬᯞᯰ, ᯘᯪᯑᯒᯪ ᯔᯉᯒᯘᯮ᯲, ᯘᯪᯑᯒᯪ ᯔᯝᯔ᯲ᯅᯖ᯲ ᯉ ᯔᯒᯬ᯲ᯇᯝᯮᯞᯮᯅᯞᯰᯄ᯦ᯉᯬ᯲ ᯥᯞᯄ᯦ᯬ᯲ ᯔᯂᯉᯪ᯲ᯔᯂᯪᯉᯉ᯲, ᯀᯐᯪ ᯇᯒᯬ᯲ᯅᯮᯒᯮᯅᯮᯒᯮ ᯘᯪᯑᯒᯪ ᯔᯉᯬᯒᯬ, ᯅᯬᯘᯪ ᯖᯔᯮ᯲ᯅᯒᯮ᯲ᯖᯔᯮ᯲ᯅᯒᯮ᯲ ᯐᯖᯪ, ᯘᯤ ᯇᯘᯪᯀᯒ᯲ᯂᯉᯬ᯲ ᯔ ᯤᯅᯉ ᯀᯔᯬ᯲ᯇᯮᯰ, ᯔᯬᯒᯩᯎᯘ᯲ᯀᯩᯎᯘ᯲.
"Ia pangonaim ale ompung, debata di tonga, pultak di tonga tonga hosa ni musunta i, unang dapot rompuon, unang morusap, unang mormum . Molo morusap, molo mormum, tangkup ma utok utokna, sopsop ma daromatana, porsurage ma holi-holina, por pinangtunggal ma pusu-pusuna, porsiathon ma laho tu jabu, porsi domdomhon ma laho tu toru! Asa ngot ma ho, ale hala dari, ngot ma ho, ale hala manoro, soro ma hosa ni musunta i, suda soada! Sah! "
"ᯤᯀ ᯇᯝᯬᯉᯀᯔᯪ᯲ ᯀᯞᯩ ᯀᯔᯬ᯲ᯇᯮᯰ, ᯑᯩᯅᯖ ᯑᯪ ᯖᯬᯝ, ᯇᯞᯮ᯲ᯖᯄ᯦᯲ ᯑᯪ ᯖᯬᯝᯖᯬᯝ ᯂᯬᯘ ᯉᯪ ᯔᯮᯘᯉᯮ᯲ᯖ ᯤ, ᯥᯉᯰ ᯑᯇᯖᯬ᯲ ᯒᯔᯬ᯲ᯇᯮᯀᯉᯬ᯲, ᯥᯉᯰ ᯔᯬᯒᯮᯘᯇ᯲, ᯥᯉᯰ ᯔᯒᯬᯔᯔᯮ᯲. ᯔᯬᯞᯬ ᯔᯬᯒᯮᯘᯇ᯲, ᯔᯬᯞᯬ ᯔᯒᯬ᯲ᯔᯔᯮ᯲, ᯖᯰᯄ᯦ᯇᯮ᯲ ᯔ ᯥᯖᯄ᯦ᯬ᯲ᯥᯖᯄ᯦ᯬ᯲ᯉ, ᯘᯇᯬ᯲ᯘᯇᯬ᯲ ᯔ ᯑᯒᯬᯔᯖᯉ, ᯇᯒᯬ᯲ᯘᯮᯒᯎᯩ ᯔ ᯂᯬᯞᯪᯂᯬᯞᯪᯉ, ᯇᯒᯬ᯲ᯇᯪᯉᯰᯖᯮᯰᯎᯞ᯲ ᯔ ᯇᯮᯘᯮᯇᯮᯘᯮᯉ, ᯇᯒᯬ᯲ᯘᯪᯀᯖ᯲ᯂᯉᯬ᯲ ᯔ ᯞᯂᯬ ᯖᯮ ᯐᯅᯮ, ᯇᯒᯬ᯲ᯘᯪᯑᯔᯬ᯲ᯑᯔᯬ᯲ᯂᯉᯬ᯲ ᯔ ᯞᯂᯬ ᯖᯮ ᯖᯬᯒᯮ! ᯀᯘ ᯝᯖᯬ᯲ ᯔ ᯂᯬ, ᯀᯞᯩ ᯂᯞ ᯑᯒᯪ, ᯝᯖᯬ᯲ ᯔ ᯂᯬ, ᯀᯞᯩ ᯂᯞ ᯔᯉᯬᯒᯬ, ᯘᯬᯒᯬ ᯔ ᯂᯬᯘ ᯉᯪ ᯔᯮᯘᯉᯮ᯲ᯖ ᯤ, ᯘᯮᯑ ᯘᯬᯀᯑ! ᯘᯂ᯲!"
Dipangke datu do tunggal panaluan i manullang pira ni manuk na beuhan, manang na halohotan, bahen tondung tu pormusuan, asa binoto hataluan manang hamonangan.
ᯑᯪᯇᯰᯄ᯦ᯩ ᯑᯖᯮ ᯑᯬ ᯖᯮᯰᯎᯞ᯲ ᯇᯉᯞᯮᯀᯉ᯲ ᯤ ᯔᯉᯞᯮ᯲ᯞᯰ ᯇᯪᯒ ᯉᯪ ᯔᯉᯄ᯦ᯮ᯲ ᯉ ᯅᯩᯥᯄ᯦ᯉᯬ᯲, ᯔᯉᯰ ᯉ ᯂᯞᯬᯂᯬᯖᯉ᯲, ᯅᯂᯉᯩ᯲ ᯖᯉᯬ᯲ᯑᯮᯰ ᯖᯮ ᯇᯒᯬ᯲ᯔᯮᯘᯮᯀᯉ᯲, ᯀᯘ ᯅᯪᯉᯬᯖᯬ ᯂᯖᯞᯮᯀᯉ᯲ ᯔᯉᯰ ᯂᯔᯬᯉᯝᯉ᯲.
Alai ingkon manolupi do ganup jolma di ulaon sisongon i, asa tung bosur situtu.
ᯀᯞᯤ ᯀᯪᯰᯄ᯦ᯉᯬ᯲ ᯔᯉᯬᯞᯮᯇᯪ ᯑᯬ ᯎᯉᯇᯮ᯲ ᯐᯞᯬ᯲ᯔ ᯑᯪ ᯥᯞᯀᯉᯬ᯲ ᯘᯪᯘᯬᯝᯉᯬ᯲ ᯤ, ᯀᯘ ᯖᯮᯰ ᯅᯬᯘᯒᯮ᯲ ᯘᯪᯖᯮᯖᯮ.
On ma jaha-jaha ni tunggal panaluan i didok datu disi,
ᯀᯉᯬ᯲ᯔ ᯐᯂᯐᯂ ᯉᯪ ᯖᯮᯰᯎᯞ᯲ ᯇᯉᯞᯮᯀᯉ᯲ ᯤ ᯑᯪᯑᯄ᯦ᯬ᯲ ᯑᯖᯮ ᯑᯪᯘᯪ,
1. "Jaha pira ni manuk, pandumpangon na bolon, Siaji boru anggasana, na mangulak aji ni halak, na mangulak aji ni begu, na mambahen pagar parjorot, pagar pormahan di na pinagaranta on."
"ᯐᯂ ᯇᯪᯒ ᯉᯪ ᯔᯉᯄ᯦ᯮ᯲, ᯇᯉ᯲ᯑᯔᯮ᯲ᯇᯝᯉᯬ᯲ ᯉ ᯅᯬᯞᯉᯬ᯲, ᯘᯪ ᯀᯐᯪ ᯅᯬᯒᯮ ᯀᯰᯎᯘᯉ, ᯉ ᯔᯝᯮᯞᯄ᯦᯲ ᯀᯐᯪ ᯉᯪ ᯂᯞᯄ᯦᯲, ᯉ ᯔᯝᯮᯞᯄ᯦᯲ ᯀᯐᯪ ᯉᯪ ᯅᯩᯎᯮ, ᯉ ᯔᯔ᯲ᯅᯂᯉᯩ᯲ ᯇᯎᯒ᯲ ᯇᯒ᯲ᯐᯬᯒᯖᯬ᯲, ᯇᯎᯒ᯲ ᯇᯒᯬ᯲ᯔᯂᯉ᯲ ᯑᯪ ᯉ ᯇᯪᯉᯎᯒᯉ᯲ᯖ ᯀᯉᯬ᯲."
2. "Jaha pira ni manuk mangihut tu tunggal panaluan, molo disintak tu ginjang, bungkas ma huta ni musunta inon."
"ᯐᯂ ᯇᯪᯒ ᯉᯪ ᯔᯉᯄ᯦ᯮ᯲ ᯔᯝᯪᯂᯖᯮ᯲ ᯖᯮ ᯖᯮᯰᯎᯞ᯲ ᯇᯉᯞᯮᯀᯉ᯲, ᯔᯬᯞᯬ ᯑᯪᯘᯉᯪ᯲ᯖᯄ᯦᯲ ᯖᯮ ᯎᯉᯪ᯲ᯐᯰ, ᯅᯮᯰᯄ᯦ᯘ᯲ ᯔ ᯂᯮᯖ ᯉᯪ ᯔᯮᯘᯉᯮ᯲ᯖ ᯤᯉᯉᯬ᯲.
Pangulubalang
Ala morgoar do huhut tunggal panaluan i tungkot ni pangulu balang, laos pinajojor ma di son na dapot paboaon taringot tu pangulubalang i; jolma do di itumpa, songon on pangalahona didok barita :
ᯀᯞ ᯔᯒᯬ᯲ᯎᯬᯀᯒ᯲ ᯑᯬ ᯂᯮᯂᯖᯮ᯲ ᯖᯮᯰᯎᯞ᯲ ᯇᯉᯞᯮᯀᯉ᯲ ᯤ ᯖᯮᯰᯄ᯦ᯖᯬ᯲ ᯉᯪ ᯇᯝᯮᯞᯮ ᯅᯞᯰ ᯞᯀᯘᯬ᯲ ᯇᯪᯉᯐᯬᯐᯒᯬ᯲ ᯔ ᯑᯪᯘᯉᯬ᯲ ᯉ ᯑᯇᯖᯬ᯲ ᯇᯅᯬᯀᯀᯉᯬ᯲ ᯖᯒᯪᯝᯖᯬ᯲ ᯖᯮ ᯇᯝᯮᯞᯮ ᯅᯞᯰ ᯤ; ᯐᯞᯬ᯲ᯔ ᯑᯬ ᯑᯪᯤᯖᯔᯮ᯲ᯇ, ᯘᯬᯝᯉᯬ᯲ ᯀᯉᯬ᯲ ᯇᯝᯞᯂᯬᯉ ᯑᯪᯑᯄ᯦ᯬ᯲ ᯅᯒᯪᯖ:
Adong ma halak saompu, naeng manumpa pangulubalang, asa adong i pasuru-suruonna laho mangalengsehon musuna, laho papidomhon na hinasogohon ni rohana.
ᯀᯑᯬᯰ ᯔ ᯂᯞᯄ᯦᯲ ᯘᯀᯔᯬ᯲ᯇᯮ ᯉᯀᯩ᯦ ᯔᯉᯔᯮ᯲ᯇ ᯇᯝᯮᯞᯮ ᯅᯞᯰ, ᯀᯘ ᯀᯑᯬᯰ ᯤ ᯇᯘᯮᯒᯮᯘᯮᯒᯮᯀᯉᯬ᯲ᯉ ᯞᯂᯬ ᯔᯝᯞᯰᯩᯘᯩᯂᯉᯬ᯲ ᯔᯮᯘᯮᯉ, ᯞᯂᯬ ᯇᯇᯪᯑᯔᯬ᯲ᯂᯉᯬ᯲ ᯉ ᯂᯪᯉᯘᯬᯎᯬᯂᯉᯬ᯲ ᯉᯪ ᯒᯬᯂᯉ.
Dung i didok na sada sian na saompu i ma, "Botima i, ale angka dongan! Adong· do sada halak sian 'luat na dao ro nuaeng tu luatta on, siporsibong lasiak na malamun.
ᯑᯮᯰ ᯤ ᯑᯪᯑᯄ᯦ᯬ᯲ ᯉ ᯘᯑ ᯘᯪᯀᯉ᯲ ᯉ ᯘᯀᯔᯬ᯲ᯇᯮ ᯤ ᯔ, "ᯅᯬᯖᯪᯔ ᯤ, ᯀᯞᯩ ᯀᯰᯄ᯦ ᯑᯬᯝᯉ᯲! ᯀᯑᯬᯰ· ᯑᯬ ᯘᯑ ᯂᯞᯄ᯦᯲ ᯘᯪᯀᯉ᯲ ᯞᯮᯀᯖ᯲ ᯉ ᯑᯀᯬ ᯒᯬ ᯉᯮᯀᯀᯰᯩ ᯖᯮ ᯞᯮᯀᯖ᯲ᯖ ᯀᯉᯬ᯲, ᯘᯪ ᯇᯒᯬ᯲ᯘᯪᯅᯬᯰ ᯞᯘᯪᯀᯄ᯦᯲ ᯉ ᯔᯞᯔᯉᯮ᯲.
Ua ibana ma taela-ela, asa dapot tumpaonta bahen pangulubalangta?!" ninna. Dung i ro ma angka donganna i, ditolopi ma hatana i.
ᯥᯀ ᯤᯅᯉ ᯔ ᯖᯀᯩᯞᯀᯩᯞ, ᯀᯘ ᯑᯇᯖᯬ᯲ ᯖᯔᯮ᯲ᯇᯀᯉᯬ᯲ᯖ ᯅᯂᯉᯩ᯲ ᯇᯝᯮᯞᯮᯅᯞᯰᯖ?! "ᯉᯉᯪ᯲ᯉ ᯑᯮᯰ ᯤ ᯒᯬ ᯔ ᯀᯰᯄ᯦ ᯑᯬᯝᯉ᯲ᯉ ᯤ, ᯑᯪᯖᯬᯞᯬᯇᯪ ᯔ ᯂᯖᯉ ᯤ.
Dung i disungkun nasida ma baoa na ro i, didok ma, "Halak sian dia do hamu, ale rajanami? Apala aha do na niulamuna ro tu luatnami on?" '
ᯑᯮᯰ ᯤ ᯑᯪᯘᯮᯰᯄ᯦ᯉᯮ᯲ ᯉᯘᯪᯑ ᯔ ᯅᯀᯬᯀ ᯉ ᯒᯬ ᯤ, ᯑᯪᯑᯄ᯦ᯬ᯲ ᯔ, "ᯂᯞᯄ᯦᯲ ᯘᯪᯀᯉ᯲ ᯑᯪᯀ ᯑᯬ ᯂᯔᯮ, ᯀᯞᯩ ᯒᯐᯉᯔᯪ? ᯀᯇᯞ ᯀᯂ ᯑᯬ ᯉ ᯉᯪᯥᯞᯔᯮᯉ ᯒᯬ ᯖᯮ ᯞᯮᯀᯖ᯲ᯉᯔᯪ ᯀᯉᯬ᯲?"'
"Halak sian na dao do ahu, na ro manandangkon hadatuon dohot tumandangi hadatuon", ninna baoa i mangalusi.
"ᯂᯞᯄ᯦᯲ ᯘᯪᯀᯉ᯲᯲ ᯉ ᯑᯀᯬ ᯑᯬ ᯀᯂᯮ, ᯉ ᯒᯬ ᯔᯉᯉ᯲ᯑᯰᯄ᯦ᯉᯬ᯲ ᯂᯑᯖᯮᯀᯉᯬ᯲ ᯑᯬᯂᯖᯬ᯲ ᯖᯮᯔᯉ᯲ᯑᯝᯪ ᯂᯑᯖᯮᯀᯉᯬ᯲", ᯉᯉᯪ᯲ᯉ ᯅᯀᯬᯀ ᯤ ᯔᯝᯞᯮᯘᯪ.
Ia dung songon i hata ni baoa i dibege nasida, dipatolhas ma i' tu datu dohot tu rajanasida, asa sahata, satahi nasida padapothon baoa i, asa saut tumpaonna gabe pangulubalang
ᯤᯀ ᯑᯮᯰ ᯘᯬᯝᯉᯬ᯲ ᯤ ᯂᯖ ᯉᯪ ᯅᯀᯬᯀ ᯤ ᯑᯪᯅᯩᯎᯩ ᯉᯘᯪᯑ, ᯑᯪᯇᯖᯞᯬ᯲ᯂᯘ᯲ ᯔ ᯤ ᯖᯮ ᯑᯖᯮ ᯑᯬᯂᯖᯬ᯲ ᯖᯮ ᯒᯐ ᯉᯘᯪᯑ, ᯀᯘ ᯘᯂᯖ, ᯘᯖᯂᯪ ᯉᯘᯪᯑ ᯇᯑᯇᯖᯬ᯲ᯂᯉᯬ᯲ ᯅᯀᯬᯀ ᯤ, ᯀᯘ ᯘᯀᯖᯮ᯲ ᯖᯔᯮ᯲ᯇᯀᯉᯬ᯲ᯉ ᯎᯅᯩ ᯇᯝᯮᯞᯮ ᯅᯞᯰ
Ia dung dos tahinasida, datu i ma dibahen nasida mangela-ela baoa na ro i, sitandangkon hadatuon, na tumandangi hadatuon i, siporsibong · lasiak, mangigil rasun ni deba.
ᯤᯀ ᯑᯮᯰ ᯑᯘᯬ᯲ ᯖᯂᯪ ᯉᯘᯪᯑ, ᯑᯖᯮ ᯤ ᯔ ᯑᯪᯅᯂᯉᯩ᯲ ᯉᯘᯪᯑ ᯔᯝᯩᯞᯀᯩᯞ ᯅᯀᯬᯀ ᯉ ᯒᯬ ᯤ, ᯘᯪᯖᯉ᯲ᯑᯰᯄ᯦ᯉᯬ᯲ ᯂᯑᯖᯮᯀᯉᯬ᯲ ᯉ ᯖᯮᯔᯉ᯲ᯑᯝᯪ ᯂᯑᯖᯮᯀᯉᯬ᯲ ᯤ, ᯘᯪᯇᯒᯬ᯲ᯘᯪᯅᯬᯰ· ᯞᯘᯪᯀᯄ᯦᯲ ᯔᯝᯪᯎᯞᯪ᯲ ᯒᯘᯉᯮ᯲ ᯉᯪ ᯑᯩᯅ.
Dung i ro ma .datu angka na mangonggop ibana i didok ma,
ᯑᯮᯰ ᯤ ᯒᯬ ᯔ. ᯑᯖᯮ ᯀᯰᯄ᯦ ᯉ ᯔᯝᯪᯰᯎᯇᯬ᯲ ᯤᯅᯉ ᯤ ᯑᯪᯑᯄ᯦ᯬ᯲ ᯔ,
"Ale rajanami! Rupana manandangi hadatuon do hamu, tumandangkon hadatuon.
"ᯀᯞᯩ ᯒᯐᯉᯔᯪ! ᯒᯮᯇᯉ ᯔᯉᯉ᯲ᯑᯝᯪ ᯂᯑᯖᯮᯀᯉᯬ᯲ ᯑᯬ ᯂᯔᯮ, ᯖᯮᯔᯉ᯲ᯑᯰᯄ᯦ᯉᯬ᯲ ᯂᯑᯖᯮᯀᯉᯬ᯲.
Anggo i do na niulamu, beta ma tu hutanami!" Dung i udur ma nasida tu huta, dung sahat dipahembang ma amak hundulanna di jolo ni sopo, disi ma nasida jolo hundul mangkata hatai.
ᯀᯰᯎᯬ ᯤ ᯑᯬ ᯉ ᯉᯪᯥᯞᯔᯮ, ᯅᯩᯖ ᯔ ᯖᯮ ᯂᯮᯖᯉᯔᯪ! "ᯑᯮᯰ ᯤ ᯥᯑᯒᯮ᯲ ᯔ ᯉᯘᯪᯑ ᯖᯮ ᯂᯮᯖ, ᯑᯮᯰ ᯘᯂᯖ᯲ ᯑᯪᯇᯂᯔᯩ᯲ᯅᯰ ᯔ ᯀᯔᯄ᯦᯲ ᯂᯉᯮ᯲ᯑᯮᯞᯉ᯲ᯉ ᯑᯪ ᯐᯬᯞᯬ ᯉᯪ ᯘᯬᯇᯬ, ᯑᯪᯘᯪ ᯔ ᯉᯘᯪᯑ ᯐᯬᯞᯬ ᯂᯉᯮ᯲ᯑᯞᯮ᯲ ᯔᯰᯄ᯦ᯖᯂᯖᯤ.
Andorang di na mangkata-hatai i nasida, nunga disuru datu na di luat i hian mangalap tuak.
ᯀᯉ᯲ᯑᯬᯒᯰ ᯑᯪ ᯉ ᯔᯰᯄ᯦ᯖᯂᯖᯤ ᯤ ᯉᯘᯪᯑ, ᯉᯮᯝ ᯑᯪᯘᯮᯒᯮ ᯑᯖᯮ ᯉ ᯑᯪ ᯞᯮᯀᯖ᯲ ᯤ ᯂᯪᯀᯉ᯲ ᯔᯝᯞᯇ᯲ ᯖᯮᯀᯄ᯦᯲.
Ia dung ro na mamboan tuak i, didok ma tu na ro i, "Minum ma antong na ro i.
ᯤᯀ ᯑᯮᯰ ᯒᯬ ᯉ ᯔᯔ᯲ᯅᯬᯀᯉ᯲ ᯖᯮᯀᯄ᯦᯲ ᯤ, ᯑᯪᯑᯄ᯦ᯬ᯲ ᯔ ᯖᯮ ᯉ ᯒᯬ ᯤ, "ᯔᯪᯉᯔᯮ᯲ ᯔ ᯀᯉ᯲ᯖᯬᯰ ᯉ ᯒᯬ ᯤ.
Hape naung di bahen datu ni dapotna i do dorma tu tuak i.
ᯂᯇᯩ ᯉᯀᯮᯰ ᯑᯪᯅᯂᯉᯩ᯲ ᯑᯖᯮ ᯉᯪ ᯑᯇᯖᯬ᯲ᯉ ᯤ ᯑᯬ ᯑᯒᯬ᯲ᯔ ᯖᯮ ᯖᯮᯀᯄ᯦᯲ ᯤ.
Ia dung masak sipanganon, diarahon datu i ma na ro i mangan, didok ma, "Nangkok ma hamu tu jabu asa mangan hita!"
ᯤᯀ ᯑᯮᯰ ᯔᯘᯂ᯲ ᯘᯪᯇᯝᯉᯉᯬ᯲, ᯑᯪᯀᯒᯂᯉᯬ᯲ ᯑᯖᯮ ᯤ ᯔ ᯉ ᯒᯬ ᯤ ᯔᯝᯉ᯲, ᯑᯪᯑᯄ᯦ᯬ᯲ ᯔ, "ᯉᯰᯄ᯦ᯄ᯦ᯬ᯲ ᯔ ᯂᯔᯮ ᯖᯮ ᯐᯅᯮ ᯀᯘ ᯔᯝᯉ᯲ ᯂᯪᯖ!"
Dung i hehe ma na ro i, hape lohot do amak hinundulanna i di omba ombana; manang beha pe dibahen pahusor-husorhon, indada olo tanggal.
ᯑᯮᯰ ᯤ ᯂᯩᯂᯩ ᯔ ᯉ ᯒᯬ ᯤ, ᯂᯇᯩ ᯞᯬᯂᯖᯬ᯲ ᯑᯬ ᯀᯔᯄ᯦᯲ ᯂᯪᯉᯉᯮ᯲ᯑᯮᯞᯉ᯲ᯉ ᯤ ᯑᯪ ᯀᯔᯬ᯲ᯅᯀᯔᯬ᯲ᯅᯉ; ᯔᯉᯰ ᯅᯩᯂ ᯇᯩ ᯑᯪᯅᯂᯉᯩ᯲ ᯇᯂᯮᯘᯒᯬ᯲ᯂᯮᯘᯒᯬ᯲ᯂᯉᯬ᯲, ᯀᯉᯪ᯲ᯑᯑ ᯀᯬᯞᯬ ᯖᯰᯎᯞ᯲.
Dung i ro ma datu ni huta i, diulahi ma manjou, didok ma,
ᯑᯮᯰ ᯤ ᯒᯬ ᯔ ᯑᯖᯮ ᯉᯪ ᯂᯮᯖ ᯤ, ᯑᯪᯥᯞᯂᯪ ᯔ ᯔᯉ᯲ᯐᯬᯥ, ᯑᯪᯑᯄ᯦ᯬ᯲ ᯔ,
"Ba, pahatop hamu, ale rajanami, ai nunga rade panganan", ninna huhut didapothon tu jolo ni sopo i.
"ᯅ ᯇᯂᯖᯇᯬ᯲ ᯂᯔᯮ, ᯀᯞᯩ ᯒᯐᯉᯔᯪ, ᯀᯤ ᯉᯮᯝ ᯒᯑᯩ ᯇᯝᯉᯉ᯲", ᯉᯉᯪ᯲ᯉ ᯂᯮᯂᯖᯮ᯲ ᯑᯪᯑᯇᯖᯬ᯲ᯂᯉᯬ᯲ ᯖᯮ ᯐᯬᯞᯬ ᯉᯪ ᯘᯬᯇᯬ ᯤ.
Alai dung diida datu i, naung sai lohot hape amak i di omba omba ni na ro i, didok ma,
ᯀᯞᯤ ᯑᯮᯰ ᯑᯪᯤᯑ ᯑᯖᯮ ᯤ, ᯉᯀᯮᯰ ᯘᯤ ᯞᯬᯂᯖᯬ᯲ ᯂᯇᯩ ᯀᯔᯄ᯦᯲ ᯤ ᯑᯪ ᯀᯔᯬ᯲ᯅᯀᯔᯬ᯲ᯅ ᯉᯪ ᯉ ᯒᯬ ᯤ, ᯑᯪᯑᯄ᯦ᯬ᯲ ᯔ,
"Boasa tiopanmu antong amak tamuenami i? Palua, asa mangan hami!" ninna, laos dipihik amak i, gabe longkang ma tutu.
"ᯅᯬᯀᯘ ᯖᯪᯀᯬᯇᯉ᯲ᯔᯮ ᯀᯉ᯲ᯖᯬᯰ ᯀᯔᯄ᯦᯲ ᯖᯔᯮᯀᯩᯉᯔᯪ ᯤ? ᯇᯞᯮᯀ, ᯀᯘ ᯔᯝᯉ᯲ᯂᯔᯪ! "ᯉᯉᯪ᯲ᯉ, ᯞᯀᯘᯬ᯲ ᯑᯪᯇᯪᯂᯄ᯦ᯪ᯲ ᯀᯔᯄ᯦᯲ ᯤ, ᯎᯅᯩ ᯞᯬᯰᯄᯰ᯦ ᯔ ᯖᯮᯖᯮ.
Ia dung ro di jabu nasida, dilehon ma jomuhan, didok ma, "marjomuk ma hamu!" Hape dung dibahen na ro i tanganna tu parjomuhan i, indang boi be enetonna, sai toltol nama disi.
ᯤᯀ ᯑᯮᯰ ᯒᯬ ᯑᯪ ᯐᯅᯮ ᯉᯘᯪᯑ, ᯑᯪᯞᯩᯂᯉᯬ᯲ ᯔ ᯐᯬᯔᯮᯂᯉ᯲, ᯑᯪᯑᯄ᯦ᯬ᯲ ᯔ," ᯔᯒ᯲ᯐᯬᯔᯄ᯦ᯮ᯲ ᯔ ᯂᯔᯮ! "ᯂᯇᯩ ᯑᯮᯰ ᯑᯪᯅᯂᯉᯩ᯲ ᯉ ᯒᯬ ᯤ ᯖᯝᯉ᯲ᯉ ᯖᯮ ᯇᯒ᯲ᯐᯬᯔᯮᯂᯉ᯲ ᯤ, ᯀᯉᯪ᯲ᯑᯰ ᯅᯬᯤ ᯅᯩ ᯀᯩᯉᯩᯖᯉᯬ᯲ᯉ, ᯘᯤ ᯖᯞᯬ᯲ᯖᯞᯬ᯲ ᯉ ᯔ ᯑᯪᯘᯪ.
Dung diida datu ni huta inon i, didok ma, "Palua antong, jomuhan, tangan ni raja i, asa mangan hami!" Dung pe i asa boi enetonna, laos mangan ma nasida.
ᯑᯮᯰ ᯑᯪᯤᯑ ᯑᯖᯮ ᯉᯪ ᯂᯮᯖ ᯤᯉᯉᯬ᯲ ᯤ, ᯑᯪᯑᯄ᯦ᯬ᯲ ᯔ, "ᯇᯞᯮᯀ ᯀᯉ᯲ᯖᯬᯰ, ᯐᯬᯔᯮᯂᯉ᯲, ᯖᯝᯉ᯲ᯉᯪ ᯒᯐ ᯤ, ᯀᯘ ᯔᯝᯉ᯲ᯂᯔᯪ! "ᯑᯮᯰ ᯇᯩ ᯤ ᯀᯘ ᯅᯬᯤ ᯀᯩᯉᯩᯖᯉᯬ᯲ᯉ, ᯞᯀᯘᯬ᯲ ᯔᯝᯉ᯲ ᯔ ᯉᯘᯪᯑ.
Ia dung sun nasida mangan, tole ma nasida mangkata-hatai.
ᯤᯀ ᯑᯮᯰ ᯘᯉᯮ᯲ ᯉᯘᯪᯑ ᯔᯝᯉ᯲, ᯖᯬᯞᯩ ᯔ ᯉᯘᯪᯑ ᯔᯰᯄ᯦ᯖᯂᯖ ᯤ
Disungkun datu ni huta i ma ibana songon on, "Ai na laho tu dia do hamu, rajanami apala aha dona niulamuna?"
ᯑᯪᯘᯮᯰᯄ᯦ᯉᯮ᯲ ᯑᯖᯮ ᯉᯪ ᯂᯮᯖ ᯤ ᯔ ᯤᯅᯉ ᯘᯬᯝᯉᯬ᯲ ᯀᯉᯬ᯲, "ᯀᯤ ᯉ ᯞᯂᯬ ᯖᯮᯑᯪᯀ ᯑᯬ ᯂᯔᯮ, ᯒᯐᯉᯔᯪ ᯀᯇᯞ ᯀᯂ ᯑᯬ ᯉ ᯉᯪᯥᯞᯔᯮᯉ?"
"Na tumandangi hadatuon do ahu nian, manandangkon hadatuan", ninna na ro i.
"ᯉ ᯖᯮᯔᯉ᯲ᯑᯝᯪ ᯂᯑᯖᯮᯀᯉᯬ᯲ ᯑᯬ ᯀᯂᯮ ᯉᯪᯀᯉ᯲, ᯔᯉᯉ᯲ᯑᯰᯄ᯦ᯉᯬ᯲ ᯂᯑᯖᯮᯀᯉ᯲", ᯉᯉᯪ᯲ᯉ ᯉ ᯒᯬ ᯤ
So diboto na maila atik pe nunga talu ibana dibahen guna-gunaan ni na nidapotna, tarila ibana dibahen amak dohot parjomuhan.
ᯘᯬ ᯑᯪᯅᯬᯖᯬ ᯉ ᯔᯤᯞ ᯀᯖᯄ᯦ᯪ᯲ ᯇᯩ ᯉᯮᯝ ᯖᯞᯮ ᯤᯅᯉ ᯑᯪᯅᯂᯉᯩ᯲ ᯎᯮᯉᯎᯮᯉᯀᯉ᯲ ᯉᯪ ᯉ ᯉᯪᯑᯇᯖᯬ᯲ᯉ, ᯖᯒᯪᯞ ᯤᯅᯉ ᯑᯪᯅᯂᯉᯩ᯲ ᯀᯔᯂ᯲ ᯑᯬᯂᯖᯬ᯲ ᯇᯒ᯲ᯐᯬᯔᯮᯂᯉ᯲.
Dung songon i alusna, didok na manamuei ibana i ma, "Anggo i do hape na niulam, ale rajanami, tu huta adui ma ho laho, ai di si do adong datu, indang adong anggo di hami on", ninna.
ᯑᯮᯰ ᯘᯬᯝᯉᯬ᯲ ᯤ ᯀᯞᯘᯮ᯲ᯉ, ᯑᯪᯑᯄ᯦ᯬ᯲ ᯉ ᯔᯉᯔᯮᯀᯩᯤ ᯤᯅᯉ ᯤ ᯔ," ᯀᯰᯎᯬ ᯤ ᯑᯬ ᯂᯇᯩ ᯉ ᯉᯪᯥᯞᯔ᯲, ᯀᯞᯩ ᯒᯐᯉᯔᯪ, ᯖᯮ ᯂᯮᯖ ᯀᯑᯮᯤ ᯔ ᯂᯬ ᯞᯂᯬ, ᯀᯤ ᯑᯪᯘᯪ ᯑᯬ ᯀᯑᯬᯰ ᯑᯖᯮ, ᯀᯉᯪ᯲ᯑᯰ ᯀᯑᯬᯰ ᯀᯰᯎᯬ ᯑᯪ ᯂᯔᯪ ᯀᯉᯬ᯲", ᯉᯉᯪ᯲ᯉ.
Hape, nunga adong hian ula-ulaanna disaorhon tu sipanganon i dipangan baoa na ro i.
ᯂᯇᯩ, ᯉᯮᯝ ᯀᯑᯬᯰ ᯂᯪᯀᯉ᯲ ᯥᯞᯀᯥᯞᯀᯉ᯲ᯉ ᯑᯪᯘᯀᯒᯬ᯲ᯂᯉᯬ᯲ ᯖᯮ ᯘᯪᯇᯝᯉᯉᯬ᯲ ᯤ ᯑᯪᯇᯝᯉ᯲ ᯅᯀᯬᯀ ᯉ ᯒᯬ ᯤ.
Ia dung mijur be nasida sian jabu, laho ma baoa i manuruk bara ni horbo, hundul-hundul ma ibana di napa ni horbo i manipat sadarina i.
ᯤᯀ ᯑᯮᯰ ᯔᯪᯐᯒᯮ᯲ ᯅᯩ ᯉᯘᯪᯑ ᯘᯪᯀᯉ᯲ ᯐᯅᯮ, ᯞᯂᯬ ᯔ ᯅᯀᯬᯀ ᯤ ᯔᯉᯮᯒᯄ᯦ᯮ᯲ ᯅᯒ ᯉᯪ ᯂᯒᯬ᯲ᯅᯬ, ᯂᯉᯮ᯲ᯑᯞᯮ᯲ᯂᯉᯮ᯲ᯑᯞᯮ᯲ ᯔ ᯤᯅᯉ ᯑᯪ ᯉᯇ ᯉᯪ ᯂᯒᯬ᯲ᯅᯬ ᯤ ᯔᯉᯪᯇᯖ᯲ ᯘᯑᯒᯪᯉ ᯤ.
Ia dung moreak bot ari, muli be ma pangisi ni huta i sian ulaonna, mulak ma nang datunasida i sian pordalananna, gabe diida ma baoa na ro i, sai hundul di bara ni horbo, gabe didok ma, "Boasa ma tu napa ni horbo i ho juguk, ale· rajanami?"
ᯤᯀ ᯑᯮᯰ ᯔᯬᯒᯩᯀᯄ᯦᯲ ᯅᯖᯬ᯲ ᯀᯒᯪ, ᯔᯮᯞᯪ ᯅᯩ ᯔ ᯇᯝᯪᯘᯪ ᯉᯪ ᯂᯮᯖ ᯤ ᯘᯪᯀᯉ᯲ ᯥᯞᯀᯉᯬ᯲ᯉ, ᯔᯮᯞᯄ᯦᯲ ᯔ ᯉᯰ ᯑᯖᯮ ᯉᯘᯪᯑ ᯤ ᯘᯪᯀᯉ᯲ ᯇᯒᯬ᯲ᯑᯞᯉᯉ᯲ᯉ, ᯎᯅᯩ ᯑᯪᯤᯑ ᯔ ᯅᯀᯬᯀ ᯉ ᯒᯬ ᯤ, ᯘᯤ ᯂᯉᯮ᯲ᯑᯞᯮ᯲ ᯑᯪ ᯅᯒ ᯉᯪ ᯂᯒᯬ᯲ᯅᯬ, ᯎᯅᯩ ᯑᯪᯑᯄ᯦ᯬ᯲ ᯔ, "ᯅᯬᯀᯘ ᯔ ᯖᯮ ᯉᯇ ᯉᯪ ᯂᯒᯬ᯲ᯅᯬ ᯤ ᯂᯬ ᯐᯮᯎᯄ᯦ᯮ᯲, ᯀᯞᯩ ᯒᯐᯉᯔᯪ?"
"Hahuaon!" ninna baoa i mangalusi.
"ᯂᯂᯮᯀᯀᯉᯬ᯲! "ᯉᯉᯪ᯲ᯉ ᯅᯀᯀ ᯤ ᯔᯝᯞᯮᯘᯪ.
Dung i didok datu ni huta i ma, "Boasa tiopanmu antong, napa ni horbo tamuenami i? Palua!" ninna.
ᯑᯮᯰ ᯤ ᯑᯪᯑᯄ᯦ᯬ᯲ ᯑᯖᯮ ᯉᯪ ᯂᯮᯖ ᯤ ᯔ, "ᯅᯬᯀᯘ ᯖᯪᯀᯬᯇᯉ᯲ᯔᯮ ᯀᯉ᯲ᯖᯬᯰ, ᯉᯇ ᯉᯪ ᯂᯒᯬ᯲ᯅᯬ ᯖᯔᯮᯀᯩᯉᯔᯪ ᯤ? ᯇᯞᯮᯀ! "ᯉᯉᯪ᯲ᯉ.
Dung i ruar ma baoa i sian i tu alaman
ᯑᯮᯰ ᯤ ᯒᯮᯀᯒ᯲ ᯔ ᯅᯀᯬᯀ ᯤ ᯘᯪᯀᯉ᯲ ᯤ ᯖᯮ ᯀᯞᯔᯉ᯲
Morhite sian angka i, diboto datu ni huta i ma, na maila so datu do baoa na ro i, hinajugulna do mandok. na tumandangkon hadatuon ibana.
ᯔᯒᯬ᯲ᯂᯪᯖᯩ ᯘᯪᯀᯉ᯲ ᯀᯰᯄ᯦ ᯤ, ᯑᯪᯅᯬᯖᯬ ᯑᯖᯮ ᯉᯪ ᯂᯮᯖ ᯤ ᯔ, ᯉ ᯔᯤᯞ ᯘᯬ ᯑᯖᯮ ᯑᯬ ᯅᯀᯬᯀ ᯉ ᯒᯬ ᯤ, ᯂᯪᯉᯐᯮᯎᯞᯮ᯲ᯉ ᯑᯬ ᯔᯉ᯲ᯑᯄ᯦ᯬ᯲. ᯉ ᯖᯮᯔᯉ᯲ᯑᯰᯄ᯦ᯉᯬ᯲ ᯂᯑᯖᯮᯀᯉᯬ᯲ ᯤᯅᯉ.
Lam digogo datu i ma antong mamasang angka botobotoanna, maniop-niopi langka ni baoa i, unang diboto morot manang tu dia, asa saut i muse tumpaonnasida bahen pangulubalang.
ᯞᯔ᯲ ᯑᯪᯎᯬᯎᯬ ᯑᯖᯮ ᯤ ᯔ ᯀᯉ᯲ᯖᯬᯰ ᯔᯔᯘᯰ ᯀᯰᯄ᯦ ᯅᯬᯖᯬᯅᯬᯖᯬᯀᯉ᯲ᯉ, ᯔᯉᯪᯀᯇᯬ᯲ᯉᯪᯀᯬᯇᯪ ᯞᯰᯄ᯦ ᯉᯪ ᯅᯀᯬᯀ ᯤ, ᯥᯉᯰ ᯑᯪᯅᯬᯖᯬ ᯔᯬᯒᯖᯬ᯲ ᯔᯉᯰ ᯖᯮᯑᯪᯀ, ᯀᯘ ᯘᯀᯖᯮ᯲ ᯤ ᯔᯮᯘᯩ ᯖᯔᯮ᯲ᯇᯀᯉᯬ᯲ ᯉᯘᯪᯑ ᯅᯂᯉᯩ᯲ ᯇᯝᯮᯞᯮ ᯅᯞᯰ.
Ia dung leleng baoa i didorma-dormai nasida, tartabotabo nang sipanganon dilehon allangonna, dipasuru-suru ma i huhut mangalap soban, aek, mangula dohot na asing.
ᯤᯀ ᯑᯮᯰ ᯞᯩᯞᯰᯩ ᯅᯀᯬᯀ ᯤ ᯑᯪᯑᯒᯬ᯲ᯔᯑᯒᯬ᯲ᯔᯤ ᯉᯘᯪᯑ, ᯖᯒ᯲ᯖᯅᯬᯖᯅᯬ ᯉᯰ ᯘᯪᯇᯝᯉᯉᯬ᯲ ᯑᯪᯞᯩᯂᯉᯬ᯲ ᯀᯞ᯲ᯞᯝᯉᯬ᯲ᯉ, ᯑᯪᯇᯘᯮᯒᯮᯘᯮᯒᯮ ᯔ ᯤ ᯂᯮᯂᯖᯮ᯲ ᯔᯝᯞᯇ᯲ ᯘᯬᯅᯉ᯲, ᯀᯀᯄᯩ᯦᯲, ᯔᯝᯮᯞ ᯑᯬᯂᯖᯬ᯲ ᯉ ᯀᯘᯪᯰ.
Tar disonggak pe i, indang be olo mangalo, indang olo be i manjua nang suruonria, atik pe nian alo sipata tu rohana, sai pintor hata olo nama sian ibana.
ᯖᯒ᯲ᯑᯪᯘᯬᯰᯎᯄ᯦᯲ ᯇᯩ ᯤ, ᯀᯉᯪ᯲ᯑᯰ ᯅᯩ ᯀᯬᯞᯬ ᯔᯝᯞᯬ, ᯀᯉᯪ᯲ᯑᯰ ᯀᯬᯞᯬ ᯅᯩ ᯤ ᯔᯉ᯲ᯐᯮᯀ ᯉᯰ ᯘᯮᯒᯮᯀᯉᯬ᯲ᯒᯪᯀ, ᯀᯖᯄ᯦ᯪ᯲ ᯇᯩ ᯉᯪᯀᯉ᯲ ᯀᯞᯬ ᯘᯪᯇᯖ ᯖᯮ ᯒᯬᯂᯉ, ᯘᯤ ᯇᯉᯪ᯲ᯖᯒᯬ᯲ ᯂᯖ ᯀᯬᯞᯬ ᯉ ᯔ ᯘᯪᯀᯉ᯲ ᯤᯅᯉ.
"Nunga patu on mangunduk mangoloi di hatangku, indang tu dia be panjuangan ni on," ninna roha ni datu i, dung diida songon i pangalaho ni baoa i, nunga tung jinak situtu, so tutu adong diida hadatuonna.
"ᯉᯮᯝ ᯇᯖᯮ ᯀᯉᯬ᯲ ᯔᯝᯉᯮ᯲ᯑᯄ᯦ᯮ᯲ ᯔᯝᯬᯞᯬᯤ ᯑᯪᯂᯖᯰᯄ᯦ᯮ, ᯀᯉᯪᯑᯰ ᯖᯮᯑᯪᯀ ᯅᯩ ᯇᯉ᯲ᯐᯮᯀᯝᯉ᯲ ᯉᯪ ᯀᯉᯬ᯲," ᯉᯉᯪ᯲ᯉ ᯒᯬᯂ ᯉᯪ ᯑᯖᯮ ᯤ, ᯑᯮᯰ ᯑᯪᯤᯑ ᯘᯬᯝᯉᯬ᯲ ᯤ ᯇᯝᯞᯂᯬ ᯉᯪ ᯅᯀᯬᯀ ᯤ, ᯉᯮᯝ ᯖᯮᯰ ᯐᯪᯉᯄ᯦᯲ ᯘᯪᯖᯮᯖᯮ, ᯘᯬ ᯖᯮᯖᯮ ᯀᯑᯬᯰ ᯑᯪᯤᯑ ᯂᯑᯖᯮᯀᯉᯬ᯲ᯉ.
Dung i mortuptup ma nasida dohot raja ni luatnasida i, 'ro di angka donganna saompu, na naeng manumpa jolma i manjadihon pangulubalang; di sihabunian ma nasida mortahi, .unang diboto na naeng tumpaonna i.
ᯑᯮᯰ ᯤ ᯔᯒᯬ᯲ᯖᯇᯮ᯲ᯖᯇᯮ᯲ ᯔ ᯉᯘᯪᯑ ᯑᯬᯂᯖᯬ᯲ ᯒᯐ ᯉᯪ ᯞᯮᯀᯖ᯲ ᯉᯘᯪᯑ ᯤ, ᯒᯬ ᯑᯪ ᯀᯰᯄ᯦ ᯑᯬᯝᯉ᯲ᯉ ᯘᯀᯔᯬ᯲ᯇᯮ , ᯉᯉᯀᯰᯩ ᯔᯉᯔᯮ᯲ᯇ ᯐᯬᯞ᯲ᯔ ᯤ ᯔᯉ᯲ᯐᯑᯪᯂᯉᯬ᯲ ᯇᯝᯮᯞᯮ ᯅᯞᯰ; ᯑᯪ ᯘᯪᯂᯅᯮᯉᯪᯀᯉ᯲ ᯔ ᯉᯘᯪᯑ ᯔᯒᯬ᯲ᯖᯂᯪ,.ᯥᯉᯰ ᯑᯪᯅᯬᯖᯬ ᯉᯉᯀᯰᯩ ᯖᯮᯔ᯲ᯇᯀᯉᯬ᯲ᯉ ᯤ.
Ia dung putus tahinasida, diela ma baoa na ro i, ditogihon ma tu tano mate, ai sai tar tu tano mate do panumpaan ni pangulubalang.
ᯤᯀ ᯑᯮᯰ ᯇᯮᯖᯘᯮ᯲ ᯖᯂᯪᯉᯘᯪᯑ, ᯑᯪᯀᯩᯞ ᯔ ᯅᯀᯬᯀ ᯉ ᯒᯬ ᯤ, ᯑᯪᯖᯬᯎᯪᯂᯉᯬ᯲ ᯔ ᯖᯮ ᯖᯉᯬ ᯔᯖᯩ, ᯀᯤ ᯘᯤ ᯖᯒ᯲ ᯖᯮ ᯖᯉᯬ ᯔᯖᯩ ᯑᯬ ᯇᯉᯔᯮ᯲ᯇᯀᯉ᯲ ᯉᯪ ᯇᯝᯮᯞᯮ ᯅᯞᯰ.
Dung sahat nasida ro disi, dilehon ma tu baoa i nasa sipanganon na pinangido ni rohana, nasa na boi patupaonnasida.
ᯑᯮᯰ ᯘᯂᯖ᯲ ᯉᯘᯪᯑ ᯒᯬ ᯑᯪᯘᯪ, ᯑᯪᯞᯩᯂᯉᯬ᯲ ᯔ ᯖᯮ ᯅᯀᯬᯀ ᯤ ᯉᯘ ᯘᯪᯇᯝᯉᯉᯬ᯲ ᯉ ᯇᯪᯉᯝᯪᯑᯬ ᯉᯪ ᯒᯬᯂᯉ, ᯉᯘ ᯉ ᯅᯬᯤ ᯇᯖᯮᯇᯀᯉᯬ᯲ᯉᯘᯪᯑ.
Angka on ma deba sipanganon ni situmpaon i dibahen nasida.
ᯀᯰᯄ᯦ ᯀᯉᯬ᯲ ᯔ ᯑᯩᯅ ᯘᯪᯇᯝᯉᯉᯬ᯲ ᯉᯪ ᯘᯪᯖᯮᯔ᯲ᯇᯀᯉᯬ᯲ ᯤ ᯑᯪᯅᯂᯉᯩ᯲ ᯉᯘᯪᯑ
1.Sangkuk, i ma indahan na tinutu rap dohot juhut dohot lasiak, godang i dibahen.
ᯘᯰᯄ᯦ᯄ᯦ᯮ᯲ ᯤ ᯔ ᯀᯉᯪ᯲ᯑᯂᯉ᯲ ᯉ ᯖᯪᯉᯮᯖᯮ ᯒᯇ᯲ ᯑᯬᯂᯖᯬ᯲ ᯐᯮᯂᯖᯮ᯲ ᯑᯬᯂᯖᯬ᯲ ᯞᯘᯪᯀᯄ᯦᯲, ᯎᯬᯑᯰ ᯤ ᯑᯪᯅᯂᯉᯩ᯲
2. Bortik, i ma poltuk ni eme na nirondang; godang do nang i dibahen ᯅᯒᯬ᯲ᯖᯄ᯦ᯪ᯲, ᯤ ᯔ ᯇᯞᯬ᯲ᯖᯄ᯦ᯮ᯲ ᯉᯪ ᯀᯩᯔᯩ ᯉ ᯉᯪᯒᯉᯬ᯲ᯑᯰ; ᯎᯬᯑᯰ ᯑᯬ ᯉᯰ ᯤ ᯑᯪᯅᯂᯉᯩ᯲
3. Pinukpuk, i ma dahanon naung sinorbuk.
ᯇᯪᯉᯄ᯦ᯮ᯲ᯇᯄ᯦ᯮ᯲, ᯤ ᯔ ᯑᯂᯉᯉᯬ᯲ ᯉᯀᯮᯰ ᯘᯪᯉᯒᯬ᯲ᯅᯄ᯦ᯮ᯲
4. indahan sinalin, i ma indahan na hinunihan.
ᯀᯉᯪ᯲ᯑᯂᯉ᯲ ᯘᯪᯉᯞᯉᯪ᯲, ᯤ ᯔ ᯀᯉᯪ᯲ᯑᯂᯉ᯲ ᯉ ᯂᯪᯉᯮᯉᯪᯂᯉ᯲
5. Pinadar, i ma juhut na nilasiahan, mansai siak dibahen.
ᯇᯪᯉᯑᯒ᯲, ᯤ ᯔ ᯐᯮᯂᯖᯮ᯲ ᯉ ᯉᯪᯞᯘᯪᯀᯂᯉ᯲, ᯔᯉ᯲ᯘᯤ ᯘᯪᯀᯄ᯦᯲ ᯑᯪᯅᯂᯉᯩ᯲
6. Pira ni manuk na tata. Songon i do i manangkas dibahen tu pamangan ni situmpaon i, alai jolo dibola, hira pangalambohi
di pamanganna, ala naung diborja dihilala pangonai ni na mangan hon juhut pinadar i.
ᯇᯪᯒ ᯉᯪ ᯔᯉᯄ᯦ᯮ᯲ ᯉ ᯖᯖ ᯘᯬᯝᯉᯬ᯲ ᯤ ᯑᯬ ᯤ ᯔᯉᯰᯄ᯦ᯘ᯲ ᯑᯪᯅᯂᯉᯩ᯲ ᯖᯮ ᯇᯔᯝᯉ᯲ ᯉᯪ ᯘᯪᯖᯔᯮ᯲ᯇᯀᯉᯬ᯲ ᯤ, ᯀᯞᯤ ᯐᯬᯞᯬ ᯑᯪᯅᯬᯞ, ᯂᯪᯒ ᯇᯝᯞᯔ᯲ᯅᯬᯂᯪ
ᯑᯪ ᯇᯔᯝᯉ᯲ᯉ, ᯀᯞ ᯉᯀᯮᯰ ᯑᯪᯅᯒᯬ᯲ᯐ ᯑᯪᯂᯪᯞᯞ ᯇᯝᯬᯉᯤ ᯉᯪ ᯉ ᯔᯝᯉ᯲ᯂᯉᯬ᯲ ᯐᯮᯂᯖᯮ᯲ ᯇᯪᯉᯑᯒ᯲ ᯤ.
Nunga singkop hian angka sipanganon i diboan sian huta, jala indang jadi juaon ni situmpaon i manganhon i sudena.
ᯉᯮᯝ ᯘᯪᯰᯄ᯦ᯇᯬ᯲ ᯂᯪᯀᯉ᯲ ᯀᯰᯄ᯦ ᯘᯪᯇᯝᯉᯉᯬ᯲ ᯤ ᯑᯪᯅᯬᯀᯉ᯲ ᯘᯪᯀᯉ᯲ ᯂᯮᯖ, ᯐᯞ ᯀᯉᯪ᯲ᯑᯰ ᯐᯑᯪ ᯐᯮᯀᯀᯉᯬ᯲ ᯉᯪ ᯘᯪᯖᯔᯮ᯲ᯇᯀᯉᯬ᯲ ᯤ ᯔᯝᯉ᯲ᯂᯉᯬ᯲ ᯤ ᯘᯮᯑᯩᯉ.
Dung sun i dipangan, ditonai ma jolma situmpaon i, songon on ma didok:
ᯑᯮᯰ ᯘᯉᯮ᯲ ᯤ ᯑᯪᯇᯝᯉ᯲, ᯑᯪᯖᯬᯉᯤ ᯔ ᯐᯬᯞ᯲ᯔ ᯘᯪᯖᯔᯮ᯲ᯇᯀᯉᯬ᯲ ᯤ, ᯘᯬᯝᯉᯬ᯲ ᯀᯉᯬ᯲ ᯔ ᯑᯪᯑᯄ᯦ᯬ᯲:
"Ba, nunga dijalo ho sude pinangido ni roham sian ahu, nunga sahat i dipangan ho. Antong, ia tu si ho husuru, tu si ma ho mangoloi!" ninna.
"ᯅ ᯉᯮᯝ ᯑᯪᯐᯞᯬ ᯂᯬ ᯘᯮᯑᯩ ᯇᯪᯉᯝᯪᯑᯬ ᯉᯪ ᯒᯬᯂᯔ᯲ ᯘᯪᯀᯉ᯲ ᯀᯂᯮ, ᯉᯮᯝ ᯘᯂᯖ᯲ ᯤ ᯑᯪᯇᯝᯉ᯲ ᯂᯬ. ᯀᯉ᯲ᯖᯬᯰ, ᯤᯀ ᯖᯮ ᯘᯪ ᯂᯬ ᯂᯮᯘᯮᯒᯮ, ᯖᯮᯘᯪ ᯔ ᯂᯬ ᯔᯝᯬᯞᯬᯤ! "ᯉᯉᯪ᯲ᯉ.
"Olo!" ninna baoa situmpaon i mangalusi.
"ᯀᯬᯞᯬ! "ᯉᯉᯪ᯲ᯉ ᯅᯀᯬᯀ ᯘᯪᯖᯔᯮ᯲ᯇᯀᯉᯬ᯲ ᯤ ᯔᯝᯞᯮᯘᯪ
"Alai ingot: na so jadi paboaonmu goarmu dohot goarhu, da!" ninna na manonai i.
"ᯀᯞᯤ ᯤᯝᯬᯖ᯲: ᯉ ᯘᯬ ᯐᯑᯪ ᯇᯅᯬᯀᯀᯉᯬ᯲ᯔᯮ ᯎᯬᯀᯒ᯲ᯔᯮ ᯑᯬᯂᯖᯬ᯲ ᯎᯬᯀᯒ᯲ᯂᯮ, ᯑ! "ᯉᯉᯪ᯲ᯉ ᯉ ᯔᯉᯬᯉᯤ ᯤ.
"Olo" ninna situmpaon i.
"ᯀᯬᯞᯬ "ᯉᯉᯪ᯲ᯉ ᯘᯪᯖᯔᯮ᯲ᯇᯀᯉᯬ᯲ ᯤ.
"Ia hujou goarmu Si Anu, oloanmu do anggo i, da!" "Olo!" ninna muse.
"ᯤᯀ ᯀᯂᯮ ᯐᯬᯥ ᯎᯬᯀᯒ᯲ᯔᯮ ᯘᯪ ᯀᯉᯮ, ᯀᯬᯞᯬᯀᯉ᯲ᯔᯮ ᯑᯬ ᯀᯰᯎᯬ ᯤ, ᯑ!" "ᯀᯬᯞᯬ! "ᯉᯉᯪ᯲ᯉ ᯔᯮᯘᯩ.
Dung i dibahen ma goar ni pangulubalangna i: Datu Porhas Sipabungkar Sibabidalu Guru so Suharon.
ᯑᯮᯰ ᯤ ᯑᯪᯅᯂᯉᯩ᯲ ᯔ ᯎᯬᯀᯒ᯲ ᯉᯪ ᯇᯝᯮᯞᯮ ᯅᯞᯰᯉ ᯤ: ᯑᯖᯮ ᯇᯒᯬ᯲ᯂᯘ᯲ ᯘᯪᯇᯅᯮᯰᯄ᯦ᯒ᯲ ᯘᯪᯅᯅᯪᯑᯞᯮ ᯎᯮᯒᯮ ᯘᯬ ᯘᯮᯂᯒᯉᯬ᯲.
Dipabotohon ma i tu situmpaon i, didok ma, "I ma goarmu, oloi ma i!" "Olo!" ninna baoa i.
ᯑᯪᯇᯅᯬᯖᯬᯂᯉᯬ᯲ ᯔ ᯤ ᯖᯮ ᯘᯪᯖᯔᯮ᯲ᯇᯀᯉᯬ᯲ ᯤ, ᯑᯪᯑᯄ᯦ᯬ᯲ ᯔ," ᯤ ᯔ ᯎᯬᯀᯒ᯲ᯔᯮ, ᯀᯬᯞᯬᯤ ᯔ ᯤ!" "ᯀᯬᯞᯬ!" ᯉᯉᯪ᯲ᯉ ᯅᯀᯬᯀ ᯤ.
Ala naung singkop didok hata panonaina i, mamatimatii jolma situmpaon i, nunga diunduk , na so jadi manjua be ibana manang dia pe didokkon sioloanna.
ᯀᯞ ᯉᯀᯮᯰ ᯘᯪᯰᯄ᯦ᯇᯬ᯲ ᯑᯪᯑᯄ᯦ᯬ᯲ ᯂᯖ ᯇᯉᯬᯉᯤᯉ ᯤ, ᯔᯔᯖᯪᯔᯖᯪᯤ ᯐᯞᯬ᯲ᯔ ᯘᯪᯖᯮᯔ᯲ᯇᯀᯉᯬ᯲ ᯤ, ᯉᯮᯝ ᯑᯪᯀᯉᯮ᯲ᯑᯄ᯦ᯮ᯲, ᯉ ᯘᯬ ᯐᯑᯪ ᯔᯉ᯲ᯐᯮᯀ ᯅᯩ ᯤᯅᯉ ᯔᯉᯰ ᯑᯪᯀ ᯇᯩ ᯑᯪᯑᯄ᯦ᯬ᯲ᯄ᯦ᯉᯬ᯲ ᯘᯪᯀᯬᯞᯬᯀᯉ᯲ᯉ.
Dung i didok ma muse : "Tumpaonnami ma ho bahen pangulubalang; ia tusi ho sinuru, ingkon tusi ma ho mangoloi.
ᯑᯮᯰ ᯤ ᯑᯪᯑᯄ᯦ᯬ᯲ ᯔ ᯔᯮᯘᯩ: "ᯖᯔᯮ᯲ᯇᯀᯉᯬ᯲ᯉᯔᯪ ᯔ ᯂᯬ ᯅᯂᯉᯩ᯲ ᯇᯝᯮᯞᯮ ᯅᯞᯰ; ᯤᯀ ᯖᯮᯘᯪ ᯂᯬ ᯘᯪᯉᯮᯒᯮ, ᯀᯪᯰᯄ᯦ᯉᯬ᯲ ᯖᯮᯘᯪ ᯔ ᯂᯬ ᯔᯝᯬᯞᯬᯤ.
Antong, on ma sihatmu, sihat na laga sihat na begu, sihat na so ra talu, sihat na so ra tulak.
ᯀᯉ᯲ᯖᯬᯰ, ᯀᯉᯬ᯲ ᯔ ᯘᯪᯂᯖ᯲ᯔᯮ, ᯘᯪᯂᯖ᯲ ᯉ ᯞᯎ ᯘᯪᯂᯖ᯲ ᯉ ᯅᯩᯎᯮ, ᯘᯪᯂᯖ᯲ ᯉ ᯘᯬᯒ ᯖᯞᯮ, ᯘᯪᯂᯖ᯲ ᯉ ᯘᯬ ᯒ ᯖᯮᯞᯄ᯦᯲
Pangido ma panganonmu pusu-pusu ni musunami i, ingkon sopsop ma daromatana.
ᯇᯝᯪᯑᯬ ᯔ ᯇᯝᯉᯉᯬ᯲ᯔᯮ ᯇᯮᯘᯮᯇᯮᯘᯮ ᯉᯪ ᯔᯮᯘᯮᯉᯔᯪ ᯤ, ᯀᯪᯰᯄ᯦ᯉᯬ᯲ ᯘᯇᯬ᯲ᯘᯇᯬ᯲ ᯔ ᯑᯒᯬᯔᯖᯉ.
Ia dilehon tu ho hita singkat ni daromata, unang jalo. Ia dilehon tu ho santung ni gaol singkat ni pusu-pusu pinangidomi, unang oloi. Ingkon daromata dohot pusu-pusu ni musu nami i do jaloonmu" , ninna.
ᯤᯀ ᯑᯪᯞᯩᯂᯉᯬ᯲ ᯖᯮ ᯂᯬ ᯂᯪᯖ ᯘᯪᯰᯄ᯦ᯖ᯲ ᯉᯪ ᯑᯒᯬᯔᯖ, ᯥᯉᯰ ᯐᯞᯬ. ᯤᯀ ᯑᯪᯞᯩᯂᯉᯬ᯲ ᯖᯮ ᯂᯬ ᯘᯉ᯲ᯖᯮᯰ ᯉᯪ ᯎᯀᯞᯬ᯲ ᯘᯪᯰᯄ᯦ᯖ᯲ ᯉᯪ ᯇᯮᯘᯮᯇᯮᯘᯮ ᯇᯪᯉᯝᯪᯑᯬᯔᯪ, ᯥᯉᯰ ᯀᯬᯞᯬ ᯤ. ᯀᯪᯰᯄ᯦ᯉᯬ᯲ ᯑᯒᯬᯔᯖ ᯑᯬᯂᯖᯬ᯲ ᯇᯮᯘᯮᯇᯮᯘᯮ ᯉᯪ ᯔᯮᯘᯮᯉᯔᯪ ᯤ ᯑᯬ ᯐᯞᯬᯀᯉᯬ᯲ᯔᯮ", ᯉᯉᯪ᯲ᯉ.
"Olo da, rajanami" , ninna halak situmpaon i mangoloi, ai so diboto be manjua.
"ᯀᯬᯞᯬ ᯑ, ᯒᯐᯉᯔᯪ", ᯉᯉᯪ᯲ᯉ ᯂᯞᯄ᯦᯲ ᯘᯪᯖᯔᯮ᯲ᯇᯀᯉᯬ᯲ ᯤ ᯔᯝᯬᯞᯬᯤ, ᯀᯤ ᯘᯬ ᯑᯪᯅᯬᯖᯬ ᯅᯩ ᯔᯉ᯲ᯐᯮᯀ.
Dung sidung angka na nidok di ginjang i, ditanom ma baoa i sintap ni rungkungna, holan uluna ma puas tu · ginjang.
ᯑᯮᯰ ᯘᯪᯑᯮᯰ ᯀᯰᯄ᯦ ᯉ ᯉᯪᯑᯄ᯦ᯬ᯲ ᯑᯪ ᯎᯉᯪ᯲ᯐᯰ ᯤ, ᯑᯪᯖᯉᯔᯬ᯲ ᯔ ᯅᯀᯬᯀ ᯤ ᯘᯉᯪ᯲ᯖᯇ᯲ ᯉᯪ ᯒᯮᯰᯄ᯦ᯮᯰᯉ, ᯂᯬᯞᯉ᯲ ᯥᯞᯮᯉ ᯔ ᯇᯮᯀᯘ᯲ ᯖᯮ ᯎᯉᯪ᯲ᯐᯰ.
Dung i didokkon ma pangangangonna pamanganna dompak ginjang dituangkon ma tu si simbora na nilala, na . ginorgoranna disi.
ᯑᯮᯰ ᯤ ᯑᯪᯑᯬᯄ᯦᯲ᯄ᯦ᯉᯬ᯲ ᯔ ᯇᯝᯝᯝᯀᯉᯬ᯲ᯉ ᯇᯔᯝᯉ᯲ᯉ ᯑᯔᯬ᯲ᯇᯄ᯦᯲ ᯎᯉᯪ᯲ᯐᯰ ᯑᯪᯖᯮᯀᯰᯄ᯦ᯉᯬ᯲ ᯔ ᯖᯮᯘᯪ ᯘᯔᯪ᯲ᯅᯬᯒ ᯉ ᯉᯪᯞᯞ, ᯉ ᯎᯪᯉᯒᯬ᯲ᯎᯬᯒᯉ᯲ ᯉ ᯑᯪᯘᯪ.
Indang tarbahen jolma i be antong morgallo-gallo, holan uluna i ma tarida songon na angkahitir mangkilala mohop ni simbora na nilala i.
ᯀᯉᯪ᯲ᯑᯰ ᯖᯒ᯲ᯅᯂᯉᯩ᯲ ᯐᯞᯬ᯲ᯔ ᯤ ᯅᯩ ᯀᯉ᯲ᯖᯬᯰ ᯔᯒᯬ᯲ᯎᯞ᯲ᯞᯬᯎᯞ᯲ᯞᯬ, ᯂᯬᯞᯉ᯲ ᯥᯞᯮᯉ ᯤ ᯔ ᯖᯒᯪᯑ ᯘᯬᯝᯉᯉ᯲ ᯉ ᯀᯰᯄ᯦ ᯂᯪᯖᯒᯪ᯲ ᯔᯰᯄ᯦ᯪᯞᯞ ᯔᯬᯂᯇᯬ᯲ ᯉᯪ ᯘᯔᯪ᯲ᯅᯬᯒ ᯉ ᯉᯪᯞᯞ ᯤ.
Dituangkon ma simbora na nilala i muse dohot tu matana asa haru mate, dung mate na tinumpana i, dihali ma muse.
ᯑᯪᯖᯮᯀᯰᯄ᯦ᯉᯬ᯲ ᯔ ᯘᯔᯪ᯲ᯅᯬᯒ ᯉ ᯉᯪᯞᯞ ᯤ ᯔᯮᯘᯩ ᯑᯬᯂᯖᯬ᯲ ᯖᯮ ᯔᯖᯉ ᯀᯘ ᯂᯒᯮ ᯔᯖᯩ, ᯑᯮᯰ ᯔᯖᯩ ᯉ ᯖᯪᯉᯔᯮ᯲ᯇᯉ ᯤ, ᯑᯪᯂᯞᯪ ᯔ ᯔᯮᯘᯩ.
Dung i disahei ma, dipapulik ma sibukna, disaok ma i mambuat miakna, dung i dibahen ma muse i tu guri-guri.
ᯑᯮᯰ ᯤ ᯑᯪᯘᯂᯩᯤ ᯔ, ᯑᯪᯇᯇᯮᯞᯄ᯦ᯪ᯲ ᯔ ᯘᯪᯅᯄ᯦ᯮ᯲ᯉ, ᯑᯪ ᯘᯀᯄ᯦ᯬ᯲ ᯔ ᯤ ᯔᯔ᯲ᯅᯮᯀᯖ᯲ ᯔᯪᯀᯄ᯦᯲ᯉ, ᯑᯮᯰ ᯤ ᯑᯪᯅᯂᯉᯩ᯲ ᯔ ᯔᯮᯘᯩ ᯤ ᯖᯮ ᯎᯮᯒᯪᯎᯮᯒᯪ.
Angka holi-holina i pe, dipapungu do, ditutung do i luhut, dung i dibuat ma sude turanggongna i, dibahen ma i tu guri-guri na asing.
ᯀᯰᯄ᯦ ᯂᯬᯞᯪᯂᯬᯞᯪᯉ ᯤ ᯇᯩ, ᯑᯪᯇᯇᯮᯝᯮ ᯑᯬ, ᯑᯪᯖᯮᯖᯮᯰ ᯑᯬ ᯤ ᯞᯮᯂᯖᯮ᯲, ᯑᯮᯰ ᯤ ᯑᯪᯅᯮᯀᯖ᯲ ᯔ ᯘᯮᯑᯩ ᯖᯮᯒᯰᯎᯬᯰᯉ ᯤ, ᯑᯪᯅᯂᯉᯩ᯲ ᯔ ᯤ ᯖᯮ ᯎᯮᯒᯪᯎᯮᯒᯪ ᯉ ᯀᯘᯪᯰ.
I ma pupuk na sumurung jala na ummarga di pangulubalang. Alai di na laho paborhathon pangulubalang i,. mordongan ambu-ambuan ma i dibahen datu , angka na pinulunganna sian angka na tubu di tano, na boi papunguonna.
ᯤ ᯔ ᯇᯮᯇᯄ᯦ᯮ᯲ ᯉ ᯘᯮᯔᯮᯒᯮᯰ ᯐᯞ ᯉ ᯀᯔᯮ᯲ᯔᯒ᯲ᯎ ᯑᯪ ᯇᯝᯮᯞᯮ ᯅᯞᯰ. ᯀᯞᯤ ᯑᯪ ᯉ ᯞᯂᯬ ᯇᯅᯒᯬ᯲ᯂᯖ᯲ᯂᯉᯬ᯲ ᯇᯝᯮᯞᯮ ᯅᯞᯰ ᯤ,.ᯔᯒᯬ᯲ᯑᯬᯝᯉ᯲ ᯀᯔ᯲ᯅᯮᯀᯔ᯲ᯅᯮᯀᯉ᯲ ᯔ ᯤ ᯑᯪᯅᯂᯉᯩ᯲ ᯑᯖᯮ, ᯀᯰᯄ᯦ ᯉ ᯇᯪᯉᯮᯞᯮᯝᯉ᯲ ᯉ ᯘᯪᯀᯉ᯲ ᯀᯰᯄ᯦ ᯉ ᯖᯮᯅᯮ ᯑᯪ ᯖᯉᯬ, ᯉ ᯅᯬᯤ ᯇᯇᯮᯝᯮᯀᯉᯬ᯲ ᯉ.
Songon i ma ninna barita panjadihon ni pangulubalang, na so ra talu, na so ra tulak mangalo musu dohot tahina.
ᯘᯬᯝᯬᯉ᯲ᯤᯔᯉᯪᯉ᯲ᯉᯅᯒᯪᯖᯇᯉ᯲ᯐᯑᯪᯂᯬᯉ᯲ᯉᯪᯇᯝᯮᯞᯮᯅᯞᯰ,ᯉᯘᯬᯒᯖᯞᯮ,ᯉᯘᯬᯒᯖᯮᯞᯂ᯲ᯔᯝᯞᯬᯔᯮᯘᯮᯑᯬᯂᯬᯖ᯲ᯖᯂᯪᯉ.
Taida ma muse manang beha pambahenna laho paborhathon i mangago musuna dohot pamangkena disi di tunggal panaluan.
ᯖᯤᯑ ᯔ ᯔᯮᯘᯩ ᯔᯉᯰ ᯅᯩᯂ ᯇᯔ᯲ᯅᯂᯉᯩ᯲ᯉ ᯞᯂᯬ ᯇᯅᯒᯬ᯲ᯂᯖ᯲ᯂᯉᯬ᯲ ᯤ ᯔᯝᯎᯬ ᯔᯮᯘᯮ ᯉ ᯑᯬᯂᯖᯬ᯲ ᯇᯔᯰᯄᯩ᯦ᯉ ᯑᯪᯘᯪ ᯑᯪ ᯖᯮᯰᯎᯞ᯲ ᯇᯉᯞᯮᯀᯉ᯲.
Ia goar ni pangulubalang i, marasing-asing do i di ganup halak, na mameop pangulubalang, morguru tu goar na pinadanhonna tu jolma na tinumpa i di na laho manumpasa.
ᯤᯀᯎᯬᯀᯒ᯲ᯉᯪᯇᯝᯮᯞᯮᯅᯞᯰᯤ,ᯔᯒᯘᯪᯰ-ᯀᯘᯪᯰᯑᯬᯤᯑᯪᯎᯉᯮᯇ᯲ᯂᯞᯂ᯲,ᯉᯔᯔᯩᯀᯬᯇ᯲ᯇᯝᯮᯞᯮᯅᯞᯰ,ᯔᯬᯒ᯲ᯎᯮᯒᯮᯖᯮᯎᯬᯀᯒ᯲ᯉᯇᯪᯉᯑᯉ᯲ᯂᯬᯉ᯲ᯉᯖᯮᯐᯬᯞ᯲ᯔᯉᯖᯪᯉᯮᯔ᯲ᯇᯤᯑᯪᯉᯞᯂᯬᯔᯉᯮᯔ᯲ᯇᯘ.
Adong ma najolo sada pangulubalang, morgoar Si Ajimamis, sipaborhaton ni nampunasa i laho mangago musuna.
ᯀᯑᯬᯰ ᯔ ᯉ ᯐᯬᯞᯬ ᯘᯑ ᯇᯝᯮᯞᯮ ᯅᯞᯰ, ᯔᯒᯬ᯲ᯎᯬᯀᯒ᯲ ᯘᯪ ᯀᯐᯪ ᯔᯔᯘᯪ᯲, ᯘᯪ ᯇᯅᯒᯬ᯲ᯂᯖᯉᯬ᯲ ᯉᯪ ᯉᯔ᯲ᯇᯮᯉᯘ ᯤ ᯞᯂᯬ ᯔᯝᯎᯬ ᯔᯮᯘᯮᯉ.
Ia pulung pulungan sipapunguonna deba nari, di na laho paborhathon i, angka on ma : Arang, barerang. imbulu buntal, sait na laga, limut
ni sombaon, limut sian inganan ni saniangnaga, silbak-silbak ponoroan ni porhas, sinalit ni gipul, hinarat ni ampodi, tano hinambor ni na mate satongkin, tanggurup batang, ansosoran, ulok na mate manoro, sait ni babiat, sait ni buea, panortoran ni na si gunjaon, poranjahan ni Si Nambela, nasa na rintop na boi jumpang, pusok ni dakdanak nambura tubu, (ia so adong i, pitu gea hapilinna), sada junggulmeong, hubang, halto, hau aek, sitaratullit.
ᯤᯀ ᯇᯮᯞᯮᯰᯇᯮᯞᯮᯝᯉ᯲ ᯘᯪᯇᯇᯮᯝᯮᯀᯉᯬ᯲ᯉ ᯑᯩᯅ ᯉᯒᯪ, ᯑᯪ ᯉ ᯞᯂᯬ ᯇᯅᯒᯬ᯲ᯂᯖ᯲ᯂᯉᯬ᯲ ᯤ ᯀᯰᯄ᯦ ᯀᯉᯬ᯲ ᯔ: ᯀᯒᯰ, ᯅᯒᯩᯒᯰ. ᯀᯔᯪ᯲ᯅᯮᯞᯮ ᯅᯉᯮ᯲ᯖᯞ᯲, ᯘᯀᯖᯪ᯲ ᯉ ᯞᯎ, ᯞᯪᯔᯖᯮ᯲ ᯉᯪ ᯘᯔᯬ᯲ᯅᯀᯉᯬ᯲, ᯞᯪᯔᯮᯖ᯲ ᯘᯪᯀᯉ᯲ ᯤᯝᯉᯉ᯲ ᯉᯪ ᯘᯉᯪᯀᯰᯉᯎ, ᯘᯞᯪ᯲ᯅᯄ᯦᯲ᯘᯞᯪ᯲ᯅᯄ᯦᯲ ᯇᯬᯉᯬᯒᯬᯀᯉ᯲ ᯉᯪ ᯇᯒᯬ᯲ᯂᯘ᯲, ᯘᯪᯉᯞᯖᯪ᯲ ᯉᯪ ᯎᯪᯇᯞᯮ᯲, ᯂᯪᯉᯒᯖ᯲ ᯉᯪ ᯀᯔ᯲ᯇᯬᯑᯪ, ᯖᯉᯬ ᯂᯪᯀᯔ᯲ᯅᯒᯬ᯲ ᯉᯪ ᯉ ᯔᯖᯩ ᯘᯖᯬᯰᯄ᯦ᯉᯪ᯲, ᯖᯰᯎᯮᯒᯇᯮ᯲ ᯅᯖᯰ, ᯀᯉ᯲ᯘᯬᯘᯬᯒᯉ᯲, ᯥᯞᯄ᯦ᯬ᯲ ᯉ ᯔᯖᯩ ᯔᯉᯬᯒᯬ, ᯘᯀᯖᯪ᯲ ᯉᯪ ᯅᯅᯪᯀᯖ᯲, ᯘᯀᯖᯪ᯲ ᯉᯪ ᯅᯮᯀᯩᯀ, ᯇᯉᯒᯬ᯲ᯖᯬᯒᯉ᯲ ᯉᯪ ᯉ ᯘᯪᯎᯉᯮ᯲ᯐᯀᯉᯬ᯲ ᯇᯬᯒᯉ᯲ᯐᯂᯉ᯲ ᯉᯪ ᯘᯪᯉᯔ᯲ᯅᯩᯞ, ᯉᯘ ᯉ ᯒᯉᯪ᯲ᯖᯇᯬ᯲ ᯉ ᯅᯬᯤ ᯐᯔᯮ᯲ᯇᯰ, ᯇᯮᯘᯄ᯦ᯬ᯲ ᯉᯪ ᯑᯄ᯦᯲ᯑᯉᯄ᯦᯲ ᯉᯔ᯲ᯅᯮᯒ ᯖᯮᯅᯮ (ᯤᯀ ᯘᯬ ᯀᯑᯬᯰ ᯤ, ᯇᯪᯖᯮ ᯎᯩᯀ ᯂᯇᯪᯞᯉᯪ᯲ᯉ), ᯘᯑ ᯐᯮᯰᯎᯞᯮ᯲ ᯔᯩᯀᯬᯰ, ᯂᯮᯅᯰ, ᯂᯞ᯲ᯖᯬ, ᯂᯥ ᯀᯀᯄᯩ᯦᯲, ᯘᯪᯖᯒᯖᯞᯮ᯲ᯞᯖᯪ᯲.
Ditutu ma i pungu, lamot ma i dibahen, dung i disaorhon ma tu si miak ni jolma naung tinumpana i, i ma naung pineopna di guriguri i.
ᯑᯪᯖᯮᯖᯮ ᯔ ᯤ ᯇᯮᯝᯮ, ᯞᯔᯖᯬ᯲ ᯔ ᯤ ᯑᯪᯅᯂᯉᯩ᯲, ᯑᯮᯰ ᯤ ᯑᯪ ᯘᯀᯒᯬ᯲ᯂᯉᯬ᯲ ᯔ ᯖᯮᯘᯪ ᯔᯪᯀᯄ᯦᯲ ᯉᯪ ᯐᯞᯬ᯲ᯔ ᯉᯀᯮᯰ ᯖᯪᯉᯔᯮ᯲ᯇᯉ ᯤ, ᯤ ᯔ ᯉᯀᯮᯰ ᯇᯪᯉᯩᯀᯇᯬ᯲ᯉ ᯑᯪ ᯎᯮᯒᯪᯎᯮᯒᯪ ᯤ.
Alai indang sae dope holan i patupaonna di na laho paborhathon pangulubalang Si Ajimamis.
ᯀᯞᯤ ᯀᯉᯪ᯲ᯑᯰ ᯘᯀᯩ ᯑᯬᯇᯩ ᯂᯬᯞᯉ᯲ ᯤ ᯇᯖᯮᯇᯀᯉᯬ᯲ᯉ ᯑᯪ ᯉ ᯞᯂᯬ ᯇᯅᯒᯬ᯲ᯂᯖ᯲ᯂᯉᯬ᯲ ᯇᯝᯮᯞᯮᯅᯞᯰ ᯘᯪ ᯀᯐᯪ ᯔᯔᯘᯪ᯲.
Digana dope sada anak ni gaol, disihat ma i di bagasanna di guri-guri i ma dibahen panihatna.
ᯑᯪᯎᯉ ᯑᯬᯇᯩ ᯘᯑ ᯀᯉᯄ᯦᯲ ᯉᯪ ᯎᯀᯞᯬ᯲, ᯑᯪᯘᯪᯂᯖ᯲ ᯔ ᯤ ᯑᯪ ᯅᯎᯘᯉ᯲ ᯉ ᯑᯪ ᯎᯮᯒᯪᯎᯮᯒᯪ ᯤ ᯔ ᯑᯪᯅᯂᯉᯩ᯲ ᯇᯉᯪᯂᯖ᯲ᯉ.
Dung i dibuat dope sasolup sagu-sagu, sabale santi-santi, sada panangga, manuk na morlanteung. Paluaonna ma manuk i dompak huta ni musuna.
ᯑᯮᯰ ᯤ ᯑᯪᯅᯮᯀᯖ᯲ ᯑᯬᯇᯩ ᯘᯘᯬᯞᯇᯮ᯲ ᯘᯎᯮᯘᯎᯮ, ᯘᯅᯞᯩ ᯘᯉ᯲ᯖᯪᯘᯉ᯲ᯖᯪ, ᯘᯑ ᯇᯉᯰᯎ, ᯔᯉᯄ᯦ᯮ᯲ ᯉ ᯔᯒᯬ᯲ᯞᯉ᯲ᯖᯩᯀᯮᯰ. ᯇᯞᯮᯀᯀᯉᯬ᯲ᯉ ᯔ ᯔᯉᯄ᯦ᯮ᯲ ᯤ ᯑᯔᯬ᯲ᯇᯄ᯦᯲ ᯂᯮᯖ ᯉᯪ ᯔᯮᯘᯮᯉ.
Dung i ditabasi ma i laho paborhathon pangulubalang Si Ajimamis i, didok ma ; "Husombayangkon ma ho, ompung, tu ari na tolu pulu, tu bulan na sampulu dua, tu desa na ualu, tu por mamis na lima.
ᯑᯮᯰ ᯤ ᯑᯪᯖᯅᯘᯪ ᯔ ᯤ ᯞᯂᯬ ᯇᯅᯒᯬ᯲ᯂᯖ᯲ᯂᯉᯬ᯲ ᯇᯝᯮᯞᯮ ᯅᯞᯰ ᯘᯪ ᯀᯐᯪ ᯔᯔᯘᯪ᯲ ᯤ, ᯑᯪᯑᯄ᯦ᯬ᯲ ᯔ; "ᯂᯮᯘᯔᯬ᯲ᯅᯛᯰᯄ᯦ᯉᯬ᯲ ᯔ ᯂᯬ, ᯀᯔᯬ᯲ᯇᯮᯰ, ᯖᯮ ᯀᯒᯪ ᯉᯖᯬᯞᯮᯇᯮᯞᯮ, ᯖᯮ ᯅᯮᯞᯉ᯲ ᯉ ᯘᯔ᯲ᯇᯮᯞᯮᯑᯮᯀ, ᯖᯮ ᯑᯩᯘ ᯉᯥᯀᯞᯮ, ᯖᯮ ᯇᯒᯬ᯲ᯔᯔᯘᯪ᯲ ᯉ ᯞᯪᯔ.
Ai tanda ni ari, na pinanjomurhon; tanda ni bulan, na pinambauhon. Tanda ni ompunta Si ajimamis, na morompuhon desa na ualu, na morinahon bulan na sampulu dua, na moranakkon ari na tolu pulu, na morpahompuhon pormamis na lima.
ᯀᯤ ᯖᯉ᯲ᯑ ᯉᯪ ᯀᯒᯪ, ᯉ ᯇᯪᯉᯉ᯲ᯐᯬᯔᯮᯒ᯲ᯂᯉᯬ᯲; ᯖᯉ᯲ᯑ ᯉᯪ ᯅᯮᯞᯉ᯲, ᯉ ᯇᯪᯉᯔ᯲ᯅᯥᯂᯉᯬ᯲ ᯖᯉ᯲ᯑ ᯉᯪ ᯀᯔᯬ᯲ᯇᯉᯮ᯲ᯖ ᯘᯪᯀᯐᯪᯔᯔᯘᯪ᯲, ᯉ ᯔᯬᯒᯬᯔ᯲ᯇᯮᯂᯉᯬ᯲ ᯑᯩᯘ ᯉ ᯥᯀᯞᯮ, ᯉ ᯔᯬᯒᯪᯉᯂᯉᯬ᯲ ᯅᯮᯞᯉ᯲ ᯉ ᯘᯔ᯲ᯇᯮᯞᯮᯑᯮᯀ, ᯉ ᯔᯬᯒᯉᯄ᯦᯲ᯄ᯦ᯉᯬ᯲ ᯀᯒᯪ ᯉ ᯖᯬᯞᯮᯇᯮᯞᯮ, ᯉ ᯔᯒᯬ᯲ᯇᯂᯔᯬ᯲ᯇᯮᯂᯉᯬ᯲ ᯇᯒᯬ᯲ᯔᯔᯘᯪ᯲ ᯉ ᯞᯪᯔ.
Asa unang ma hamu inang tumalaban-talaban, tumalebun-talebun,
songon dalu niinjam di pogu ni alaman.
ᯀᯘ ᯥᯉᯰ ᯔ ᯂᯔᯮ ᯤᯉᯰ ᯖᯮᯔᯞᯅᯉ᯲ᯖᯞᯅᯉ᯲, ᯖᯮᯔᯞᯩᯅᯉᯮ᯲ᯖᯞᯩᯅᯉᯮ᯲, ᯘᯬᯝᯉᯬ᯲ ᯑᯞᯮ ᯉᯪᯀᯉᯪ᯲ᯐᯔ᯲ ᯑᯪ ᯇᯬᯎᯮ ᯉᯪ ᯀᯞᯔᯉ᯲.
Ai anakboru do hamu songon dainang undeng.
ᯀᯤ ᯀᯉᯄ᯦᯲ᯅᯬᯒᯮ ᯑᯬ ᯂᯔᯮ ᯘᯬᯝᯉᯬ᯲ ᯑᯤᯉᯰ ᯀᯉᯮ᯲ᯑᯰᯩ.
Ai tarsubut do ahu ningku, laning, di sahala mulajadingku.
ᯀᯤ ᯖᯒ᯲ᯘᯮᯅᯖᯮ᯲ ᯑᯬ ᯀᯂᯮ ᯉᯪᯰᯄ᯦ᯮ ᯞᯉᯪᯰ, ᯑᯪ ᯘᯂᯞ ᯔᯮᯞᯐᯑᯪᯰᯄ᯦ᯮ
Ba, aha ma niombomu, asa hubuangkon, asa hudurukkon, asa hutompashon tu toding tapian ni Si Anu an.
ᯅ ᯀᯂ ᯔ ᯉᯪᯀᯔᯬ᯲ᯅᯬᯔᯮ, ᯀᯘ ᯂᯮᯅᯮᯀᯰᯄ᯦ᯉᯬ᯲, ᯀᯘ ᯂᯮᯑᯮᯒᯮᯄ᯦᯲ᯄ᯦ᯉᯬ᯲, ᯀᯘ ᯂᯮᯖᯔᯬ᯲ᯇᯘ᯲ᯂᯉᯬ᯲ ᯖᯮ ᯖᯬᯑᯪᯰ ᯖᯇᯪᯀᯉ᯲ ᯉᯪ ᯘᯪ ᯀᯉᯮ ᯀᯉ᯲.
Tapian sipor sunting-sunting, na di mata ni ari, sitartading-tading di mata ni bulan.
ᯖᯇᯪᯀᯉ᯲ ᯘᯪᯇᯒᯬ᯲ ᯘᯉᯮ᯲ᯖᯪᯰᯘᯉᯮ᯲ᯖᯪᯰ, ᯉ ᯑᯪ ᯔᯖ ᯉᯪ ᯀᯒᯪ, ᯘᯪᯖᯒ᯲ᯖᯑᯪᯰᯖᯑᯪᯰ ᯑᯪ ᯔᯖ ᯉᯪ ᯅᯮᯞᯉ᯲.
Asa mortona do ahu di handian, manongos ahu di alogo na mangaban, alogo na mangobin.
ᯀᯘ ᯔᯒᯬ᯲ᯖᯬᯉ ᯑᯬ ᯀᯂᯮ ᯑᯪ ᯂᯉ᯲ᯑᯪᯀᯉ᯲, ᯔᯉᯬᯝᯘᯬ᯲ ᯀᯂᯮ ᯑᯪ ᯀᯞᯬᯎᯬ ᯉ ᯔᯝᯅᯉ᯲, ᯀᯞᯬᯎᯬ ᯉ ᯔᯝᯬᯅᯉᯪ᯲.
Asa hupurpurhon ma ho ompung tu tanding sitanalu-nalu, tu atas liang na binunbun, tu toru ni padang rapuan.
ᯀᯘ ᯂᯮᯇᯒᯮ᯲ᯇᯒᯮ᯲ᯂᯉᯬ᯲ ᯔ ᯂᯬ ᯀᯔᯬ᯲ᯇᯮᯰ ᯖᯮ ᯖᯉ᯲ᯑᯪᯰ ᯘᯪᯖᯉᯞᯮᯉᯞᯮ, ᯖᯮ ᯀᯖᯘ᯲ ᯞᯪᯀᯰ ᯉ ᯅᯪᯉᯉᯮ᯲ᯅᯉᯮ᯲, ᯖᯮ ᯖᯬᯒᯮ ᯉᯪ ᯇᯑᯰ ᯒᯇᯮᯀᯉ᯲
Saitan ni ompunta ma i Si Ajimamis, Datu Malim ni aji, Si Ajibisnu, Datu Putor ni aji, Si Ajisari, Datu Jungjung ni aji, Si Ajihala, Datu Tulpak ni aji, Siajiborna, Datu Sibaso bolon.
ᯘᯤᯖᯉ᯲ ᯉᯪ ᯀᯔᯬ᯲ᯇᯉᯮ᯲ᯖ ᯔ ᯤ ᯘᯪ ᯀᯐᯪᯔᯔᯘᯪ᯲, ᯑᯖᯮ ᯔᯞᯔᯪ᯲ ᯉᯪ ᯀᯐᯪ, ᯘᯪ ᯀᯐᯪᯅᯘᯪ᯲ᯉᯮ, ᯑᯖᯮ ᯇᯮᯖᯒᯬ᯲ ᯉᯪ ᯀᯐᯪ, ᯘᯪ ᯀᯐᯪᯘᯒᯪ, ᯑᯖᯮ ᯐᯮᯰᯐᯮᯰ ᯉᯪ ᯀᯐᯪ, ᯘᯪ ᯀᯐᯪᯂᯞ, ᯑᯖᯮ ᯖᯮᯞᯮ᯲ᯇᯄ᯦᯲ ᯉᯪ ᯀᯐᯪ, ᯘᯪᯀᯐᯪᯅᯒᯬ᯲ᯉ, ᯑᯖᯮ ᯘᯪᯅᯘᯬ ᯅᯬᯞᯉᯬ᯲.
Asa ung ma ningku, laning, inang anak raja!
ᯀᯘ ᯀᯮᯰ ᯔ ᯉᯪᯰᯄ᯦ᯮ, ᯞᯉᯪᯰ, ᯤᯉᯰ ᯀᯉᯰ ᯒᯐ!
Oe raja boru, pahompu ni rumbia Nai Morlampu, Si Tarandang na uja, na pande.
ᯀᯬᯀᯩ ᯒᯐ ᯅᯬᯒᯮ, ᯇᯂᯔᯬ᯲ᯇᯮ ᯉᯪ ᯒᯔᯮ᯲ᯅᯪᯀ ᯉᯤ ᯔᯒᯬ᯲ᯞᯔ᯲ᯇᯮ, ᯘᯪ ᯖᯒᯉ᯲ᯑᯰ ᯉ ᯥᯐ, ᯉ ᯇᯉ᯲ᯑᯩ.
inang silandi susu, siganjang mise; inang nanjau, Datu sosor di bale ; inang sisiak bagi, sitorop anak , inang sitorop boru; inang nai pangelek-elek, inang nai pangapul-apul, sai elek dainang tondi ni musunami.
ᯤᯉᯰ ᯘᯪᯞᯉ᯲ᯑᯪ ᯘᯮᯘᯮ, ᯘᯪᯎᯉ᯲ᯐᯰ ᯔᯪᯘᯩ; ᯤᯉᯰ ᯉᯉ᯲ᯐᯥ ᯑᯖᯮ ᯘᯬᯘᯒᯬ᯲ ᯑᯪ ᯅᯞᯩ; ᯤᯉᯰ ᯘᯪᯘᯪᯀᯄ᯦᯲ ᯅᯎᯪ, ᯘᯪᯖᯬᯒᯇᯬ᯲ ᯀᯉᯄ᯦᯲ ᯤᯉᯰ ᯘᯪᯖᯬᯒᯇᯬ᯲ ᯅᯬᯒᯮ; ᯤᯉᯰ ᯉᯤ ᯇᯝᯩᯞᯄᯩ᯦᯲ᯀᯩᯞᯄᯩ᯦᯲ ᯤᯉᯰ ᯉᯤ ᯇᯝᯇᯞᯮ᯲ᯀᯇᯞᯮ᯲, ᯘᯤ ᯀᯩᯞᯄᯩ᯦᯲ ᯑᯤᯉᯰ ᯖᯉᯬ᯲ᯑᯪ ᯉᯪ ᯔᯮᯘᯮᯉᯔᯪ.
Inang nai pormuruk-muruk, sai suruk dainang butuha ni Si Anu.
ᯤᯉᯰ ᯉᯤ ᯇᯒᯬ᯲ᯔᯮᯒᯄ᯦ᯮ᯲ᯔᯮᯒᯄ᯦ᯮ᯲ ᯘᯤ ᯘᯮᯒᯄ᯦ᯮ᯲ ᯑᯤᯉᯰ ᯅᯮᯖᯮᯂ ᯉᯪ ᯘᯪ ᯀᯉᯮ
Inang siganjang tali, inang simetmet dengke.
ᯤᯉᯰ ᯘᯪᯎᯉ᯲ᯐᯰ ᯖᯞᯪ, ᯤᯉᯰ ᯘᯪᯔᯖᯩ᯲ᯔᯖᯩ᯲ ᯑᯩ᯦ᯄᯩ᯦
Inang pangambe na uli, pordalan sigale-gale Sipahu na mira, di ruma ni porsirangan.
ᯤᯉᯰ ᯇᯝᯔ᯲ᯅᯩ ᯉ ᯥᯞᯪ, ᯇᯒᯬ᯲ᯑᯞᯉ᯲ ᯘᯪᯎᯞᯩᯎᯞᯩ ᯘᯪᯇᯂᯮ ᯉ ᯔᯪᯒ, ᯑᯪ ᯒᯮᯔ ᯉᯪ ᯇᯒᯬ᯲ᯘᯪᯒᯝᯉ᯲.
Moranjak ma i musungki soada musu, siar-siaran soada gondang.
ᯔᯬᯒᯉ᯲ᯐᯄ᯦᯲ ᯔ ᯤ ᯔᯮᯘᯮᯰᯄ᯦ᯪ ᯘᯬᯀᯑ ᯔᯮᯘᯮ, ᯘᯪᯀᯒ᯲ᯘᯪᯀᯒᯉ᯲ ᯘᯬᯀᯑ ᯎᯉᯬ᯲ᯑᯰ
Sai topot ma i ompung Si Ajimamis, ganup-ganup banjar, tingkir ganup suhi-suhi.
ᯘᯤ ᯖᯬᯇᯖᯬ᯲ ᯔ ᯤ ᯀᯔᯬ᯲ᯇᯮᯰ ᯘᯪ ᯀᯐᯪᯔᯔᯘᯪ᯲ ᯎᯉᯇᯮ᯲ᯎᯉᯇᯮ᯲ ᯅᯉ᯲ᯐᯒ᯲, ᯖᯪᯰᯄ᯦ᯒᯪ᯲ ᯎᯉᯇᯮ᯲ ᯘᯮᯂᯪᯘᯮᯂᯪ.
Sai patais ma pangambem, pagogo soaram, patuduhon ma dirim, pataridahon ma rupam, dok ma goarmu.
ᯘᯤ ᯇᯖᯀᯘᯪ᯲ ᯔ ᯇᯝᯔ᯲ᯅᯔᯩ᯲, ᯇᯎᯬᯎᯬ ᯘᯬᯀᯒᯔ᯲, ᯇᯖᯮᯑᯮᯂᯉᯬ᯲ ᯔ ᯑᯪᯒᯔᯪ᯲, ᯇᯖᯒᯪᯑᯂᯉᯬ᯲ ᯔ ᯒᯮᯇᯔ᯲, ᯑᯄ᯦ᯬ᯲ ᯔ ᯎᯬᯀᯒ᯲ᯔᯮ
Jou ma morharungguan musungki.
ᯐᯬᯥ ᯔ ᯔᯒᯬ᯲ᯂᯒᯮᯰᯎᯮᯀᯉ᯲ ᯔᯮᯘᯮᯰᯄ᯦ᯪ.
inang na laga manongos, na so ra panongosan ; inang na laga mangido, na sora pangidoan, sai pangido nama jolo tondi ni musu an.
ᯤᯉᯰ ᯉ ᯞᯎ ᯔᯉᯬᯝᯘᯬ᯲, ᯉ ᯘᯬ ᯒ ᯇᯉᯬᯝᯬᯘᯉ᯲; ᯤᯉᯰ ᯉ ᯞᯎ ᯔᯝᯪᯑᯬ, ᯉ ᯘᯬᯒ ᯇᯝᯪᯑᯬᯀᯉ᯲, ᯘᯤ ᯇᯝᯪᯑᯬ ᯉᯔ ᯐᯬᯞᯬ ᯖᯉᯬ᯲ᯑᯪ ᯉᯪ ᯔᯮᯘᯮ ᯀᯉ᯲.
Jadihon ma i guntur-gunturon, bahen ma i gaja-gajaon.
ᯐᯑᯪᯂᯉᯬ᯲ ᯔ ᯤ ᯎᯉᯮ᯲ᯖᯒᯮ᯲ᯎᯉᯮ᯲ᯖᯮᯒᯉᯬ᯲, ᯅᯂᯉᯩ᯲ ᯔ ᯤ ᯎᯐᯎᯐᯀᯉᯬ᯲.
Sai mangaloting ma hamu di pogu ni alaman, na jumadihon api na morjimbur-jimbur ma hamu ale ompung, pangulima di jau, soripada di Toba, di huta ni musunami an.
ᯘᯤ ᯔᯝᯞᯬᯖᯪᯰ ᯔ ᯂᯔᯮ ᯑᯪ ᯇᯬᯎᯮ ᯉᯪ ᯀᯞᯔᯉ᯲, ᯉ ᯐᯮᯔᯑᯪᯂᯉᯬ᯲ ᯀᯇᯪ ᯉ ᯔᯒᯬ᯲ᯐᯔᯪ᯲ᯅᯒᯮ᯲ᯐᯔᯪ᯲ᯅᯒᯮ᯲ ᯔ ᯂᯔᯮ ᯀᯞᯩ ᯀᯔᯬ᯲ᯇᯮᯰ ᯇᯝᯮᯞᯪᯔ ᯑᯪᯐᯥ, ᯘᯬᯒᯪᯇᯑ ᯑᯪ ᯖᯬᯅ, ᯑᯪ ᯂᯮᯖ ᯉᯪ ᯔᯮᯘᯮᯉᯔᯪ ᯀᯉᯬ᯲
Ba morhara ma hamu di orang-orang ni begu, gigilandak na beguon, mombangboru na begu on, tu huta ni musu an.
ᯅ ᯔᯒᯬ᯲ᯂᯒ ᯔ ᯂᯔᯮ ᯑᯪ ᯀᯬᯒᯰᯀᯬᯒᯰ ᯉᯪ ᯅᯩᯎᯮ, ᯎᯪᯎᯪᯞᯉ᯲ᯑᯄ᯦᯲ ᯉ ᯅᯩᯎᯮᯀᯉᯬ᯲, ᯔᯔᯬ᯲ᯅᯰᯅᯬᯒᯮ ᯉ ᯅᯩᯎᯮ ᯀᯉᯬ᯲, ᯖᯮ ᯂᯮᯖ ᯉᯪ ᯔᯮᯘᯮ ᯀᯉ᯲
Inang boru munti, boru inunti na . harom, sai harom bahen babina i, harom bahen manukna i.
ᯤᯉᯰ ᯅᯬᯒᯮ ᯔᯉᯮ᯲ᯖᯪ, ᯅᯬᯒᯮ ᯤᯉᯉᯮ᯲ᯖᯪ ᯉ ᯂᯒᯔᯬ᯲, ᯘᯤ ᯂᯒᯬᯔ᯲ ᯅᯂᯉᯩ᯲ ᯅᯅᯪᯉ ᯤ, ᯂᯒᯔᯬ᯲ ᯅᯂᯉᯩ᯲ ᯔᯉᯂᯮ᯲ᯉ ᯤ.
Asa morhara muse ma hamu di begu ni na mate lalaen, asa tubu na masitihaman di huta i.
ᯀᯘ ᯔᯒᯬ᯲ᯂᯒ ᯔᯮᯘᯩ ᯔ ᯂᯔᯮ ᯑᯪ ᯅᯩᯎᯮ ᯉᯪ ᯉ ᯔᯖᯩ ᯞᯞᯀᯉᯩ᯲ ᯀᯘ ᯖᯮᯅᯮ ᯉ ᯔᯘᯪᯖᯪᯂᯔᯉ᯲ ᯑᯪ ᯂᯮᯖ ᯤ.
Morhara muse ma hamu di begu ni na mate mandolos, asa mate masidolosan di huta ni musu i.
ᯔᯒᯬ᯲ᯂᯒ ᯔᯮᯘᯩ ᯔ ᯂᯔᯮ ᯑᯪ ᯅᯩᯎᯮ ᯉᯪ ᯉ ᯔᯖᯩ ᯔᯉ᯲ᯑᯬᯞᯘᯬ᯲, ᯀᯘ ᯔᯖᯩ ᯔᯘᯪᯑᯬᯞᯬᯘᯉ᯲ ᯑᯪ ᯂᯮᯖ ᯉᯪ ᯔᯮᯘᯮ ᯤ.
Arahon muse begu ni na mate sumalin, asa masa na mate sumalin di huta i.
ᯀᯒᯂᯉᯬ᯲ ᯔᯮᯘᯩ ᯅᯩᯎᯮ ᯉᯪ ᯉ ᯔᯖᯩ ᯘᯮᯔᯞᯉᯪ᯲, ᯀᯘ ᯔᯘ ᯉ ᯔᯖᯩ ᯘᯮᯔᯞᯉᯪ᯲ ᯑᯪ ᯂᯮᯖ ᯤ.
Arahon begu ni na mate maningkot, asa masa na mate santongkin di huta i.
ᯀᯒᯂᯉᯬ᯲ ᯅᯩᯎᯮ ᯉᯪ ᯉ ᯔᯖᯩ ᯔᯉᯪᯰᯄ᯦ᯖᯬ᯲, ᯀᯘ ᯔᯘ ᯉ ᯔᯖᯩ ᯘᯖᯬᯰᯄ᯦ᯉᯪ᯲ ᯑᯪ ᯂᯮᯖ ᯤ.
Angkat podas darimata ni ari, angkat podas darimata ni bulan.
ᯀᯰᯄ᯦ᯖ᯲ ᯇᯬᯑᯘ᯲ ᯑᯒᯪᯔᯖ ᯉᯪ ᯀᯒᯪ, ᯀᯰᯄ᯦ᯖ᯲ ᯇᯬᯑᯘ᯲ ᯑᯒᯪᯔᯖ ᯉᯪ ᯅᯮᯞᯉ᯲.
Sai ihutihuti, ale Ajimamis; sai tunggu-tunggu, rumpak bulung tobu, mate panumpak, mate panogu, na hona tipu nan taue ; mate panande, mate na sinande.
ᯘᯤ ᯤᯂᯮᯖᯪᯂᯮᯖᯪ, ᯀᯞᯩ ᯀᯐᯪᯔᯔᯘᯪ᯲; ᯘᯤ ᯖᯮᯰᯎᯮᯖᯮᯰᯎᯮ, ᯒᯔᯮ᯲ᯇᯄ᯦᯲ ᯅᯮᯞᯮᯰ ᯖᯬᯅᯮ, ᯔᯖᯩ ᯇᯉᯔᯮ᯲ᯇᯄ᯦᯲, ᯔᯖᯩ ᯇᯉᯬᯎᯮ, ᯉ ᯂᯬᯉ ᯖᯪᯇᯮ ᯉᯉ᯲ᯖᯥᯀᯩ; ᯔᯖᯩ ᯇᯉᯉ᯲ᯑᯩ, ᯔᯖᯩ ᯉ ᯘᯪᯉᯉ᯲ᯑᯩ
Na di balik ni dolok sai ihut-ihut; na di bariba ni aek manang tao, sai langei!
ᯉ ᯑᯪ ᯅᯞᯄ᯦ᯪ᯲ ᯉᯪ ᯑᯬᯞᯄ᯦ᯬ᯲ ᯘᯤ ᯤᯂᯖᯮ᯲ᯤᯂᯖᯮ᯲; ᯉ ᯑᯪ ᯅᯒᯪᯅ ᯉᯪ ᯀᯀᯄᯩ᯦᯲ ᯔᯉᯰ ᯖᯀᯬ, ᯘᯤ ᯞᯝᯩᯤ!
Borhat ma ho, ompung, mata ni ari na so ra dua, dohot ho mata ni bulan, na so jadi morimbang.
ᯅᯒᯬ᯲ᯂᯖ᯲ ᯔ ᯂᯬ, ᯀᯔᯬ᯲ᯇᯮᯰ, ᯔᯖ ᯉᯪ ᯀᯒᯪ ᯉ ᯘᯬ ᯒ ᯑᯮᯀ, ᯑᯬᯂᯖᯬ᯲ ᯂᯬ ᯔᯖ ᯉᯪ ᯅᯮᯞᯉ᯲, ᯉ ᯘᯬ ᯐᯑᯪ ᯔᯬᯒᯔᯪ᯲ᯅᯰ.
Hau i didege ho, hau i lagi maponggol; tano pe didege ho, tano i lagi malonglong.
ᯂᯥ ᯤ ᯑᯪᯑᯩᯎᯩ ᯂᯬ, ᯂᯥ ᯤ ᯞᯎᯪ ᯔᯇᯬᯰᯎᯞᯬ᯲; ᯖᯉᯬ ᯇᯩ ᯑᯪᯑᯩᯎᯩ ᯂᯬ, ᯖᯉᯬ ᯤ ᯞᯎᯪ ᯔᯞᯬᯰᯞᯬᯰ
Batu pe didege ho, batu i lagi matapor; dolok i didege ho, dolok i lagi matorban; huta ni musungki disuruk ho, lagi i matutung.
ᯅᯖᯮ ᯇᯩ ᯑᯪᯑᯩᯎᯩ ᯂᯬ, ᯅᯖᯮ ᯤ ᯞᯎᯪ ᯔᯖᯇᯒᯬ᯲; ᯑᯬᯞᯄ᯦ᯬ᯲ ᯤ ᯑᯪᯑᯩᯎᯩ ᯂᯬ, ᯑᯬᯞᯄ᯦ᯬ᯲ ᯤ ᯞᯎᯪ ᯔᯖᯒᯬ᯲ᯅᯉ᯲; ᯂᯮᯖ ᯉᯪ ᯔᯮᯘᯮᯰᯄ᯦ᯪ ᯑᯪᯘᯮᯒᯄ᯦ᯮ᯲ ᯂᯬ, ᯞᯎᯪ ᯤ ᯔᯖᯮᯖᯮᯰ
Disi ma unggas, disi ma andalu; ba gira ma i musungki bungkas, hatop ma i mabalu.
ᯑᯪᯘᯪ ᯔ ᯀᯮᯰᯎᯘ᯲, ᯑᯪᯘᯪ ᯔ ᯀᯉ᯲ᯑᯞᯮ; ᯅ ᯎᯪᯒ ᯔ ᯤ ᯔᯮᯘᯮᯰᯄ᯦ᯪ ᯅᯮᯰᯄ᯦ᯘ᯲, ᯂᯖᯇᯬ᯲ ᯔ ᯤ ᯔᯅᯞᯮ.
"Ale ni ale, ale ni botohonku, amang sitabunangnang, laengku ma na begu, ibotongku ma ulubalang", ninna.
"ᯀᯞᯩ ᯉᯪ ᯀᯞᯩ, ᯀᯞᯩ ᯉᯪ ᯅᯬᯖᯬᯂᯉᯬ᯲ᯄ᯦ᯮ, ᯀᯔᯰ ᯘᯪᯖᯅᯮᯉᯰᯉᯰ, ᯞᯀᯰᯩᯄ᯦ᯮ ᯔ ᯉ ᯅᯩᯎᯮ, ᯤᯅᯬᯖᯬᯰᯄ᯦ᯮ ᯔ ᯥᯞᯮᯅᯞᯰ", ᯉᯉᯪ᯲ᯉ.
Alai di na laho paborhathon i, nunga peak hian disi angka ambu-ambuan di atas ni anduri, i ma sagu-sagu, santi-santi dohot na asing.
ᯀᯞᯤ ᯑᯪ ᯉ ᯞᯂᯬ ᯇᯅᯒᯬ᯲ᯂᯖ᯲ᯂᯉᯬ᯲ ᯤ, ᯉᯮᯝ ᯇᯩᯀᯄ᯦᯲ ᯂᯪᯀᯉ᯲ ᯑᯪᯘᯪ ᯀᯰᯄ᯦ ᯀᯔ᯲ᯅᯮᯀᯔ᯲ᯅᯮᯀᯉ᯲ ᯑᯪ ᯀᯖᯘ᯲ ᯉᯪ ᯀᯉ᯲ᯑᯮᯒᯪ, ᯤ ᯔ ᯘᯎᯮᯘᯎᯮ, ᯘᯉ᯲ᯖᯪᯘᯉ᯲ᯖᯪ ᯑᯬᯂᯖᯬ᯲ ᯉ ᯀᯘᯪᯰ.
Ingkon rade hian dope disi dohot porhohas ni pangulu balang i, i ma.
ᯀᯪᯰᯄ᯦ᯉᯬ᯲ ᯒᯑᯩ ᯂᯪᯀᯉ᯲ ᯑᯬᯇᯩ ᯑᯪᯘᯪ ᯑᯬᯂᯖᯬ᯲ ᯇᯒᯬ᯲ᯂᯬᯂᯘ᯲ ᯉᯪ ᯇᯝᯮᯞᯮ ᯅᯞᯰ ᯤ, ᯤ ᯔ.
1. Porbasbasna, i ma lili tunggal, na nirompu, disolothon sait ni aili dingkan bonana.
ᯇᯒᯬ᯲ᯅᯘ᯲ᯅᯘ᯲ᯉ, ᯤ ᯔ ᯞᯪᯞᯪ ᯖᯮᯰᯎᯞ᯲, ᯉ ᯉᯪᯒᯔᯬ᯲ᯇᯮ, ᯑᯪᯘᯬᯞᯖᯬ᯲ᯂᯉᯬ᯲ ᯘᯀᯖᯪ᯲ ᯉᯪ ᯀᯤᯞᯪ ᯑᯪᯰᯄ᯦ᯉ᯲ ᯅᯬᯉᯉ.
2. Rautna, · dua kibung, i ma hau andulpak dipauli suman tu raut.
ᯒᯀᯖᯮ᯲ᯉ,· ᯑᯮᯀ ᯂᯪᯅᯮᯰ, ᯤ ᯔ ᯂᯥ ᯀᯉ᯲ᯑᯞᯮ᯲ᯇᯄ᯦᯲ ᯑᯪᯇᯥᯞᯪ ᯘᯮᯔᯉ᯲ ᯖᯮ ᯒᯀᯖᯮ᯲
3. Sibudokna, i ma suman-suman ni biang, tolu kibung i digana.
ᯘᯪᯅᯮᯑᯄ᯦᯲ᯉ, ᯤ ᯔ ᯘᯮᯔᯉ᯲ᯘᯮᯔᯉ᯲ ᯉᯪ ᯅᯪᯀᯰ, ᯖᯬᯞᯮ ᯄ᯦ᯪᯅᯮᯰ ᯤ ᯑᯪᯎᯉ.
4. Tungkotna, i ma tunggal panaluan. Disulangi ma i dohot sagu-sagu i, dohot pinadar dohot dengke niura. ingkon ris do i sulanganna gombaran na di tunggal panaluan i sian ginjang tu toru, ia dung sun i disulangi, ditabashon ma tabas tu tunggal panaluan, songon naung sinurathon i di jolo (Ida alaman 51 ).
ᯖᯮᯰᯄ᯦ᯖᯬ᯲ᯉ, ᯤ ᯔ ᯖᯮᯰᯎᯞ᯲ ᯇᯉᯞᯮᯀᯉ᯲. ᯑᯪᯘᯮᯞᯝᯪ ᯔ ᯤ ᯑᯬᯂᯖᯬ᯲ ᯘᯎᯮᯘᯎᯮ ᯤ, ᯑᯬᯂᯖᯬ᯲ ᯇᯪᯉᯑᯒ᯲ ᯑᯬᯂᯖᯬ᯲ ᯑᯰᯩᯄᯩ᯦ ᯉᯪᯥᯒ. ᯀᯪᯰᯄ᯦ᯉᯬ᯲ ᯒᯘᯪ᯲ ᯑᯬ ᯤ ᯘᯮᯞᯝᯉ᯲ᯉ ᯎᯔᯬ᯲ᯅᯒᯉ᯲ ᯉ ᯑᯪ ᯖᯮᯰᯎᯞ᯲ ᯇᯉᯞᯮᯀᯉ᯲ ᯤ ᯘᯪᯀᯉ᯲ ᯎᯉᯪ᯲ᯐᯰ ᯖᯮ ᯖᯬᯒᯮ, ᯤᯀ ᯑᯮᯰ ᯘᯉᯮ᯲ ᯤ ᯑᯪᯘᯮᯞᯝᯪ, ᯑᯪᯖᯅᯘ᯲ᯂᯉᯬ᯲ ᯔ ᯖᯅᯘ᯲ ᯖᯮ ᯖᯮᯰᯎᯞ᯲ ᯇᯉᯞᯮᯀᯉ᯲, ᯘᯬᯝᯉᯬ᯲ ᯉᯀᯮᯰ ᯘᯪᯉᯮᯒᯖ᯲ᯂᯉᯬ᯲ ᯤ ᯑᯪᯐᯬᯞᯬ (ᯀᯪᯑ ᯀᯞᯔᯉ᯲51)
Godang dope angka pangulubalang, sipaborhaton ni na mameopsa mangagohon na hinasogohon ni rohana. Sai rap dohot tunggal panaluan i ma i dibahen laho paborhathonsa jala atar songon naung pinaboa di ginjang i ma pangulahonna disi.
ᯎᯬᯑᯰ ᯑᯬᯇᯩ ᯀᯰᯄ᯦ ᯇᯝᯮᯞᯮᯅᯞᯰ, ᯘᯪᯇᯅᯒᯬ᯲ᯂᯖᯉᯬ᯲ ᯉᯪ ᯉ ᯔᯔᯩᯀᯇᯬ᯲ᯘ ᯔᯝᯎᯬᯂᯉᯬ᯲ ᯉ ᯂᯪᯉᯘᯬᯎᯬᯂᯉᯬ᯲ ᯉᯪ ᯒᯬᯂᯉ. ᯘᯤ ᯒᯇ᯲ ᯑᯬᯂᯖᯬ᯲ ᯖᯮᯰᯎᯞ᯲ ᯇᯉᯞᯮᯀᯉ᯲ ᯤ ᯔ ᯤ ᯑᯪᯅᯂᯉᯩ᯲ ᯞᯂᯬ ᯇᯅᯒᯬ᯲ᯂᯖ᯲ᯂᯉᯬ᯲ᯘ ᯐᯞ ᯀᯖᯒ᯲ ᯘᯬᯝᯉᯬ᯲ ᯉᯀᯮᯰ ᯇᯪᯉᯅᯬᯀ ᯑᯪ ᯎᯉᯪ᯲ᯐᯰ ᯤ ᯔ ᯇᯝᯮᯞᯂᯉᯬ᯲ᯉ ᯑᯪᯘᯪ.
Ragam pangulubalang i, ba, ragam do nang pangonaina tu halak na niagona. Ginoaran ma deba dison dohot pangonaina tu na magona.
ᯒᯎᯔ᯲ ᯇᯝᯮᯞᯮᯅᯞᯰ ᯤ, ᯅ ᯒᯎᯔ᯲ ᯑᯬ ᯉᯰ ᯇᯝᯬᯉᯤᯉ ᯖᯮ ᯂᯞᯄ᯦᯲ ᯉ ᯉᯪᯀᯎᯬᯉ. ᯎᯪᯉᯬᯀᯒᯉ᯲ ᯔ ᯑᯩᯅ ᯑᯪᯘᯉᯬ᯲ ᯑᯬᯂᯖᯬ᯲ ᯇᯝᯬᯉᯤᯉ ᯖᯮ ᯉ ᯔᯎᯬᯉ.
1. Pangulubalang Sipubonggare, i ma sipaintop hosa ni ' . halak morsasaompu, asa unang adong, ninna, tinggal nanggo sada.
ᯇᯝᯮᯞᯮᯅᯞᯰ ᯘᯪᯇᯮᯅᯬᯰᯎᯒᯩ, ᯤ ᯔ ᯘᯪᯇᯀᯉᯪ᯲ᯖᯇᯬ᯲ ᯂᯬᯘ ᯉᯪ ᯂᯞᯄ᯦᯲ ᯔᯒᯬ᯲ᯘᯘᯀᯔᯬ᯲ᯇᯮ, ᯀᯘ ᯥᯉᯰ ᯀᯑᯬᯰ, ᯉᯉᯪ᯲ᯉ, ᯖᯪᯰᯎᯞ᯲ ᯉᯰᯎᯬ ᯘᯑ.
2 . Pangulubalang Nagara di langit, suratna sampulusia, i ma sibuat na mangkuling, sitangko manuk sada, sian huta ni musuna.
ᯇᯝᯮᯞᯮᯅᯞᯰ ᯉᯎᯒ ᯑᯪ ᯞᯝᯖᯪ᯲, ᯘᯮᯒᯖ᯲ᯉ ᯘᯔ᯲ᯇᯮᯞᯮᯘᯪᯀ, ᯤ ᯔ ᯘᯪᯅᯮᯀᯖ᯲ ᯉ ᯔᯰᯄ᯦ᯮᯞᯪᯰ, ᯘᯪᯖᯰᯄ᯦ᯬ ᯔᯉᯄ᯦ᯮ᯲ ᯘᯑ, ᯘᯪᯀᯉ᯲ ᯂᯮᯖ ᯉᯪ ᯔᯮᯘᯮᯉ.
3. Pangulubalang Sibatu nanggar, i ma ninna, panegai di sandok pangisi · ni huta ni musu, asa tung mate morsingkor, patulangaon dohot ranggeongon.
ᯇᯝᯮᯞᯮᯅᯞᯰ ᯘᯪᯅᯖᯮ ᯉᯰᯎᯒ᯲, ᯤ ᯔ ᯉᯉᯪ᯲ᯉ, ᯇᯉᯩᯎᯤ ᯑᯪ ᯘᯉ᯲ᯑᯄ᯦ᯬ᯲ ᯇᯝᯪᯘᯪ ᯉᯪ ᯂᯮᯖ ᯉᯪ ᯔᯮᯘᯮ, ᯀᯘ ᯖᯮᯰ ᯔᯖᯩ ᯔᯒᯬ᯲ᯘᯪᯰᯄ᯦ᯒᯬ᯲, ᯇᯖᯮᯞᯝᯀᯉᯬ᯲ ᯑᯬᯂᯖᯬ᯲ ᯒᯰᯎᯩᯀᯬᯝᯉᯬ᯲
4. Pangulubalang Sibatuloting, i ma siantuk na jugul di huta ni musu, sipangaleok, sigarut timpul, siboru porjanjian.
ᯇᯝᯮᯞᯮᯅᯞᯰ ᯘᯪᯅᯖᯮᯞᯬᯖᯪᯰ, ᯤ ᯔ ᯘᯪᯀᯉ᯲ᯖᯄ᯦ᯮ᯲ ᯉ ᯐᯮᯎᯞᯮ᯲ ᯑᯪ ᯂᯮᯖ ᯉᯪ ᯔᯮᯘᯮ, ᯘᯪᯇᯝᯞᯩᯀᯄ᯦ᯬ᯲, ᯘᯪᯎᯒᯖᯮ᯲ ᯖᯔᯪ᯲ᯇᯞᯮ᯲, ᯘᯪᯅᯬᯒᯮ ᯇᯒᯬ᯲ᯐᯉ᯲ᯐᯪᯀᯉ᯲.
5. Pangulubalang Sigantungrangin, i ma dibahen datu manggantungkon gora, asa unang saut tahi ni musu ; i do dibahen manggantungkon utang ni porutang, unang saut ro portunggu, unang saut digarar.
ᯇᯝᯮᯞᯮᯅᯞᯰ ᯘᯪᯎᯉ᯲ᯖᯮᯰᯒᯝᯉᯪ᯲, ᯤ ᯔ ᯑᯪᯅᯂᯉᯩ᯲ ᯑᯖᯮ ᯔᯰᯎᯉ᯲ᯖᯮᯰᯄ᯦ᯉᯬ᯲ ᯎᯬᯒ, ᯀᯘ ᯥᯉᯰ ᯘᯀᯖᯮ᯲ ᯖᯂᯪ ᯉᯪ ᯔᯮᯘᯮ; ᯤ ᯑᯬ ᯑᯪᯅᯂᯉᯩ᯲ ᯔᯰᯎᯉ᯲ᯖᯮᯰᯄ᯦ᯉᯬ᯲ ᯥᯖᯰ ᯉᯪ ᯇᯬᯒᯮᯖᯰ, ᯥᯉᯰ ᯘᯀᯖᯮ᯲ ᯒᯬ ᯇᯒᯬ᯲ᯖᯮᯰᯎᯮ ᯥᯉᯰ ᯘᯀᯖᯮ᯲ ᯑᯪᯎᯒᯒ᯲.
6. Pangulubalang Pangihutihut, i ma dibahen mangalului ugasan mago, molo so adong be na olo morhatohon dohot napaboahon, atik pe sai mulak-ulak na uso-uso.
ᯇᯝᯮᯞᯮᯅᯞᯰ ᯇᯝᯪᯂᯖᯮ᯲ᯤᯂᯖᯮ᯲, ᯤ ᯔ ᯑᯪᯅᯂᯉᯩ᯲ ᯔᯝᯞᯮᯞᯮᯤ ᯥᯎᯘᯉ᯲ ᯔᯎᯬ, ᯔᯬᯞᯬ ᯘᯬᯀᯑᯬᯰ ᯅᯩ ᯉ ᯀᯬᯞᯬ ᯔᯒᯬ᯲ᯂᯖᯬᯂᯉᯬ᯲ ᯑᯬᯂᯖᯬ᯲ ᯉ ᯇᯅᯬᯀᯂᯉᯬ᯲, ᯀᯖᯄ᯦ᯪ᯲ ᯇᯩ ᯘᯤ ᯔᯮᯞᯄ᯦᯲ᯥᯞᯄ᯦᯲ ᯉ ᯥᯘᯬᯥᯘᯬ.
Alai dung pe sungkot usu-usu dohot sungkun-sungkun, asa jadi paborhaton pangulu balang pangihut-ihut, asa mangonai i tu sitangko ugasan i.
ᯀᯞᯤ ᯑᯮᯰ ᯇᯩ ᯘᯮᯰᯄ᯦ᯖᯬ᯲ ᯥᯘᯮᯀᯮᯘᯮ ᯑᯬᯂᯖᯬ᯲ ᯘᯮᯰᯄ᯦ᯉᯮ᯲ᯘᯮᯰᯄ᯦ᯉᯮ᯲ ᯀᯘ ᯐᯑᯪ ᯇᯅᯒᯬ᯲ᯂᯖᯉᯬ᯲ ᯇᯝᯮᯞᯮᯅᯞᯰ ᯇᯝᯪᯂᯖᯮ᯲ᯤᯂᯖᯮ᯲, ᯀᯘ ᯔᯝᯬᯉᯤ ᯤ ᯖᯮ ᯘᯪᯖᯰᯄ᯦ᯬ ᯥᯎᯘᯉ᯲ ᯤ.
Ala pangago do pangulubalang ni musu tu iba, ala ni ingkon jagaon do i, tamparon, asa unang mangonai. Ganup halak na maralo i, dibahen be do pangulubalangna, sisuruonna mangago musuna.
ᯀᯞ ᯇᯝᯎᯬ ᯑᯬ ᯇᯝᯮᯞᯮᯅᯞᯰ ᯉᯪ ᯔᯮᯘᯮ ᯖᯮ ᯤᯅ, ᯀᯞ ᯉᯪ ᯀᯪᯰᯄ᯦ᯉᯬ᯲ ᯐᯎᯀᯉᯬ᯲ ᯑᯬ ᯤ, ᯖᯔ᯲ᯇᯒᯉᯬ᯲, ᯀᯘ ᯥᯉᯰ ᯔᯝᯬᯉᯤ ᯎᯉᯇᯮ᯲ ᯂᯞᯄ᯦᯲ ᯉ ᯔᯒᯞᯬ ᯤ, ᯑᯪᯅᯂᯉᯩ᯲ ᯅᯩ ᯑᯬ ᯇᯝᯮᯞᯮᯅᯞᯰᯉ, ᯘᯪᯘᯮᯒᯮᯀᯉᯬ᯲ᯉ ᯔᯝᯎᯬ ᯔᯮᯘᯮᯉ
Alai nang manulak pangulubalang ni musu i, dibahen be do, unang belut tu nasida, i ma pagar.
ᯀᯞᯤ ᯉᯰ ᯔᯉᯮᯞᯄ᯦᯲ ᯇᯝᯮᯞᯮᯅᯞᯰ ᯉᯪ ᯔᯮᯘᯮ ᯤ, ᯑᯪᯅᯂᯉᯩ᯲ ᯅᯩ ᯑᯬ, ᯥᯉᯰ ᯅᯩᯞᯖᯮ᯲ ᯖᯮ ᯉᯘᯪᯑ, ᯤ ᯔ ᯇᯎᯒ᯲.
On ma deba goar ni pagar pangurubalang i dibahen datu.
ᯀᯉᯬ᯲ ᯔ ᯑᯩᯅ ᯎᯬᯀᯒ᯲ ᯉᯪ ᯇᯎᯒ᯲ ᯇᯝᯮᯒᯮᯅᯞᯰ ᯤ ᯑᯪᯅᯂᯉᯩ᯲ ᯑᯖᯮ.
1. Pangulubalang pagar gasing, asa targasing, asa tartutup aji. manang pangulubalang ni musuna, ia tung naung dipaborhat dompak nasida.
ᯇᯝᯮᯞᯮᯅᯞᯰ ᯇᯎᯒ᯲ ᯎᯘᯪᯰ, ᯀᯘ ᯖᯒ᯲ᯎᯘᯪᯰ, ᯀᯘ ᯖᯒ᯲ᯖᯮᯖᯇᯮ᯲ ᯀᯐᯪ ᯔᯉᯰ ᯇᯝᯮᯞᯮᯅᯞᯰ ᯉᯪ ᯔᯮᯘᯮᯉ ᯤᯀ ᯖᯮᯰ ᯉᯀᯮᯰ ᯑᯪᯇᯅᯒᯬ᯲ᯂᯖ᯲ ᯑᯔᯬ᯲ᯇᯄ᯦᯲ ᯉᯘᯪᯑ.
2. Pangulubalang sitabunangnang, boru Saragi, batu do i digana, di lambung dalihan ma i dibahen ; i ma ninna, manulak bahen-bahenan ni musu, ia tung adong dibahen.
ᯇᯝᯮᯞᯮᯅᯞᯰ ᯘᯪᯖᯅᯮᯉᯰᯉᯰ, ᯅᯬᯒᯮ ᯘᯒᯎᯪ, ᯅᯖᯮ ᯑᯬ ᯤ ᯑᯪᯎᯉ, ᯑᯪ ᯞᯔ᯲ᯅᯮᯰ ᯑᯞᯪᯂᯉ᯲ ᯔ ᯤ ᯑᯪᯅᯂᯉᯩ᯲; ᯤ ᯔ ᯉᯉᯪ᯲ᯉ, ᯔᯉᯮᯞᯄ᯦᯲ ᯅᯂᯉᯩ᯲ᯅᯂᯩᯉᯉ᯲ ᯉᯪ ᯔᯮᯘᯮ, ᯤᯀ ᯖᯮᯰ ᯀᯑᯬᯰ ᯑᯪᯅᯂᯉᯩ᯲.
3. Pangulubalang sipatulpak; i ma manulpak aji ni begu, aji ni halak. Sitau-tau do ninna, anggo pangulubalang sipatulpak i: tau do i pagar, asa unang margo aji ni musu; alai boi do i huhut bahen pangulubalang panongtongi, mangago huta ni musuna dohot hosa ni sandok alona.
ᯇᯝᯮᯞᯮᯅᯞᯰ ᯘᯪᯇᯖᯞᯮ᯲ᯇᯄ᯦᯲; ᯤ ᯔ ᯔᯉᯞᯮ᯲ᯇᯄ᯦᯲ ᯀᯐᯪ ᯉᯪ ᯅᯩᯎᯮ, ᯀᯐᯪ ᯉᯪ ᯂᯞᯄ᯦᯲ ᯘᯪᯖᯥᯖᯥ ᯑᯬ ᯉᯉᯪ᯲ᯉ, ᯀᯰᯎᯬ ᯇᯝᯮᯞᯮᯅᯞᯰ ᯘᯪᯇᯖᯞᯮ᯲ᯇᯄ᯦᯲ ᯤ: ᯖᯥ ᯑᯬ ᯤ ᯇᯎᯒ᯲, ᯀᯘ ᯥᯉᯰ ᯔᯒ᯲ᯎᯬ ᯀᯐᯪ ᯉᯪ ᯔᯮᯘᯮ; ᯀᯞᯤ ᯅᯬᯤ ᯑᯬ ᯤ ᯂᯮᯂᯖᯮ᯲ ᯅᯂᯉᯩ᯲ ᯇᯝᯮᯞᯮᯅᯞᯰ ᯇᯉᯬᯰᯖᯬᯝᯪ, ᯔᯝᯎᯬ ᯂᯮᯖ ᯉᯪ ᯔᯮᯘᯮᯉ ᯑᯬᯂᯖᯬ᯲ ᯂᯬᯘ ᯉᯪ ᯘᯉ᯲ᯑᯄ᯦ᯬ᯲ ᯀᯞᯬᯉ
Mansai godang dope ragam ni pangulubalang, suang songon i alona pagar pangulubalang; alai mangulahon angka i, sai ihut do tusi tunggal panaluan dipangke.
ᯔᯉ᯲ᯘᯤ ᯎᯬᯑᯰ ᯑᯬᯇᯩ ᯒᯎᯔ᯲ ᯉᯪ ᯇᯝᯮᯞᯮᯅᯞᯰ, ᯘᯮᯀᯰ ᯘᯬᯝᯉᯬ᯲ ᯤ ᯀᯞᯬᯉ ᯇᯎᯒ᯲ ᯇᯝᯮᯞᯮᯅᯞᯰ; ᯀᯞᯤ ᯔᯝᯮᯞᯂᯉᯬ᯲ ᯀᯰᯄ᯦ ᯤ, ᯘᯤ ᯤᯂᯖᯮ᯲ ᯑᯬ ᯖᯮᯘᯪ ᯖᯮᯰᯎᯞ᯲ ᯇᯉᯞᯮᯀᯉ᯲ ᯑᯪᯇᯰᯄᯩ᯦.
Jolo disulangi do i dohot sulang-sulangna, dung i ditabashon datu ma tabas tusi, hombar tu siulaonna i, mangago musu manang mangkorasi iba dohot dongan.
ᯐᯬᯞᯬ ᯑᯪᯘᯮᯞᯝᯪ ᯑᯬ ᯤ ᯑᯬᯂᯖᯬ᯲ ᯘᯮᯞᯰᯘᯮᯞᯰᯉ, ᯑᯮᯰ ᯤ ᯑᯪᯖᯅᯘ᯲ᯂᯉᯬ᯲ ᯑᯖᯮ ᯔ ᯖᯅᯘ᯲ ᯖᯮᯘᯪ, ᯂᯔᯬ᯲ᯅᯒ᯲ ᯖᯮ ᯘᯪᯥᯞᯀᯉᯬ᯲ᯉ ᯤ, ᯔᯝᯎᯬ ᯔᯮᯘᯮ ᯔᯉᯰ ᯔᯰᯂᯬᯒᯘᯪ ᯤᯅ ᯑᯬᯂᯖᯬ᯲ ᯑᯬᯝᯉ᯲.
Asa songon i ma ninna barita, rangsa ni Si Aji Donda Hatahutan, mula ni tunggal panaluan, ale amang panjaha!
Botima
ᯀᯘ ᯘᯬᯝᯉᯬ᯲ ᯤ ᯔ ᯉᯉᯪ᯲ᯉ ᯅᯒᯪᯖ, ᯒᯰᯘ ᯉᯪ ᯘᯪ ᯀᯐᯪ ᯑᯉᯬ᯲ᯑ ᯂᯖᯂᯮᯖᯉ᯲, ᯔᯮᯞ ᯉᯪ ᯖᯮᯰᯎᯞ᯲ ᯇᯉᯞᯮᯀᯉ᯲, ᯀᯞᯩ ᯀᯔᯰ ᯇᯉ᯲ᯐᯂ!
ᯅᯬᯖᯪᯔ